Uriurianga Openga ki te Aronga ka Papetito

Mea matauia i te rave i te au papetitoanga i ko i te au akaputuputuanga e te au uruoaanga a te Au Kite o Iehova. I te openga o te ako no te papetito ka pati te vaa tuatua i te aronga te ka papetito kia tu ki runga e kia pau maata mai i te nga uianga ka aru mai:

1. Kua tataraara ainei koe no taau au ara, kua akatapu i toou oraanga kia Iehova, e kua āriki i tana ravenga kia rauka te ora na roto ia Iesu Mesia?

2. Kua mārama ainei koe e na roto i toou papetitoanga, kua riro mai koe ei Kite no Iehova i roto i to Iehova akaaerenga?

Te pauanga ki teia nga uianga, te aaki ra te aronga ka papetito i mua i te katoatoa e kua tuku ratou i to ratou akarongo i roto i te oko a Iesu Mesia, e kua akatapu i to ratou oraanga kia Iehova. (Roma 10:9, 10) Te aronga ka papetitoia, kia na mua ratou i te akamanako meitaki i teia nga uianga na roto i te pure, kia rauka ia ratou te oronga i ta ratou pauanga kia tau ki to ratou uaorai irinakianga.

Kua akatapu ainei koe ia koe uaorai kia Iehova na roto i te pure, ma te taputou i te akamori iaia anake e te akariro i tona anoano ei mea puapinga rava atu i roto i toou oraanga?

Kua papu tikai ainei ia koe i teianei e ka inangaro koe kia papetitoia me papa koe?

Eaa te kakau tau kia aao no te papetito? (1 Timo. 2:9,10; Ioane 15:19; Phili. 1:10;)

Ka aao tatou i te au kakau “akatietie kore e te akono meitaki” no te akaari i to tatou tu “akono i te Atua.” No reira, kare te aronga ka papetito e aao i te kakau paî vai ka akaariari ua mai i te kopapa, me kore te kakau e au tuatua me kore e au tutu tau kore tei tataia ki runga. Kia akamanea ratou ma te tu ngateitei koia oki kia mako, kia mā, taurekareka e kia tau ki te akakoroanga.

Mei teaa ra to tetai tangata tu e tana peu me papetitoia aia? (Luka 3:21, 22)

Kua akanoo to Iesu papetitoanga i te akaraanga no te au Kerititiano me papetitoia i teia tuatau. Kua kite aia e e takainga puapinga tikai teia, e kua akaariia mai teia na roto i tona tu e tana peu. No reira kare te ngai papetitoanga i te ngai tuatua tau kore, kanga, paî vai, e no te au tu e te au peu akanoanoa i teia akakoroanga; e kare te au Kerititiano ou e akariro e kua re ratou. Noatu e atianga mataora te papetito, kia akaariia teia mataora na roto i te tu ngateitei.

Akapeea te aravei putuputu e te piri vaitata ua anga ki te putuputuanga me tauturu ia koe kia akatupu i taau akatapuanga kia Iehova?

Muri ake i toou papetitoanga, eaa i puapinga ai kia akanoo i tetai porokaramu apii naau uaorai, e kia piri putuputu ki roto i te angaanga orometua?

AU ARATAKIANGA NO TE ARONGA PAKARI I ROTO I TE PUTUPUTUANGA

Me akakite tetai papuritia e ka inangaro aia kia papetitoia, kia akamaroiroiia aia kia tatau meitaki i te “Au Uianga no te Aronga tei Inangaro Kia Papetitoia,” i te kapi 185-207 o teia puka. Kia akamou aia i te manako ki runga i te “Karere ki te Papuritia Kare i Papetitoia,” akamata i te kapi 182, e akamārama maira akapeea aia me akapapa no te uriurianga ki te aronga pakari. Mei tei akakiteia i reira, kia akara te tangata ka papetito i te au manako tana i tata e kia akatuera i teia puka i te taime o ta ratou uriurianga. Kare e anoanoia kia uriuri i te au uianga kiaia i mua ake ka uriuri ei ratou ko te aronga pakari.

