“E Akamanako i to Kotou au Arataki”

TEIA au tuatua a te apotetoro ko Paulo, tei roto ia Ebera 13:7. Mei te Penetekote 33 T.N. e aere ua atu, kua riro te apainga ei pupu akaaere, na te au apotetoro tiratiratu a Iesu, ko ratou tei riro ei arataki i te putuputuanga Kerititiano ou tei akatumuia. (Anga. 6:2-4) Tae ki te mataiti 49 T.N., kua maata atu teia pupu akaaere no te mea kua kapitiia mai tetai aronga ke kare i te au apotetoro. Na ‘te au aposetolo e te aronga orometua i Ierusalema’ i rave i te tukuanga tika no runga i te peritome. (Anga. 15:1, 2) Na ratou te apainga no te au tukuanga tika no runga i te au mea e ō maira te au Kerititiano i te au ngai ravarai. Tuku ratou i te au reta e te au akauenga tei riro ei akamatutu i te au putuputuanga, e tei tauturu i te au taeake kia taokotai to ratou ngakau i te tavini ia Iehova. Kua akarongo e kua kauraro te au putuputuanga ki te aratakianga a te pupu akaaere e tei tupu mai, kua akameitaki Iehova i te putuputuanga e kua tupu atura ratou ki te maata.—Anga. 8:1, 14, 15; 15:22-31; 16:4, 5; Ebe. 13:17.

² Muri ake i te mate anga te au apotetoro, kua maata atu te aronga tei akaruke i te putuputuanga Kerititiano. (2 Tesa. 2:3-12) Mei ta Iesu i totou i roto i tana parapore no runga i te titona e te titania, kua maata takiri te titania (au Kerititiano pikikaa) tei ruruia ki rotopu i te titona (au Kerititiano akatainuia). I te au anere mataiti tei aereia, kua vaoo uaia teia au pupu kia tupu kapipiti e tae ua atu ki te tuatau kokoti i te openga o teia akatereanga. (Mata. 13:24-30, 36-43) Kua vai rai ta Iesu akameitakianga ki runga i te au Kerititiano tataki tai tei akatainuia i tera tuatau, inara kare e pupu akaaere i akanooia ake i te enua nei no Iesu kia oronga mai i te aratakianga no tana au pipi. (Mata. 28:20) Kua totou a Iesu e e tauianga tetai ka tupu a te tuatau kokoti.

³ “Koai te tavini akono meitaki e te pakari?” Te ui anga a Iesu i tera uianga, te akakite maira aia i tetai parapore no te tuanga o te “akairo” tana i oronga no runga i te openga o teia akatereanga. (Mata. 24:3, 42-47) Akaari mai a Iesu e ka oronga teia tavini akono meitaki i te kai pae vaerua no te iti tangata o te Atua “i te ora mou.” Kare a Iesu i taangaanga i tetai tangata okotai ua, mari ra kua taangaanga aia i tetai pupu tane kia oronga i te aratakianga i te anere mataiti mua, mei tera rai i te openga o teia akatereanga, ko te tavini akono meitaki ta Iesu e taangaanga nei, kare ko tetai tangata okotai ua.

AKATAKA ANGA E KOAI “TE TAVINI AKONO MEITAKI E TE PAKARI”

⁴ Koai ma ta Iesu i akamana kia angai i tana au pipi? E mea tau rai e ko te au Kerititiano akatainuia i runga nei i te enua tana ka taangaanga. Te taiku ra te Pipiria e “e kau taunga ariki” ratou tei akaueia ‘kia akakite i tona meitaki, to tei kapiki ia ratou i to roto i te poiri, kia tae ki tona mārama umereia.’ (1 Pete. 2:9; Mala. 2:7; Apo. 12:17) Ko te katoatoa ainei o te aronga akatainuia i te enua nei te tavini akono meitaki? Kare. Te oronga anga a Iesu i te kai na te 5,000 tuma tane, vaine e te tamariki na roto i te temeio, kua oronga aia i te kai ki te au pipi, na te au pipi i tuʼa aere na te urupu tangata. (Mata. 14:19) Maata tana i angai na roto i te tokoiti ua. Teia tuatau te oronga nei aia i te kai pae vaerua na roto i taua mataara rai.

⁵ E pupu meangiti ua “te akaaere pikikaa kore e te pakari” o te au taeake akatainuia, ko ratou te akapapa ana e te oronga maira i te kai pae vaerua mei te mataiti 1919 mai. (Luka 12:42) Mei te akamataanga o te au rā openga, te tavini kapiti anga te au taeake akatainuia i roto i te pupu “tavini akono meitaki e te pakari” i ko i te opati maata o te Au Kite o Iehova. Teia tuatau ko ratou te Pupu Akaaere o te Au Kite o Iehova.

