Apiianga 4

Koai te Tiaporo?

Satani te Tiaporo—no ea mai aia? (1, 2)

Akapeea ta Satani akavare anga i te au tangata? (3-7)

Eaa i tau ei kia patoi koe i te Tiaporo? (7)

1. Te aite anga o te tuatua “tiaporo” ko tetai tei tuatua pikikaa kino ra no tetai atu peretana. To “satani” aite anga e enemi me kare ko tei patoi. Ko nga tuatua teia tei orongaia ki te enemi maata o te Atua ra. I te akamata anga, koia tetai angera apa kore ua i te rangi ma te Atua. Inara, i muri akera kua maata roa tona manakoanga nona uaorai e kua anoano i te akamori anga tei tau tikai ra no te Atua.—Mataio 4:8-10.

2. Kua tuatua atu teia angera, ko Satani, kia Eva na roto i tetai ovi. Na te tuatuaanga pikikaa kiaia, kua akariro aia iaia kia akarongo kore i te Atua. Kua patoi a Satani i reira i tei karangaia ko te “tu ngateitei” o te Atua, me kore ra tona turanga ei te Teitei Rava. Kua akaekoko a Satani me te tau ra ta te Atua tutara anga e na roto i te mataara tau e te au tu meitaki no Tona au tangata ra. Kua akatupu katoa a Satani i te ekoko anga me ka tamou marie tetai ua atu tangata i te tiratiratu ki te Atua. Na te raveanga i teia, kua akariro a Satani iaia uaorai ei enemi no te Atua. Ko te tumu te reira i riro ei aia kia tapaia ko Satani te Tiaporo ra.—Genese 3:1-5; Iobu 1:8-11; Apokalupo 12:9.

3. Te tamata ra Satani kia akavare i te au tangata kia akamori atu iaia. (2 Korinetia 11:3, 14) Ko tetai mataara akavare nana i te au tangata na roto i te akonoanga pikikaa. Me ka apii tetai akonoanga i te au pikikaa i te Atua ra, te tavini tika ra ia i te akakoro anga a Satani. (Ioane 8:44) Te au tangata e au mema no te au akonoanga pikikaa penei ka irinaki ngakau tae tikai e te akamori ra ratou i te Atua mou. Inara te tavini tikai ra ratou ia Satani. Koia ‘te atua o teianei ao.’—2 Korinetia 4:4.

4. Ko te purepure tetai atu mataara a Satani ei apai i te au tangata ki raro ake i tona mana. Penei ka pati ratou i te au vaerua kia paruru ia ratou, e kia akakino ia etai ke, kia totou mai i te tuatau ki mua, me kare kia akono i te au temeio. Ko Satani te mana kino te turu nei i teia au ravenga ravarai. Ei akamareka i te Atua, ka tau tatou kia kore e o atu i te rave purepure.—Deuteronomi 18:10-12; Angaanga 19:18, 19.

5. Te akavare katoa ra Satani i te au tangata na te akaparau maata i te iti tangata e te akamori anga i te au akaaerenga poritiki. Te manako ra tetai pae e e meitaki atu to ratou pa enua me kare iti tangata i to etai ke ra. Inara kare teia i te tika. (Angaanga 10:34, 35) Te akara ra etai atu au tangata ki te au akaaerenga poritiki kia akakore atu i te au manamanata o te tangata nei. Na te raveanga i teia, te kopae ke ra ratou i te Patireia o te Atua. Ko te reira anake ua te apinga ei akakore atu i to tatou au manamanata.—Daniela 2:44.

6. Ko tetai atu mataara a Satani no te akavare i te au tangata na te timataanga ia ratou ma te au anoano rave ara. Te ako maira Iehova ia tatou kia kopae ke i te au ravenga ara no te mea te kite ra aia e ka akakino te reira ia tatou. (Galatia 6:7, 8) Penei ka anoano tetai pae tangata kia piri atu koe kia ratou i taua au ravenga ra. Kia maara, ra, ko Satani tikai te anoano ra ia koe kia rave i te reira au mea.—1 Korinetia 6:9, 10; 15:33.

7. Penei ka taangaanga a Satani i te takingakino anga me kare te patoi anga kia akariro ia koe kia akaruke ia Iehova. Penei ka riri maata tetai papaki o taau aronga akaperepere no toou apiianga i te Puka Tapu. Penei ko etai atu ka aviri ua ia koe. Inara te kaiou ra koe i toou oraanga kiaai? Te anoano ra a Satani kia tamataku ia koe kia akamutu koe i te apiianga no runga ia Iehova. Auraka e tuku kia re a Satani! (Mataio 10:34-39; 1 Petero 5:8, 9) Na te patoianga i te Tiaporo, ka akamataora koe ia Iehova e ka akaari oki e te mou ra koe i Tona ngateitei.—Maseli 27:11.

[Au Tutu i te kapi 9]

Te akavare ra te akonoanga pikikaa, te purepure, e te akaparau anga iti tangata i te au tangata

[Tutu i te kapi 9]

E patoi atu ia Satani na te tamou marieanga i te apii no runga ia Iehova