Tuanga 8
Te Neke ra ta te Atua Akakoroanga kia Akatupuia
1, 2. Akapeea te Atua i te rave anga no te akakore atu i te mamae?
E ANERE ua atu mataiti ta te au tangata patoi e te au temoni ra tutara i te kikaanga i te kopu tangata ki raro. Inara, kare te Atua i akangaropoina ana i to tatou au mamae. Mari ra, i te au anere mataiti ravarai, kua rave ana aia i tetai rave anga no te tatara mai i te au tangata ra mei te mou o te kino e te mamae.
2 I te taime o te patoi anga i Edene, kua akamata te Atua i te akaari mai i tana akakoroanga no te akatu i tetai kavamani te ka akariro i teia enua ei kainga parataito no te au tangata. (Genese 3:15) I muri mai, ei vaa tuatua maata no te Atua, kua akariro a Iesu i teia kavamani o te Atua e aere maira ei tumu tuatua no tana apiianga. Kua karanga aia e ko te reira anake to te au tangata manakonako anga.—Daniela 2:44; Mataio 6:9, 10; 12:21.
3. Eaa ta Iesu i kapiki no te kavamani te aere maira no te enua nei, e no teaa ra?
3 Kua kapiki a Iesu i te reira kavamani o te Atua e aere maira e ko “te patireia o te au rangi ra,” i te mea e ka tutara mai te reira mei te rangi. (Mataio 4:17, NW) Kua kapiki katoa aia i te reira e ko “te patireia o te Atua,” i te mea e ko te Atua Tei Akatumu ra. (Luka 17:20, NW) I te anere ua atu mataiti i aereia mai kua akauru te Atua i tona au tangata tata ra kia tata i te au totou no runga i te aronga te ka tu ki roto i te reira kavamani ra e eaa ta te reira ka akatupu.
To te Enua Ariki Ou
4, 5. Akapeea te Atua i te akaari anga e ko Iesu tana Ariki i mareka ra?
4 E vaitata i te rua tauatini mataiti i topa akenei, kua akatupu a Iesu i te au totou e manganui no runga i te ka riro mai ei Ariki no te Patireia o te Atua. Koia ta te Atua i iki ei Tutara i te reira kavamani i te rangi ra ki rungao i te tangata nei. E i muri ake i tona mate anga, kua akatu mai te Atua ia Iesu ki te ora i te rangi ra ei mea vaerua ririnui, e te mate kore. E manganui te aronga tei kite i tona tuakaou anga.—Angaanga 4:10; 9:1-9; Roma 1:1-4; 1 Korinetia 15:3-8.
5 I reira a Iesu i te ‘noo anga i te rima katau o te Atua ra.’ (Ebera 10:12) Kua tiaki aia i te tuatau no te Atua kia akamana iaia kia rave ra ei Ariki no te Patireia o te Atua i te rangi ra. Kua akatupu teia i te totou ia Salamo 110:1, te ngai i akakite ei te Atua kiaia: “Ka noo koe ki toku rima katau nei, e kia akariroia e au to au enemi ei pange vaevae noou.”
6. Akapeea a Iesu i te akaari anga e kua tau meitaki aia ei Ariki no te Patireia o te Atua?
6 Iaia i te enua nei, kua akaari a Iesu e kua tau meitaki aia no te reira tu taoonga. Noatu te takinokino anga, kua iki aia i te tamou i tona tu akono tikai ki te Atua. Na te raveanga i te reira, kua akaari aia e kua pikikaa a Satani i tona tuatua anga e kare e tangata okotai e akarongo ki te Atua i raro ake i te timata anga. Ko Iesu, ei tangata tiama ra, te ‘Adamu rua’ ra, kua akaari e kare te Atua i tarevake i te angaanga i te au tangata tiama ra.—1 Korinetia 15:22, 45; Mataio 4:1-11.
7, 8. Eaa te au mea meitaki ta Iesu i rave iaia i te enua nei, e eaa tana i akaari maira?
7 Teea atura te tutara tei akatupu i te meitaki maata mei ia Iesu rai i te nga mataiti i tona angaanga orometua anga? Ma te akaririnuiia e te vaerua tapu o te Atua, kua akaora a Iesu i te aronga maki, te pirikoki, te matapo, te taringa turi, te vava. Kua akatu katoa aia i te aronga mate ra! Ma te meangiti kua akaari aia e eaa tana ka rave ma te maata ra no te tangata nei me riro te mana o te Patireia iaia.—Mataio 15:30, 31; Luka 7:11-16.
