“E ko tei Akarongo ra, ka Tuatua Katoa aia e, E Aere Mai”

A te mataiti katoa te aere mai nei ka akapou te au Kite o Iehova i to ratou uaorai ririnui i te au enua e tere atu i te 200 kia rotai ki ta ratou irava mataiti no te 1991: “E KO TEI AKARONGO RA, KA TUATUA KATOA AIA E, E AERE MAI.”

“E te tuatua nei te Vaerua ma te vaine akaipoipo ou ra, E aere mai. E ko tei akarongo ra, ka tuatua katoa aia e, E aere mai. E ko tei kaki ra, ka aere mai. E tei anoano ua ra, ka rave ua mai aia i te vai ora.”​—APOKALUPO 22:17.

1. Te patiia nei tatou “E aere mai” ki teea “vai”?

TE PATIIA nei koe “e aere mai.” Kia aere mai ki te aa? Eaa ra ka aere mai kia pangea toou kaki i te vai. Kare teia i te vai ua nei mari ra ko taua vai ta Iesu Mesia i tuatua atu ki te vaine Samaria i te ruavai ra: “Kareka te ka inu i te vai e orongaia atu e au nei, kare rava atura aia e kaki akaou; ka riro ra taua vai e orongaia atu e au nana ra, ei vai pupui ua i roto iaia, e tika i te pupui anga, e tae ua atu ki te ora mutu kore ra.” (Ioane 4:14) No ea mai ta Iesu “vai” mei te reira ra?

2. Eaa te tumu o taua “vai” ra, e i muri mai eaa te tupu anga anake ka taʼe mai ei?

² Kua puapingaia te apotetoro ko Ioane i te kite anga na roto i te orama i te tumu no reira mai teia “vai” i te taʼe anga mai, mei tana i akakite maira ia Apokalupo 22:1: “Kua akakite maira aia iaku i tetai vai ora, e vai taʼe oki, mei te io te areare, no roto mai i te terono o te Atua e to te Punua-mamoe ra.” Ae, ko te tumu o teia vai mei te io te areare, ma tona au tuanga tei oronga mai i te ora kare i tetai ke mari ra ko Tei Oronga Ora maira, ko Iehova uaorai, nana ra i akapapa mai na roto i te Punua Mamoe, koia a Iesu Mesia ra. (Akaaiteia atu kia Apokalupo 21:6.) I te taiku mai anga i “te terono o te Atua e to te Punua-mamoe ra,” e mea tau e i muri ake i te akanoo angaia te Patireia o te Mesia i te 1914, koia oki, i muri ake i te akamata anga te ra o te Atu ra, i akamataʼi taua vai o te ora ra i te taʼe mai.​—Apokalupo 1:10.

3, 4. Eaa ta taua “vai” e akatutu maira, e ka rauka te reira vai iaai?

³ Eaa ta teia vai o te ora i akatutu maira? Te akatutu maira i te akaoraanga i te oraanga tangata apa kore ua, ki te ora mutu kore ma te apa kore ua ki runga i te enua tei akariroia ei parataito. Te akatutu maira taua vai ora ra i te au apinga katoatoa no te oraanga na roto mai ia Iesu Mesia ra. Te papa katoatoa nei ainei teia i teianei? Kare, kare ko te katoa anga o te reira, no te mea ka tau kia akakore atu te Atua i teia akatereanga kino o te au mea nei ma tona tutara akara koreia katoa, koia a Satani te Tiaporo ra. Inara ka rauka ia tatou i te inu i tei papa i teianei o teia “vai” nei, na te akarongoanga e te akonoanga i te tuatua meitaki o te Patireia e te akonoanga i to tatou oraanga kia tau ki te reira.​—Ioane 3:16; Roma 12:2.

