Akaaereia no te Rave i to Iehova Anoano

I ROTO i teianei ao, e maata ua atu te au akaaerenga akonoanga, poritiki, okooko, e te au akaaerenga tauturu tangata, kare e aiteite ana to ratou au akakoroanga, angaanga, manakonakoanga e te irinakianga. Inara, okotai akaaerenga tei tuke takiri, kare i aite mei te au akaaerenga ravarai. Te taka ua ra i roto i te Tuatua a te Atua e ko te Au Kite o Iehova taua akaaerenga ra.

² Te mea meitaki, kua piri koe ki to Iehova akaaerenga. Kua papu ia koe eaa to te Atua anoano, e te rave nei koe i te reira. (Sala. 143:10; Roma 12:2) E orometua maroiroi koe e tavini kapiti nei e te au taeake i te ao katoa. (2 Kori. 6:4; 1 Pete. 2:17; 5:9) Mei ta te Tuatua a te Atua i taputou mai, e maata te akameitakianga e te mataora tei rauka ia koe. (Mase. 10:22; Mare. 10:30) Na te akono marie anga i te anoano o Iehova i teianei, te akapapa nei koe ia koe no te oraanga mutu kore a te tuatau ki mua.—1 Timo. 6:18, 19; 1 Ioa. 2:17.

³ No Iehova ua rai te akaaerenga tuke takiri i te ao katoa nei no te mea, koia uaorai te tutara e koia anake te Upoko. Koia to tatou irinakianga, to tatou Akava, to tatou Tuku Ture, e to tatou Ariki. (Isa. 33:22) E Atua mako a Iehova e kua rave aia i te au akanoonooanga kia tavaitai mai ia tatou kia “angaanga kapiti” i te rave anga i tona anoano.—2 Kori. 6:1, 2.

⁴ I te mea te vaitata roa mai nei te openga o teia akatereanga kino, ka anoanoia tatou kia aru vaitata i te aratakianga a Iesu Mesia, te Ariki akamanaia. (Isa. 55:4; Apo. 6:2; 11:15) Na Iesu uaorai i totou e ko te angaanga ka rave tana au pipi, e maata roa atu te reira i tana i rauka i tona tuatau i te enua nei. (Ioa. 14:12) E tika rai te reira, no te mea e roa te tuatau ka aereia, ka maata atu te au pipi a Iesu, e ka kako takiri te ao katoa ia ratou. Ka tutu aere ratou i te tuatua meitaki o te Patireia e tae ua atu ki te openga o te enua.—Mata. 24:14; 28:19, 20; Anga. 1:8.

⁵ Kua tupu tikai teia i te au mataiti tei aereia mai ana. Inara, mei ta Iesu i akakite taka meitaki mai e me ope te tuatau tei akonoia e Iehova, ka akamutu te angaanga tutu aere i te tuatua meitaki. Mei ta te au totou i roto i te Tuatua a te Atua i akaari mai, kua vaitata roa mai te rā maata e te rikarika o Iehova.—Ioela 2:31; Zepha. 1:14-18; 2:2, 3; 1 Pete. 4:7.

⁶ I te mea e kua kite tatou i teianei e eaa to Iehova anoano, ka inangaroia tatou kia tauta pakari atu rai i te rave i tana e umuumu maira. Ka anoanoia i reira tatou kia akamatau meitaki ia tatou ki te mataara e akanoonooia ana te akaaerenga o te Atua e kia taokotai ki te reira. Kua akatumuia te akanoonooanga a te akaaerenga ki runga i te au kaveinga Pipiria, tei kapiti mai i te au akauenga, au ture, au ikuikuanga, au tukuanga tika e te au apiianga i roto i te Tuatua akauruia a te Atua.—Sala. 19:7-9.

⁷ Me aru te iti tangata o Iehova i te aratakianga i roto i te Pipiria, ka noo au ua ratou e ka angaanga kapiti ma te rotai. (Sala. 133:1; Isa. 60:17; Roma 14:19) Eaa te akamatutu ra i te pirianga i rotopu i to tatou au taeake i te au ngai ravarai? Ko te aroa. Na te aroa e akakeu ana ia tatou e e tavaitai ana ia tatou. (Ioa. 13:34, 35; Kolo. 3:14) Na roto i teia tu, te aru ra tatou i te au akanoonooanga ou e tukuia maira e to Iehova akaaerenga i te rangi, ki te tuanga o tona akaaerenga i te enua nei.

