Ka Kitea e Koe te Apinganui Puapinga Rava Atu i te Auro!

PENEI ka akaaiteia te au tuatua mou i roto i te Puka Tapu ki te auro, te ario, me kore tetai atu au apinga puapinga tei uunaia. Noatu e kare koe i kimi matatio ana no tetai auro me kore ario, penei kua kite mai koe e ko te rave ka anoanoia ra te angaanga maata e te tauta ua atu. No reira e maata te taime ka maromaroa ua rai te tangata kimi i te reira.

Inara, kare rava te reira tu maromaroa e tupu mai me te kimi ra koe i te au apinga puapinga tei uunaia i roto i te Puka Tapu. E akara i teia akapapu anga akamaroiroi: “Kia kimi pu tikai koe iaia mei te ario ra, e kia makitoro marie koe iaia, mei te apinga uunaia ra: Ei reira koe e kite ei i te mataku ia Iehova, e e rauka ia koe te kite i te Atua.” (Maseli 2:4, 5) Inara kia kimi tikai koe?

“Ka Kimi Ana, Kia Kite”

“Ka kimi ana, kia kite koe, kare rava e peroveta i tupu i Galilea.” Ko teia te ako ta etai au Pharisea ngati Iuda i te tai anere mataiti i oronga kia Nikodemo, e Pharisea katoa. “Ka kimi ana, kia kite.” E ako meitaki tikai. Kua rauka i te kimi kia kitea te tuatua mou​—tetai mea puapinga rava atu i te auro.

Inara i te reira tikai mea, kua poka te aronga tei oronga i te reira ako “ka kimi ana, kia kite” i te taangaanga i te reira. Akapeea ra?

Kua tono ana te au kau taunga e te au Pharisea i te aronga taoonga no te tapeka ia Iesu Mesia. Ma te potirere tikai i te tu o tana apiianga, kua oki ua mai te aronga taoonga ma te kare ua. No reira kua ui atu te au Pharisea kia ratou: “Kua vavare katoa ainei kotou?” Kua tuatua maira a Nikodemo: “Ka tika aina i ta tatou nei ture kia akaapa atu tatou i te tangata, kare e timata na i te akarongo atu i tana tuatua, e kia kitea?” Kua akakeu teia au tuatua i te ako e “ka kimi ana, kia kite.”​—Ioane 7:32, 45-52.

Akapeea te au taunga e te au Pharisea i te poka anga? Kare ratou i kite me kore i akatika e noatu e kua maata mai a Iesu i Galilea, kua anauia ra aia ki Betelehema. Kua akakite te peroveta a Mika e: “E tae maira aia kiaku nei mei roto mai ia koe ra [e Betelehema], ko te ka riro ei tutara i Iseraela nei.” (Mika 5:2) No reira kua poka taua aronga e arataki ra i te kimi e kia kite i to Iesu au pepa puapinga tei tau ei peroveta, ko tetai tei tau kia riro mai ei tutara i Iseraela. Kua taki atu teia ki te au ravenga kino, e te akatutu maira e mei teaa te puapinga kia kimi e kia rauka te katoa anga o te tuatua mou no runga i te au mea. Inara akapeea te tuatua mou me akaraia i te maata anga o te taime?

Riro Mai te Tuatua Mou ei Apinga Taviiviiia

“Kua kiteia mai te tuatua mou ma, mei te auro ma rai, ei apinga tau kore kia tuaia, no te mea kua kiteia mai e te tangata nei e e mako atu i te taviivii i te tuatua mou i te akamako mai ia ratou uaorai” i tuatuaʼi tetai tangata tata i te 19 anere mataiti. Mei teaa tikai te kokoi o teia au tuatua no runga i te akonoanga o teianei ao! I muri ake i te arai o teia taviiviianga i te tuatua mou ko te Tiaporo ko Satani “e metua oki no te pikikaa.” (Ioane 8:44; Apokalupo 12:9) Te taangaanga ra aia i te akonoanga pikikaa kia taviivii i te au apiianga mou no runga i tetai au uianga mei teia: Koia te Atua? Eaa to Iesu pirianga kiaia? Eaa tei tamanakoia no te enua e te tangata nei?

Naringa te au taunga e te au Pharisea i kimi kua kitea mai te tuatua mou. Kua kitea mai i reira te apinganui puapinga rava atu i te auro. Ae, naringa ratou i ‘akarongo kiaia e te kite i tana e rave ra,’ kua rauka i reira ia ratou te katoa anga o te tuatua mou no runga ia Iesu mei ta Nikodemo i oronga atu i te tuatua. Naringa ratou i inangaro tikai i te rave i teia, kare e ekoko anga e kua akamarama atu rai a Iesu i te au mea kia ratou, mei tana i rave ki tana au pipi. (Mareko 4:34) Inara iea ngai e kiteaʼi e tatou te tuatua mou ma i teia tuatau? E tika, e akapapu anga rai tetai e ka rauka tikai ia tatou te kimi i te katoa anga o te tuatua mou?

[Tutu i te kapi 4]

Naringa te au arataki akonoanga i ‘akarongo kiaia’ kua rauka rai ia ratou te katoa anga o te tuatua mou no runga ia Iesu