Angaanga Tiratiratu ma Iehova Katoa
“Naau, e te Atua, i apii mai iaku mei toku ou anga mai: e kua akakite au i taau ra au angaanga i umereia e teia noaʼi.”—SALAMO 71:17.
1. Eaa tatou ka tau ei kia karanga e e apinga orongaia mai te angaanga e Iehova?
KO TE angaanga tetai apinga aroa na te Atua i oronga ki te tangata. Kua karanga a Iehova, ki to tatou nga metua mua ra, kia Adamu raua ko Eva e: “E akaki i te enua nei, e e akavi.” E akaaoanga tikai te reira angaanga, inara tei roto tikai i te kotinga o te ka rauka ia raua kia rave. Ka tere atu to raua rekareka no te oraanga i te tauta anga i te pae kopapa e te manako, ka tere roa atu i tetai ua atu apinga i kitea e te au manu tei noo ra ki to raua kainga i te enua ra.—Genese 1:28.
2, 3. (a) Kua riro te angaanga ei aa na te aronga e manganui i teia tuatau, e no teaa ra? (e) Eaa te tuatau no te rave i tetai angaanga takake te ka tau tatou kia akamanako?
2 Noatu rai i to tatou tu apa ua nei, ko te “angaanga pakari” tei riro ei “meitaki” e “mea o maiia mai ïa e te Atua,” ta te tangata pakari ko Solomona i tata. (Koheleta 3:13) Te vaira to te tangata anoano kia taangaanga i tona au kite manako e te kopapa. E mea maromaroa te kore e angaanga. Tera ra, kare te au angaanga katoatoa i te meitaki e te puapinga. No te aronga e manganui, e apinga reka kore te angaanga, kua anauia mai kia rave ngata i te oraanga.
3 Inara, te vaira, te angaanga puapinga tikai te patiia ra te katoatoa kia rave. E maata te aronga patoi e te au manamanata na te aronga tei rave ra kia akakore atu. Eaa i puapinga maataʼi e kia tau tatou no te reira angaanga? Akapeea tatou me rave i te reira? I mua ake ka pau ei tatou i teia au uianga, e akamanako tatou i te mea mua ra:
Te Angaanga ra Tatou Naai?
4. Eaa te tu angaanga tei oronga i te rekareka e te merengo anga kia Iesu ra?
4 Kua karanga a Iesu Mesia: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.” (Ioane 4:34) No tana angaanga tiratiratu na Iehova kua apai mai i te rekareka maata e te merengo anga no Iesu. Na te reira i oronga mai i te akakoroanga no tona oraanga, e i te openga o tana angaanga orometua i te toru e te apa mataiti, kua tau tikai tana tuatua ki tona Metua i te rangi ra: “Kua akakakā au ia koe i te [enua, NW] nei: kua oti iaku te angaanga taau i o mai naku e rave ra.” (Ioane 17:4) Mei te akamaroiroi a te kai kopapa ra, ka pera katoa te angaanga i te pae vaerua ra. Kua akaketaketa katoa mai a Iesu i teia i tetai atu atianga iaia i akamaroiroi maira: “Auraka e angaanga i te kai pe ua, ko te kai ra te ka tika i te vairanga, e tae ua atu ki te ora mutu kore ra.” (Ioane 6:27) Ei tuke anga, ko te angaanga te ka kore e akatupu i te pae vaerua ka taki atu ia ki te manamanata e te mate oki.
