Apiianga 5

Eaa ta te Atua Akakoro Anga no te Enua?

Eaa ra a Iehova i angaʼi i te enua? (1, 2)

Eaa ra te enua i kore ei i tetai parataito i teianei? (3)

Eaa te ka tupu ki te au tangata rave kino? (4)

A te tuatau ki mua, eaa ta Iesu ka rave no te aronga maki? te aronga pakarikari? e no tei mate? (5, 6)

E piri atu ei ki te au akameitakianga i te tuatau ki mua, eaa taau ka tau kia rave? (7)

1. Kua angaia mai e Iehova te enua nei kia rekareka te au tangata i te nooanga ki runga i reira e tuatau ua atu. Kua anoano aia kia noo tamouia te enua e te au tangata tuatua tika, e te mataora. (Salamo 115:16; Isaia 45:18) Kare rava te enua e akapouia; ka vai ra ia e tuatau ua atu.—Salamo 104:5; Koheleta 1:4.

2. I mua ake i ta te Atua anga mai anga i te tangata, kua iki Aia i tetai tuanga meangiti o te enua e kua maani i te reira ei parataito manea. Kua tapa aia i te reira ko te kainga i Edene. Kua tuku aia i te tangata mua e te vaine ki reira, koia Adamu raua ko Eva. Kua akakoro te Atua no raua kia anau tamariki e kia akaki i te enua katoatoa. Ka rave marie mai ratou i reira i te akariro anga i te enua katoa ei parataito.—Genese 1:28; 2:8, 15.

3. Kua ara a Adamu raua ko Eva na te aatianga akakoro tikai i te ture a te Atua. No reira kua akaatea atu a Iehova ia raua ki vao i te kainga i Edene ra. Kua ngaro ke atu te Parataito. (Genese 3:1-6, 23) Inara kare i ngaropoina ia Iehova tana akakoro anga no te enua nei. Te taputou ra aia i te akariro i te reira ei parataito, e ka noo te au tangata ki reira e tuatau ua atu. Akapeea aia i te rave anga i teia?—Salamo 37:29.

4. I mua ake ka riro ei teia enua ei parataito, ka tau te au tangata rave kino kia akaateaia. (Salamo 37:38) Ka tupu teia ia Aramakito, koia oki i te tamaki anga a te Atua no te akaope i te kino. I muri mai, ka tapekaia a Satani no tetai 1,000 mataiti. Ka riro te aite anga e kare e aronga rave kino te ka toe mai ei akakino i te enua. Ko te au tangata anake o te Atua ra te ka ora atu.—Apokalupo 16:14, 16; 20:1-3.

5. I reira ka tutara a Iesu Karaiti ei Ariki i runga ake i teia enua e 1,000 mataiti ra. (Apokalupo 20:6) Ka takore marie atu aia i te ara mei to tatou manako e to tatou au kopapa. Ka riro mai tatou ei au tangata apa kore mei ia Adamu raua ko Eva ra i mua ake i to raua ara anga. Kare e maki akaou i reira, kare e ruaine, e te mate. Ka rapakauia te au tangata maki, e ka oki akaou te aronga ruaine ki to ratou ou anga ra.—Iobu 33:25; Isaia 33:24; Apokalupo 21:3, 4.

6. I te tuatau o to Iesu Tutara no te Tauatini Mataiti, ka rave angaanga te au tangata tiratiratu ra kia akariro i te enua katoa nei ei parataito. (Luka 23:43) Pera katoa, e au mirioni ua atu to tei mate te ka akatuia mai ki te oraanga tangata ki runga i te enua nei. (Angaanga 24:15) Me ka rave ratou i ta te Atua e umuumu ia ratou ra, ka ora ua atu ratou ki runga i te enua e tuatau ua atu. Me kare, ka akapouia ratou e tuatau ua atu.—Ioane 5:28, 29; Apokalupo 20:11-15.

7. Ka autu i reira ta te Atua ra akakoro anga mua no te enua nei. Ka anoano ainei koe kia piri atu ki teia au akameitaki anga i te tuatau ki mua? Me koia ia, ka tau koe kia apii tamou marie no runga ia Iehova e te akarongoanga i tana au umuumu anga. Na te aereanga ki te au uipaanga i te Are Uipaanga Patireia o te Au Kite o Iehova ka rauka ia koe i te rave i te reira.—Isaia 11:9; Ebera 10:24, 25.

[Tutu i te kapi 10]

Ngaro a Parataito

[Au Tutu i te kapi 11]

I muri ake ia Aramakito, ka akariroia te enua ei parataito