Pene 116

Akapapa Anga i te au Apotetoro no Tona Akarukeanga

KUA oti te oroa akamaaraanga, e te vaira a Iesu e tana au apotetoro i te pia i runga ra. Noatu rai e kare e roa atu ana ka aere atu ei a Iesu, e manganui tana au apinga te vaira no te tuatua. Kua akapumaana atura aia ia ratou e: “Auraka e taitaia to kotou ngakau: ka akarongo i te Atua.” Inara e maata atu tei umuumuia ra. Kua kapiti atura aia: “Ka akarongo katoa mai iaku.”

“Manganui te nooanga tikai i te are o taku Metua ra,” ta Iesu i tuatua atu, “te aere nei au e akamanea i tetai ngai no kotou . . . ei reira katoa kotou, i te ngai e nooia e au ra. Kua kite kotou i te ngai taku e aere nei, kua kite oki kotou i te mataara.” Kare ra te au apotetoro i marama e te tuatua ra a Iesu no te aere anga ki te rangi, no reira kua ui atura a Toma: “E te Atu, kare matou i kite i tenana ngai taau e aere na; eaa oki matou e kite ei i te mataara?”

“Ko au te mataara, e te tuatua-mou e te ora,” ta Iesu ia i pau atu. Ae, na te arikianga anake iaia e te aruanga i te mataara o tona oraanga e raukai i tetai te tomo atu ki te are o te Metua i te rangi ra no te mea, mei ta Iesu i tuatua ra: “Kare ua e tangata e tae ki te Metua ra, mari ra ei iaku.”

Kua pati atura a Philipa kiaia: “E te Atu, ka akakite mai ia matou i te Metua, oti ra ua ra.” Te akara anga te anoano ra a Philipa kia oronga atu a Iesu i tetai akakite anga mata i te Atua, mei tei orongaia i te tuatau taito ra i te au orama kia Mose, kia Elia, e kia Isaia. Ko te tika ra i te au apotetoro ra tetai apinga meitaki roa atu i te au orama mei te reira te tu, mei ta Iesu i akakite atura: “Ko toku nei oki noo anga roa ki o kotou nei e, e kare akerai koe i kite iaku, e Philipa? ko te akara mai iaku nei, kua akara ïa i te Metua.”

No te taka meitaki to Iesu akatutu anga i te tu o tona Metua ra e ko te nooanga ma ia katoa e te akaraanga iaia, mei te mea rai e te akara tika atura i te Metua. Inara, e maata te Metua i te Tamaiti, mei ta Iesu i akatika ra e: “Te tuatua taku e karanga atu kia kotou nei, kare ïa i taku uaorai.” Te oronga katoa ra a Iesu i te meitaki o tana au apiianga e no tona Metua anake ia i te rangi ra.

Mei teaa ra te akamaroiroianga kia akarongo atu te au apotetoro ia Iesu i reira i te tuatua anga kia ratou e: “Ko te akarongo mai iaku ra, ka rave katoa aia i teianei au angaanga taku e rave nei: e maata ua atu rai tana e rave i teia”! Kare te aite anga o ta Iesu tuatua e ka maata atu ta te au pipi semeio ka rave i tana ra. Kare, mari ra ka rave ratou kia roa atu te tuatau o te angaanga tutu aere anga, e maata atu i te ngai e raveiaʼi, e e maata katoa atu oki te au tangata.

Kare rava a Iesu e akaruke ua mai i tana au pipi i tona aere anga. Kua taputou aia: “Ko ta kotou e pati ma toku ingoa, naku ïa e rave.” Pera katoa, kua karanga aia: “Naku oki e pati atu i te Metua ra, e nana e oronga mai i tetai [tauturu, NW] Akapumaana ia kotou nei e tuatau ua atu; Ko te Vaerua tuatua-mou ra.” I muri akera, i tona kake atu anga ki te rangi, kua riringi maira a Iesu i te vaerua tapu ki rungao i tana au pipi, koia tetai atu tauturu.