5. Koai tei patoi i te angaanga meitaki ta Iesu i rave ra, e no teaa ra?
5 “Te angaanga ua nei rai toku Metua, ka angaanga katoa oki au.” Kua akakite atura Iesu i teia tuatua ki te ngati Iuda tei akaapa ra iaia nona i rapakau i tetai tangata i te Tapati tei makiia e 38 mataiti. (Ioane 5:5-17) Noatu rai e te rave ra aia i ta Iehova angaanga, kare te aronga patoi o te akonoanga atua e akatika i te reira tika e kua rave ra ratou i te au mea katoa e rauka ia ratou ei tapu iaia. No teaa ra? No te mea no to ratou metua, no Satani te Tiaporo ra, koia tei patoi ua ra i te angaanga a Iehova. (Ioane 8:44) I te mea ka rauka ua ia Satani ‘i te akatutu iaia uaorai ei angera no te marama,’ na te taangaanga i “te tuatua-tika kore pikikaa katoa ra,” te anoano ra tatou i te kite oonu i te pae vaerua e te manako marama kia kite i tana au angaanga e eaa te tu. Me kare ra, penei ka kite tatou e te rave ra tatou i te patoi anga ia Iehova.—2 Korinetia 11:14; 2 Tesalonia 2:9, 10.
Te Angaanga ra te Aronga Patoi
6. Eaa ra te aronga patoi i riro ei ei “rave angaanga pikikaa”? E akatutuia mai.
6 Ko tetai papaki, mei etai aronga patoi o teia tuatau nei te rave tiratiratu kore ra ei rima rave no Satani e akainga i te akarongo o te au mema ou o te putuputuanga Kerititiano ra. (2 Korinetia 11:13) Kare ratou e rave, i te Puka Tapu no te tumuanga no te au apiianga mou, te rave maroiroi ra ratou i te akaapa i te New World Translation of the Holy Scriptures (Urianga Ao Ou i te au Tuatua Tapu), mei te mea rai e kare atu e apinga ke a te au Kite o Iehova te irinaki ra ei tauturu. Kare ra te reira i te tika. No te tuanga maata o teia anere mataiti nei, kua taangaanga maata te au Kite, i te King James Version, te Douay Version a te akonoanga Katorika o Roma, me kare etai au urianga katoa tei rauka mai i to ratou reo, ei apii i te tuatua mou no Iehova e tana au akakoroanga. E kua rave ratou i te reira au urianga taito i te akakitekiteanga i te tika no te tu o tei mate ra, te pirianga o te Atua e tana Tamaiti, e eaa i tau ei e ko te anana iti anake ua te ka aere ki te rangi. Te aronga te apii ra kua kite e te rave ra te au Kite o Iehova i te au urianga o te Puka Tapu e manganui i ta ratou angaanga evangeria i te ao katoa nei. Inara, mei te 1961 mai rai kua rekareka ratou i te kapiti anga mai te New World Translation, ma tona au urianga akatikatikaia ra, tei tano ra e tei meitaki ra no te tatau anga.
7. (a) Eaa a Iesu ka kopae ke ei i tetai papaki e manganui tei karanga e e akarongo to ratou iaia? (e) Eaa i puapingaʼi kia akarongo i te ako ia 1 Ioane 4:1 ra?
7 Kua karanga a Iesu e ka kopae ke aia i tetai papaki e manganui te karanga ra e te akarongo ra ratou iaia. Kua karanga aia e penei ka totou ratou, ka tuaru temoni, e “kua rave i te au akairo e manganui” ma toou ingoa? Inara, kua akataka aia i taua au angaanga ra e e “tuatua kino.” (Mataio 7:21-23) No teaa ra? No te mea kare ratou e rave ra i te anoano o tona Metua i te rangi e e mea puapinga kore anake ia i to Iehova manako. E mea tuke rai, e noatu ko tei akaraia ra e e semeio, ko te reira au angaanga i teia tuatau nei te rauka katoa ra kia akamataia mai i tei pikikaa maata ra, koia a Satani. I te tataanga te apotetoro ko Ioane i tana reta mua e tere atu i te 60 mataiti i muri ake i to Iesu matenga e te tuakaouanga, kua ako aia i te au Kerititiano e, “auraka e irinaki i te au tuatua akauruia ravarai mari ra e timata i taua au tuatua akauruia kia kitea e me no ko mai rai i te Atua.” Ka tau rai tatou kia rave pera.—1 Ioane 4:1, NW.
