Te Akaaere Anga e te Akatere Anga i te Putuputuanga

I ROTO i tana reta mua ki to Korinetia, kua akakite te apotetoro ko Paulo i tetai tuatua mou puapinga no runga i te Atua. Kua tata a Paulo e: “Kare oki te Atua i te tumu o te kononinoni pu ua, no te au ra.” I te tuatua anga no runga i te au uipaanga putuputuanga, akakite aia e: “E rave ra te au mea ravarai ma te tika e te manea.”—1 Kori. 14:33, 40.

² I te akamataanga tikai o tana reta, kua akamatakite atu a Paulo no runga i te tu pae ke i roto i te putuputuanga i Korinetia. Kua ako atu a Paulo i te au taeake, “ei tuatua okotai ta kotou ravarai” e “kia kapiti marie ra kotou ma te ngakau okotai e te manako okotai.” (1 Kori. 1:10, 11) I reira kua ako aia no runga i te au mea tuke tuke e ō maira te tu taokotai o te putuputuanga. Te oronga anga i te akatutuanga no runga i te kopapa tangata, akaari mai a Paulo e ka anoanoia te tu rotai e te tu taokotai. Kua raurau aia i te katoatoa i roto i te putuputuanga Kerititiano kia akono i tetai e tetai ma te aroa takinga meitaki noatu eaa ta ratou apainga. (1 Kori. 12:12-26) Te akaari maira te tu rotai e te tu taokotai o te au taeake i roto i te putuputuanga e ka akaaere meitakiia te reira.

³ Akapeea ra me akaaere i te putuputuanga Kerititiano? Naai e akaaere i te reira? Mei teaa te tu me akanoo i te reira? Koai ma te ka ikiia no teia au apainga? Me akariro tatou i te Pipiria ei arataki ia tatou, ka taka meitaki te pauanga ki teia au uianga.—1 Kori. 4:6.

KO TE ATUA TE AKAAERE

⁴ Akatumuia te putuputuanga Kerititiano i te rā Penetekote 33 T.N. Eaa ta tatou ka kite no runga i te putuputuanga i te anere mataiti mua? Ko te Atua te akaaere e te akatere, tei raro te putuputuanga i ta te Atua (reo Ereni, the·osʹ) tutara (reo Ereni, kraʹtos). Ka kiteaia teia nga tuatua i roto ia 1 Petero 5:10, 11. No runga i tei tupu i Ierusalema mei tetai 2,000 mataiti i topa, akakite papu teia tataanga akauruia e, na te Atua i akatumu i te putuputuanga o te au Kerititiano akatainuia. (Anga. 2:1-47) Nona taua ngutuare ra e taua iti tangata ra. (1 Kori. 3:9; Ephe. 2:19) Teia tuatau, kua aru meitaki te putuputuanga i te tu i akaaereia ai, e i raveia ai te angaanga tei akanooia i te anere mataiti mua.

⁵ Mei te 120 au pipi o te putuputuanga i te akamataanga. Kua akatupuia a Ioela 2:28, 29, te riringi angaia mai te vaerua tapu ki runga ia ratou. (Anga. 2:16-18) I taua rā rai mei te 3,000 aronga ke atu tei papetitoia e kua kapitiia mai ki roto i te putuputuanga o te aronga akatainuia. Kua āriki ratou i te tuatua no runga i te Mesia e kua “mou piri tikai atura ratou i ta te au aposetolo i apii.” Muri ake i te reira, ko “te aronga i akaoraia ra, kua kapitiia ïa e te Atu i te ekalesia.”—Anga. 2:41, 42, 47.

⁶ Kua tupu rava atura te putuputuanga i Ierusalema e kua akaapa maira te kau taunga e kua kī rava a Ierusalema i ta ratou apiianga. E maata te au taunga ngati Iuda tei riro mai ei au taeake i roto i te putuputuanga.—Anga. 5:27, 28; 6:7.