TE TUANGA O TO IEHOVA AKAAERENGA I TE RANGI

⁸ Kua kite te au peroveta ko Isaia, Ezekiela, e Daniela i te au orama no te tuanga o to Iehova akaaerenga i te rangi. (Isa., pene 6; Eze., pene 1; Dani. 7:9, 10) E kua kite katoa te apotetoro ko Ioane i tetai orama no teia akanoonooanga i runga i te rangi e kua akaari mai aia i tetai tuanga ua o te reira na roto i te puka o Apokalupo. Kua kite aia ia Iehova i runga i tona terono kakā e kua koropiniia aia e te au angera, e karanga ra e: “E tapu, e tapu, e tapu, to te Atu ra, to te Atua mana katoatoa ra, ko tei vai ana, e te vai nei, e ko te ka tae mai.” (Apo. 4:8) Kua kite katoa a Ioane i “rotopu i te mareva i te terono . . . tetai Punua-mamoe,” koia oki ko Iesu Mesia, te Punua mamoe a te Atua.—Apo. 5:6, 13, 14; Ioa. 1:29.

⁹ Te akaari maira teia orama ia Iehova e noo ra i runga i te terono e koia te Upoko o teia akaaerenga. No runga iaia e tona turanga teitei, te akakite maira a 1 Paraleipomeno 29:11, 12 e: “Tei ia koe, e Iehova, te maata, e te mana, e te kakā, e te autu, e te tapunui: to runga i te rangi ra, e to runga i te enua, noou anake ïa; tei ia koe te au, e Iehova, e ko koe tei teitei ei upoko i te au mea katoa nei. No ko na mai ia koe na te apinga e te akangateitei, e ko koe tei tutara ki rungao i te au mea katoa; e tei to rima te ririnui e te maroiroi; e tei to rima i te akamaata mai, e te oronga mai i te maroiroi ki te tangata katoa nei.”

¹⁰ Ei oa rave angaanga na Iehova, e taoonga teitei rava to Iesu Mesia i runga i te rangi e e mana maata tei orongaia kiaia. ‘Kua tuku oki te Atua i te au mea ravarai ki raro ake i tona vaevae, e kua akono oki iaia ei upoko i rungao i te au mea katoa i te ekalesia.’ (Ephe. 1:22) Kua tuatua te apotetoro a Paulo no runga ia Iesu e: “I akateitei rava atu ei te Atua iaia, e kua oronga mai i te ingoa i maata ua atu i te teitei i te au ingoa ravarai nei nona: Kia tuku te au turi katoa ki raro, to te rangi, to runga i te enua, e to raro ake i te enua, i te ingoa o Iesu; E kia aaki te au vaa ravarai e, ko Iesu Mesia te Atu, kia kakā te Atua Metua.” (Phili. 2:9-11) No reira ka rauka ia tatou i te irinaki pu tikai i ta Iesu aratakianga tuatua tika.

¹¹ Kua kite te peroveta a Daniela ia Iehova i roto i te orama e noo ra i runga i Tona terono i te rangi e te au angera “kua tausani oki te tausani anga i te tavini anga kiaia, e kua ngauru oki te tausani anga i te manotini i te tu anga ki mua iaia.” (Dani. 7:10) Te karanga ra te Pipiria e e “tavini vaerua anake” teia au nuku o te au angera, “i tonokia ei matuapuru i te aronga tuanga i te ora.” (Ebe. 1:14) Kua orongaia na te au angera e rave i te au angaanga tuke ke e ō maira ‘te au terono, te aronga tutara, te ui ariki, e te aronga mana.’—Kolo. 1:16.

¹² Me akamanako marie tatou i teia akanoonooanga i roto i te tuanga o to Iehova akaaerenga i te rangi, ka mārama tatou i ta Isaia i tuatua i tona kite anga ia Iehova e ‘noo ra ki runga i te terono teitei,’ e “te tu ua ra nga seraphi i vaitata iaia.” Akakite a Isaia e: “E ae oki au nei! kua mate au e, e tangata vaa viivii oki au, e te noo nei au i rotopu i te tangata vaa viivii; kua akara oki oku mata nei i te ariki, ia Iehova Sabaota ra.” Kua umere tikai a Isaia e kua taakaaka iaia uaorai i tona mārama anga e mei teaa tikai te tu ngateitei o te angaanga e ō maira i roto i to Iehova akaaerenga. Kua tukia takiri tona ngakau i tana i kite, e i te taenga mai te karere no te rangi no te angaanga puapinga o te akakite anga i ta Iehova au tukuanga tika, kua karanga atura Isaia e: “Teia au; ko au taau e tono.”—Isa. 6:1-5, 8.

