Ka Ora Ainei Teia Ao?

Kare atu e uki tei rongo maata ana i te tuatua no runga i te openga o teia ao. E manganui te mataku ra e ka taopenga teia ao ki roto i tetai akapou anga ai nukiria. Te manako ra tetai atu e penei ka takore te taero i teia ao. Te manamanata ra rai tetai pae e ka akatupu te tu oripu ua o te pae puapinga i te au tangata e manganui kia patoi i tetai e tetai.

Ka ope ainei tikai teia ao? I te mea e ka pera, eaa i reira te aite anga o te reira? Kua ope ainei tetai ao i mua ana?

E Ope Tetai Ao—Kua Komono Mai Tetai i te Reira

Ae, kua ope ana rai tetai ao. Ka tamanako ana i te ao tei kino pakari ra i to Noa tuatau. Te akataka ra te Puka Tapu e: ‘Kua mamae te enua o te reira tuatau i te akapou anga tiruvi a te vai.’ Te karanga katoa ra te Puka Tapu: “E kare [te Atua] i tapupu ana i te akautungaanga i tetai ao taito, inara kua akono ia Noa, e tangata tutu aere i te tika, kia ora ma etai toko itu i tona apai anga mai i tetai tiruvi ki rungao i tetai ao o te au tangata atua kore.”—2 Petero 2:5, NW; 2 Petero 3:6, NW.

Ka akara ana i te aite anga o te openga o te reira ao e eaa kare te reira i te aite anga. Kare te aite anga e ko te openga ia o te au tangata nei. Kua ora mai a Noa e tona kopu tangata i te Vaipuke o te ao katoa. Pera katoa te paraneta Enua nei e te au rangi manea ma te au etu ra. Ko “tetai ao o te au tangata atua kore” tei peke ke, e akatereanga kino o te au mea nei.

I te openga, i to Noa uanga e maata maira, kua tupu akaou mai tetai ao. Kua vai ua rai te rua o te reira ao me kore akatereanga o te au mea nei, e tae ua mai ki to tatou tuatau. Kua ki tona tuatua enua i te tamaki, te kino, e te ta ua. Eaa te ka tupu ki teia ao? Ka ora ainei te reira?

Te Tuatau ki Mua o Teia Ao

I muri ake i te tuatuaanga e kua mamae te ao o to Noa tuatau i te akapou anga, te tuatua ua atura te papaanga Puka Tapu e: “Na taua tuatua rai te au rangi e te enua te vaooia ra i teianei no te ai.” (2 Petero 3:7, NW) E tikai, mei ta tetai atu tata Puka Tapu e akataka ra: “Te ngaro ke nei teianei [to teia tuatau] ao.”—1 Ioane 2:17.

Kare te aite anga o ta te Puka Tapu e tuatua ra e ka ngaro ke te enua tikai me kore te au rangi ra ma te au etu ra, i te mea e kare teia au mea nei i ngaro ke ana i to Noa tuatau. (Salamo 104:5) Mari ra, ko teia ao, ma tona “au rangi,” me kore au tutara kavamani i raro ake i te mana tuke o Satani, e tona “enua,” me kore totaiete tangata, ka takoreia te reira mei te ai rai. (Ioane 14:30; 2 Korinetia 4:4) Teia ao, me kore teia akatereanga o te au mea nei, ka peke ke ia ma te papu tikai mei te ao rai i mua ake i te Vaipuke. Pera katoa ei akaraanga kua tuatua a Iesu Karaiti no runga i te turanga o “te au ra o Noa ra” e eaa te ka tupu i mua ua ake i te openga o teia ao.—Mataio 24:37-39, NW.

Ma te puapinga rai, i to Iesu tuatua anga no runga i te au ra o Noa ra, e pau anga te reira ki te uianga a tana au pipi: “Eaa te akairo o toou ra aerenga mai, e te openga o te ao?” (Mataio 24:3, King James Version) Kua kite te au pipi a Iesu e ka ope teia ao. Kua tamataku ainei teia manakonakoanga ia ratou?

I tetai tua, te akatutu anga a Iesu i te au rave anga e ka tupu i mua ua ake i te openga o te ao, kua akamaroiroi aia ia ratou kia rekareka no te mea ‘te vaitata maira oki to ratou ora.’ (Luka 21:28) Ae, ko te akaora anga mei ia Satani e tana akatereanga kino o te au mea nei ki roto i tetai ao ou ma te au!—2 Petero 3:13.

Inara aea teia ao e ope ei? Eaa te “akairo” ta Iesu i oronga no tona “aerenga mai, e te openga o te ao”?

“Te Akairo”

Te tuatua Ereni tei uriia “aerenga mai” i konei e pa·rou·siʹa ia, e ko tona aite anga “parutia,” koia oki, te noo tikai anga mai ki konei. No reira me kiteia “te akairo” kare te aite anga e kare e roa atu ana ka aere mai a Karaiti mari ra kua oki takere mai aia e kua parutia ana. Tera te aite anga kua akamata takereia aia i te tutaraanga ma te kitea koreia ei ariki i te rangi e kare e roa atu ana ka apai mai aia i te openga ki tona au enemi.—Apokalupo 12:7-12; Salamo 110:1, 2.