Au Angaanga Puapinga Kore
8. Eaa te manako tau no tatou no te au angaanga a te kopapa ra?
8 Noatu rai e kare tatou e rave ana i te angaanga patoi i te pae vaerua ra, te puapinga kore ra ta tatou au angaanga me te raveia ra no te anoano o te kopapa tei topa ra. Kua karanga te apotetoro ko Petero e kua rava ua te tuatau ia tatou i rave ei “i to te etene inangaro . . . i te peu kanga ra, te inangaro tika kore, te inu nui i te wina ra, te kapiti anga kanga ra, te akakonā kava ra, e te au ravenga viivii a te idolo ra.” (1 Petero 4:3, 4) Kare te aite anga o teia e, ko te katoatoa tei akatapuia ei Kerititiano i teianei te rave ra i te reira au tu ravenga, te akakite maira e ko te tu akono o te aronga tei rave ana i te reira kua tau ke ana kia taui vivikiia i te tupu anga to ratou kite i te pae vaerua ra. Ka tuatua akakinoia ratou e to teianei ao no te mea kua tauiia to ratou oraanga; ka tau rai kia manakoia te reira. Inara, ka tau ratou kia taui me ka riro ei aronga angaanga tiratiratu i ta Iehova ra angaanga.—1 Korinetia 6:9-11.
9. Eaa ta tatou i kite no tei tupu ra i te Kite tei akamata ra i te akamatau ei vaine imene opera?
9 E manganui ta Iehova apinga oronga mai ei rekareka anga no tatou, e akatangianga imene tetai. Inara, i te mea e “te vai ua nei rai to te ao ravarai i raro ake i taua vaerua kino ra,” koia a Satani te Tiaporo, kare ainei te reira e kapiti katoa i te akatangianga imene? (1 Ioane 5:19) Ae, ka rauka ua te akatangianga imene ei ereere kikite, mei ta Sylvana i kite ra. Kua rauka iaia te tuatau no te akamatau i te imene i Varani ei imene opera. “Te vaira toku inangaro maroiroi i te tavini ia Iehova,” ko tana ia i akataka mai. “Te rekareka ra au i te angaanga ei painia tauturu e kua manakonako au kia kapiti i teia nga apinga e rua i toku oraanga. Inara ko te manamanata mua taku i aro atu i te aruanga i taku angaanga ko te akaturi ia. I te akamataanga, kua akara toku au oa iaku e e kamakura no tei kore au e o atu i ta ratou au tuatua anga no te akaturi e ta ratou akaraanga. I muri akera, kua akamata te reva viivii i te akanauru iaku, kia akariro iaku kia akakoromaki ua i ta Iehova au mea makitakita ra. Kua raurau maira tetai o toku nga puapii iaku kia akariro i taku imeneanga ei akonoanga naku, e kua apii ia au kia rave riririri ua i runga i te paata e kia manako ko au tei maata atu i etai ke katoa. Kua akariro te reira au tu katoa ei akakore i toku tu maru. I muri akera, kua teateamamao au no tetai aitamu takake. Kua pure au kia Iehova kia akataka mai kiaku i te mataara tau noku kia aere. Noatu rai i meitaki taku imene anga e i papu katoa oki toku manako, e kare au i o atu ki roto i te aronga tei ikiia. I reira kua kite au i te tumu—kua oti muna ke ana te tupuanga i mua roa ake i te tarere anga. Inara e pauanga marama tikai taku i taku pure e kua iki au i te akaruke i te paata no te imene e kia apii imene i te kainga ua.” I muri akera kua akaipoipo teia tuaine i tetai o te aronga pakari i te putuputuanga Kerititiano ra, te rave kapiti ra raua i teianei ma te tiratiratu i te akatere anga i te au apinga no te Patireia ki mua.