Te vaitata ra to Iesu akarukeanga, i tuatuaʼi aia: “E kia roaroa ake, kare ua to te ao e kite akaou mai iaku.” Ka riro a Iesu ei mea ora vaerua kare e akaraia e te tangata nei. Inara kua taputou atura a Iesu ki tana au apotetoro tiratiratu ra: “Ka akara maira kotou iaku: no te mea, e ora au, ka ora katoa oki kotou.” Ae, kare e ka mama anake a Iesu kia ratou ei kopapa tangata i muri ake i tona tuakaouanga mari ra i te tuatau ka akatuakaou ei aia ia ratou kia ora ma ia katoa i te rangi ra ei au mea ora vaerua katoa oki.

Kua tuatua atura a Iesu i te tika mama ua: “Tei iaia taku au akauenga, e kua akono aia i te reira ra, koia tei anoano mai iaku; e tei anoano mai iaku ra, ka akaperepereia mai aia e taku Metua ra; e ka akaperepere oki au iaia, e ka akakite oki au kiaia iaku uaorai.”

Ei reira te apotetoro ko Iuda, koia tei karangaia ra ko Tadaio, i tuatua mai ei: “E te Atu, eaa koe e akakite mai ei ia matou ia koe ra, e kare i to te ao?”

Kua karanga atura a Iesu: “Kia anoano mai te tangata iaku ra, ka akono ïa i taku tuatua: e ka akaperepere mai oki taku Metua iaia. . . . Ko tei kore i anoano mai iaku ra, kare ïa i akono i taku tuatua.” Kare i aite ki tana au pipi akarongo ra, kua akakore to teianei ao i ta Iesu apiianga. No reira kare aia e akakite iaia uaorai kia ratou.

I tona tuatau angaanga ei orometua i te enua nei, kua apii a Iesu i te au mea e manganui ki tana au apotetoro. Akapeea ratou e maaraʼi i te katoatoa, i te mea i te reira atianga, e maata ta ratou kare i mou ana? E mea rekareka ra, e kua taputou a Iesu e: “Na te [tauturu, NW] Akapumaana ra, na te Vaerua Tapu, ko ta te Metua e tono mai ma toku ingoa, nana e apii mai ia kotou i te au mea katoa, ka akakite akaou mai oki kia kotou i te au tuatua katoa, taku i karanga atu kia kotou na.”

Kua akapumaana akaou atura a Iesu ia ratou, i te na ko anga: “E au taku e vaio ia kotou nei, ko taku nei au taku e o atu no kotou. . . . Eiaa e taitaia to kotou ngakau.” E tika, te akaruke ra a Iesu, inara kua akataka atura aia: “Naringa kotou i anoano mai iaku, kua rekareka kotou, ko au i karanga e ka aere au ki te Metua ra: e maata oki toku Metua iaku.”

Kua poto roa to Iesu tuatau toe ia ratou ra. Kua karanga aia: “Teia au ka kore e karangaranga maata atu kia kotou: i teianei, te aere mai nei te ariki o teianei ao, kare ra ana i roto iaku nei.” Ko Satani te Tiaporo ra, koia te tutara o teianei ao, koia tei tomo ra ki roto ia Iuda e kua mou iaia. Inara kare e tu apikepike i roto ia Iesu no te ara, e raukai ia Satani i te akavare iaia kia ariu ke i te tavinianga i te Atua.

Rekarekaanga i Tetai Pirianga Vaitata

Aru mai i te oroa akamaaraanga, kua rave a Iesu i te akamaroiroianga i tana au apotetoro ma te tuatua anga ngakau ki te ngakau. Penei kua paati i te turuaipo. Kua raurau atura a Iesu: “Ka tu, ka aere ke tatou.” Inara, i mua ake ka akaruke ei ratou, kua akakeuia a Iesu e tona aroa no ratou, kua tuatua ua atu, ma te oronga i te akatutuanga akakeu.

