Akanoonooanga no te au Ngai Akamorianga

TE AKAUEIA maira te aronga akamori ia Iehova kia akaputuputu mai no tetai aratakianga e te akamaroiroianga. (Ebe. 10:23-25) Te ngai mua no te akamorianga a te ngati Iseraela te iti tangata ikiia o Iehova, ko te ‘puakapa, no te Are uipaanga.’ (Exo. 39:32, 40) Muri mai, kua akatu a Solomona te tamaiti a Davida i tetai are, me kore iero, ei akakakā i te Atua. (1 Ari. 9:3) Muri ake i te takoreia anga te iero i te 607 M.T.N., kua akanoo te ngati Iuda kia raveia te au uipaanga ki roto i te au are tei kapikiia, e sunago. Kare i roa ana, kua pātu akaouia te iero e kua akariroia ei ngai akamorianga mou. Kua apii katoa a Iesu i roto i te au sunango e te iero. (Luka 4:16; Ioa. 18:20) Kua rave katoa a Iesu i tetai uipaanga i runga i te maunga.—Mata. 5:1–7:29.

² I muri ake i te matenga o Iesu, kua akamata te au pipi i te akaputuputu i te au ngai tangata. Kua uipa katoa ratou i roto i te au are o te au taeake, i te apii i te Tuatua a te Atua e kia aravei i te au oa akarongo. (Anga. 19:8, 9; Roma 16:3, 5; Kolo. 4:15; Phile. 2) Tetai taime ka anoanoia te au Kerititiano kia uipa i te au ngai ke, me kore i te au ngai ngaro mei te aronga patoi. E mea inangaro na te au tavini o te Atua i mua ana kia akaputuputu i te au ngai no te akamori, kia “apiiia e Iehova.”—Isa. 54:13.

³ Teia tuatau, e rave katoaia ana te au uipaanga Kerititiano i te au ngai tangata e i te au ngutuare. E rave katoaia ana te uipaanga no te tutu evangeria i te kainga o te au taeake. Te aronga tei akatuera mai to ratou kainga, kia ratou e akameitakianga tikai teia. Na roto i teia akanoonooanga, e manganui tei akamatutuia to ratou akarongo.

ARE UIPAANGA PATIREIA

⁴ Ko te Are Uipaanga Patireia te ngai matauia e te Au Kite o Iehova no ta ratou au uipaanga. Ka okoia mai tetai potonga enua e oti ka pātuia tetai Are Uipaanga Patireia ou ki runga, me kore ka akaouia te are kua pātu takereia i reira. Kia akaiti mai te akapouanga moni e kia akapuapinga meitakiia teia au ngai, e maata te au putuputuanga tuke ke e taangaanga nei i te Are Uipaanga Patireia okotai. I tetai au ngai, ka anoanoia kia tutaki i tetai are ei ngai uipaanga. No te au Are Uipaanga Patireia ou e te au are tei akaou maataia, e mea tau kia maaniia tetai akatapuanga no te are. Inara me e au angaanga rikiriki ua te ka raveia no te akaou i tetai Are Uipaanga Patireia e vai ra, kare e anoanoia kia rave i tetai akatapuanga.

⁵ Kia tau ua te au Are Uipaanga Patireia ka pātu, eiaa kia akariroia ei akaariari anga. Noatu e tuke ke te parani o te are mei tera ngai ki tera ngai, te taangaangaia nei rai te reira no te akakoroanga i maaniia ai. (Anga. 17:24) Kia tau ki te au turanga o te enua, kia mako e kia tau ua teia au ngai no te rave i te au uipaanga Kerititiano.

⁶ Pouroa te au putuputuanga o te Au Kite o Iehova, ka oronga tauturu ratou no te taangaanga, te akatereanga, e te ripeaanga i te Are Uipaanga Patireia tei tukuia ratou ki roto. Kare e koi moni e kare e patiia atu te moni. E pia tetai tei akatakaia no te moni tauturu me ka inangaro te aronga i tae mai i te oronga moni tauturu no te au mea e ō maira te taangaanga anga i te are uipaanga. Ka rave ratou i te reira no to ratou inangaro e te tae o te ngakau.—2 Kori. 9:7.

⁷ Ki te katoatoa i roto i te putuputuanga, e tikaanga ngateitei tikai teia kia turu i te akanoonooanga Are Uipaanga Patireia i te pae moni, e kia akono i te reira kia vai meitaki ua e te mā. E tukuia ana na tetai tangata pakari me kore tavini tauturu e akanoonoo i teia angaanga. Tei matauia na te au pupu tutu evangeria tuke ke e rave i teia i raro i te akatereanga a to ratou akaaere me kore tona tauturu. Kia riro a roto e a vaʼo i te Are Uipaanga Patireia, ei akakakā i te ingoa o Iehova e tona akaaerenga.