⁴ E no reira, i muri ake i te akaarianga i taua ‘vai ora’ ra kia Ioane, kua tuatua atura a Iesu kia Ioane i Tona akakoroanga kia tono atu i Tana angera ma te orama. I reira a Ioane i akarongo atu ei i te tuatua anga: “Te tuatua nei te Vaerua ma te vaine akaipoipo ou ra, E aere mai. E ko tei akarongo ra, ka tuatua katoa aia e, E aere mai. E ko tei kaki ra, ka aere mai, E tei anoano ua ra, ka rave ua mai aia i te vai ora.” (Apokalupo 22:17) E no reira, e te au tavini o te Atua e akatotoa i te patianga ki te aronga te kaki katoa ra kia akamata i te inuanga i ta te Atua ra au apinga e raukaʼi te ora mutu kore ki runga i te enua nei na roto mai i te Punua Mamoe a te Atua ra.​—Ioane 1:29.

Tupu Mai Anga te Anoano no te Vai Ora

5. Na teaa te au tangata katoa i riro ei kia anoano i teia apinga na te Atua?

⁵ E mea tangi ra, kare nga metua mua o te tangata i akono i te mataara o te oraanga tei tau no te oronga i te tika no to raua uanga kia rekareka i te oraanga o te tangata apa kore ua i te kainga parataito. Kua umuumuia a Adamu kia iki meitaki i te tavinianga i Tei Anga mai iaia ra ma te akarongo kia oraʼi te au tangata e mutu kore ua atu. I raro ake i te mana o tetai mea ora vaerua meameaau ra, kua akamataia e Eva te ravenga tei taki atura ki te mate no te tangata nei, e kua iki a Adamu, koia tana tane apa kore ua ra, kia kapiti atu kiaia i te reira mataara no te mate. E no reira, i te mea koia tei oronga mai i te oraanga no te au uki tangata nei, na Adamu tikai i akamata mai te akatupu anga i te mate ki roto i te uanga tangata katoatoa. No reira i tuatuaʼi te Puka Tapu e: “No te tangata okotai ra i o mai ei te kino i te ao nei, e no te kino oki te mate; e kua taea katoa oki te tangata ravarai e te mate, no te mea kua ara katoatoa.” (Roma 5:12) No muri ake i to Adamu raua ko Eva topa anga ki roto i te ara i akamataʼi raua i te kapiti mai anga i etai atu au mema no te anaunga tangata nei.​—Salamo 51:5.

6. Eaa ra a Iehova i akapapaʼi kia rauka mai taua “vai” ra?

⁶ Ka araiia ainei ta te Atua ra akakoroanga no te enua parataito kia akakiia ki te tangata apa kore ua e tuatau ua atu? Te pau anga a te Puka Tapu e, kare rava ia! Inara, e tupu ei tana akakoroanga, kua akono a Iehova i tetai ravenga aroa ei akaanga ke i to Adamu tarevake kino roa e kia tau rai ki te tuatua tau e te tuatua tika, ko Ia ra te akaoti anga e te akakite anga openga. Kua akono aia i te reira na roto “i tetai vai ora” ra. Na te reira tana akaoki mai anga i te oraanga tangata apa kore ua ki te au tangata akarongo katoa, tei akakoreia ra to ratou tikaanga kia tae atu ki te Tumu o te ora ra. Ka taʼe mai teia vai ma tona ki katoa a te tuatau o te Tauatini Mataiti te Tutaraanga o Iesu Mesia. E no reira, a te Tutara o te Mesia no te Tauatini Mataiti te ka tau te au tangata ravarai, kia kapiti katoa te aronga tei akatuia mei te mate maira, kia inu ua “i te vai ora” ra.​—Akaaiteia atu kia Ezekiela 47:1-10; Angaanga 24:15.

7. Na runga i teea akatumu anga te rave mai anga i te “vai” ra?

⁷ Te rekareka ra a Iehova i tona uaorai oraanga, e te rekareka katoa ra aia i te orongaanga i te tika no te oraanga ei kite no tetai papaki o tana au mea i anga ra. Ko te akatumu anga i ta Iehova ra au apinga ei oronga i te ora, ko te atinga oko ia o Iesu ra. (Mareko 10:45; 1 Ioane 4:9, 10) Te o katoa maira te Tuatua a te Atua, ko ta te Puka Tapu te reira e karanga ra i etai tuatau e e “vai” ia. (Ephesia 5:26) Te rauka ua ra i te Atua ko Iehova i te tuatua, “E aere mai” ki te au tangata katoa, tei mamae ra i te ngaro anga te au apinga tei orongaia maira e te Atua no nga tangata apa kore ua, koia a Adamu raua ko Eva i te akamata anga ra.