“Ko au te vine mou, e ko taku Metua te tanu-kai,” ko tana ia i tuatua atu. Ko te Atua ko Iehova te Tanu Kai Maata, kua tanu aia i teia vine tei akatutuia i tana akatainu anga ia Iesu i te vaerua tapu i tona papetito angaia i te tuanga openga o te 29 T.N. Inara kua rave ua atu a Iesu i te akakite e te akatutu maira te vine e tere atu iaia uaorai, i te na ko anga: “E te au rara ua kore katoa i roto iaku nei, nana ïa e tipu ke atu; e te au rara ua katoa, nana ïa e tope, kia maata ua atu te ua. . . . Mei te rara kare e ua koia anake ra, kia kore e piri ki te vine ra; kare katoa kotou, kia kore e piri mai kiaku ra. Ko au te vine, kotou te au rara.”

Ia Penetekote, e 51 ra i muri akera, kua riro mai te au apotetoro e etai katoa atu ei rara no te vine ra i te riringi angaia te vaerua tapu ki rungao ia ratou ra. I te openga ka riro mai te aronga e 144,000 katoa ei rara no te vine tei akatutuia ra. Kapiti atu ma te pu o te vine katoa ra, koia a Iesu Mesia, ka riro ko ratou te vine tei akatutuia ra te ka uua mai i te ua no te Patireia o te Atua ra.

Kua akataka maira a Iesu i te taviri no te akauaanga kia ua mai: “Ko te topiri kiaku ra, e ko te topiri atu au kiaia ra, koia te ua maata: i taka ke kotou iaku ra, kare rava e mea e tika ia kotou.” Inara, me kare tetai e uua mai, e na Iesu ei, “e akarukeia ïa mei te rara ra, marō atura ïa, ko te akaputuia ra, tiria atura ïa ki roto i te ai, pou atura ïa i te ka.” I tetai pae, kua taputou maira a Iesu e: “I topiri mai kotou kiaku ra, e kia noo marie taku tuatua ki roto ia kotou na, e pati ua kotou i ta kotou e anoano ra, e e orongaia mai ïa kia kotou.”

Kua rave ua atura a Iesu i te akakite ki tana au apotetoro: “Ko te mea ïa e akakakāiaʼi taku Metua, kia maata to kotou ua anga; e riro kotou ei pipi naku i reira.” Te ua ta te Atua e umuumu maira i te au rara kia akakite ratou i te au tu mei to te Mesia rai, kia maata oki te aroa. Pera katoa, i te mea e akakitekite a Iesu i te Patireia o te Atua ra, ko te ua tei umuumuia kia kapiti katoa oki i ta ratou rave anga i te akariro anga i te tangata ei pipi mei ta Iesu i rave ra.

“Kia noo kotou ma te akaperepereia atu e au,” ko ta Iesu ia i manono atu i reira. Inara, ka akapeea tana au apotetoro i te rave anga i te reira? Kua karanga aia: “I akono kotou i taku au akauenga, e vai akaperepereia atu kotou e au.” Kua rave ua atura a Iesu i te akataka anga: “Teia taku akauenga, kia aroa kotou ia kotou uaorai, mei iaku i aroa ia kotou. Kia oronga te tangata i tona uaorai ora no tona au taunga, kare rava e tangata aroa maata atu i te reira.”

I nga ora tokoiti ua, kua akakite a Iesu i te reira aroa maata rava na te orongaanga i tona oraanga no tana au apotetoro, e pera katoa no etai atu te ka akono i te akarongo kiaia ra. Ka tau tana akatauanga kia opara i tana au pipi kia rave katoa oki i te reira tu atinga kia aroa ratou tetai i tetai. Na teia aroa e akataka ia ratou, mei ta Iesu i tuatua i mua akera: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”

I te akatakaanga i tona au oa, kua karanga a Iesu: “Ko kotou toku oa, kia akono kotou i te au tuatua katoa taku i akaue atu ia kotou na. Kare atura au e karanga kia kotou e, e tavini; kare oki te tavini i kite i ta tona pu e rave ra: kua karanga ra au kia kotou e, e oa; kua akakite oki au kia kotou i te au tuatua ravarai taku i kite i taku Metua ra.”

