Koai Tikai tei Kapikiia ki te Rangi?

KUA aroa oki a Iehova i te tangata ravarai. Ko teia aroa maata, kua tae rava te reira kiaia kia oronga i tana tamaiti, ko Iesu Mesia, ei oko kia rauka akaou i ta to tatou ai metua i ngaro ko Adamu! E eaa oki te reira? Te oraanga tangata, mutu kore apa kore e te au tika anga no te reira e te au tapapaanga. (Ioane 3:16) E akaarianga aroa katoa oki te oko na Iesu no te tangata nei.​—Mataio 20:28.

Te aroa no te Atua mai kua akaariia mai te reira na roto i te akatuera anga ia e rua nga manakonakoanga na te Atua i oronga mai tei akatumuia ki runga i te puapinga o te atinga oko o Iesu. (1 Ioane 2:1, 2) I mua ake ka mate ei a Iesu ei tangata, te manakonakoanga okotai tei akatuera ki te aronga tei arikiia e te Atua koia oki te oraanga i te enua parataito. (Luka 23:43) I muri ake ia Penetekote 33 T.N., kua oronga mai a Iehova i te manakonakoanga no te rangi ra ki te “anana iti.” (Luka 12:32) Eaa ra oki tei tupu i teia au tuatau nei? Mei te 1931 mai kua akateimaa te tuatua Patireia ki runga i te “mamoe ke” ra, e mei te 1935 aere atu i apai mai ana te Atua i te “urupu maata” te aronga tu mamoe kiaia na roto i te Mesia. (Ioane 10:16; Apokalupo 7:9, NW) Kua tuku oki te Atua ki roto i to ratou ngakau te manakonakoanga no te oraanga mutu kore i roto i te enua parataito. Kua inangaro ratou i te kai i te kai meitaki, kia mana ma te aroa i rungao i te au manu taae, e kia rekareka i te kapitianga ki te au tangata tuatua tika e tuatau ua atu.

Au Taunga e te au Ariki Aroa

I te mea na te aroa i akakeu ia Iesu kia oronga i tona oraanga ei oko, papu i reira e ka riro aia ei Ariki aroa. Oti akera, kare e ko Iesu anake rai ka apai ei i te tangata ravarai ki te tu apa kore i te tuatau o tona Tutara anga e tai Tauatini Mataiti. Kua akono ke ana a Iehova i tetai au ariki aroa i te rangi ra. Ae, “e ei taunga ratou na te Atua e na te Mesia, e ka tutara ei ariki ma ia katoa e tai tauatini au mataiti.”​—Apokalupo 20:1-6, NW.

Eia ra au tutara ki te Mesia ra, e ka akapeea ratou kia ikiia no teia tika anga umere tikai? I kite ana oki te apotetoro ko Ioane e 144,000 i runga i te Maunga ia Ziona e te Mamoe ra ko Iesu Mesia. Kua “okoia mei o te tangata nei,” ka kite oki ratou e eaa te aiteanga kia tatomoia e e te au tumatetenga, kia akakoromaki i te au teimaa o te tu ara nei, kia mamae, e kia mate mei te au tangata nei. (Apokalupo 14:1-5, NW; Iobu 14:1) Mei teaa atura te tu aroa o teia au ariki taunga mea riro mai!

Te Kite a te Vaerua

Te 144,000 “e akatainuanga tei rauka ia kotou no ko mai i tei tapu ra,” ko Iehova. (1 Ioane 2:20, NW) E akatainuanga ia no te manakonakoanga no te rangi ra. Kua tuku oki te Atua ‘i te akairo ki runga ia ratou e kua oronga i te matakite o te ka aru mai, koia oki, te vaerua, i roto i to ratou au ngakau.’​—2 Korinetia 1:21, 22.

Ae, te aronga e kapiki anga to ratou ki te rangi tei a ratou te akapapuanga a te vaerua o te Atua ta te reira ka rave. No runga i teia, kua tata a Paulo i roto ia Roma 8:15-17: “Kare oki te vaerua tuikaa tei rauka ia kotou kia mataku akaou; ko te Vaerua akatamariki ra tei rauka ia kotou, i karangaʼi oki tatou e, E Aba, e taku Metua. Ko te vaerua uaorai oki, e to tatou katoa nei oki vaerua, tei akakite ïa e, e tamariki tatou na te Atua: E e tamariki ra, e aronga tuanga ïa; e aronga tuanga i te Atua ra, e aronga tuanga tatou e te Mesia; te mate kapipiti nei oki tatou ma ia katoa, kia akakakā kapipitiia ma ia katoa oki.” Na te vaerua o te Atua, me kare te mana angaanga, e riro ana te aronga akatainuia kia kapiki e, “Aba, e taku Metua”!