Tetai tangata ka inangaro kia papetitoia, ka akakite aia ki te tauturu no te pupu aronga pakari. Me oti i te tangata ka papetitoia i te tatau i te “Au Uianga no te Aronga Tei Inangaro Kia Papetitoia,” kia ui te tauturu no te pupu aronga pakari kiaia me kua akatapu aia iaia uaorai kia Iehova na roto i te pure no te rave i Tona anoano. Me kua rave aia i te reira, ka pati te tauturu no te pupu aronga pakari e rua tangata pakari kia uriuri ki te tangata ka papetitoia i te “Au Uianga no te Aronga Tei Inangaro Kia Papetitoia.” Ka tukuia e tai tangata pakari kia rave i te tuanga okotai. Eiaa e tiaki kia akakite roaia mai te rā o te akaputuputuanga me kore uruoaanga ka rave ei i teia au uriurianga.

Kua akatakaia e rua tuanga o teia uriurianga, ka oti ua e tai tuanga i te ora okotai, kare ra e araiia me ka anoanoia kia roa atu te taime no te uriuri. Kia akamata e kia akaoti te uriurianga na roto i te pure. Eiaa te tangata pakari e te tangata ka papetito e rapurapu kia oti vave teia au uianga. Ko teia uriurianga tetai mea mua kia tuku te aronga pakari tei ikiia ki roto i ta ratou porokaramu.

Meitaki roa atu kia uriuriia te au uianga ki te tangata tataki tai, eiaa i roto i te pupu. Me akataka mai te tangata ka papetito i tona manako no runga i te au uianga tataki tai, ka taka meitaki atu i te aronga pakari e mei teaa te oonu o tona mārama, e ka papu i reira e me kua papa aia no te papetito. E tetai, penei e kare te tangata ka papetitoia e emiemi i te akakite mai i tona uaorai manako. Me e tane akaipoipo e tana vaine, kia rave kapitiia teia uriurianga kia raua.

Me e tuaine te ka papetitoia, kia raveia teia uriurianga ki tetai ngai e tangata tetai e akara maira kare ra e rongo mai ana. Mea tau kia apai i tetai tangata pakari me kore i tetai tavini tauturu, me uriuri i tetai tuanga mei tei akatakaia i raro ake nei.

Roto i te au putuputuanga e tokoiti ua te aronga pakari, ka rauka i tetai tavini tauturu tukatau tei mārama meitaki eaa tei anoanoia, kia uriuri i te au uianga papetito i roto i te “Tuanga 1: Au Irinakianga Kerititiano.” Ko te aronga pakari anake ua te ka uriuri i te “Tuanga 2: Oraanga Kerititiano.” Me kare e rava te au taeake tukatau i roto i te putuputuanga, penei kia tuatua atu ki te akaaere kotinga kia akapapu e me ka rauka i tetai putuputuanga vaitata mai kia tauturu.

Me e tamariki ua te aronga ka papeptito, kia kapitiia mai tona (nga) metua kua papetitoia ki teia uriurianga. Me kare tetai ia raua e va mai, penei kia kapitiia mai e rua tangata pakari (me kore e tai tangata pakari, e tai tavini tauturu, kia tau ki te tuanga e uriuriia ra.)

Kia akapapu te aronga pakari e kua mārama meitaki te tangata ka papetitoia i te au apiianga o te Pipiria. Kia akapapu katoa ratou e kua āriki tikai aia i te tuatua mou i roto i tona ngakau e te akaari maira i te tu akangateitei no to Iehova akaaerenga. Me kare tera tangata i mārama i te apiianga a te Pipiria, ka akapapu te aronga pakari e kia tauturuia aia kia tau no te papetito a tetai tuatau ki mua. Tetai papaki, penei ka anoanoia tetai tuatau no ratou kia akaari mai i to ratou inangaro no te tutu evangeria me kore no te tu kauraro ki te au akanoonooanga a te akaaerenga. Tei runga i te aronga pakari te akara mei teaa te maata o te taime ka akapouia i te tuanga okotai, kia papu tikai ia ratou e me kua papa rai te reira tangata kia papetitoia. Noatu e maata atu te taime ka pou no tetai au uianga e ka iti mai no etai atu, inara kia uriuriia te au uianga pouroa.

