Eaa Te Tumu i Maata ai te Taitaia?

1, 2. Eaa ta te manganui e ui ana?

KUA pakokoia tetai oire e te ngaru akaki. Kua puipuiia te tangata i ko i tetai are pure, maata tei mate e kua kino ua tetai pae. Kua mate tetai vaine i te maki cancer, e rima ana tamariki e ora nei.

² Me tupu tetai mea kino e te tumatetenga mei teia, e maata te ui ana e, “Eaa ra te tumu?” Eaa ra teia ao i ki ei te makitakita e te taitaia. Kare ainei koe e umere ana i teia?

3, 4. (a) Eaa te uianga ta Habakuka i ui? (e) Peea a Iehova i te pau mai anga iaia?

³ Roto i te Pipiria, kua ui katoa te au tangata tiratiratu ki te Atua i teia au uianga. Ui te peroveta a Habakuka kia Iehova e: “Eaa ra oki koe i akakite mai ei iaku nei i te kino, akara uaʼi koe i te mate nei? te vai nei oki te āru e te rave aroa kore ki mua iaku nei: e te vai nei oki te aronga e akatupu i te karo e te tauetono.”​—Habakuka 1:3.

⁴ Roto ia Habakuka 2:2, 3, ka kite tatou i ta Iehova pauanga no te uianga a Habakuka e ta Iehova taputou kia akatikatika i taua au turanga ra. E aroa maata to Iehova i te tangata. Akakite te Pipiria e: “Koia oki te tiaki mai ia kotou.” (1 Petero 5:7) Mareka kore a Iehova i te tu taitaia. (Isaia 55:8, 9) Teianei ka uriuri tatou i te uianga, Eaa te tumu i maata ai te taitaia i teia ao?

EAA TE TUMU I MAATA AI TE TAITAIA?

5. Eaa ta te au puapii akonoanga i akakite no runga i te turanga taitaia? Eaa ra ta te Pipiria e apii maira?

⁵ Karanga te au orometua e te au puapii akonoanga e ko to te Atua anoano rai ïa, kia taitaia te tangata. Karanga tetai aronga e ko te au mea pouroa e tupu ana ki tetai tangata kapiti mai te au tumatetenga, kua akakoro ke ana te Atua i te reira, e kare roa tatou e mārama eaa te tumu. Tetai pae karanga ratou e te mate nei te tangata e te tamariki, kia rauka ia ratou te noo i te rangi e te Atua. Inara kare tera i te tika. Kare roa a Iehova e akatupu ana i te au mea kino. Akakite te Pipiria e: “Kia atea ke atu te tuatua kino i te Atua; e te ara i te Mana katoatoa.”​—Iobu 34:10.

6. No teaa te manganui i akaapa ai i te Atua no te turanga taitaia o teia ao?

⁶ Manganui tei akaapa i te Atua no te turanga taitaia i teia ao. Manako ratou e ko te Atua te tutara o teia ao. Roto i te Pene 3 kua apii tatou e ko Satani te tutara o teia ao.

7, 8. Eaa te tumu i maata ai te taitaia i teia ao?

⁷ Akakite te Pipiria e “te vai ua nei rai to te ao ravarai i raro ake i taua vaerua kino ra.” (1 Ioane 5:19) E taae kino tikai a Satani, te tutara o teia ao. Koia “tei pikikaa i to te ao katoatoa nei.” (Apokalupo 12:9) E manganui tei aite kiaia. Ko tetai tumu ua teia i ki ei teia ao i te pikikaa, makitakita e te takinga kino.

⁸ E au tumu ke atu rai tetai i maata ai te taitaia i teia ao. Muri ake i te meameaau, kua ïri mai te ara a Adamu e Eva ki runga i ta raua tamariki. No te ara, akatupu te tangata i te taitaia ki etai ke. Inangaro ratou te akaaere i etai ke e te kaitamaki atu, te tamaki e te rave kino i etai ke. (Koheleta 4:1; 8:9) Tetai taime e rokoia ana te tangata e te taitaia no te mea e tupu poitirere ua ana tetai au manamanata. (Koheleta 9:11) Penei aere ratou ki tetai ngai, tupu mai te manamanata kare i manakoia ana.