Kare a Iesu i oronga anake ua i te rave anga okotai ei “akairo.” E manganui tana au rave anga e te au turanga i akatutu i te ao nei. Ka tupu katoatoa teia au mea i te tuatau tei kapikiia e te au tata Puka Tapu e ko “te au ra openga.” (2 Timoteo 3:1-5, NW; 2 Petero 3:3, 4) Ka tamanako ana i etai o te au mea ta Iesu i totou te ka akairo i “te au ra openga.”

“Ka tu mai tetai enua e patoi i tetai enua e te patireia e patoi i tetai patireia.” (Mataio 24:7, “NW”) Kua riro te tamaki i teia au tuatau ei mea maata atu i to mua ana. Kua tuatua tetai tangata tuatua enua e: “[Akamataanga i te 1914] ko te Tamaki Mua o Teianei Ao te tamaki ‘kapiti anga katoa’ mua.” Inara, kua riro mai te tamaki rua o teianei ao ei akapouanga kino rava atu. Te rave ua atura te tamaki i te takino i te enua. Ae, kua akatupuia ta Iesu au tuatua na roto i tetai tu kitea maataia!

“E ka tupu te rava kore o te kai.” (Mataio 24:7, “NW”) I muri ake i te Tamaki Mua o Teianei Ao kua tupu te onge maata rava atu i roto i te tuatua enua ravarai. Kua tupu katoa te onge kino i muri ake i te Tamaki Rua o Teianei Ao. Kua taea i te tai rima o te au tangata katoa i te enua nei tei paria e tetai utunga o te rava kore o te au kai tau te tamateanga i etai 14 mirioni au tamariki i te au mataiti ravarai. E tikai, kua tupu ana te “rava kore o te kai”!

“Te ngaruerue maata i te enua.” (Luka 21:11) I te averiti, mei te tai ngauru taime e maata atu tei matemate i te mataiti okotai mei te au ngaruerue enua mei te 1914 mai i te au anere mataiti i mua atu ana. Ka tamanako ana i tetai nga mea maata ua: i te 1920, i Tinito, e 200,000 tei ­matemate; i te 1923, i Tiapani, e 99,300 tei kinokino; i te 1939, i Tureki, e 32,700 tei tumatetenga; i te 1970, i Peru, e 66,800 tei matemate; e i te 1976, i Tinito, mei te 240,000 (me kore, i tau ki etai au tumu, e 800,000) tei kinokino. Te papu ra, e e ‘ngaruerue enua maata’ tikai!

‘I tera ngai i tera ngai te maki-mate.’ (Luka 21:11) I muri ua ake i te Tamaki Mua o Teianei Ao, kua matemate etai 21 mirioni tangata mei te maki vuru Paniora. Kua ripoti te Science Digest e: “I roto i te tuatua enua ravarai kare atu a te mate tamaki anga pakari e te viviki rava atu.” Mei te reira taime mai, ko te maki pukuatu, te maki kaneta, te AIDS, e tetai atu au maki e manganui tei tamate e anere ua atu au mirioni.

“Te tupu anga maata o te au kino ra.” (Mataio 24:12, “NW”) Mei te 1914 mai kua kiteaia to tatou ao ei ngai kino e te ta ua. I te au ngai e manganui kare tetai e manako ana e e mea tau no te aaere i te au mataara noatu i te ao. I te po ka noo te au tangata i to ratou au kainga i muri ake i te au ngutupa rokaia e te arai pakariia, ma te mataku i te aere ki vao.

E manganui tetai atu au mea tei akakiteia e ka tupu i te au ra openga, e te akatupu katoaia ra teia au mea ravarai. Tera te aite anga te vaitata maira te openga o teia ao. Inara, ma te mataora, ka vai te aronga te ka ora mai. I muri ake i te karangaanga e “te ngaro ke nei teianei ao,” te taputou maira te Puka Tapu e: “Ko tei akono ra i to te Atua anoano, e tika ïa i te ora anga e tuatau ua atu.”—1 Ioane 2:17.

No reira te anoanoia ra tatou kia apii i to te Atua anoano e te rave i te reira. I reira e raukaʼi ia tatou i te ora atu i te openga o teia ao no te rekareka atu i te au akameitakianga mutu kore o te ao ou a te Atua. Te taputou ra te Puka Tapu e a te reira taime: ‘Na te Atua e orei i te roi-mata katoatoa o te au tangata; e e kore rava te mate, e te aue, e te mii; e te mamae oki.’—Apokalupo 21:3, 4.

Me kare i akakiteia atu te reira, te au taiku anga Tuatua Tapu i roto i teia aenga pepa no roto mai i te Puka Tapu i te reo Kuki Airani, urianga 1888. Te ngai i akaariia te NW i muri i tetai taiku anga, te akakite maira e no roto mai te urianga i te reo Engarani o te New World Translation of the Holy Scriptures, Tataanga Ou o te 1984.

[Picture Credit Line i te kapi 6]

Au Tutu Akameitakianga: Pairere: Tutu USAF. Tamaiti: Tutu WHO na W. Cutting. Ngaruerue enua: Na Y. Ishiyama, Apii Teitei i Hokkaido, Tiapani.