⁶ Ko teia te pupu tangata ta Iesu e taangaanga ana kia akapapa i te au apiianga no runga i te akatupuanga o te au totou Pipiria, e kia oronga i te aratakianga tei anoanoia i te tuatau tau no te aru anga i te au kaveinga Pipiria i roto i te oraanga. E tuʼa aereia ana teia kai pae vaerua na roto i te au putuputuanga o te Au Kite o Iehova. (Isa. 43:10; Gala. 6:16) I te au tuatau taito, na tetai tavini irinakiia me kore na tetai akaaere, e akono ana i te au mea pouroa a tona pu. E mei tera katoa rai i teia tuatau, ko te tavini akono meitaki e te pakari tei orongaia te apainga no te akono i te iti tangata o Iehova. Ko ratou te akaaere i ta Iesu au apinga ravarai i te enua nei, te angaanga tutu evangeria, te au akaputuputuanga e te au uruoaanga, te akamana anga i te au akaaere no te au tuanga tuke ke i roto i te akaaerenga, e te akapapa anga i te au puka apii Pipiria, ka riro teia au mea pouroa ei puapinga no te “ngutuare.”—Mata. 24:45.

⁷ Koai i reira te “ngutuare”? Ko ratou te aronga e angaiia nei. I te akamataanga, ko te aronga pouroa tei akatainuia. Muri mai, kua kapitiia mai te aronga maata rava o te au “mamoe ke atu.” (Ioa. 10:16) Ko teia nga pupu, te angaiia nei ki te kai pae vaerua na roto i te tavini akono meitaki.

⁸ A te tuatau o te mate maata me aere mai a Iesu i te akautunga i teia akatereanga kino, ka akamana aia i te tavini akono meitaki “ei akaaere i te au apinga ravarai nana ra.” (Mata. 24:46, 47) Ko te pupu tavini akono meitaki, ka orongaia ta ratou tutaki i te rangi. Ka tutara kapiti ratou ma te katoaanga o te 144,000 e te Mesia i te rangi. Noatu kare e tavini akono meitaki e te pakari i te enua nei, ka oronga mai a Iehova raua ko Iesu i te aratakianga no te au tangata o te Patireia i raro i te tutaraanga a te Mesia na roto i te aronga tei akamanaia ei au ariki.—Sala. 45:16.

EAA RA TATOU KA AKAMANAKO EI I TE AU ARATAKI?

⁹ E maata te au tumu no tatou kia akamanako i te au arataki e kia akaari i to tatou irinaki i roto ia ratou. Eaa i puapinga ai no tatou kia akapera? Akakite mai te apotetoro ko Paulo e: “Te tiaki ra ratou i to kotou au vaerua, e akakiteia oki ta ratou tuatua ia kotou i te Atua ra; kia akakite ra ratou ma te rekareka, eiaa ma te aue; kare oki e puapingaia ta kotou i te reira.” (Ebe. 13:17) No reira e mea puapinga no tatou kia akarongo e kia kauraro ki te aratakianga a te au taeake no te mea te tiaki ra ratou e te paruru ra i to tatou pirianga ki te Atua.

¹⁰ Mei tei tataia i roto ia 1 Korinetia 16:14, akakite a Paulo e: “Kia raveia te au mea ravarai i roto ia kotou na, ma te aroa.” Te au tukuanga tika tei raveia no te iti tangata o te Atua, kua akatumuia ki runga i teia tu aroa ngateitei rava. No runga i te aroa, te akakite maira a 1 Korinetia 13:4-8 e: “E akakoromaki anga roa to te aroa, e te takinga-meitaki; kare te aroa e vareae, kare te aroa e akamaata, kare oki e akatietie, Kare e rave i te mea tau kore, kare e kimi i te meitaki nona uaorai, kare e riri vave, kare e manako kino ia etai ke; Kare e rekareka i te tuatua-tika kore, e rekareka ra i te tuatua-mou; E tapoki i te au mea katoa, e akarongo i te au mea katoa, e manakonako i te au mea katoa, e akakoromaki i te au mea katoa. Kare ua te aroa e kore.” No te mea i akatumuia te au tukuanga tika pouroa ki runga i te aroa ei puapinga no to Iehova au tavini, e tumuanga tau to tatou kia noo ponuiaau i raro i tera aratakianga. Te akaari maira teia i to Iehova aroa.