⁸ Me tere atu i te okotai putuputuanga ka uipa i roto i tetai are uipaanga, ka akanoo te aronga pakari o te putuputuanga i tetai Kumiti Akatere o te Are Uipaanga Patireia, na ratou e akamako i te au mea e ō maira te are e te enua. Ka iki te au pupu aronga pakari i tetai taeake ei taeake tauturu no te kumiti akatere. I raro i te akatereanga a te au pupu aronga pakari, ka akapapu te kumiti akatere e kia tamāia te are uipaanga, kia akono meitakiia, e kia rava te au mea ka anoanoia no te reira. Ka anoanoia kia taokotai meitaki te au putuputuanga e ō maira.

⁹ Me e maata te putuputuanga ka taangaanga i te Are Uipaanga Patireia okotai, penei ka tauiui te akanoonooanga no te taime o te au uipaanga. Ka akanoonoo te aronga pakari i teia na roto i te tu rotai e te aroa taeake. (Phili. 2:2-4; 1 Pete. 3:8) Kare o tetai putuputuanga tikaanga kia rave i te au ikianga no tetai mai. Me atoro mai te akaaere kotinga i tetai putuputuanga e taangaanga ra i te Are Uipaanga Patireia, ka taui te au putuputuanga ke mai i to ratou taime uipaanga no tera epetoma.

¹⁰ Ka rauka kia taangaanga i te Are Uipaanga Patireia no te au akaipoipo e te tanumanga me akatika mai te Kumiti Raverave o te Putuputuanga. Ka akamanako meitaki te aronga pakari i te patianga, e ka akatumuia ta ratou tukuanga tika ki runga i te aratakianga no ko i te opati Betela.

¹¹ Te aronga tei orongaia te tika kia taangaanga i te Are Uipaanga Patireia no taua akakoroanga ra, kia akaari ratou i te tu Kerititiano. Eiaa e rave i tetai ua atu mea i ko i te Are Uipaanga Patireia te ka akamareka kore i te putuputuanga me kore, te ka taviivii i te ingoa o Iehova e to te putuputuanga. (Phili. 2:14, 15) I raro i te aratakianga a te opati Betela, ka taangaangaia te Are Uipaanga Patireia no te au angaanga e ō maira te akamorianga mei te Apii Tereni Orometua no te Patireia e te Apii Angaanga Painia.

¹² Ka akangateitei ua rai te putuputuanga i to ratou ngai uipaanga. Kia akaata mai to tatou kakau, akamanea, e to tatou tu mako i te tu ngateitei e ō maira te akamorianga a Iehova. (Kohe. 5:1; 1 Timo. 2:9, 10) Me akono tatou i te ako no runga i teia, te akaari ra tatou i te tu akaperepere no ta tatou uipaanga Kerititiano.

¹³ E mea puapinga te tu mako i te au taime uipaanga. Te akamaroiroiia atu nei te au tamariki kia noo ki te pae i to ratou metua. Te au metua e tamariki rikiriki ta ratou, te akamaroiroiia atu nei ratou kia noo ki te ngai kare e tamanamanata i etai ke me ka anoanoia kia apai i te tamariki ki vao.

¹⁴ I te taime o te uipaanga, ka tukuia te au taeake tukatau ei raverave i ko i te Are Uipaanga Patireia. Kia akaari ratou i te tu oaoa, tauturu i te au taeake e kia kite i te taime tau no te rave i tetai mea me anoanoia. Kia aravei atu i te aronga ou, tauturu i te aronga taroaroa i te kimi i tetai nooanga, rekoti i te maata o te aronga tei tae mai, akapapu e te angaanga meitaki ra te au apinga tamaanaana e kia rava te reva ou e aere maira ki roto. Me anoanoia, kia akamaara atu te aronga raverave i te au metua, kia akamako i ta ratou tamariki, kia kore e orooro aere i mua ake e i muri ake i te uipaanga me kore i mua i te paata. Na roto i te tu maru e te tau, penei ka pati te tangata raverave i te metua o tetai tamaiti marikonga kore kia apai iaia ki vao kia kore e tamanamanata i te katoatoa. Ka mataora te katoatoa i te au uipaanga no te tauturu a teia au taeake raverave. E meitaki atu kia tukuia te aronga pakari e te au tavini tauturu ei aronga raverave.

PĀTU ARE UIPAANGA PATIREIA

¹⁵ I te anere mataiti mua, e maata atu te apinga a tetai au Kerititiano i ta etai atu, no reira a Paulo i tata ai e: “Kia aiteite ra, kia riro ta kotou apinga maata ei tauturu atu i to ratou ngere i teianei, e kia tauturu mai ratou i to kotou ngere i ta ratou apinga maata i tona atu rā, kia aiteite.” (2 Kori. 8:14) I teia tuatau te raveia nei rai teia tu “kia aiteite” ua te turanga o te katoatoa. Te akaputuia nei te moni tauturu a te au putuputuanga i te ao katoa nei ki te ngai okotai ei tauturu i te pātu e te akaou i te au Are Uipaanga Patireia. Teia moni oronga a te au taeake i te ao katoa, te āriki rekareka nei te akaaerenga e te au putuputuanga tei puapingaia.