Mei teaa ra te pirianga oko maata tei rauka​—kia riro mai ei oa piri vaitata no Iesu! Inara e tamou ei te rekareka anga i te reira pirianga, ka tau tana au pipi “e kia uua te ua.” Kia pera ratou ra, kua karanga a Iesu e, “[kia] oronga mai te Metua kia kotou i ta kotou e pati atu ma toku nei ingoa.” E tika tikai, e tutaki meitaki te reira no te uua anga i te ua no te Patireia! I muri akaou ake i te raurau anga i te au apotetoro kia “aroa kotou ia kotou uaorai,” e kua akataka katoa atu a Iesu e ka makitakita to te ao ia ratou. Inara, kua akapumaana atura aia ia ratou: “Kia riri mai to te ao ia kotou ra, kua kite kotou e, ko au ta ratou i mainaina mai ana, ou to ratou riri ia kotou.” Kua akakite atura a Iesu kia ratou eaa to te ao i makitakitaʼi i tana au pipi, i te na ko anga: “No te mea ra, kare kotou i to teianei ao, ko au i iki ia kotou no roto i teianei ao, i riri mai ei teianei ao ia kotou.”

I te akataka ua atu anga i te tumu o teianei ao i riri ei, kua karanga atura a Iesu: “No toku nei ingoa ra e pera mai ei ratou kia kotou, no te mea kare ratou i kite iaia [te Atua ko Iehova] i tei tono mai iaku nei.” Na te au angaanga semeio a Iesu ra, i akaapa i te aronga tei riri ra kiaia, mei tana i akakite maira: “Naringa au kare i rave i rotopu ia ratou, i te angaanga rave koreia e te tangata katoa, kare ïa a ratou ara: i teianei ra, kua kite ia ratou, e kua riri mairai iaku e taku Metua katoa oki.” No reira mei ta Iesu i tuatua ra, tika atura te tuatua i tataia: “I riri ua mai ratou iaku kare e ara.”

Mei tana i rave i mua akera, kua akapumaana akaou atura a Iesu ia ratou na te taputouanga kia tuku atu i te tauturu, koia te vaerua tapu, ko te mana rave ririnui o te Atua ra. “Nana au e akakite: E e akakite katoa oki kotou.”

Etai Atu Akamaroiroi no te Takakeanga

Kua papa a Iesu e te au apotetoro no te akaruke atu i te pia i runga ra. “I akakite atu ei au kia kotou i teianei au tuatua, kia kore kotou e maitu,” ko tana ia i karanga atu. I reira kua oronga atu aia i te akamatakiteanga: “E tuku ratou ia kotou ki vao i to ratou au sunago ra: e kua vaitata oki te ora, e manako ei te tangata e ta ia kotou na e, kua akamori i te Atua.”

E mea papu e kua manamanata oonu te au apotetoro no te reira akamatakiteanga. Noatu rai e kua akakite atura a Iesu i mua akera e ka makitakita to teianei ao ia ratou, kare ra aia i karanga atu e ka tamateia ratou. “Kare oki au i akakite atu kia kotou i taua au mea ra i muatangana,” kua akataka atura a Iesu: “No te mea tei vaitata ra au ia kotou.” Inara, mei teaa te meitaki kia akapapa ia ratou i mua ake ma teia akakiteanga i mua ake ka akaruke ei aia!