10. Eaa taau ka manako mei te au tuatua a Iesu ia Ioane 3:19-21 ra?
10 Kua karanga a Iesu: “Ko te rave i te kino ra, kua makitakita anake ïa ki te mārama, kare oki e aere mai ki te mārama, ko te kitea aea tana [angaanga, NW].” I tetai pae, “te akono i te tuatua-mou ra, ka tae mai ïa ki te mārama kia kitea meitakiia e, te tau ra tana [angaanga, NW] ki te Atua.” (Ioane 3:19-21) Mei teaa ra te akameitakianga kia rave i te angaanga kia rotai ma to Iehova ra anoano e tona akakoroanga! Inara e puapingaʼi te rave anga i te reira, ka tau tatou kia tuku i ta tatou au angaanga kia akara matatioia i roto i te marama o ta te Atua ra Tuatua. Kare tatou i te ruaine roa e kare i tureti roa no te taui anga i to tatou oraanga e kia ariki i te patianga kia rave i ta Iehova angaanga puapinga maata katoa ra.
Raveanga “Angaanga Meitaki” i Teia Tuatau
11. Eaa ta tetai papaki ka aruaru ei “au angaanga meitaki,” e eaa ka raukai i te reira te taki atu ki te manamanata maata?
11 Te angaanga puapinga i teia tuatau ka tau kia akakite mai i te tu rapurapu o to tatou tuatau nei. E manganui te au tangata te akatika ra e te rave ra ratou i te au angaanga te putuputu ra te akatakaia e e “angaanga meitaki,” te raveia ra ei puapinga no te tangata nei me kare no tetai tumu tikai. Inara, mei teaa te manamanata te reira tu angaanga! I Peritane, i te ripotianga te CAFOD (Moni a te Katorika no te Akapuapinga i te Au Enua i Vao mai) i tana ravenga no te tauturu i te ngai onge, kua na ko ra: “E toru mataiti i topa . . . e mirioni ua atu paunu tei akaputuia ei tauturu. E tauatini ua atu tei akaoraia. I teianei te topa akaou ra ratou ki te kino . . . No teaa ra? Eaa te tarevake? I te rave ua atu anga i tana tataanga, kua akataka maira te CAFOD Journal e kare i akonoia ana te au manamanata o te tuatau roa ra e ko te “au moni tei anoano maataia ra no te akapuapinga i te tangata kua akapouia ei akaka i te taumaro anga [tamaki na te tangata].” Kare e ekoko anga e kua akarongo ana koe i te au tu tuatua mei te reira na te au pupu tauturu te rave ra i te angaanga aiteite ki te reira.
12. Eaa ua te pauanga no te au manamanata te aro mai nei i teianei ao i teia tuatau?
12 E tu rapurapu to te manamanata no te onge. Inara, koai ma te akataka maira i te au tumatetenga o teia tuatau nei no te onge te tamaki te akatupu ra i ta Iesu Mesia totou, e te tou atura ki te openga o te akatereanga o te au mea nei? (Mataio 24:3, 7) Koai te akakitekite ra i te akapapu anga i te akapirianga i teia au tupu anga ma te akaoro anga nga tangata akaoro oroenua e a tei akatutu taka meitakiia maira i te puka o te Puka Tapu ia Apokalupo, pene 6? Kua tamou, te au Kite o Iehova i te rave tiratiratu i te reira. No teaa ra? Ei akakite e kare e taea e te tangata i te maani i tetai rapakau tinamou. E mamao roa ia. E aroa to ratou e ka rave oki i te ka rauka ia ratou i te akakore i te mamae. Tera ra, te aro tika atura ratou i te tika e me kare te Atua e rave mai, kare roa e kore te au manamanata o teianei ao. Mei te aronga putaua rai, ka vai rai te au manamanata me ka vai mai, a Satani ei tutara no teianei ao.—Mareko 14:7; Ioane 12:31.
