Pene 119

Kua Apainaia atu kia Ana e kia Kaiapha

KUA takaiia a Iesu mei te tangata rave kino rai, e kua aratakiia atu kia Ana, koia te taunga maata rongonui i mua ana. Ko Ana te taunga maata ia Iesu te tamaroa 12 mataiti tei umereia ra e te au puapii rapi i te iero ra. Kua riro etai tamaroa a Ana ei taunga maata i muri akera, e i teianei ko tana unonga te mou ra i te reira taoonga.

Penei kua aratakiia a Iesu i mua ake ki te are o Ana no te roa i te reira taunga maata e te rongonui tei matau i te oraanga o te akonoanga ngati Iuda. Kua tika te reira tuatau ia ratou i te kite ia Ana ra no te Taunga Maata ko Kaiapha kia akaputu i te Sunederi, koia te akavaanga maata o te ngati Iuda e 71 au mema, e pera katoa kia akaputu i te au kite pikikaa ra.

Kua ui maira a Ana te taunga maata ra kia Iesu i tana au pipi e i tana apiianga. Inara, kua karanga atura a Iesu kiaia: “I tuatua akakite ua au ki to te ao nei; i roto ua rai au i te au sunago ra, e i roto i te iero ra, i te apii anga, i te ngai e akaputu ei te ngati Iuda; kare rava au i tuatua ki te ngai ngaro. Eaa koe i ui mai ei kiaku? ka ui atu i te aronga i akarongo mai i taku i karanga atu kia ratou ra: i na, kua kite ratou i taku i tuatua ra.”

Ei reira, kua moto maira i tona paparinga tetai o te aronga taoonga i tu vaitata ua ia Iesu ra, kua na ko maira: “E akapera koe i te tuatua ki te taunga maata?”

Kua karanga atura a Iesu: “Te apa ra taku i tuatua akenei, ka akakite mai ana i te apa: e tuatua-tika ra eaa ua koe i moto mai ei iaku?” I muri ake i te reira tuatua anga, kua tukua atura a Iesu e Ana kia Kaiapha.

Ei reira kua akamata i te akaputu mai te kau taunga nunui katoa e te aronga pakari ma te au tata tuatua oki, ae, to te sunederi katoatoa ra. E mea papu kua akaputu atu ratou ki te ngutuare o Kaiapha ra. Ko te rave anga i te reira akavaanga i te po o te Pasa ra kare ia i tau ki te ture a te ngati Iuda. Kare ra te reira i akakore i te akakoroanga kino a te au arataki o te akonoanga atua ra.

I te au epetoma i mua akera, i ta Iesu akatu mai anga ia Lazaro, kua oti te manako o te Sunederi i rotopu ia ratou uaorai e ka tau aia kia mate. E rua ua ra i mua akera, i te Ruitoru, kua kimi iora te aronga mana o te au akonoanga atua ra i te ravenga e raukaʼi a Iesu ia ratou i te pikikaa e ka ta atu ei iaia. E tamanako ana, kua oti ke ana aia i te akaapaia i mua ake i tona akava angaia.

Kua tauta ratou i reira i te kimi i te au kite ei oronga i te akapapu anga pikikaa ua kia raukaʼi tetai akaapa anga ia Iesu. Inara, kare e au kite i kitea kua rotai ra ta ratou tuatua. I te openga ra, e rua tei aere mai ki mua e kua karanga: “Kua kite matou iaia i te tuatua anga e, E vavaʼi au i teianei nao i angaia e te rima tangata nei, e kia po toru anake, kua akatu akaou au i tetai, tei kore i angaia e te rima.”

“Kare koe e tuatua mai?” ta Kaiapha ia i ui atu. “Eaa ta nga tangata nei i tapepe mai ia koe nei?” Inara kua muteki ua a Iesu. Noatu rai i teia au akaapa anga pikikaa, kia taakaakaia to te Sunederi, kare i rauka i te au kite ra i te ta rotai i ta ratou au tua. No reira kua timata te taunga maata ra i tetai atu ravenga tuke.

Kua kite a Kaiapha e eaa te manako o te ngati Iuda no tetai tangata kia karangaia e e Tamaiti tikai aia na te Atua. I etai atianga e rua i mua akera, kua karanga aviri ratou ia Iesu e e tangata akakino i te Atua te tau ra kia mate, i tetai atianga kua manako tarevake ratou e te karanga ra aia i arite atu aia ra ki te Atua. Kua akaue kikite atura a Kaiapha i reira: “Te akataputouia nei koe e au i te Atua ora ra e, e akakite mai koe kia matou nei, ko koe aina te Mesia, te Tamaiti a te Atua?”

Noatu rai eaa te manako o te au ngati Iuda ra, ko Iesu uaorai te Tamaiti tikai a te Atua ra. E na tona muteki ua ka rauka kia taruri keia te manako e e akakore anga nana i te tika e koia te Mesia. No reira kua pau mataku kore atura a Iesu: “Ko au ïa; ka kite oki kotou i te Tamaiti a te tangata i te noo anga i te rima katau o Tei mana ra, e te aere anga mai na runga i te tiao rangi.”

Ei reira, na roto i ta Kaiapha akaari anga tuke, kua aae atura i tona kakau na ko atura: “Kua akakino Atua aia; eaa ua atu rai to tatou kite? I na, kua kite ua kotou i tana akakino Atua. Eaa to kotou na manako?”

“E tau iaia te mate,” ta te Sunederi ia i karanga. Kua akamata ratou i reira i te akariro iaia ei kanga, e kua tuatua atu e manganui i te au apinga ei akakino iaia ra. Kua moto ratou i tona paparinga e kua tutua atura i te uavare. Kua tapoki atura etai i tona mata katoa e kua moto atura ma to ratou rima e kua tuatua aviri atura: “E akakite mai na, e te Mesia e, i tei papaki ia koe na.” Kua tupu teia tu akono e te akakino, tei kore i tau i te ture ra i te po o tona timataanga. Mataio 26:​57-68; 26:​3, 4; Mareko 14:​53-65; Luka 22:​54; 63-65; Ioane 18:​13-24; 11:​45-53; 10:​31-39; 5:​16-18.

▪ Kua aratakiia atura a Iesu kiea i mua akera, e eaa tei tupu kiaia i reira ra?

▪ Kua takiia atura a Iesu kiea i muri akera, e eaa te akakoroanga?

▪ Akapeea i raukaʼi ia Kaiapha te akariro i te Sunederi ra kia karanga e e tau a Iesu kia mate?

▪ Eaa te tu akono e te akakino, tei kore i tau i te ture, tei tupu i te tuatau o te timataanga ra?