⁷ Akakite a Iesu e: “Ei kite oki kotou noku i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.” (Anga. 1:8) E kua tupu akera te takinga kino i Ierusalema i muri ake i te mate o Setephano, e kua pueu aere te au pipi e noo ra i Iudea e Samaria. Inara i te au ngai ravarai ta ratou i aere, kua akakite ratou i te tuatua meitaki e e maata te au pipi tei kapitiia mai, no Samaria tetai papaki ia ratou. (Anga. 8:1-13) I muri mai, kua tutu aereia te tuatua meitaki ki te aronga peritome koreia, e au tangata no te pa enua kare i te ngati Iuda. (Anga. 10:1-48) Tei tupu mai no teia angaanga tutu aere, e manganui te au pipi e te au putuputuanga tei akamataia i vao ake ia Ierusalema.—Anga. 11:19-21; 14:21-23.

⁸ Eaa te au akanoonooanga tei raveia i te akapapu e kia akaaereia te au putuputuanga e kia akatereia na roto i te mataara ta te Atua i akanoo? Kua orongaia mai te aratakianga na roto i te vaerua o te Atua ki te aronga pakari kia akono i te anana. I roto i te au putuputuanga ta Paulo e Banaba i atoro i to raua tere mitinari mua, kua iki raua i tetai au tangata ei aronga pakari. (Anga. 14:23) Akakite mai te tangata tata Pipiria a Luka i tetai au mea no runga i to Paulo uipa anga ma te aronga pakari o te putuputuanga i Ephesia. Akakite a Paulo e: ‘E teianei, e matakite ia kotou uaorai, e te anana katoa i akariroiaʼi kotou e te vaerua tapu ei tiaki i rungao ra, kia akaangai oki kotou i te ekalesia a te Atua, ko tana i oko i tona uaorai toto.’ (Anga. 20:17, 28) Kua tau ratou kia riro ei aronga pakari no te mea kua tukatau ratou no te au turanga e umuumuia maira e te Tuatua a te Atua. (1 Timo. 3:1-7) Kua akamanaia a Tito, te oa angaanga o Paulo kia iki i te aronga pakari i roto i te putuputuanga i Kereta.—Tito 1:5.

⁹ I te mea te maata atura te au putuputuanga tei akamataia, ko te au apotetoro rai e te aronga pakari i Ierusalema, te au akaaere no te putuputuanga Kerititiano tei totoa ki te pa enua i te anere mataiti mua. Ko ratou te pupu akaaere.

¹⁰ Kua akamārama te apotetoro ko Paulo ki te putuputuanga i Ephesia, e me aru ratou i te aratakianga a te vaerua o te Atua, ka vai rai te tu taokotai o te putuputuanga, no to ratou tu tiratiratu ki te taoonga upoko o Iesu Mesia. Kua raurau a Paulo i te au Kerititiano i reira, kia akatupu i te tu akaaka e kia tamou marie i ‘te taokotaianga a te vaerua’ na roto i te pirianga au ki te au taeake pouroa i roto i te putuputuanga. (Ephe. 4:1-6) I reira kua taiku mai aia ia Salamo 68:18, e kua akaaite i te reira kia Iehova tei oronga mai i teia au tangata tukatau ei au apotetoro, au peroveta, aronga tutu evangeria, au tiaki e te au puapii, kia akono i te au anoano o te putuputuanga. Ei apinga aroa no ko ia Iehova, ka akamatutu teia au tangata i te putuputuanga kia akatupu i te au mea ravarai te ka akamareka i te Atua.—Ephe. 4:7-16.