Kua tuatua katoa atura a Iesu: “E teianei te aere tika nei au kiaia i tei tono mai iaku nei ra; e kare akerai tetai o kotou i ui mai e, Ka aere koe kiea?” I te tuanga mua o taua aiai ra, i ui ana ratou e te aere ra aia kiea, inara i teianei te ruketekete ra ratou i tana i tuatua atura kia ratou e kua kore to ratou manako kia ui akaou atu i te reira. Mei ta Iesu i karanga atura: “No te mea i akakite ateaia atu e au kia kotou teianei au tuatua, te ki ra to kotou ngakau i te aue.” E kua aue te au apotetoro ra, kare no to ratou kite anake e ka takinokino ravaia ratou e ka tamateia mari katoa ra no te mea ka akaruke to ratou Pu ia ratou.

Kua akataka atura a Iesu: “E meitaki ei kotou ko au e aere ke nei: angairi au kare e aere ke, kare e riro mai te [tauturu, NW] kia kotou nei: kia aere ke ra au, naku ia e tono mai iaia kia kotou nei.” Mei te tangata, e okotai ua ra ngai no Iesu i te tuatau okotai ra, inara kia tae aia ki te rangi, ka rauka iaia i te tono mai i te tauturu, koia te vaerua tapu o te Atua, ki tana au pipi ki te ngai tei reira ratou i te enua nei. No reira i puapingaiaʼi to Iesu ra akarukeanga.

Na te vaerua tapu, e na Iesu ei, “e akakite mai ki to te ao i te ara, e te tuatua-tika, e te akaapa.” Te ara a to te ao nei, ma tona kore e akono i te akarongo i te Tamaiti a te Atua, ka akakite ateaia ia. Kapiti atu, ka akakiteia te tuatua tika papu o Iesu kia kake atu aia ki te Metua ra. Na te kore anga e rauka ia Satani e tona ao rave kino i te aati i to Iesu ra tu tiratiratu e mea papu roa ia e kua akaapaia te tutara o teianei ao.

“E manganui ra taku tuatua e akakite atu kia kotou,” e na Iesu ei, “kare ra e tika ia kotou i teianei.” E no reira kua taputou atura a Iesu e ka riringi mai aia i te vaerua tapu, koia te mana angaanga o te Atua ra, na te reira e arataki ia ratou kia marama i taua au mea ra kia tau ki to ratou kite kia mou i te reira.

Kare takiri te au apotetoro ra i kite e ka mate a Iesu e ka mama akaou mai kia ratou i muri ake i tona tuakaouanga. No reira kua ui ratou kia ratou uaorai e: “Eaa teia tana i tuatua mai kia tatou nei e, Kia roaroa iti ake, kare atura kotou e kite iaku: e roaroa iti akera oki, kua akara mai kotou iaku: e no te mea te aere tika nei au ki te Metua ra?”

Kua kite ra a Iesu e te inangaro ra ratou i te uiui kiaia, e kua karanga atura aia: “Tika, tika tikai taku e karanga atu kia kotou, E aue kotou, e e mii oki, ko to te ao ra, e kata ïa: e mii kotou, kareka ra to kotou mii, ka akariroia ïa ei rekareka.” I tetai mai aiai avatea ra, i to Iesu tamate angaia, kua rekareka te au arataki o te akonoanga atua o teianei ao, inara kua mii te au pipi ra. Inara, kua tauiia to ratou mii ei rekareka, i to Iesu ra tuakaouanga! E kua tamouia to ratou rekareka i tana akamana anga ia ratou i te Penetekote ra kia riro ei au kite nona na te riringianga ki runga ia ratou ra i te vaerua tapu o te Atua!

I te akaaite atu anga i te turanga o te au apotetoro ra ki tetai vaine i tona tuatau mamae no te anau anga, kua na ko atura a Iesu: “E aue te vaine kia rokoia e te anau ra, no te mea kua tae ki tona ora.” Inara mei iaia katoa ka kore ra e maara i tona tumatetenga me anau mai tana ra tamaiti, kua akamaroiroi a Iesu i tana au pipi i te na ko anga e: “Koia oki kotou ka aue i teianei: e kite akaou maira au ia kotou [kia akatuakaouia au nei], e e mareka to kotou ngakau, e kare rava to kotou rekareka e riro ia etai ke.”