Oronga Anga te Pupu Vaine Akaipoipo Ou i te Patianga, “E Aere Mai”

8. Kiaai e i naea teia “vai” i oronga muaia mai ei?

⁸ Te aronga mua no te oronga i te patianga “e aere mai” ko ratou te vaine akaipoipo ou tei akatutuia a te Punua Mamoe ra, koia te Tamaiti anau mua a Iehova i te pae vaerua. (Apokalupo 14:1, 3, 4; 21:9) Kare te vaine akaipoipo ou a te Mesia i te pae vaerua ra i tuatua ana, “e aere mai” kiaia uaorai, koia oki, te aronga ta te Atua ko Iehova ka akaputu ei tuanga no te pupu o te vaine akaipoipo ou ei akaki i te 144,000 katoa. Ko te reira au tuatua e patianga tei orongaia atura ki te au tangata te manakonako ra kia rauka ia ratou te oraanga o te tangata apa kore ua ki runga i te enua nei i muri ake ia Aramakito. (Apokalupo 16:14, 16) I teia tuatau openga o te akatereanga o te au mea nei mei te 1914 mai rai, kua akarongo ana tatou i taua patianga nei i te oronga anga i “te vaine akaipoipo ou,” i te rave kapiti anga ma te vaerua tapu o te Atua ra.

9. Akapeea tatou i kite ei e kare te reira na te pupu meangiti ua?

⁹ E mea rekareka ra, i te puka openga o te Puka Tapu te akaari maira i ‘tetai urupu maata, kare e rauka i te tangata kia tatau,’ ka akarongo ratou i te akakitekite anga i te tuatua meitaki o te Patireia o te Atua e ka tuku ngaueue kore ia ratou uaorai ki te pae o te reira kavamani tiratiratu ra. (Apokalupo 7:9, 10, 16, 17) Ko koe ainei tetai o taua urupu maata ra? I reira, “e ko tei akarongo ra, ka tuatua katoa aia e, E aere mai.”

Tuatua te Vaerua e te Vaine Akaipoipo Ou, “E Aere Mai”

10. I akamata mai ki ea teia vai tei akatutuia nei, e no teaa ra?

¹⁰ Inara eaa te Atua raua ko te Tane akaipoipo ou i kore ei i taikuia ia Apokalupo 22:17? Te mea mua, e akara, kare te irava i akakite mai e i raro ake i taai arataki anga i angaangaʼi te vaerua ra. Tera ra, te arataki atura te taiku anga i te vaerua i to tatou manako ki te Atua ko Iehova uaorai. Kare te Metua i oparaia atu ki vao i te reira tutu, no te mea koia tikai te Tumu o te vaerua tapu. Te rua, te taokotai ra te Tamaiti ma tona Metua, mei tana uaorai i tuatua ra: “Kare e tika ta te Tamaiti kia rave aia anake uaorai, ko tana ra i kite i te Metua i te rave anga.” (Ioane 5:19) Pera katoa, i te mea ko teia patianga e tuatua tei akauruia e no ko mai i te Atua ko Iehova ra, ka rauka mai i te tangata te au arataki anga a te Atua, me kare “au tuatua akauruia ra,” na roto mai ia Iesu Mesia, koia oki “te Logo.” (Apokalupo 22:6; e te Apokalupo 22:17, Reference Bible, tuatua i raro mai; Ioane 1:1) E mea tau i reira, ka kapiti atu tatou i te Mesia, koia te Tane akaipoipo ou, ki teia patianga. Ae, ka papu ia tatou e ko te Atua ko Iehova, koia te Metua o taua Tane ra, ma Iesu Mesia katoa, koia te Tane akaipoipo ou, ka kapiti atu ma “te vaine akaipoipo ou” ra na te tuatuaanga te vaerua tapu e, “E aere mai.”