TEIA TUATAU, ARU TE AU PUTUPUTUANGA I TE AKARAANGA A TE AU APOTETORO

¹¹ Teia tuatau, ko te reira rai te tu o te akaaere anga e aruia nei i roto i te au putuputuanga pouroa o te Au Kite o Iehova. Kua taokotaiia teia au putuputuanga katoatoa i te ao katoa nei e kua akatumuia te reira ki runga i te aronga akatainuia. (Zeka. 8:23) Na roto ia Iesu i tupu ei teia. Mei tana i taputou, kua vai tiratiratu rai aia ki tana au pipi akatainuia “e tae ua atu ki te openga o teianei ao.” Te au tangata tei apaiia mai ki roto i teia putuputuanga, kua āriki ratou i te tuatua meitaki no runga i te Atua e kua akatapu i to ratou oraanga ma te ngakau katoa Kiaia, e kua papetitoia ei au pipi na Iesu. (Mata. 28:19, 20; Mare. 1:14; Anga. 2:41) Kua āriki ratou i “te tiaki mamoe meitaki,” ia Iesu Mesia ei Upoko no te anana katoa, koia oki te au Kerititiano akatainuia o te putuputuanga e te “mamoe ke atu.” (Ioa. 10:14, 16; Ephe. 1:22, 23) Kua vai ua rai te tu taokotai o taua ‘anana okotai,’ no to ratou tu tiratiratu i te āriki i te taoonga upoko o te Mesia, e te kauraro ki “te tavini akono meitaki e te pakari” ta te Mesia i iki. Kia tuku ua rai tatou i to tatou irinakianga ki roto i te tavini akono meitaki i teia tuatau.—Mata. 24:45.

ANGAANGA A TE AU TAOKOTAIANGA I RARO I TE PUPU AKAAERE

¹² Kua akanooia tetai au taokotaianga kia rauka i te oronga i te kai pae vaerua i te tuatau tau, e te tutu i te tuatua meitaki o te Patireia i mua ake i te openga. Kua tikaia teia au taokotaianga i raro ake i te ture a te au enua tuke ke, e taokotai ana ratou tetai ki tetai. Na ratou e akapapu ana e kia tere meitaki te tutu anga i te tuatua meitaki i te ao katoa nei.

TE TU E AKATEREIA ANA TE AU OPATI BETELA

¹³ Me akanooia tetai opati Betela, ka ikiia mei te toru tuma tangata pakari ei akono i te angaanga i roto i tera enua me kore i te au enua i raro i te akatereanga a tera opati Betela. E tai mema o te kumiti, koia te taeake tauturu no te Kumiti Opati Betela.

¹⁴ Te au putuputuanga i raro i te opati Betela tataki tai, kua akanooia ki roto i te au kotinga. Tuke tuke te mamaata o teia au kotinga, tei runga ua i te enua e te reo, pera katoa te maata o te au putuputuanga i roto i te au ngai tei tukuia na tera Opati Betela e akatere. Ka ikiia tetai akaaere kotinga ei akono i te au putuputuanga i roto i te au kotinga tataki tai. Ka oronga te opati Betela i te aratakianga ki te akaaere kotinga no runga i te akono anga i tana au tuanga angaanga.

¹⁵ Te āriki ra te au putuputuanga i te au akanoonooanga a te akaaerenga tei akatakaia mai ei tauturu i te katoatoa. Te āriki katoa ra ratou i te aronga pakari tei ikiia, kia akaaere i te angaanga i te au opati Betela, au kotinga, e te au putuputuanga. Irinaki ratou ki runga i te tavini akono meitaki e te pakari kia oronga mai i te kai pae vaerua i te tuatau tau. Teia tuatau, te aru matatio nei te tavini akono meitaki i te aratakianga a te upoko ko Iesu Mesia, te akono marie i te au kaveinga Pipiria, e te aru i te aratakianga a te vaerua tapu. Ia tatou e taokotai nei te angaanga kapiti, te kite nei tatou i te tuatua mou e tupu atura, e mei te au Kerititiano rai o te anere mataiti mua, “tinamou atura te au ekalesia i te akarongo anga i te tuatua, tupu atura i te maata anga, kare e rā i tivata.”—Anga. 16:5.