¹³ Mei tera katoa Tona iti tangata, kua akakeuia ratou kia āriki i to Iehova akaaerenga i to ratou mārama anga i te reira. No te mea e maata te au mea ou e tupu nei i roto i to Iehova akaaerenga, te tauta pakari nei tatou i te akono i teia au tauianga. Te angaanga maroiroi nei tatou i te akaari e te irinaki pu nei tatou i to Iehova akaaerenga i teia tuatau.

TE TUPU UA ATURA TO IEHOVA AKAAERENGA

¹⁴ I roto i te pene 1 o te totou a Ezekiela, te akatutuia maira a Iehova e akaoro ra i tetai kariota maatamaata i runga i te rangi. Te akatutu maira teia kariota kakā i te tuanga o to Iehova akaaerenga i te rangi. Te akaaere nei aia i teia kariota e te akariro nei i te reira ei akatupu i tona akakoroanga, kia puapingaia te tangata i te enua nei.—Sala. 103:20.

¹⁵ I rotopu i te au porotata tataki tai o teia kariota, e porotata akaou mai tetai—aiteite ua te maatamaata, kua tāpaeia na roto ake i te porotata o vao. Na roto anake ua i teia mataara, ka tau i reira kia karanga e ‘te aere ra te au porotata na runga i nga pae katoa e ā.’ (Eze. 1:17) Ka rauka ua i te au porotata i te taui viviki i to ratou kaveinga. Inara, na Iehova e akaaere ana i teia kariota. Kare a Iehova e tuku ua ana i tona akaaerenga kia aru i te kaveinga ua atu ta ratou e inangaro ra kia aere. Te na ko ra a Ezekiela 1:20 e: “Te au ngai katoa i aereia e te vaerua ra, kua aere katoa ratou.” No reira, na Iehova e arataki ana i tona akaaerenga kia aere ki te ngai ua atu ta tona vaerua e akakeu ra i te reira. Ka anoanoia tatou kia ui i teia uianga kia tatou uaorai e, ‘Te aru ra ainei au i te kaveinga o to Iehova akaaerenga?’

¹⁶ E maata atu te ō maira i to te aere ua ki te au uipaanga e te piri ki roto i te angaanga orometua. Ko te tupuanga o to tatou turanga akarongo te mea maata roa atu. Kia akapapu meitaki tatou “i te au mea e maata ua atu te meitaki” e kia tamou i te au mea ou e rauka mai nei na roto i te au apii a Iehova. (Phili. 1:10; 4:8, 9; Ioa. 17:3) Kia akamaara katoa tatou e me akaaere meitakiia te angaanga, ka mako e ka taokotai te katoatoa ki te aratakianga a te akaaerenga. No reira, ka anoanoia tatou kia mārama e e mea puapinga maata kia taangaanga meitaki i te au akanoonooanga ta Iehova e oronga mai nei, kia rauka ia tatou i te rave akaope takiri i tana angaanga. Ia tatou e aru ra i te kaveinga o to Iehova akaaerenga i te rangi, te akarotai ra tatou i to tatou oraanga ki te karere ta tatou e akakite aere ra.

¹⁷ Te rauka nei ia tatou i te rave i te anoano o te Atua ma te tauturu a te akaaerenga o Iehova. E akamaara e ko Iehova te Akaoro o teia kariota. I te mea e te aru nei tatou i te kaveinga a tona kariota, te akaari maira te reira i to tatou akangateitei e to tatou irinaki pu tikai i roto i to tatou Mato ia Iehova. (Sala. 18:31) Te taputou maira te Pipiria e: “Ka oronga mai a Iehova i te maroiroi no tona ra au tangata; e akameitaki mai a Iehova i tona au tangata i te au.” (Sala. 29:11) No te mea tei roto tatou i te akaaerenga o Iehova i teia tuatau, te rauka nei ia tatou te maroiroi e te au na roto i tana akameitakianga i tona iti tangata. Ae, e mea papu roa e ka oronga ua mai rai a Iehova i te akameitakianga, kia rauka ia tatou i te rave ua atu rai i tona anoano i teianei e tuatau ua atu.