APII 9
Akapeea me Akapapa Meitaki no te au Uipaanga?
Cambodia
Ukraine
Me te apii ra koe i te Pipiria ki tetai o te Au Kite o Iehova, penei kua akara ana koe i te ka apiiia i mua ake i te au apii tataki tai. E puapinga maataia ai e mea meitaki kia rave i te reira i mua ake ka aere ei koe ki te uipaanga a te putuputuanga. Ka puapinga maataia tatou me akanoo tatou i tetai papaanga meitaki.
Akamanako i te taime e te ngai ka rave koe i taau apii. Eaa te taime meitaki noou i te akamanako meitaki? I te popongi maiata ainei i mua ake ka aere ei koe ki te angaanga, me kore i te aiai, e i te tuatau e moe ra te tamariki? Noatu me kare e rauka ia koe i te apii no tetai tuatau roa, e iki eia oou taime ka rauka ia koe i te akapou i te apii, e e tauta kia kore tetai apinga e tamanamanata i te reira. E kimi i tetai ngai muteki ua, e e tamate i te au apinga mei te ratio, tivi, e te terepaoni. Na te pure anga i mua ake i te apii, ka tauturu mai te reira ia koe kia kore e taitaia no runga i te au apinga o taua ra ra, kia rauka ia koe i te akamanako meitaki i te Tuatua a te Atua.—Philipi 4:6, 7.
Akaira i taau e apii ra, e e akapapa kia piri atu. Akamata na te maramaanga i taau ka apii. Akamanako i te tumu tuatua me kore i te pene o te atikara, akara akapeea te au tumu tuatua rikiriki te piri atu anga ki te au tumu tuatua, e e akara meitaki i te au tutu e te au uianga te akakite maira i te au manako puapinga. E oti tatau i te au parakarapa tataki tai, e e kimi i te au pauanga ki te au uianga. Akara e e tatau i te au irava, e e akamanako e akapeea te reira te turuturu anga i taau e apii ra. (Angaanga 17:11) Me rauka ia koe i te pau i te uianga, e akaira i tetai au tuatua puapinga i roto i te parakarapa te ka tauturu ia koe kia akamaara i te pauanga. E oti, e taki koe i toou rima ki runga i ko i te uipaanga me ka inangaro koe i te pau mai i roto i taau uaorai au tuatua.
Na te akamanako anga i te au tumu tuatua tukeke te ka uriuriia i ko i te au uipaanga i te au epetoma ravarai, ka rauka ia koe i te kapiti mai i te au manako ou ki taau i kite no runga i te Pipiria.—Mataio 13:51, 52.
Eaa taau ka akanoo ei akapapaanga naau no te au uipaanga?
Akapeea koe me akapapa ia koe uaorai kia paupau i ko i te uipaanga?