Te Angaanga Puapinga Rava Atu
13. Eaa te angaanga rapurapu ravaia i teia tuatau, e koai ma te rave ra i te reira?
13 Te apinga te anoano rapurapuia nei i teia tuatau ko te tutu aere i te evangeria o te Patireia o te Atua ko Iehova te ka mono i te au kavamani katoa o teianei ao kare e roa atu ka apai mai i te meitaki ta te aronga i mataku i te Atua e tapapa nei. (Daniela 2:44; Mataio 24:14) Kua akariro a Iesu Mesia i te tutu aere i te Patireia o te rangi ei akakoroanga maata i tona oraanga, inara kua kotingaia tana tutuanga ki te enua ko Paretaina. I teia tuatau, kua totoa teia tutuanga ki te ao katoa nei, mei ta Iesu i tuatua ra ka pera. (Ioane 14:12; Angaanga 1:8) Kia piri atu ki te reira, noatu e e tuanga meangiti ua, i te angaanga na te Atua, e angaanga ia kare e rauka kia akaaiteia atu. Te au tane e te vaine, te ruaine e te ou aiteite ua, koai i tetai taime kare i moemoea ana e ka riro mai ei tutu aere i te evangeria, tei mua ratou i te rave anga i te reira angaanga evangeria te raveia ra e te au Kite o Iehova i teianei. Mei ia Noa e tona ngutuare rai, te rave tiratiratu ra ratou i ta te Atua angaanga i raro ake i Tana tika, e Nona te maroiroi, ei momua anake i te openga o teianei akatereanga o te au mea nei.—Philipi 4:13; Ebera 11:7.
14. Eaa te tutuanga i tau ei ei akaora oraanga e pera katoa ei paruru katoa oki?
14 Te akakitekiteanga a te au Kite o Iehova i teia tuatau openga nei e angaanga akaora tangata ia no te aronga te ka akarongo e ka akono kia tau ki te tuatua meitaki ta ratou e akarongo ra. (Roma 10:11-15) E e paruru katoa oki no te aronga tutu aere ra. Na te manako anga ma te ngakau tae i te tauturuanga i te au tangata e au manamanata maata atu to ratou i to tatou uaorai, ka meangiti mai to tatou manako no to tatou uaorai manamanata. Te kite nei tatou e te inangaro nei teianei ao ma tona au turanga te topa aere ra kia aru atu tatou i tona au mataara. No reira ko te akakianga i to tatou manako ia tatou e tutu aere ra i to te Atua au manako e maata ta te reira akamaroiroi i te akarongo; ei meitaki ia no tatou. Mei ta tetai Kite i tuatua ra: “Me kare au e tauta kia taui te au tangata taku e aravei ra, penei ko au ta ratou ka taui!”—Akaaiteia atu kia 2 Petero 2:7-9.
Angaanga ki te Putuputuanga
15. Eaa te au apainga te tukuia ra ki runga i te au tiaki o raro akenei i teia tuatau, e eaa te manako tau no te aronga tane o te putuputuanga tei akakiteia maira ia 1 Timoteo 3:1?
15 Me aere mai te aronga inangaro ou ki te putuputuanga, te aere maira ratou i raro ake i te utuutu anga a te Tiaki Maata, koia te Atua ko Iehova, e tana Tiaki Meitaki, ko Iesu Mesia. (Salamo 23:1; Ioane 10:11) Te komonoia ra teia nga Tiaki i te rangi ra i te enua nei e te au tiaki o raro akenei no te anana, e aronga akataoongaia i roto i te au putuputuanga. (1 Petero 5:2, 3) Te mou anga i te reira taoonga e apinga oko maata ia i teia tuatau openga nei. E apainga teiaa te angaanga a te au tiaki, te kapiti ra kare i arataki anake i te apiianga i te putuputuanga e pera katoa te tutu aereanga mari katoa ra te paruruanga i te anana mei te aronga aru i te pae vaerua ra e te takino anga a te reva arara kino o teianei ao ta tatou e noo nei. Kare e angaanga ke atu tei tau te puapinga no te aronga tane o te putuputuanga kia itae atu i te tauturuanga i te akono i te pae vaerua o te au mema o te putuputuanga Kerititiano te akatotoaanga nei kia maata.—1 Timoteo 3:1; akaaiteia atu kia Isaia 32:1, 2.