11, 12. (a) Eaa te akakite anga mua maira e ka akatotoaia te reira patianga kia inu i taua vai ra? (e) Akapeea te riro anga kia taka meitaki te reira tumu i roto i te au mataiti i topa?

¹¹ Kua aere teia patianga no etai au raungauru mataiti ki te aronga tei kaki i te “vai ora” ra “e aere mai.” Mei te 1918 mai, kua akamata te pupu o te vaine akaipoipo ou ra i te tutuanga i te tuatua tei kapiti ra i te aronga penei ka noo ki runga i te enua nei. Ko te tuatua anga ki te katoatoa i te tumu “E au Mirioni Ua Atu te Ora Nei Kare e Mate.” Na te reira i oronga i te manakonakoanga e e manganui te ka ora atu ia Aramakito e i muri akera ka rauka te ora mutu kore ki runga i te enua Parataito i raro i to te Atua Patireia no te Mesia ra. Inara kare te reira tuatua anga i akakite papu mai i te mataara ki te reira ora atu anga, mari ua na te tuatua tika.

¹² E itae ei kia maata atu te au tangata ma taua patianga ra, kia “E aere mai” i te 1922 kua tukuia atu te tuatua ki te aronga katoatoa tei inangaro kia tavini atu ki te Atua: “E Akakite i te Ariki e te Patireia.” I te 1923 kua kite te pupu o te vaine akaipoipo ou ra e ko “te mamoe” e “te puakanio o ta Iesu parapore ia Mataio 25:31-46 ra ka kitea ia ratou i mua ake ia Aramakito. E i te 1929, kua akakiteia mai i Te Punanga Tiaki Anga (Peritane) o Mati 15 i te tumu tuatua “E Patianga Aroa.” Ko tona irava i te akatumu anga ko Apokalupo 22:17, e kua akataka meitaki maira te reira i te apainga a te pupu o te vaine akaipoipo ou ra kia akamaata atu i taua patianga ra, “E aere mai.”​—Nga kapi 87-9.a

Kapiti Atu te Mamoe ke Atu i te Tuatua Anga, “E Aere Mai”

13, 14. I te au mataiti o te 1930 ra eaa te akataka anga tei kapitiia maira e ka inu katoa etai atu i taua vai akatutuia maira?

¹³ Aru mai, i te 1932 ra, kua tou maira Te Punanga Tiaki Anga (Peritane) i te apainga a te au “mamoe ke atu” ra i ta ratou tuanga, kia tuatua, “E aere mai.” (Ioane 10:16) I tana itiu o Aukute 1, kapi 232, parakarapa 29 tei tuatua maira: “E maroiroi to te au Kite o Iehova i teianei mei to Iehu rai e ka tau ratou kia akamaroiroi i te pupu o Ionadaba ra [koia te mamoe ke atu ra] kia aru mai ia ratou e kia rave i tetai tuanga i te akakiteanga kia etai atura e kua vaitata te patireia o te Atua.” I muri ake i te tataanga ia Apokalupo 22:17 ra, kua tuatua maira taua parakarapa ra: “E akamaroiroi atu tei akatainuia ra i te aronga katoatoa te ka rave i te tuatuaanga i te tuatua meitaki o te patireia ra. Kare ratou e anoanoia ei aronga akatainuia na te Atu e tau ei kia akakitekite i te tuatua a te Atu ra. E pumaana maata tikai ki te au Kite o Iehova i teianei kia kite e te akatikaia ra ratou kia apai atu i te vai ora ki tetai pupu tangata te ka raveia atu na roto ia Aramagido e kia orongaia atu te ora mutu kore ki runga i te enua nei no te meitaki maata o Iehova.”b

