Tuanga 7

Ta te Atua Akakoroanga Kare e Roaia ka Kiteia

1, 2. Eaa ra tatou ka papu ei e ka rave angaanga te Atua no te akaope i te kino e te mamaeanga?

¹ Noatu kua akatika te Atua i te tu apa kore e te mamaeanga no tetai tuatau roa mei te manako o te tangata, kare aia e tuku e kia tupu ua atu te au turanga kino. Te akakite maira te Pipiria kia tatou e e tuatau takake to te Atua no te tukuanga i teia au mea kia tupu.

² “E atianga to te au mea katoa nei.” (Koheleta 3:1) Me tae te tuatau akanooia e te Atua no te akatika anga i te kino e te mamae anga ki tona openga, i reira ka akao mai aia ki roto i te au mea a te tangata nei. Ka apai mai aia i te openga ki te kino e te mamaeanga e ka akatupu i tona akakoroanga mua kia akaki i te enua ma te pamiri tangata mataora e te apa kore, te rekareka ra i te au tikai e te tinamou i te pae apinga i roto i te au turanga Parataito.

Ta te Atua Au Akavaanga

3, 4. Akapeea te puka o Maseli i te akataka anga i te au tupuanga i te akao anga mai te Atua?

³ Ka akara ana i etai o te au totou Pipiria e manganui te akakite ra e eaa te aiteanga o ta te Atua akao anga, koia oki, te au tupu anga o tana au akavaanga, no te pamiri tangata:

⁴ “Na te aronga tiratiratu oki e noo i te enua, e te aronga apa kore te ka akatinamouia ki reira; Ka tipu keia ra te aronga kino i te enua nei, e te aronga rave ara ra, ka kiriti tumuia ïa.”—Maseli 2:21, 22.

5, 6. Akapeea a Salamo 37 i te akaari anga mai e eaa te ka tupu me akao mai te Atua?

⁵ “Ka riro oki te aronga i rave i te kino ra i te tipu keia; ko te aronga ra i tapapa ia Iehova ra, ko ratou te ka noo i te enua. E roa poto ake, e kare ua te tangata kino ra . . . Kareka te aronga maru ra, ka noo ïa i te enua, e ka rekareka ratou i te maata o te au ra.”—Salamo 37:9-11.

⁶ “E tiaki atu ia Iehova, e akono tikai i tona arataa, e nana koe e akateitei kia rauka ia koe te enua: e ka kite koe i te mate o te aronga kino ra. E akairo ana i te apa kore, ka akara oki i te tiratiratu; e au oki te openga o te reira tangata; Kareka te aronga tatipake ra, ka pou anake ïa; ko te openga o te aronga kino ra ko te tipu keia.”—Salamo 37:34, 37, 38.

7. Eaa te ako anga tau te oronga maira te Tuatua a te Atua kia tatou?

⁷ No reira, i te manako anga i te au tuatau ki mua te ka tupu ki te aronga tei kite e kua tika Tei Anga maata katoa i te tutara ia tatou, te raurauia ra tatou: “E kia akono marie toou ngakau i taku nei au akauenga. E au rā roa oki, e te au mataiti ora, e te au, ta te reira e kapiti katoa mai kia koe ra.” E tika, ka kapitiia mai te oraanga mutu kore ki te aronga tei iki i te rave i te anoano o te Atua! No reira, te ako maira te Tuatua a te Atua kia tatou: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.”—Maseli 3:1, 2, 5, 6.

Ta te Atua Tutara Anga mei te Rangi Ra

8, 9. Na roto i teea ravenga ta te Atua tama anga i te enua?

⁸ Ka akatupu te Atua i teia tamaanga i te enua na roto i tetai kavamani meitaki tei rauka ra i te tangata ravarai. E kavamani ia te akaata ra i te pakari i te rangi ra no te mea te tutara maira te reira mei te rangi ra i raro ake i te akatereanga a te Atua. E ka akaatea taua Patireia i te rangi ra i te au tu tutara anga tangata mei te enua. Kare e rauka akaou i te au tangata te iki anga no te tauta anga i te tutara takake mei te Atua.

⁹ No teia te akakite ra te totou ia Daniela 2:44 e: “I te au rā o taua au ariki ra [te au kavamani i teia tuatau], e akatupu ei te Atua no te rangi i tetai basileia [i te rangi ra], te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia [te vai nei i teianei] katoa ra, e ka vai rai te reira e tuatau ua atu.”—Akara katoa ia Apokalupo 19:11-21; 20:4-6.

10. Eaa ra tatou ka papu ei e i raro ake i te Patireia a te Atua i te rangi, ka kore rava te ravenga pikikaa i roto i te tutara anga?