Te akapapuanga maata e kua akatainuia tetai peretana ki te kapikianga o te rangi, koia oki e vaerua, me kare tu teitei, kia akatamariki ia. (Galatia 4:6, 7) Kua papu uaorai i te reira tangata e kua ikiia aia e te Atua ei tamariki vaerua e koia tetai o te 144,000 aronga tuanga kapipiti o te Patireia i te rangi. Ka rauka iaia i te akapapu e ko tona manakonakoanga no te rangi kare te reira e na tona anoano uaorai te reira i akakeu me kare tona manako anga, marira na Iehova te reira i te angaanga a te vaerua o te Atua ki aia ra.​—1 Petero 1:3, 4.

I raro ake i te mana o te vaerua tapu o te Atua, te vaerua, me kare teia tu teitei, o te aronga akatainuia kua riro te reira mei te mana opara. Ka akakeu te reira ia ratou kia ariki papu meitaki ki ta te Atua Tuatua ka tuatua mai no runga i te manakonakoanga o te rangi ra. Ka ariki katoa ratou na roto i te mataara papu ki ta Iehova au ravenga kia ratou i roto i te vaerua tapu. No reira, kua papu ia ratou e ko ratou te au tamariki vaerua e te aronga tuanga a te Atua.

Me tatau te aronga akatainuia i te Tuatua a te Atua e tuatua nei no runga i tana au tamariki vaerua e te manakonakoanga i te rangi ra, ko to ratou uaorai inangaro anga koia oki kia tuatua i roto uaorai ia ratou, ‘Te aiteanga ko au ia!’ Ae, te ariki rekareka nei ratou me taputou mai te Tuatua a to ratou Metua i tetai tutaki i te rangi ra. Ka tuatua ratou, ‘Te aiteanga ko au ia!’ me tatau ratou e: “E aku au akaperepere e, e tamariki tatou na te Atua i teianei.” (1 Ioane 3:2) E me tatau te aronga akatainuia e kua rave mai te Atua i te au tangata “kia riro tatou mei te popo mua o te au mea i angaia e ia ra,” to ratou uaorai manako ka tuatua e, ‘Ae, kua apai mai oki aia iaku no te reira akakoroanga.’ (Iakobo 1:18) Kua kite ratou kua “papetitoia ratou ki roto ia Iesu Mesia” e ki roto i tona mate anga. (Roma 6:3, NW) No reira e irinaki anga papu to ratou e e tuanga no te kopapa vaerua o te Mesia e te akamou nei i te manakonakoanga ka mate atu rai mei iaia e kia akatuia i te oraanga i te rangi ra.

E o atu ei ki te Patireia i te rangi ra, te aronga akatainuia ‘ka akamaroiroi kia kitea tikaia to kotou kapiki angaia e te iki angaia.’ (2 Petero 1:5-11) Te aere nei ratou i roto i te akarongo e te tupu nei rai i te pae vaerua, e te aronga katoa e manakonakoanga no te enua nei. No reira, eaa atu rai tetai apinga no te kite i te vaerua?

Eaa Ratou ka Kai Ei

Kare oki te au Kerititiano akatainuia e inangaro i te aere ki te rangi i te tumu e te marekakore nei i te oraanga i teia tuatau i te enua nei. (Akaaiteia atu kia Iuda 3, 4, 16.) Mari ra, na te vaerua tapu e akakite ki to ratou vaerua e e tamariki ratou na te Atua. Kua papu katoa ia ratou e kua tukuia ratou ki roto i te koreromotu ou. Te aronga i roto i teia koreromotu koia oki ko te Atua ko Iehova e te Iseraela vaerua. (Ieremia 31:31-34; Galatia 6:15, 16; Ebera 12:22-24) Ko teia koreromotu, kua akamataia teia na roto i te toto o Iesu tei maringi, ka rave ei i tetai papaki tangata no to Iehova ingoa e kia akariro i teia aronga Kerititiano akatainuia ei tuanga no te “uanga” a Aberahama. (Galatia 3:26-29; Angaanga 15:14) Ka vai rai te koreromotu kia angaanga e tae ua atu te katoatoa rava o te Iseraela vaerua i te akatuia ki te oraanga mate kore i te rangi ra.

Tetai katoa, te aronga kua tika tikai to ratou kapiki anga ki te rangi kare i ekoko e tei roto katoa i te koreromotu no te Patireia i te rangi ra. Kua taiku a Iesu ki teia koreromotu i rotopu iaia uaorai e tana au pipi i tona tuatua anga e: “Ko kotou ko te aronga e noo tamou i vaitata iaku i toku au timataanga nei: Mei toku metua i akono i tetai basileia noku ra, kua akono katoa au ia kotou; Kia kai katoa kotou kia inu oki i taku kaingakai i toku basileia ra, e kia noo ki rungao i te au terono i te akava anga i nga kopu tino ngauru ma rua o Iseraela ra.” (Luka 22:28-30) Kua papauia teia koreromotu ki te au pipi a Iesu i to ratou akatainuia anga ki te vaerua tapu i te ra o te Penetekote 33 T.N. Te angaanga nei rai te reira i rotopu i te Mesia e tana au ariki tei kapitiia e tuatau ua atu.​—Apokalupo 22:5.