¹⁴ Mei te 1934 e aere atura, kua akakite te toenga o tei akatainuia ra e mea tau no teia au mamoe ke atu kia akatapu ia ratou uaorai ki te Atua e kia akatutu mai i te reira akatapu anga na te papetito angaia ki te vai e kia kapiti atu ma te pupu o te vaine akaipoipo ou ra i te na ko anga, “E aere mai.” ki etai katoa oki te kaki ra. E no reira, e patianga papu tikai tetai i teianei tei orongaia ra e te pupu o te vaine akaipoipo ou no te akaputuanga i teia aronga tei kaki ra o te mamoe ke atu kia riro mai ei “okotai . . . anana” i raro ake i te “tiaki okotai,” koia a Iesu Mesia. (Ioane 10:16) I te 1935 kua oraora tikai te toenga o tei akatainuia ra i te kite anga i ta ratou uruoaanga i te reira mataiti e ko te pupu mei te mamoe rai te tu, ta ratou i tuatua atura, “E aere mai” ko te “urupu maata” tikai o Apokalupo 7:9-17 (NW). Na teia i akatupu kia ririnui roa atu te angaanga no te patianga.

15. I akapeea te o atu anga “te vaerua” i te patianga, “E aere mai”?

¹⁵ I ta ratou tuatuaanga, “E aere mai” te rotai ra te pupu o te vaine akaipoipo ou ma te vaerua o te Atua. Na tona vaerua tapu i akatuera i te aite anga o te au totou o tana Tuatua i tataia ra, kua akakeu aia i te toenga o te pupu o te vaine akaipoipo ou ra kia akatotoa atu i te patianga. Ko teia au totou tei akatumuia maira no ta ratou patianga e mea akauruia na te vaerua o te Atua. No reira, na te vaerua tikai o te Atua te na roto maira i te Mesia e tana vaine akaipoipo ou te tuatua ra ki te urupu maata o te aronga mei te mamoe rai te tu e, “E aere mai.”​—Apokalupo 19:10.

16. Akapeea te kapiti anga i te vaerua e te vaine akaipoipo ou ma taua patianga ra i teia tuatau nei?

¹⁶ Tae roa mai ki teia tuatau te Vaerua ma te vaine akaipoipo ou ra, koia tei akatutuia mai e te toenga ra: “Ka tuatua katoa aia e, E aere mai.” Kua akaue atura te toenga ki te au mamoe ke atura kia pati katoa ia etai atu “E aere mai.” Auraka ratou e tapu i te “vai ora,” te rauka maira i teia tuatau nei, kia ratou anake ua. Ka tau ratou kia akarongo i te akauenga mei ko mai i “te vaerua ma te vaine akaipoipo ou ra,” koia oki: “Ko tei akarongo ra, ka tuatua katoa aia e, E aere mai.” Pouroa te aronga te akamerengo ra i to ratou kaki ka tau katoa kia oronga i te patianga. Ka tau ratou kia akatotoa i te reira ki te au tangata ravarai noatu no teea iti tangata, te enua, te reo, me kare te akonoanga atua i teianei​—te au tangata ravarai i te au ngai ravarai! Ko te “vai ora” e rauka mai ana i teia tuatau nei ko ta te au Kite ia o Iehova te ka pati e ka tauturu i te au tangata katoatoa kia rave ua mai!

17. Eaa te tu o te “vai” te vai maira i teia tuatau?

¹⁷ Takapini i te ao katoa, te arataki ra te Punua Mamoe, koia a Iesu Mesia, i te urupu maata ki “te au pupui anga o te vai ora.” (Apokalupo 7:17) Kare teia i te vai tei taeroia, e areare ra, e anuanu, e vai meitaki mei tona Tumu mairai. Ko teia au vai tei akatutuia e maata atu ia i te au vai tei akamarama maira i te tuatua mou no te Puka Tapu; te akatutu maira i te au apinga katoatoa a te Atua na roto mai ia Iesu Mesia te akamata ra i teianei i te arataki i te urupu maata na runga i te arataa e tae atu ei ki te oraanga mutu kore ma te apa kore ua e te mataora anga.