9. Eaa tatou i papu ei e e tumu tau to Iehova i akatika ai kia tupu ua atu te taitaia?

⁹ Kare roa a Iehova e akatupu i te taitaia. Kare nona te apa i tupu ei te tamaki, te aati ture e te takinga kino. Kare Nana e akatupu ana i te ngaruerue enua, te uriia e te vai puke. Penei ka ui koe e, ‘Me ko Iehova tei ririnui rava atu i te ao nei, eaa aia i kore ei e takore i te au mea rikarika e tupu nei?’ Kua kite tatou e e inangaro maata to Iehova ia tatou, no reira e tumu tau tetai i akatika ai aia i te taitaia.​—1 Ioane 4:8.

TUMU I AKATIKA AI A IEHOVA I TE TAITAIA

10. Eaa te akaapaanga a Satani ia Iehova?

¹⁰ I te aua i Edene, kua akavare te Tiaporo ia Adamu e Eva. Akaapa aia e e Tutara kino te Atua, e te uuna ra a Iehova i tetai apinga mei ia raua. Inangaro a Satani kia irinaki raua e koia te tutara meitaki atu ia Iehova e kare raua e anoano ia Iehova i roto i to raua oraanga.​—Genese 3:2-5; akara i te Au Manako Poto 27.

11. Eaa te uianga ka anoanoia kia pau tatou?

¹¹ Akarongo kore a Adamu e Eva ia Iehova e kua meameaau iaia. Manako raua e, e tikaanga to raua kia iki eaa te mea tika e eaa te mea tarevake no raua. Akapeea ra a Iehova me akapapu e kua tarevake raua e koia tei kite eaa te mea meitaki no raua?

12, 13 (a) Eaa te tumu i kore ei a Iehova e takore i te aronga meameaau i reira rai? (e) Eaa te tumu i akatika ai a Iehova ia Satani kia tutara, e te tangata kia akatere ia ratou uaorai?

¹² Kare a Iehova i takore ia Adamu e Eva i reira rai. Mari ra kua akatika aia ia raua kia anau tamariki. Akapapu a Iehova e kia rauka i ta raua tamariki i te iki e koai ta ratou ka inangaro ei tutara no ratou. To Iehova akakoroanga, kia akaki i te enua ki te au tangata apa kore, e ka tupu rai teia noatu eaa ta Satani ka rave.​—Genese 1:28; Isaia 55:10, 11.

¹³ Akaapa a Satani ia Iehova i mua i te manotini o te au angera. (Iobu 38:7; Daniela 7:10) Kua oronga a Iehova i te tuatau no Satani kia akapapu e me e tika tana akaapaanga. Kua oronga katoa Aia i tetai tuatau no te tangata kia akanoo i to ratou uaorai kavamani i raro i te tutara a Satani, ei akapapu e me ka puapingaia rai me kare te Atua e turu i te reira.

14. Eaa ta te tuatau i aereia mai ana i akapapu mai?

¹⁴ Tauatini ua atu mataiti te tutaraanga te tangata ia ratou rai e kare i puapingaia. Akapapu mai teia e e pikikaa a Satani. Ka anoanoia te tauturu a Iehova. Tika rai ta Ieremia e: “Kua kite oki au, e Iehova e, e kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.”​—Ieremia 10:23.

NO TEAA A IEHOVA I VAOO EI KIA ROA?

15, 16 (a) No teaa a Iehova i akatika ai kia roa te tuatau o te taitaia? (e) No teaa a Iehova i kore ei akatikatika i te au manamanata ta Satani i akatupu?

¹⁵ Eaa a Iehova i akatika ai kia roa te tuatau taitaia? Eaa aia i kore ei e takore i te au mea kino? Kua anoanoia tetai tuatau i te akapapu e kua puapinga kore ta Satani tutara. Akanoo te tangata i te au tu kavamani e kare i puapingaia. Noatu e maata to ratou mārama no te au apinga e ō maira te kite taieni, te tupu nei rai te tu akavaavaa, te ngere, te aati ture e te tamaki. Me kare a Iehova, puapinga kore ta tatou tutara.

