Eaa te Tupu Ana me Mate Tatou?

Kua takake ainei tetai taau i akaperepere na te ara o te mate? Penei ka manako koe i teia tuatau mamae tikai: ‘Eaa te tupu ana me mate tatou? Ka kite akaou ainei tatou i te aronga tei akaperepereia?’ I teia apii e te ka aru mai, akamanako i te au pauanga pumaana a te Pipiria.

1. Eaa te tupu ana me mate tatou?

Kua akaaite a Iesu i te mate ki tetai moe tinainai. Kare tetai tangata i roto i tana moe tinainai e kite eaa te tupu ra kiaia. Akapeea te mate me akaaiteia ki te moe? Me mate tetai tangata kare aia e kite ana i te mamae. Kare aia e kite i te maromaroa, noatu tana akaperepere i tona au oa e te ngutuare tangata. “Kare ra a te aronga i mate ra e tuatua i kitea,” i na te Pipiria ei.​—E tatau ia Koheleta 9:5.

2. Akapeea tatou e puapinga ai me kite tatou i te tika no runga i te mate?

Te mataku ra te tangata i te mate​—e pera te aronga tei mate! Inara ka pumaana koe i ta te Pipiria e akakite ra no te mate. Karanga a Iesu: “Na te tuatua-mou kotou e akarangatira.” (Ioane 8:32) Kare te Pipiria i apii mai ana e e kopapa mate kore to te tangata, te ka ora ua atu i muri ake i tona mate anga. No reira, kare aia e mamae akaou. Mei te mea, kua mate te aronga mate, kare e rauka ia ratou i te takinokino mai ia tatou. Kare tatou e akamarū e te akamori, e kare e pure atu no te aronga tei mate.

Karanga tetai aronga e ka rauka ia ratou i te tuatua ki te aronga mate. Inara e ngata te reira. Mei ta tatou i apii mai, kare a te aronga i mate ra “e tuatua i kitea.” Te aronga tei manako e te tuatua ra ratou ki te aronga mate tei akaperepereia, penei te tuatua ra ratou ki te au temoni tei akatutu i te aronga tei mate. Me kite tatou i te tika no runga i te mate, ka paruru te reira ia tatou mei te au temoni. Te akamatakite maira a Iehova me tauta tatou i te karangaranga ki te aronga mate kua kite aia e ka takinokino te au temoni ia tatou.​—E tatau ia Deuteronomi 18:​10-12.

3. Apii kia kite i te turanga o tei mate

I teianei ao, tukeke te au irinakianga eaa te tupu ana me mate tatou. E tika, e pikikaa teia au irinakianga.

• Eaa te au irinakianga tei matauia i toou ngai no te turanga o tei mate?

VITIO: Eaa ra te Turanga o Tei Mate?​—Potonga Ua (1:19)

E tatau ia Koheleta 3:20, e oti uriuri i teia au uianga:

• I teia irava, eaa te tupu ana me mate tetai tangata?

• Ka ora ua atu ainei tetai tangata i muri ake i te mate anga?

Te akakite maira te Pipiria no tetai oa piri vaitata o Iesu, ko Lazaro. Ia koe e tatau ra ia Ioane 11:​11-14, akara akapeea a Iesu te tuatua anga no Lazaro. E oti uriuri i teia au uianga:

• Eaa ta Iesu i akaaite ki te mate?

• Eaa ta teia akaaite anga e akakite maira no te turanga o tei mate?

• E tau ainei te manako o te Pipiria no te mate?

4. Ka puapingaia tatou me kite tatou i te tika no runga i te mate

Me kite tatou i te tika no te mate, ka akarangatira te reira ia tatou kia kore e mataku i tei mate. E tatau ia Koheleta 9:10, e oti uriuri i teia uianga:

• Ka rauka ainei i tei mate te takinokino mai ia tatou?

Ka paruru te tuatua mou Pipiria ia tatou mei te irinakianga kia akamarū e kia akamoriia tei mate. E tatau ia Isaia 8:19 e Apokalupo 4:11, e oti uriuri i teia uianga:

• Eaa toou manako me kite a Iehova i tetai tangata e akamori ra e e kimi tauturu ra ki tetai tangata mate?

5. Pumaana tatou me kite i te tika no te mate

E maata te tangata tei apiiia e me mate ratou, ka tamamaeia ratou no ta ratou ara i mua ana. Inara pumaana tatou i te kite e kare te tangata e tamamaeia i muri ake i te mate anga​—pera te tangata tei rave ana i te kino. E tatau ia Roma 6:7, e oti uriuri i teia uianga:

• Mei ta tatou i tatau i roto i te Pipiria, me na te mate e akakore i te ara a tetai tangata, i toou manako te tamamaeia ra tetai tangata no tana au ara i mua ana?

Te maata atu ta tatou i kite no Iehova, kite mai tatou e kare rava a Iehova e akatika i tei mate ra kia tamamaeia. E tatau ia Deuteronomi 32:4 e 1 Ioane 4:8, e oti uriuri i teia au uianga:

• Ka mareka ainei te Atua ma tona au tu i teia nga irava, kia tamamaeia te aronga tei mate?

• Ka pumaana ainei koe te kite i te tika no runga i te mate? Eaa te tumu?

APIIANGA

Me mate tetai tangata, kua akamutu rai tona oraanga. Kare tei mate e mamae, e kare ratou e takinokino i te aronga ora.

Uriurianga

• Eaa te tupu ana me mate tatou?

• Akapeea tatou e puapinga ai mei te tika no runga i te mate?

• Akapeea te tika no te mate me akapumaana ia tatou?

KIMI KIMI

Kimi i te aiteanga tikai o te tuatua “soul” i roto i te Pipiria.

“Eaa te Soul?” (Web atikara)

Apii kia kite me e taangaanga ana te Atua i te aʼi tamamae anga no te akautunga i te aronga kino.

E Tika Ainei te Aʼi Tamamae Anga? (3:07)

Ka tau ainei kia mataku tatou i te aronga tei mate?

Au Vaerua o Tei Mate​—Ka Tauturu Ainei ia Koe me ka Akakino ia Koe? Te Vai Rai Ainei Ratou? (poroutia)

Akara akapeea tetai tangata ma te pumaana, te kite anga i te tika eaa te tupu ana me mate tatou.

“Umere Au i te Pauanga Taka Meitaki e te Māmā ua a te Pipiria” (Te Punanga Tiaki, Peperuare 1, 2015)