¹¹ Mei te anere mataiti mua rai, ko te aronga ta Iehova e taangaanga ra ei akaaere i tona iti tangata, e au tangata apa ua ratou. Kua taangaanga ana a Iehova i te aronga apa ua i mua ana i te akatupu i tona anoano. I to Noa tuatau, kua tarai aia i tetai araka e kua akakite aere no runga i te akapouanga te ka tupu. (Gene. 6:13, 14, 22; 2 Pete. 2:5) Kua ikiia a Mose ei arataki i te iti tangata o Iehova mei Aiphiti mai. (Exo. 3:10) E au tangata apa ua tei ikiia kia tata i te Pipiria. (2 Timo. 3:16; 2 Pete. 1:21) No te mea te taangaanga nei a Iehova i te aronga apa ua ei arataki i te angaanga tutu e ei akariro i te tangata ei pipi, kare te reira e riro ei akaparuparu i to tatou irinakianga i roto i te akaaerenga a te Atua. Kua riro ra te reira ei akamatutu ia tatou no te mea kua kite tatou e me kare a Iehova e turu mai, kare rava e tupu ta te akaaerenga e akakoro ra. Na roto i te au turanga ngatā i te au tuatau tei aereia, kua akaari mai te tavini akono meitaki e na te vaerua tapu o te Atua e arataki ra i ta ratou angaanga. Maata ua atu te akameitakianga tei rauka i te akaaerenga a Iehova i teia tuatau. No reira kia turuturu e kia irinaki tatou i te reira ma te ngakau katoa.

AKAARI I TO TATOU IRINAKIANGA

¹² Te aronga tei ikiia no te au apainga i roto i te putuputuanga, te akaari ra ratou te irinakianga i roto i teia akanoonooanga ma te rekareka e te rave tiratiratu anga i ta ratou apainga. (Anga. 20:28) Ei aronga tutu i te Patireia, kia piri maroiroi tatou ki te tutu aere mei tera are ki tera are, te atoro akaou, e te rave i te au apii Pipiria. (Mata. 24:14; 28:19, 20) E puapinga meitaki ei mei te au apiianga a te tavini akono meitaki e oronga maira, kia akapapa tatou e kia tae ki te au uipaanga Kerititiano, te au akaputuputuanga e te au uruoaanga. Maata te puapinga ka rauka ia tatou mei te akamaroiroianga e orongaia maira, me noo kapiti e to tatou au taeake i ko i teia putuputuanga.—Ebe. 10:24, 25.

¹³ Na roto i ta tatou tauturu oronga ua, te akapapu ra tatou e te irinaki ra tatou i roto i te akaaerenga. (Mase. 3:9, 10) Me kite tatou e te ngere ra to tatou au taeake, kare tatou e tavarevare i te tauturu. (Gala. 6:10; 1 Timo. 6:18) Ka rave tatou i teia ma te inangaro e te aroa no to tatou au taeake. Ka kimi ua rai tatou i te au mataara kia akaari i to tatou rekareka no te meitaki ta Iehova e tana akaaerenga e oronga ua mai nei.—Ioa. 13:35.

¹⁴ Te akaari katoa ra tatou i to tatou irinakianga i roto i te akaaerenga me turu tatou i ta te reira au tukuanga tika. Te ō maira te aru anga i te aratakianga a te aronga tei ikiia kia akaaere, mei te au akaaere kotinga e te aronga pakari o te putuputuanga. Ko teia au taeake etai o te “au arataki” ka anoanoia tatou kia akarongo e kia kauraro. (Ebe. 13:7, 17) Noatu kare tatou i mārama tikai i te tumu no teia au tukuanga tika, kua kite ra tatou e ka riro te reira ei puapinga no tatou. Kua akameitaki mai a Iehova ia tatou no to tatou akarongo i roto i tana Tuatua e tona akaaerenga. Te akaari ra tatou e te kauraro ra tatou ki to tatou Pu ko Iesu Mesia.

¹⁵ E tumuanga tau to tatou kia irinaki i roto i te tavini akono meitaki e te pakari. Te tauta pakari nei a Satani te atua o teia akatereanga kino i te taviivii i te ingoa o Iehova e tona akaaerenga. (2 Kori. 4:4) Auraka e vare i te au ereere kino a Satani! (2 Kori. 2:11) Kua kite a Satani e “e manga tuatau poto ua tona e toe nei” i mua ake ka uriia ai aia ki roto i te vaarua takere kore, e te akakoro nei aia i te tarurike i te manganui ua atu o to Iehova iti tangata. (Apo. 12:12) Inara, ia Satani e akapakari atura i tana au tautaanga, kia akapiri vaitata roa atu tatou kia Iehova. Kia tuku tatou i to tatou irinaki ki roto ia Iehova e te akaaerenga tana e taangaanga nei kia akatere i tona iti tangata i teia tuatau. Me akapera tatou ka riro te reira ei akaruru i to tatou akaaerenga taeake ki te ngai okotai.