Apiianga 13

Akapeea e Kiteiaʼi e Koe te Akonoanga Mou?

Te akamareka ra ainei te au akonoanga ravarai i te Atua, me e okotai ua ainei? (1)

Eaa ra i maata roaʼi te au akonoanga te karanga ra e Kerititiano ratou? (2)

Akapeea koe me akataka i te au Kerititiano mou? (3-7)

1. Na Iesu i akamata mai e okotai ua akonoanga Kerititiano mou. No reira i teia tuatau nei ka tika ra e okotai ua kopapa, me kare pupu, o te aronga akamori mou i te Atua ko Iehova. (Ioane 4:23, 24; Ephesia 4:4, 5) Te apii maira te Puka Tapu e e tokoiti ua te au tangata tei runga i te ara o iti ki te ora.—Mataio 7:13, 14.

2. Kua totou maira te Puka Tapu e i muri ake i te matenga o te au apotetoro ra, ka aere marie mai te au apiianga tarevake e te au ravenga tau kore i te Kerititiano ki roto i te putuputuanga Kerititiano. Ka arataki ke te au tangata i te aronga irinaki ra kia aru ia ratou e kare ia Karaiti. (Mataio 7:15, 21-23; Angaanga 20:29, 30) Ko te tumu te reira i kite ei tatou e manganui te au akonoanga ke ke te karanga ra e Kerititiano ratou. Akapeea e raukaʼi ia tatou i te akataka i te au Kerititiano mou ra?

3. Ko te akairo meitaki roa o te au Kerititiano mou ra ko to ratou aroa tikai i roto ia ratou uaorai. (Ioane 13:34, 35) Kare ratou i apiiia ana kia manako e e meitaki ake ratou i te au tangata no etai atu pa enua me kare etai atu kara te pakiri. Kare katoa oki ratou i apiiia kia makitakita atu i te au tangata no etai enua ke maira. (Angaanga 10:34, 35) No reira kare ratou e piri atu ki roto i te au tamaki. Te akono ra te au Kerititiano mou tetai i tetai mei te au tungane e te au tuaine rai.—1 Ioane 4:20, 21.

4. Ko tetai atu akairo o te akonoanga mou koia oki e akangateitei oonu to tona au mema i te Puka Tapu. Te ariki ra ratou i te reira ei te Tuatua a te Atua e te irinaki ra i ta te reira i tuatua. (Ioane 17:17; 2 Timoteo 3:16, 17) Te akono ra ratou i te Tuatua a te Atua ei apinga puapinga maata atu i to te au manako tangata e te au peu ra. (Mataio 15:1-3, 7-9) Te tauta ra ratou kia akono i ta te Puka Tapu i to ratou oraanga i te au ra ravarai. No reira kare ratou e ako i tetai apinga e ka rave ei i tetai apinga ke.—Tito 1:15, 16.

5. Ka tika katoa oki te akonoanga mou kia akangateitei i te ingoa o te Atua. (Mataio 6:9) Kua akakite katoa oki a Iesu i te ingoa o te Atua, koia a Iehova, kia etai ke ra. Ka tau katoa oki te au Kerititiano mou kia rave i te reira. (Ioane 17:6, 26; Roma 10:13, 14) Koai ma te au tangata i toou ngai te akakite ra kia etai ke i te ingoa o te Atua ra?

6. Ka tika katoa te au Kerititiano mou kia tutu aere i te Patireia o te Atua ra. Kua pera katoa a Iesu. Kua tuatua tamou marie aia i te Patireia. (Luka 8:1) Kua akaue aia i tana au pipi kia tutu aere i teia tuatua rai i te enua katoa nei. (Mataio 24:14; 28:19, 20) Kua irinaki te au Kerititiano mou e na te Patireia o te Atua anake ua e apai mai i te au mou e te tinamou oki ki te enua nei.—Salamo 146:3-5.

7. Kare te au pipi a Iesu e tika ei tuanga no teianei ao rave kino. (Ioane 17:16) Kare ratou e o atu ki roto i te au ravenga poritiki o teianei ao e te au pekapeka o tona au tangata katoa oki. Te kopae ke ra ratou i te au tu akono, te au ravenga, e te au tu manako tei matauia ra i teianei ao. (Iakobo 1:27; 4:4) Ka rauka ainei ia koe i te akataka tetai pupu akonoanga i toou ngai tei ia ratou teia au akairo o te akonoanga Kerititiano mou?

[Au Tutu i te kapi 26, 27]

Te aroa ra te au Kerititiano mou tetai i tetai, e te akangateitei ra i te Puka Tapu, e te tutu aere ra i te Patireia o te Atua