Tae roa mai ki te reira tuatau, kare te au apotetoro ra i pati ana na roto i tona ingoa. Inara i teianei kua karanga aia: “Ta kotou e pati atu i te Metua ma toku ingoa, nana ïa e o mai kia kotou na. . . . Te anoano maira oki te Metua ia kotou, ko kotou i anoano mai iaku nei, e kua akarongo e, mei ko mai au i te Atua ra. I aere mai nei au ki te ao nei, mei mua mai i te aroaro o te Metua ra: te akaruke nei au i teianei ao, e te oki nei au ki te Metua ra.”

E akamaroiroi anga maata ta Iesu au tuatua ki te au apotetoro ra. “Ko te mea teia i akarongo ei matou e mei ko mai koe i te Atua ra,” ta ratou ia i tuatua. Kua ui atura a Iesu: “Kua akarongo ainei kotou i tenana? Ina, te vaitata mai nei te ora, e teianei rai oki, e pueurikiriki ke atu ei kotou, ko te tangata ko tona uaorai kainga, akaruke maira iaku ko au anake ua.” Te akaraanga e mea kare e tau kia irinakiia, inara kua tupu te reira i mua ake ka poiri ei!

Kua taopenga atura a Iesu: “I akakite atura au kia kotou i teianei au tuatua, kia rauka to kotou au iaku nei. E tumatetenga to kotou i teianei ao: ka akamaroiroi ra, kua riro te re o teianei ao iaku.” Kua riro te re o teianei ao ia Iesu na tana akaotianga tiratiratu i to te Atua anoano noatu te au apinga pouroa a Satani e tona ao i rave ei akakore i to Iesu ra tu tiratiratu.

Pure Openga i te Pia i Runga Ra

I te akakeu anga a te aroa oonu no tana au apotetoro, kua teateamamao a Iesu ia ratou no tona akaruke anga te vaitata ra. I reira, i muri ake i te akamaroiroianga e te akapumaanaanga ia ratou, kua nana akera ona mata ki runga i te rangi, e kua pati akatenga atura i tona Metua: “Ka akakakā i taau Tamaiti, kia akakakā katoa oki taau Tamaiti ia koe. Kua oronga mai oki koe i te mana nona ki te tangata katoa nei, kia oronga atu aia i te ora mutu kore i te aronga katoa taau i oronga mai nona ra.”

Mei teaa ra te akaoraora i ta Iesu tumu tuatua i oronga mai​—⁠e ora mutu kore! Te orongaanga i te “mana nona ki te tangata katoa nei,” ka rauka ia Iesu i te tua i te au puapinga no tona atinga oko ki te au tangata katoatoa te aere atura ki te mate. Inara, ka oronga aia i te “ora mutu kore” ki te aronga anake ua ta tona Metua ka akatika. Na te patuanga ki runga i teia tumu no te ora mutu kore, kua rave ua atura a Iesu i tana pure:

“Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” Ae, tei runga te ora i to tatou tukuanga i te kite i te Atua raua ko tana Tamaiti ki roto ia tatou. Inara e tere atu i te kite anake te manako te anoanoia ra.

Ka tau te tangata kia kite ia raua ma te pirianga oa vaitata, ma te akatupuanga i tetai kiteanga oa kia raua. Ka tau tetai kia manako ngakau mei ia raua rai no runga i te au tumu tika katoa e kia akara atu i te au mea katoa ra na roto i to raua mata. E i rungao i te au apinga ravarai, ka tau te tangata kia tauta i te aru i to raua au tu arite koreia i te akonoanga ia etai ke ra.

Kua pure katoa a Iesu: “Kua akakakā au ia koe i te ao nei: kua oti iaku te angaanga taau i o mai naku e rave ra.” I te oti anga iaia tana angaanga i orongaia maira kia raveia no te reira tuatau e te papu anga te manako no tona autu anga i te tuatau ki mua, kua pati akatenga aia: “E taku Metua, e akakaka mai koe iaku ki te pae ia koe uaorai ma te kaka iaku i te pae ia koe ra i mua ake i teianei ao nei.” (NW) Ae, kua pati aia kia akaokiia aia ki tona kaka mua i te rangi ra na te tuakaouanga.