Kapiti Atu i Teianei i te Akakitekite Anga

18. Akapeea te maata o te patianga i to tatou tuatau nei?

¹⁸ Kua tae ke ana te numero o teia urupu maata e kua tere atu te au mirioni. Te rave maroiroi ua atura ratou i te akakitekite i te tuatua meitaki o te Patireia i te pa enua ravarai. Te ripoti putuputu ra ratou i ta ratou angaanga tutu aere anga i te tuatua meitaki o te Patireia, tei tae i teianei ki e 212 au enua. I te tuatau te toe nei o te openga o te akatereanga o te au mea nei, ka rave uaia atu te patianga kia tau ki te akakoromaki anga e te akakoromaki anga roa o te Atua ra ko Iehova, koia te Akono Maata i te tuatau ra. Ka kite rai aia me pou te tuatau e aea te atianga tau nona kia akakite iaia uaorai ki te katoatoa e ko Iehova aia, mei tana rai i taputou maira e rave kia tau ki te au akakiteanga putuputu i te totou a te Puka Tapu ra.​—Ezekiela 36:23; 38:21-23; 39:7.

19. Eaa i raukai ia tatou kia tuatua e te orongaia nei teia “vai” kare e tutakiia?

¹⁹ I te mea te vai nei te tuatau, ka rave rekareka te urupu maata ma te toenga o te pupu akaipoipo i te na ko anga: ‘Ka aere mai ka rave ua i te vai ora!’ Te rave ua ra te aronga akakitekite i teia tuatua meitaki ei akaora anga ma te akakite anga, kare ua e tutakiia no te angaanga ta ratou e rave ra ia ratou e akatotoa ra i te tuatua o te Patireia takapini i teianei ao.

20. Eaa te ka tupu i te mea te rauka mai nei teia “vai”?

²⁰ Te vaira te vai ora i teianei e takapini rava te ao nei, e ka rauka ua i te tangata tei anoano i te rave kia merengo tikai ma te tupu anga e te akaora anga i te oraanga. Ka rekareka te au tangata tei okoia ra i te oraanga i konei tikai i runga i te enua nei, ko te ka akariroia ei parataito, ei akatikaanga i te akakoroanga oko maata a Iehova ra. Kare Tei Anga mai ia tatou i anga puapinga kore ua i te enua nei mari ra kia riro ei kainga mei to Edene rai e takapini te ao katoa nei, me kare ei Parataito no te mareka anga, kia tangataia e te au tangata apa kore ua kia aite ki to te Atua rai tu.

21. Akapeea e oti ei ta te Atua ra akakoroanga no te enua nei?

²¹ E tika, ka riro te reira ei rekareka anga meitaki tei kore e rauka kia tuatuaia kia noo ki roto i tetai ao ou mei te reira te tu! Ei reira te akauenga ta te Atua i oronga atura ki nga tangata mua e rua ia Genese 1:27, 28 ka akatupuiaʼi kia oti rava. E akameitaki i ta Iehova akonoanga ngaueue kore i te tumatetenga tei rokoia ra ki te uanga tangata katoa, ka akaviia te enua kia riro ei parataito e ka akakiia ki te au tangata apa kore ua. Ae, ka akara te Atua i te au mea ravarai tana i anga, e, i na, ka meitaki rava ia. Ka tae ainei koe ki reira? Me ka pera, e tau koe i teianei kia akamata ma te manako ariki i te rave ua i te vai ora. “E aere mai” e inu kia rava kia pangea toou kaki i te vai ora tei akamata maira i te taʼe i teianei e ka taʼe ua atu rai ma tona ki katoa i te tuatau o te Tauatini Mataiti te aere mai nei. E ko tei akarongo mai i teia patianga reka kia tuatua aia: E aere mai”!

[Au Tataanga Rikiriki i Raro]

Eaa Taau Pauanga?

◻ Eaa te “vai” e taikuia maira ia Apokalupo 22:17?

◻ Eaa te tumu o taua “vai” ra?

◻ Eaa i anoanoiaʼi taua “vai” ra, e i naea anake ua i akamataʼi i te taʼe mai?

◻ I ta tatou irava eaa te akakiteia maira i te taiku anga i te “vaerua,” e akapeea te kapiti mai anga i “te vaine akaipoipo ou ra”?

◻ Koai ma te ka rave i taua “vai” ra, e eaa te tupu anga?