Te aronga pakari tei ikiia kia uriuri i teia uianga, ka uipa kapiti ratou i muri ake i te tuanga rua i te tuku i ta raua tika e me ka ārikiia taua tangata kia papetitoia e me kare. Kia akamanako rai te aronga pakari i te turanga o te reira tangata, tona mārama, e etai atu au tu. Ta tatou e inangaro nei ko te aronga tei āriu to ratou ngakau kia Iehova e ko tei mārama i te tuatua mou o te Pipiria. Ka riro taau tauturu ei akapapa meitaki i te aronga ka papetitoia kia akatupu i ta ratou apainga puapinga kia riro ei au orometua no te tuatua meitaki.

Muri ake i te reira, kia uipa kapiti e tai me kore te nga tangata pakari e te tangata ka papetitoia, kia akakite kiaia me kua tau aia kia papetitoia e me kare. Mei te mea e kua tau aia, kia uriuri te nga tangata pakari kiaia i te “Uriurianga Openga ki te Aronga ka Papetito,” i te kapi 206-207. Me kare i oti tana apii i roto i te nga puka Apii ia Tatou, e te Vai Tamou i Roto i te Aroa o te Atua, kia akamaroiroi te aronga pakari iaia kia akaoti te apii i taua nga puka i muri ake i tona papetitoanga. E akakite ki te tangata ka papetitoia e ka tataia te rā o tona papetitoanga ki roto i tona Congregation’s Publisher Record. Akamaara katoa kiaia e ka inangaro te aronga pakari i te au akakiteanga no runga iaia kia rauka i te akaaerenga i te akono ua rai i te angaanga a te Au Kite o Iehova takapini i te ao, e kia rauka iaia i te piri atu ki te au angaanga e te tauturu pae vaerua a te putuputuanga. Ko tetai ua atu akakiteanga ka oronga mai te au papuritia ou, ka akonoia te reira kia tau ki te Global Data Protection Policy of Jehovah’s Witnesses, i runga i te jw.org. Teia uriurianga e tai ngauru rai paa miniti ka pou me kore i raro ake.

E tai mataiti i muri ake i to te papuritia papetitoanga, kia uipa e rua nga tangata pakari kiaia i te akamaroiroi e te oronga atu i tetai au manako tauturu. Tetai o teia nga tangata pakari, koia te akaaere no te pupu o te taeake ou tei papetitoia. Mei te mea e tamariki ua aia, ka inangaroia kia ō mai rai tona nga metua Kerititiano. Kia riro te uipaanga ei akapumaana e ei akamaroiroi. Ka uriuri te aronga pakari i te turanga o tona akarongo e ka oronga atu i tetai au manako tauturu kia rauka iaia te akamou i tetai porokaramu tau no tana uaorai apii, tatau Pipiria i te au rā, te akamorianga a te ngutuare i te au epetoma, te aere ua rai ki te au uipaanga e te paupau i reira, e te tutu evangeria i te au epetoma ravarai. (Ephe. 5:15) Me kare rai i oti tana apii i roto i te nga puka Apii ia Tatou e te Vai Tamou i Roto i te Aroa o te Atua, kia pati te aronga pakari i tetai tangata kia tauturu iaia kia akapou i teia nga puka. Kia maoraora ua te aronga pakari i te oronga i ta ratou akameitakianga na roto i te tu akaperepere. Ka rava ua e tai me kore e rua nga manako akamaroiroi.