¹⁶ Inara kare a Iehova i akatikatika i te manamanata ta Satani i akatupu. Naringa aia i pera, tera te aiteanga te turu ra aia ia Satani. Kare rava a Iehova e akapera. Tetai, ka manako te tangata e ka rauka ia ratou te tutara ia ratou uaorai. Kare tera i te tika e kare katoa a Iehova e turu i te reira. Kare rava aia e pikikaa.​—Ebera 6:18.

17, 18 Eaa ta Iehova ka rave ki te au kino pouroa ta Satani i akatupu?

¹⁷ Ka rauka ainei ia Iehova te takore i te au kino ta Satani e te tangata i akatupu? Ae noatu eaa, ka rauka ia Iehova. Kua kite a Iehova eaa te taime e pau pouroaia ai ta Satani au akaapaanga. I reira aia e akariro ei te enua ei parataito mei tana i akakoro. Te aronga pouroa i “roto i te rua” ka akatu akaouia. (Ioane 5:28, 29) Kare e tangata e maki e e mate akaou. Ka takore a Iesu i te au kino pouroa ta Satani i akatupu. Akamana a Iehova ia Iesu “kia akakore aia i te angaanga a te diabolo.” (1 Ioane 3:8) Akameitaki tatou ia Iehova no te mea e akakoromaki tikai tona ia tatou, i te oronga mai i te tuatau kia rauka ia tatou te kite iaia, e kia iki me ka inangaro tatou iaia ei Tutara no tatou. (E tatau ia 2 Petero 3:9, 10.) E me taitaia tatou, ka tauturu mai aia kia rauka ia tatou te akakoromaki.​—Ioane 4:23; e tatau ia 1 Korinetia 10:13.

¹⁸ Kare a Iehova e māro ia tatou kia iki iaia ei Tutara no tatou. Oronga mai aia i te tikaanga kia iki tatou. Akara tatou i te puapinga o teia apinga aroa.

AKAPEEA KOE ME TAANGAANGA I TEIA APINGA AROA?

19. Eaa te apinga aroa ta Iehova i oronga mai no tatou? No teea tatou ka akaperepere ei i teia apinga aroa?

¹⁹ Tuke te tangata mei te manu, kua oronga mai a Iehova i te tikaanga no tatou kia iki, kare aia i pera i te manu. Ka rauka ia tatou kia iki me ka inangaro tatou i te tavini ia Iehova e me kare. (Deuteronomi 30:19) Kare tatou i aite mei te matini tei maani uaia kia rave i te angaanga i maaniia ai te reira kia rave. Ka rauka ia tatou kia iki i ta tatou ka inangaro, to tatou au oa e ta tatou ka inangaro i te rave ki to tatou oraanga. Inangaro a Iehova kia mataora tatou.

20, 21 Eaa te ikianga meitaki rava atu taau ka rave i teianei?

²⁰ Inangaro a Iehova kia inangaro tatou iaia. (Mataio 22:37, 38) Mei te metua rai, me karanga mai tana tamaiti e “Inangaro au ia koe,” mareka aia me tuatua mai te tamaiti ma te ngakau tae no te mea kare aia i māroia ana. Oronga mai a Iehova i te tikaanga kia iki tatou me ka tavini iaia e me kare. Iki a Satani, Adamu e Eva kia patoi ia Iehova. Akapeea ra koe me taangaanga i teia apinga aroa?

²¹ Toou tikaanga kia iki, taangaanga i te reira ei tavini ia Iehova. Manganui tei iki kia akamareka ia Iehova e kua patoi ia Satani. (Maseli 27:11) Eaa taau ka rave i teianei kia tae ki roto i to Iehova ao ou me takore aia i te au turanga taitaia? Ka pau te pene ka aru mai i teia uianga.