Apiianga 15

Tauturuanga ia Etai Ke kia Rave i te Anoano o te Atua

Eaa ka akakite ei i te tuatua meitaki taau e apii ra kia etai ke? (1)

Ka rauka ia koe i te tua atu i te tuatua meitaki kiaai? (2)

Eaa te akatupu anga a toou tu akono ki runga ia etai ke ra? (2)

Eaa te tuatau te ka rauka ia koe i te tutu aere ma te putuputuanga? (3)

1. I teianei, e manganui te au apinga meitaki taau kia kite no roto mai i te Puka Tapu. Ka tau teia kite kia taki atu ki toou tatanuanga i tetai tu akatangata Kerititiano. (Ephesia 4:22-24) Ka umuumuia te reira kite kia raukaʼi ia koe te ora mutu kore. (Ioane 17:3) Inara, ka anoano katoaia etai ke ra kia akarongo i te tuatua meitaki kia rauka katoaʼi ratou i te akaoraia. Ka tika te au Kerititiano ravarai kia akakite atu kia etai ke ra. Na te Atua ia akauenga.—Roma 10:10; 1 Korinetia 9:16; 1 Timoteo 4:16.

2. Ka rauka ia koe te akamata na te tuaanga ki te aronga i te pae mai ia koe i te au apinga meitaki taau e apii ra. E tuatua ki toou ngutuare, toou oa, te au oa apii, e te au oa angaanga oki. Kia takinga meitaki e kia akakoromaki ia koe e rave ra i te reira. (2 Timoteo 2:24, 25) E kia maara e e putuputu te au tangata i te akara i to tetai tu akono kia tere atu i ta ratou akarongo anga ki tana tuatua. No reira penei na toou tu akono meitaki e akavaitata mai ia etai ke ra kia akarongo i te tuatua taau e akakite ra kia ratou.—Mataio 5:16; 1 Petero 3:1, 2, 16.

3. I muri akera, penei ka tau koe kia akamata i te tutu aereanga ma te putuputuanga o te Au Kite o Iehova i toou ngai. E takainga puapinga maata teia i toou tupu anga. (Mataio 24:14) Mei teaa ra te rekareka te reira me ka rauka ia koe i te tauturu i tetai atu kia riro mai ei tavini no Iehova e kia rauka te ora mutu kore!—1 Tesalonia 2:19, 20.