8 E maata ta Iesu meitaki i rave iaia i te enua nei e kua karanga tana pipi ko Ioane e: “E manganui atu rai ta Iesu peu i rave, naringa i ope katoa i te tataia, te manako nei au, kare e tika i to te ao katoa nei kia āriki mai i taua au buka ra, naringa i tataia.”—Ioane 21:25.a
9. Eaa te au tangata ngakau tiratiratu i akaputuputu atu ei kia Iesu?
9 E takinga meitaki a Iesu e te tu tangi, e maata tikai tona aroa i te tangata. Kua tauturu aia i te putaua e tei apikepike ra, inara kare aia i akatakake mai iaia mei te aronga apinganui me kore ra te aronga taoonga. Kua ariu atu te aronga ngakau tiratiratu ra ki ta Iesu pati anga aroa i tona karanga anga e: “E aere mai kiaku nei, e kotou katoatoa tei roiroi ra e tei teiaa te apainga ra, e naku e akaoraora ia kotou. E apai i taku amo ki runga ia kotou na e apii mai mei iaku nei, no te mea e ngakau maru toku e te akaaka o te ngakau, e ka kiteaia e kotou na te akaangaroi anga i to kotou au meta. E takinga meitaki taku amo e te mamangika taku apainga.” (Mataio 11:28-30, NW) Kua akaputuputu atu kiaia ra te au tangata mataku i te Atua e kua akara atu ki mua i tona tutara anga.—Ioane 12:19.
Te Au Tauturu Tutara
10, 11. Koai ma te ka piri atu kia Iesu i te tutaraanga ki rungao i te enua ra?
10 Mei te au kavamani a te tangata ra e au tauturu akaaere to ratou, pera katoa to te Atua Patireia i te rangi. Ka piri atu tetai pae kia Iesu i te tutaraanga ki rungao i te enua, no te mea kua taputou a Iesu ki tona au tauturu piri vaitata e ka tutara ratou ma ia katoa ei au ariki ki rungao i te tangata nei.—Ioane 14:2, 3; Apokalupo 5:10; 20:6.
11 No reira, kapiti atu kia Iesu ra, ko tetai au tangata tei kotingaia te numero ra, ka akatu katoaia mai ratou ki te ora i te rangi ra. Te riro ra ratou ei akatupu i te Patireia o te Atua te ka apai mai i te au akameitakianga ope kore ki te tangata nei. (2 Korinetia 4:14; Apokalupo 14:1-3) No reira i te mataiti i aereia mai, kua oora te Atua i te akapapa anga no tetai tutara anga te ka apai mai i te au akameitakianga mutu kore ki te kopu tangata.
Ka Ope te Tutara Irinaki Koreia Ra
12, 13. Eaa ta te Patireia o te Atua i papa no te rave?
12 I teia anere mataiti kua rave te Atua i te akatere i te au rave anga i te enua nei. Mei ta te Tuanga 9 o teia poroutia ka uriuri ra, te akaari maira te totou Puka Tapu e kua akatupuia to te Atua Patireia i raro ake ia Karaiti i te 1914 e te papa ra te reira no te akapaii i ta Satani akatereanga katoa. Te papa ra te reira Patireia no te “aere e akavi i rotopu i [to Karaiti] au enemi ra.”—Salamo 110:2, NW.
13 No teia nei te karanga ra te totou i roto ia Daniela 2:44 e: “I te au ra o taua au ariki ra [te vaira i teianei] ka akatu te Atua o te rangi ra i tetai patireia [i te rangi] te ka kore rava e takoreia, kare katoa tona tu ngateitei e akarukeia ki tetai akaou atu au tangata [tutara tangata te ka kore akaou e tuku uaia]. Ka atiati te reira [te Patireia o te Atua] kia pueurikiriki teia au patireia ravarai e ka akaope atu ia ratou, i reira e tu ei te reira e tuatau ua atu.”—Revised Standard Version.
14. Eaa etai au puapinga te ka aere mai me ope ake te tutara anga a te tangata?
14 Me apai keia te au tutara anga ravarai tei kore i irinaki ki runga i te Atua ra, i reira e oti takiri ei te tutara anga a te Patireia o te Atua i te enua nei. E no te mea ka tutara te Patireia mei te rangi maira, kare rava te reira e takinoia e te au tangata ra. Ka vai te mana akaaereanga i tona ngai tikai mei te akamata anga, i te rangi, ma te Atua. I te mea e ka akaaere ta te Atua tutara anga i te enua ravarai, kare tetai ua atu e arataki keia e te au akonoanga pikikaa me kore ra te au apiianga merengo kore a te tangata ra e te au tuatua poritiki. Kare okotai o teia au mea e akatikaia kia vai mai.—Mataio 7:15-23; Apokalupo, au pene 17 ki te 19.
[Tataanga i Raro Ake]
a No tetai akakite anga maata i to Iesu oraanga, e akara i te puka Te Tangata Maata Rava Atu Tei Ora Ana, tei neneiia i te 1991 e te Watchtower Society.
[Picture on page 18]
Iaia i te enua nei kua rapakau a Iesui te aronga maki e kua akatu i te aronga mateno te akaari i tana ka rave i roto i te ao ou
[Picture on page 19]
Ka akapaii te Patireia o te Atua i te rangi rakia kore atu te au tu tutara anga ravaraitei kare i irinaki ki runga iaia ra