I te akatakaanga i tana angaanga maata i te enua nei, kua karanga a Iesu: “Kua akakite atu au i toou ingoa i te au tangata o teianei ao, taau i o mai noku ra: noou ana oki ratou, e naau oki ratou i o mai noku; e kua akono ratou i taau tuatua.” Kua taiku a Iesu i te ingoa o te Atua, koia a Iehova, i tana angaanga tutu aere e kua akakite i te tika anga o te tuatua no te reira, inara e tere atu i te reira tana i rave i te akakiteanga i te ingoa o te Atua ki tana au apotetoro. Kua akatotoa katoa aia i to ratou kite e te ariki anga ia Iehova, i tona tu ei peretana, e pera katoa tona au akakoroanga.

I te akatikaanga e ko Iehova Tei Teitei iaia, tei raro ake aia i te rave i te angaanga, kua akatika taakaaka ua a Iesu i te reira: “E naau i tuku mai iaku i te tuatua taku i tuku ake kia ratou nei; e kua āriki ratou i taua tuatua ra, e kua kite tikai oki e, mei ko mai au ia koe ra; e kua akarongo oki ratou e, naau au i tono mai.”

I te akataka anga i tana au pipi ia etai atu tangata katoa, kua pure a Iesu: “Kare au e pure i to teianei ao, ko te aronga ra taau i o mai noku ra, . . . I toku noo anga i te ao nei ma ratou katoa ra, naku ïa ratou i tiaki . . . , kua tiakiia ïa e au, e kare rava tetai i ngaro, mari ra ko te tamaiti o te mate ra,” koia, a Iuda Ikariota. I te reira atianga tikai, te aere atura a Iuda i tana angaanga rikarika i te pikikaa ia Iesu ra. No reira, kua akatupu kite kore ua ra a Iuda i te au Tuatua Tapu ra.

“Te riri nei to te ao nei ia ratou,” kua tamou atura a Iesu i te pure. “Kare au i pure ia koe e, ka apai ke atu koe ia ratou i teianei ao, kia tiaki maira koe ia ratou, auraka ei kino. Kare ratou i to teianei ao, mei iaku nei rai oki, kare i to teianei ao.” Tei roto ra ta Iesu au pipi i teianei ao, koia teia totaiete tangata tei akanooia nei ko Satani te tu­tara, inara te takake ra ratou i te reira ma tana au angaanga kikino e ka tau kia vai tamou te reira tu takake anga.

Kua pure katoa atura a Iesu: “Ka akatapu koe ia ratou i te tuatua-mou naau, ko te tuatua aau na te tuatua-mou.” I konei te karanga ra a Iesu i te au Tuatua Tapu Epera tei akauruia, koia tana i taiku putuputu maira e, ko “te tuatua-mou” ia. Inara ko tana i apii atura i tana au pipi e pera katoa oki ta ratou i tata i raro ake i te akauru anga te vaerua tapu ei au Tuatua Tapu Ereni Kerititiano ra ko “te tuatua-mou” katoa ia. Ka rauka i teia tuatua mou i te akatapu i te tangata, e te taui takiri i tona oraanga, e ka akariro iaia ei tangata takake i teianei ao.

Kua pure a Iesu kare “ia ratou anake ua, i te aronga katoa ra te ka akarongo mai [iaia] i ta ratou apii anga.” No reira kua pure a Iesu no te aronga te ka riro ei pipi akatainuia nana e pera katoa oki tetai au pipi te ka akaputuia mai ki roto i te ‘okotai anana.’ Eaa ra tana i pati no ratou katoatoa?

