Ka Noo te Au Oa o te Atua ki Roto i te Parataito

Kare te Parataito e riro mei te ao ta tatou e noo nei i teianei. Kare rava te Atua i anoano ana i te enua kia ki i te manamanata e te mii, te mamae e te tamamae anga. A te tuatau ki mua, ka akariro te Atua i te enua ei parataito. Mei teaa rai te Parataito? Ka akara ana tatou e eaa ta te Pipiria e tuatua ra:

Te au tangata meitaki. Ka riro te parataito ei kainga no te au oa o te Atua. Ka rave ratou i te au mea meitaki no tetai e tetai. Ka noo ratou kia tau ki te au tu tuatua tika a te Atua.—Maseli 2:21.

Ka maata te kai. I Parataito, ka kore te matepongi. Te karanga ra te Pipiria: “E manga sitona [me kare, e kai] okotai rima i ki i te enua nei.”—Salamo 72:16.

Meitaki te au kainga e te angaanga rekareka. I te enua Parataito, ka rauka te kainga tataki tai ki te au pamiri ravarai. Ka rave te katoatoa i te angaanga te ka apai mai i te mataora mou.—Isaia 65:21-23.

E au i te ao katoa. Kare te tangata e ta akaou e kia mate i roto i te tamaki. Te karanga ra te Tuatua a te Atua: “Kua akakore [te Atua] i te tamaki.”—Salamo 46:8, 9.

Meitaki te oraanga kopapa. Te taputou maira te Pipiria: “Kare oki to te reira [o te Parataito] e karanga e, Kua maki au.” (Isaia 33:24) Pera katoa, ka kore te pirikoki me kare te matapo me kare te taringa turi me kare te murare.—Isaia 35:5, 6.

Ka ope te mamae, te mii, e te mate. Te karanga ra te Tuatua a te Atua e: “E kore rava te mate, e te aue, e te mii; e te mamae oki, e kore katoa ïa, no te mea kua kore te au mea taito.”—Apokalupo 21:4.

Ka kore te au tangata kino. Te taputou maira a Iehova: “Ka tipu keia ra te aronga kino i te enua nei, e te aronga rave ara ra, ka kiriti tumuia ïa.”—Maseli 2:22.

Ka inangaro e ka akangateitei te tangata i tetai e tetai. Ka kore te tuatua tika kore, te taomianga, te noinoi, e te makitakita. Ka taokotaiia te tangata e ka noo rotai ma te au tu tuatua tika a te Atua.—Isaia 26:9.