APII 10
E Akarongo ua Ana Rai a Iesu
E mea mama ainei i te akarongo ua rai ki toou nga metua?— Tetai taime e ngata. Kua kite ra koe e e akarongo ua ana a Iesu kia Iehova e ki tona nga metua?— Ka tauturu tona akaraanga meitaki ia koe kia akarongo ki toou nga metua noatu kare i te mea mama ua. Ka apii taua no runga i teia.
I mua ake ka aere mai ei a Iesu ki te enua nei, e noo ana aia i te rangi i te pae i tona Metua, ia Iehova. E nga metua katoa to Iesu i te enua nei. To raua ingoa ko Iosepha e Maria. Kua kite koe e akapeea raua te riro anga ei nga metua nona?—
Kua rave mai a Iehova i te oraanga o Iesu i te rangi. Kua tuku aia i te reira ki roto ia Maria kia anauia mai a Iesu, e kia noo i runga i te enua nei. E temeio teia! Kua tupu mai a Iesu i roto ia Maria mei te au pepe rai e tupu mai ana i roto i to ratou mama. Mei te iva marama i muri mai, kua anauia mai a Iesu. Na roto i teia tu i riro ei a Maria raua ko Iosepha ei nga metua no Iesu i runga nei i te enua.
E 12 o Iesu mataiti, kua rave aia i tetai mea tei akaari mai i tona inangaro maata i tona Metua, ia Iehova. Kua tupu teia i te aere anga a Iesu e tona ngutuare tangata ki Ierusalema no te Pasa. Te oki anga ratou ki te kainga, kare a Iosepha raua ko Maria i kite e teiea a Iesu. Kua kite koe e teiea aia?—
No teaa a Iesu i aere ei ki ko i te iero?
Kua oki viviki atu a Iosepha e Maria ki Ierusalema i te kimi ia Iesu. Manamanata tikai raua no te mea kare raua i kite e teiea a Iesu. E toru ra i muri mai, kua kitea mai a Iesu i roto i te iero! Kua kite koe e eaa a Iesu i aere ei ki ko i te iero?— No te mea ka rauka iaia i te apii no runga i tona Metua ia Iehova. Inangaro maata tikai tona ia Iehova. Kua inangaro a Iesu kia kite e akapeea aia te akamareka anga ia Iehova. Tona mamaata mai anga, e akarongo ua ana a Iesu kia Iehova. Kua akarongo a Iesu noatu kare i te mea mama e noatu ka tamamaeia aia. Kua akarongo ana rai a Iesu kia Iosepha raua ko Maria?— Te karanga ra te Pipiria e ae, e akarongo ana aia.
Eaa taau ka mou mai mei te akaraanga o Iesu?— Ka inangaroia koe kia akarongo ki toou nga metua, noatu e kare i te mea mama. Ka rave ainei koe i te reira?—