“Kia riro ratou katoa ei okotai; mei ia koe, e taku Metua, i roto iaku nei, e mei iaku oki i roto ia koe na, . . . kia riro ratou ei okotai, mei ia taua, okotai nei.” Kare a Iesu raua ko tona Metua i te peretana okotai tikai, mari ra te taokotai ra to raua manako no te au mea ravarai. Kua pure a Iesu e kia rekareka tana au pipi i taua tu taokotai rai, e “kia kite to te ao nei e naau au i tono mai nei, e kua akaperepere mai koe ia ratou, mei ia koe e akaperepere mai iaku nei ra.”

Kua pati katoa a Iesu no tona Metua i te rangi ra no te aronga te ka riro mai ei au pipi akatainuia nana ra. No teaa ra? “Ei vaitata katoao oki iaku, i te ngai taku e noo ra, kia akara mai ratou i toku kaka, i taau i o mai noku ra: kua akaperepere mai ana oki koe iaku ou teianei ao i angaia.” I te reira taime, kua anauia e Adamu raua ko Eva te tamaiti mua ra. I mua roa atu i tera kua akaperepere ke ana te Atua i tana Tamaiti anau tai, tei riro maira koia a Iesu Mesia.

I te akaotianga i tana pure, kua akaketaketa akaou maira a Iesu: “E kua akakite atu oki au kia ratou, e e akakite atu rai au, i toou ingoa: e ei roto ia ratou te akaperepere taau i akaperepere mai iaku ra, e ei roto au ia ratou.” No te au apotetoro ra, ko te kiteanga i te ingoa o te Atua kua kapiti katoa i te kite tatakitaianga i te akaperepere a te Atua ra. Ioane 14:​1–​17:26; 13:​27, 35, 36; 10:16 Luka 22:​3, 4; Exodo 24:10; 1 Ariki 19:​9-13; Isaia 6:​1-5; Galatia 6:16; Salamo 35:19; 69:4; Maseli 8:​22, 30.

▪ Te aere ra a Iesu kiea, e eaa te pauanga kia Toma no runga i te mataara ki reira?

▪ No tana patianga, penei eaa ta Philipa i anoano kia orongaia atu e Iesu?

▪ Eaa i tau ei e ko tei akara ia Iesu kua akara katoa ia i te Metua?

▪ Akapeea te rave anga a te au pipi a Iesu ra kia maata atu te angaanga i tana uaorai i rave?

▪ I teea tu i kore ei o Satani, mouranga ki runga ia Iesu?

▪ I naea a Iehova i tanu ei i te vine tei akatutuia ra, e i naea etai atu i riro ei ei tuanga no te vine ra e i akapeea ia?

▪ I te openga, eia katoa rara o taua vine tei akatutuia ra?

▪ Eaa te ua ta te Atua e umuumu ra mei te au rara maira?

▪ Akapeea tatou e riro ei ei oa no Iesu?

▪ Eaa ra to teianei ao ka riri ei ki te au pipi a Iesu?

▪ Eaa te akamatakiteanga a Iesu tei tamanata i tana au apotetoro?

▪ Eaa te au apotetoro i kore ei e ui kia Iesu e te aere ra aia kiea?

▪ Eaa tikai ta te au apotetoro i kore i marama?

▪ Akapeea ta Iesu akatutu anga e ka tauiia te turanga mii o te au apotetoro ra ei rekareka anga?

▪ Eaa ta Iesu i karanga e kare e roa ka raveia e te au apotetoro?

▪ Akapeea a Iesu i re ei i teianei ao?

▪ Na teea tu te oronga anga kia Iesu i “te mana nona ki te tangata katoa nei”?

▪ Eaa te aite anga e kia apii i te kite i te Atua e i tana Tamaiti katoa oki?

▪ Na teea au mataara ta Iesu akakite anga i te ingoa o te Atua?

▪ Eaa te “tuatua-mou,” e akapeea tana “akatapu” anga i te Kerititiano?

▪ Akapeea te Atua, e tana Tamaiti, e te aronga akamori mou katoatoa i riro ei ei okotai?

▪ I naea ‘te akatumuanga i teianei ao’?