Tetai Muna ka Mataora Tatou i te Kite

E tangata rai tetai i akakite atu ana i tetai muna kia koe?—a Te akakite maira te Pipiria no runga i tetai “tuatua ngaro” puapinga, koia oki i tetai muna no ko mai i te Atua. Karangaia tera e e muna, no te mea kare e tangata i kite i te reira. Inangaro tikai te au angera kia kite no runga i tera muna. Ka inangaro koe kia kite e eaa tera muna?—

Maata ua atu te au mataiti i topa ki muri, kua anga mai te Atua i te tangata mua e te vaine mua. To raua ingoa ko Adamu e Eva. Kua oronga te Atua i tetai kainga manea no raua. Karangaia te reira e ko te kainga i Edene. Naringa a Adamu e Eva i akarongo i te Atua, ka rauka ia raua e ta raua tamariki te akariro i te enua ei parataito mei te kainga rai i Edene. Ka rauka ia ratou te noo i roto i te Parataito e mutu kore ua atu. Te maara ra ia koe e eaa ta Adamu e Eva i rave?—

Kare a Adamu e Eva i akarongo ana i te Atua. No reira rai tatou kare i roto i te parataito i teia tuatau. Akakite mai ra oki te Atua e, ka maani aia kia manea te enua katoatoa. Ka mataora te au tangata pouroa e ka ora ratou e mutu kore ua atu. Ka akapeea ra te Atua me rave i teia? Kua roa i teianei, kare te tangata i kite. E muna oki te reira.

Te aere mai anga a Iesu ki te enua nei, maata tana au mea i apii ki te tangata no runga i teia muna. Karanga aia e no runga te reira i te Patireia o te Atua. Akakite a Iesu ki te tangata kia pure no teia Patireia kia tae mai. Ka akariro te reira i te enua ei parataito manea tikai.

Kare koe e rekareka ana no tei kite koe i teia muna?— Kia akamaara ra oki e ko te aronga ua tei akarongo kia Iehova te ka noo i roto i te Parataito. Maata te au tua e akakite maira te Pipiria no runga i te au tane e te au vaine tei akarongo kia Iehova. Ka inangaro koe kia kite no runga ia ratou?— Ka akara taua e koai tetai papaki ia ratou, e ka akapeea taua e aite ei mei ia ratou rai.