Apiianga 8

Oraanga Ngutuare Tangata te Akamareka ra i te Atua

Eaa te turanga o te tane i roto i te ngutuare tangata? (1)

Akapeea te akono tau a te tane i tana vaine? (2)

Eaa te au apainga a te metua tane ra? (3)

Eaa ta te vaine tuanga i te ngutuare tangata? (4)

Eaa ta Iehova e umuumu ra i te au metua e te au tamariki? (5)

Eaa ta te Puka Tapu manako no te akataka ke anga e te kopae? (6, 7)

1. Te karanga ra te Puka Tapu e ko te tane te upoko o tona ngutuare tangata. (1 Korinetia 11:3) E okotai ua vaine e tika na tetai tane. Ka tau raua kia akaipoipo tikaia i nga mata o te ture.—1 Timoteo 3:2; Tito 3:1.

2. Ka tau te tane kia aroa i taua vaine mei iaia i aroa iaia uaorai. Ka tau aia kia akono i tana vaine i te tu o ta Iesu akono anga i tana au pipi. (Ephesia 5:25, 28, 29) Kare aia e tau kia papa i tana vaine me kare kia takinga kino iaia i tetai ua atu tu. Mari ra, ka tau aia kia akaari i te ngateitei nona e te manako tau.—Kolosa 3:19; 1 Petero 3:7.

3. Ka tau te metua kia angaanga pakari i te akono no tona ngutuare tangata. Ka tika aia kia oronga i te kai, te kakau, e te are no tana vaine e te tamariki. Ka tika katoa te metua kia oronga i te au apinga pae vaerua no tona ngutuare tangata. (1 Timoteo 5:8) Nana e arataki te tauturuanga i tona ngutuare tangata kia apii no runga i te Atua e Tana au akakoro anga.—Deuteronomi 6:4-9; Ephesia 6:4.

4. Ka tau te vaine ei tauturu meitaki no tana tane. (Genese 2:18) Ka tau aia kia tauturu i tana tane i te apiianga e te terenianga i ta raua tamariki. (Maseli 1:8) Te umuumu ra a Iehova i te vaine kia utuutu i tona ngutuare tangata ma te aroa. (Maseli 31:10, 15, 26, 27; Tito 2:4, 5) Ka tau aia kia kauraro marie i tana tane.—Ephesia 5:22, 23, 33.

5. Te umuumu ra te Atua i te tamariki kia akarongo i to ratou nga metua. (Ephesia 6:1-3) Te manakonako maira aia i nga metua kia apii e kia akatikatika i ta raua tamariki. Ka tau te au metua kia akapou taime ma ta ratou tamariki e kia apii i te Puka Tapu ma ratou, i te akonoanga i te au mea vaerua e tei anoanoia no to ratou manako ngakau ra. (Deuteronomi 11:18, 19; Maseli 22:6, 15) Kare rava e tau te au metua kia ako i ta ratou tamariki na te tu kino me kare takino anga.—Kolosa 3:21.

6. Me ka manamanata nga tokorua i te noo kapiti anga, ka tau raua kia tauta i te akono i te ako Puka Tapu. Te raurau maira te Puka Tapu ia tatou kia akaari i te aroa e te akakoreanga ara. (Kolosa 3:12-14) Kare te Tuatua a te Atua e akamaroiroi mai i te akataka keanga ei mataara akakore i te manamanata rikiriki. Inara penei ka iki te vaine kia akaruke i tana tane me (1) te marokiakia ra aia i te kore e tauturu i tona ngutuare tangata, (2) no tana ta ua te akakino ra i tona ora e te oraanga, me kare (3) ko tona tu patoi kino roa te akariro ra kia kore e rauka i tana vaine i te akamori ia Iehova.—1 Korinetia 7:12, 13.

7. E mea tika kia tiratiratu nga tokorua akaipoipo tetai ki tetai. Ko te akaturi e ara ia ki te Atua e ki tona tokorua. (Ebera 13:4) Te pirianga ainga i vao ake i te akaipoipo anga ko te tumu anake ua ia i tau ki te Tuatua Tapu no te kopae te akatikaanga i te akaipoipo akaou anga. (Mataio 19:6-9; Roma 7:2, 3) E mea riri na Iehova te kopae o te au tangata e kare e tumu Tuatua Tapu e ka akaipoipo ei i tetai ke atu ra.—Malaki 2:14-16.

[Au Tutu i te kapi 16, 17]

Te manakonako maira te Atua i te au metua kia apii i ta ratou tamariki e kia akatikatika ia ratou

[Tutu i te kapi 17]

Ka oronga te metua tane aroa i te apinga kopapa e te pae vaerua no tona ngutuare tangata