¹⁶ Kia tau ki te parani no te au enua, kua akataka te opati Betela i tetai au Are Uipaanga Patireia, no tetai au putuputuanga. Na te opati Betela e iki i te taime e te ngai ka pātuia tetai au Are Uipaanga Patireia ou, e te akaou i te au Are Uipaanga Patireia i te ngai e akatereia ra e te opati Betela. Me tupu te au tumatetenga, ka raveia tetai au akanoonooanga no te au angaanga ripea ki runga i te au Are Uipaanga Patireia i kino, e i tetai au taime, ki runga i te au are o te au taeake.

¹⁷ Ka iki te opati Betela i tetai aronga tauturu kia oko mai i te au enua, kia maani i te parani are, kia pati i te tikaanga no te pātu are, kia pātu i te are, e kia ripea i te reira. No te mea e maata te au Are Uipaanga Patireia e anoanoia ra no te au enua, e maata te aronga tauturu ka anoanoia. Te akamaroiroiia nei te aronga kua papetitoia e tei inangaro i te tauturu, kia akaki i tetai pepa patianga e kia oronga i te reira ki to ratou Kumiti Raverave o te Putuputuanga. Ka rauka katoa i te au taeake e te au tuaine kare i papetitoia i te tauturu i te pātu me kore i te akaou i to ratou uaorai Are Uipaanga Patireia.

AU ARE AKAPUTUPUTUANGA

¹⁸ E uipa ana te au Kerititiano o mua ana i roto i te au pupu rikiriki ua. I tetai au taime ra, e manganui te tangata e akaputuputu mai ana. (Anga. 11:26) Mei tera rai i teia tuatau, e mamaata rai te au pupu o to Iehova iti tangata e uipa mai ana no te au akaputuputuanga kotinga e te au uruoaanga tapere. E tutakiia ana te au ngai no teia akakoroanga, inara me kare e tau e me kare e rauka tetai ngai, penei ka rauka mai te Are Akaputuputuanga ei ngai akamorianga.

¹⁹ Tetai au taime, e okoia mai ana tetai are, ka akaouia te reira e oti ka taangaangaia ei Are Akaputuputuanga. Maataanga o te taime, e okoia mai ana tetai ngai e oti ka pātuia tetai are ki runga. Tuke tuke te mamaata o te au Are Akaputuputuanga, kia tau ua ra ki te anoano o te au putuputuanga i reira. Na te opati Betela e tuku i te tika no te oko mai me kore no te pātu i tetai are, i muri ake ra i te akapapu meitaki anga e eaa te moni ka pou e te maata o te moni ka inangaroia.

²⁰ Ka iki te opati Betela i tetai au taeake kia akono i te akatereanga o te Are Akaputuputuanga e te au angaanga ripea. Kua akanoonooia te au kotinga, kia tamā putuputu, kia tamā i te au ono marama, e kia ripea i teia au ngai. E mea puapinga kia tauturu mai te au taeake i te rave i teia au angaanga. Te akamaroiroiia atu nei te au putuputuanga kia turuturu mai i teia au akanoonooanga.—Sala. 110:3; Mala. 1:10.

²¹ Tetai au taime, e taangaanga katoaia ana te Are Akaputuputuanga no tetai au angaanga mei te au apii Pipiria e te au uipaanga a te au akaaere kotinga. Mei te Are Uipaanga Patireia rai, kua akatapuia te Are Akaputuputuanga ei ngai no te akamorianga. Me uipa tatou i ko i tetai Are Akaputuputuanga, kia riro to tatou tu, to tatou kakau, e to tatou akamanea, ei tu akangateitei mei tei matauia me akamori tatou i ko i te Are Uipaanga Patireia.

²² E manganui te aronga ou e inangaro nei kia riro ei tuanga no to Iehova akaaerenga i teia au tuatau openga. E akairo teia no ta Iehova akameitakianga. (Isa. 60:8, 10, 11, 22) No reira, ka inangaro tatou i te turuturu i te au akanoonooanga no te oko mai, e te akono i teia au ngai akamorianga, kia mā ua e kia tau. Me akapera, te akaari ra tatou i to tatou āriki rekareka no teia au ngai, tei riro ei tauturu ia tatou kia akamaroiroi i tetai e tetai, e kia maata atu rai te maroiroi, ia tatou e akara ra i to Iehova rā e vaitata maira.