¹⁰ No reira, kare e rauka akaou i te tangata ravarai te au tu tutara pikikaa, no te mea i muri ake i ta te Atua akapou anga i teia akatereanga, kare e vai mai te au tutara anga tangata takake mei iaia. E te Patireia e tutara maira mei te rangi ra kare e pikikaaia, i te mea e ko te Atua Tei Akamata e Tei Akono i te reira. Kareka ra, ka angaanga te reira ei meitaki rai no te au tangata i raro ake i te reira. Ka raveia i reira to te Atua anoano i te enua katoa e i te rangi ra. No reira oki a Iesu i apii ei ki tana au pipi kia pure ki te Atua: “Kia tae toou basileia. Kia akonoia toou anoano i te enua nei, mei tei te ao katoa na.”—Mataio 6:10.

Mei Teaa te Vaitata ia Tatou?

11. Ka kitea e tatou kiea i roto i te Pipiria te au totou te ka tauturu ia tatou i te akataka e mei teaa te vaitata ia tatou ki te openga o teia akatereanga?

¹¹ Mei teaa te vaitata ia tatou ki te openga o teia akatereanga o te au mea merengo kore e te akamataanga o te ao ou o te Atua? Te oronga taka meitaki maira te totou Pipiria i te pau anga kia tatou. Ei akatauanga, kua totou a Iesu uaorai e eaa te ka akaraia atu e raukai ia tatou i te akataka i to tatou turanga, mei ta te Pipiria i tuatua ra, “te openga o teianei ao.” Kua rekotiia teia ia Mataio pene 24 e te 25, Mareko 13, e Luka 21. Pera katoa, tei rekotiia ia 2 Timoteo pene 3, kua totou te apotetoro ko Paulo e ka vai tetai tuatau tei tapaia e ko te “tuatau openga ra” i te akapapu anga i etai atu au tupu anga e teiea tatou i roto i te aerenga o te taime.

12, 13. Eaa ta Iesu raua ko Paulo i tuatua no runga i te tuatau openga?

¹² Kua tuatua a Iesu e ka akamata teia tuatau ma teia au tupu anga: “Ka tu mai tetai enua e patoi i tetai enua e te patireia e patoi i tetai patireia, e ka tupu te rava kore o te kai e te au ngaruerue enua i tera ngai e i tera ngai.” (Mataio 24:7) Te akaari maira a Luka 21:11 e kua taiku katoa aia ‘i tera ngai i tera ngai, e te maki-mate.’ E kua akamatakite, katoa aia, “e maata te kino i te tupu anga.”—Mataio 24:12.

¹³ Kua totou te apotetoro ko Paulo: “Ka tupu te kino maata i taua tuatau openga ra, kia kite mai koe. E riro te tangata nei ei akaperepere ia ratou uaorai, ei noinoi, ei akatietie, ei nengonengo, ei akakino, ei akarongo kore ki te metua, ei mareka kore, ei viivii, Ei aroa kore, ei akaatikau koreromotu ra, ei tapepe pikikaa, ei mako kore, ei rotoriri, ei akavaavaa i te tangata memeitaki ra, Ei pikikaa, ei māro, ei ngakau akateitei, ei anoano i te au mea e navenave ei ra, kare i anoano i te Atua; E tutu akono i te Atua to ratou, kareka te mana ra kua akakore ratou i te reira: . . . Ko te au tangata kikino e te aronga pikikaa ra, e tupu rai to ratou kino, e e maata atu, i te pikikaa ua anga atu, e te pikikaa angaia mai.”—2 Timoteo 3:1-5, 13.

14, 15. Akapeea te au tupu anga o teia 20 anere mataiti i te akapapu anga e tei roto tatou i te au tuatau openga?

¹⁴ Kua tupu ainei te au mea ta Iesu raua ko Paulo i tuatua i to tatou tuatau? Ae, kua tupu te reira. Ko te Tamaki I o te Ao te tamaki kino roa atu i taua taime ra. Ko te tamaki mua ia i te ao e ko tetai take taui anga i te tuatua enua o teia tuatau. I te pae mai i taua tamaki te rava kore o te kai, te au maki kino, e tetai atu au tumatetenga. Ko taua au tupu anga mei te 1914 mai e nei, mei ta Iesu i taiku i te reira, “e momua anake teia katoa au mea nei no te mate.” (Mataio 24:8) Kua akamata te reira i te tuatau totouia tei tapaia e ko te “tuatau openga,” te akamataanga o te uki openga i te tukuanga te Atua i te kino e te mamaeanga.

¹⁵ Papu e kua matau rai koe i te au tupuanga o te 20 anere mataiti. Kua kite koe i te au oripu anga tei tupu ana. Kua tamateia etai 100 mirioni tangata i roto i te au tamaki. E au anere ua atu i te au mirioni tei mate mei te pongi e te maki. Kua takinokino te au ngaruerue enua i te au oraanga e manganui. Te maata ra te manako kore i te oraanga e te ngai. Kua riro te mataku anga i te ta ua ei tuanga no te oraanga i te au ra. Kua kopaeia te au turanga akono. Te akatupu ra te maata o te tangata i te au manamanata tei kore i akatikatikaia. Te takino ra te taero anga i te tu meitaki o te oraanga e te akakino ra i te reira. E tikai, tei roto tatou i te au tuatau openga mei te 1914 mai e te vaitata nei ki te take o te au totou Pipiria te o mai nei to tatou tuatau.