16. Na teea au tu te au tiaki Kerititiano i te akaki anga tetai i tetai ra?
16 Auraka e ngaropoina ia tatou, e e tangata ua te reira au tiaki, e tuke tuke to ratou tu tangata e te au tu tau kore oki mei to te anana katoa ra. Te meitaki ra tetai no tetai tuanga o te tiakianga, ko te apinga orongaia na tetai ke ra ka akapuapinga i te putuputuanga na tetai tuanga ke. Te akaki ra ta ratou angaanga tetai i tetai ei akamaroiroi i te putuputuanga. (1 Korinetia 12:4, 5) Auraka roa e tuku kia tomo atu te vaerua taemoemo ki rotopu ia ratou ra. E angaanga kapipiti ratou i te paruru e te akatere i au apinga no te Patireia ki mua, ma “te takianga i nga rima tiratiratu” e pure kia Iehova, ma te kimianga i tana akameitakianga e tana aratakianga i ta ratou manako anga e pera katoa te tukuanga tika.—1 Timoteo 2:8, NW.
17. (a) Eaa ta tatou nei apainga? (e) Eaa te au apinga ka tau tatou kia kopae ke kia raukai ia tatou te rave kia oti meitaki ta tatou apainga?
17 Te kapiti katoa maira te angaanga tutu aere i te tu rapurapu i te vaitata anga mai te openga o to Satani patireia. I te tu anga i te tuatua mou o te Tuatua a te Atua, ei au Kite nana, e apainga ta tatou kia akatotoa i te tuatua meitaki i te au tuatau katoa te ka va mai. E maata te angaanga no te rave kia kore tatou e noonoo ua, e tae roa ki te openga. Auraka rava tatou e tuku ia tatou uaorai kia aere ke, na te aruaruanga i te akaturi ei mea e navenave ei ra me kare kia akateiaaia i te kimianga kia maata te apinga kopapa. Auraka tatou kia o atu ki te au manakoanga tau kore e te akapou taime ua. (2 Timoteo 2:14; Tito 1:10; 3:9) I te ui anga te au pipi kia Iesu, “E te Atu, ei teianei aina koe e akaoki mai ei i te au kia Iseraela?” Kua akatika atura Iesu i to ratou manako ki te angaanga puapinga te vaira, i te na ko anga: “Ei kite oki kotou noku i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.” Mei reira mai te reira angaanga e tae mai ki teia ra.—Angaanga 1:6-8.
18. Eaa i puapinga maataʼi te rave angaanga kapiti ma Iehova katoa ra?
18 Te angaanga ma Iehova, te tutu kapiti anga ma tana putuputuanga i te ao katoa i teia tuatau, te apai maira i te mataora, te pumaana, e te akakoroanga tikai no to tatou oraanga. E tuatau ia no te aronga inangaro ia Iehova kia akakite i te tu akono e te tiratiratu kiaia. Kare teia angaanga ma tona au tu e manganui e rave akaouia a te tuatau ki mua. I te vai marama mai anga te manakonakoanga no te ora mutu kore i te tuatau ki mua, kia tamou tiratiratu e kia “akamori tatou i te Atua ma te akaaka e te mataku,” ei akapaapaa iaia e ei ora oki no tatou uaorai.—Ebera 12:28.
◻ No teea angaanga i raukai ia Iesu te rekareka e te merengoanga?
◻ Koai ma te patoi ra i ta Iehova angaanga, e no teaa ra?
◻ Akapeea te akaaiteia atu anga o te “au angaanga meitaki” o teianei ao ki te tutuanga i te evangeria o te Patireia o te Atua ra?
[Tutu i te kapi 18]
Kua akaue a Iesu i tana au pipi kia aere e tutu aere