16. Mei teaa te roa i te tuatau o te au tuatau openga?

¹⁶ Mei teaa te roa i te tuatau e vai ei te au tuatau openga ra? Kua tuatua a Iesu no runga i te tuatau te ka kite i te “momua anake teia katoa au mea nei no te mate” mei te 1914 e aere atu ki mua: “Kare e ope teianei uki, e ope ei teianei au tuatua ravarai i te tupu.” (Mataio 24:8, 34-36) No reira, ka tupu te au tutu o te tuatau openga i roto rai i tetai tuatau kotingaia. Te karanga ra a Apokalupo 12:12 i muri ake i te titiri angaia a Satani ki rotopu i te enua, e tuatau poto ua tona.

17, 18. Eaa te totou te akaari maira e te vaitata nei tatou ki te openga o teia ao?

¹⁷ Ko tetai totou te akaari ra e te vaitata maira te openga o teia akatereanga ko tei orongaia e te apotetoro ko Paulo, tei totou: “Te aere maira taua rā o te Atu ra mei te keia i te po ra. E tuatua oki te tangata e, e au, e kare e kino; ei reira ratou e rokoia uaia mai ei e te mate viviki, . . . , e kare rava ratou e ora.”—1 Tesalonia 5:2, 3; akara katoa ia Luka 21:34, 35.

¹⁸ I teia tuatau kua kore te Cold War, e kare te tamaki i te pa enua i te tamataku anga maata. No reira penei ka manako te au pa enua e te aere meitaki ra ratou ki te akatereanga ao ou. Inara i te manako anga ratou e te manuia ra ta ratou au tauta anga, ko te aiteanga ko tei kore i manakoia e ratou, ko te reira oki te akairo openga e te vaitata maira ta te Atua akapouanga i teia akatereanga. E akamaara, kare te au tuatua poritiki e te au koreromotu e rave ana i te au taui anga tika tikai i roto i te au tangata. Kare ratou e akariro ana i te au tangata kia aroa i tetai e tetai. E kare te au arataki o te ao e tapu ana i te ta ua, kare katoa ratou e akakore ana i te au maki e te mate. No reira auraka e tuku i toou irinaki ki roto i tetai akatupu anga au e te tinamou a te tangata e kia manako e te rauka nei i teia ao i te akatikatika i tona au manamanata. (Salamo 146:3) Te aite anga tikai o taua aue e te vaitata nei teia ao ki tona openga.

Tutuanga i te Tuatua Meitaki

19, 20. Eaa te totou te o maira te tutuanga i te au tuatau openga te kite nei tatou e te tupu ra?

¹⁹ Ko tetai totou te akaari maira e tei roto tatou i te tuatau openga mei te 1914 mai koia oki ko tetai ta Iesu i oronga ra: “E na mua ra te evangelia nei i te akakiteia atu i to te pa enua ravarai e tikaʼi.” (Mareko 13:10) Me kare mei ta Mataio 24:14 e akakite ra i te reira: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.”

²⁰ I teia tuatau kare mei mua ana i roto i te tuatua enua, te tutu aereia nei te tuatua meitaki no te openga o teia ao e te aere anga mai o tetai ao ou Parataito i raro ake i te Patireia o te Atua i te enua katoa. E ai ma? E te au mirioni Au Kite o Iehova. Te tutu aere ra ratou i te au enua katoa i te enua nei.

21, 22. Eaa, tikai, te akataka ra i te Au Kite o Iehova ei au Kerititiano mou?

²¹ I te pae mai i ta ratou tutu aereanga i te Patireia o te Atua, te akamako nei te Au Kite o Iehova i te tu te akataka ra ia ratou uaorai ei aronga aru mou tikai ia Karaiti, te akakite ra oki aia: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” No reira, te taokotaiia ra te Au Kite o Iehova ei akataeake i te koropu na roto i tetai tapeka anga aati koreia o te aroa.—Ioane 13:35; akara katoa ia Isaia 2:2-4; Kolosa 3:14; Ioane 15:12-14; 1 Ioane 3:10-12; 4:20, 21; Apokalupo 7:9, 10.

²² Te irinaki ra te Au Kite o Iehova i ta te Pipiria e karanga ra: “Kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.” (Angaanga 10:34, 35) Te manako ra ratou i to ratou au taeake Au Kite i te au enua ravarai ei au tungane e te au tuaine i te pae vaerua, noatu e eaa te pakiri me kare te kara. (Mataio 23:8) I te mea e te vai nei taua akataeake anga i te koropu i te ao i teia tuatau te akakite ra e kare e roaia atu ka kiteia ta te Atua akakoroanga.

[Tutu i te kapi 26]

Ko to te Atua Patireia apa kore i te rangi ra to te tangata ravarai tutara anga anake i te ao ou