Te aronga e kapikianga to ratou no te rangi kua papu ia ratou e tei roto ratou i te koreromotu ou e te koreromotu no tetai Patireia. No reira, te kai nei ratou i te akatutu anga o te varaoa e te uaina i te akamaaraanga mataiti o te Oroa Aiai a te Atu, me kare te Akamaaraanga i te mate o Iesu Mesia. Te varaoa opue kore kua akatutu te reira i to Iesu kopapa tangata ara kore, e te uaina, i tona toto apa kore tei maringi i tona mate anga e kia mana atu ei te koreromotu ou.​—1 Korinetia 11:23-26.

Me kua akakeu a Iehova ki roto ia koe te manakonakoanga no te oraanga ekoko kore no te rangi ra, te irinaki nei koe ki runga i te reira. Ka oronga koe i reira i roto i taau au pure te akameitaki anga o te reira manakonakoanga. Ka akamou te reira ia koe, e kare e rauka ia koe kia akaatea mei roto i toou tino. E tu inangaro toou i te rave akaope i ta te vaerua. Inara me kua papaki tai koe e kare i papu, kare koe i reira e kai i te nga akatutu anga o te Oroa Aiai a te Atu.

No Teaa te Tamanako Tarevake?

Penei ka kai tarevake etai i nga akatutu anga o te Akamaaraanga no te mea kare tikai ratou i kite e ko te akatainuanga “kare to te anoano, kare oki to te oro, no te Atua ra i aroa maira.” (Roma 9:16) Kare oki e tei te tataki tai te tika kia iki me koia me kare ko te vaine kia o atu ki roto i te koreromotu ou e kia riro ei tuanga okotai e te Mesia ra i roto i te Patireia o te rangi ra. Ta Iehova ikianga ko tei maata ia. I roto ia Iseraela taito, na te Atua i iki te aronga te ka tavini ei au taunga nona, e kua tamate ia Kora no te kimi noinoi i te taoonga taunga tei akairiia e te Atua ki roto i to Aarona ngutuare tangata. (Exodo 28:1; Numero 16:4-11, 31-35; 2 Paraleipomeno 26:18; Ebera 5:4, 5) Pera katoa, ka mareka kore a Iehova me ka oronga tetai peretana iaia uaorai e ko tetai ia tei kapikiia e koia katoa tetai o te au ariki e te taunga ra i te rangi me kare oki te Atua i oronga ana i te reira kapikianga.​—Akaaiteiteia atu kia 1 Timoteo 5:24, 25.

Ka tarevake rai tetai tangata kia manako e e kapiki anga tona no te rangi penei no te manako ngakau pakari i te tupuanga o te au manamanata kino e tupu nei. Te mate o te tokorua me kare e tumatetenga te ka akariro i tetai peretana kia ngaro tona inangaro i te oraanga i runga i te enua nei. Me kare e oa piri kua manako kia riro ei aronga akatainuia, e kua inangaro katoa teia peretana i te reira nooanga. No teia au tumu nei ka akainangaro i reira aia e ko te oraanga i te rangi ko tona ia. Inara kare e ko ta te Atua mataara teia i te oronga anga i te vaerua akatamariki ra. Ka akaari te reira i te akangateitei kore no ta te Atua akakoroanga no te enua mei te mea e te anoano nei tetai i te aere ki te rangi no te au tu oraanga tau kore me kare te manako ngakau taitaia i te enua nei.

Te irinakianga akonoanga atua taito ka akariro katoa i tetai kia manako tarevake e tei iaia te kapiki anga no te rangi ra. Penei i mua ana i kapiti ana ki te akonoanga tarevake tei irinaki ua e te oraanga i te rangi ra te manakonakoanga ia no te akarongo. No reira, ka anoanoia te Kerititiano kia paruru atu kia kore e aratakiia e te manako ngakau e te au manako taito tarevake.

E Puapinga Kia Akara Matatio

Kua oronga mai oki a Paulo i tetai tumu puapinga i tona tata anga e: “E teianei, ko te kai i teianei manga, e ko te inu i te kapu a te Atu, ma te taukore ra, e ara ïa i te kopapa e te toto o te Atu. E kimi matatio ra te tangata iaia uaorai, ka kai ei aia i taua manga ra, ka inu ei oki i tana kapu ra. Ko tei kai oki e ko tei inu oki ma te tau kore, kua kai ia e kua inu i te akaapa nona uaorai, koia kare i akara i te kopapa o te Atu ra.” (1 Korinetia 11:27-29) No reira, tetai Kerititiano tei papetitoia i teia nga mataiti ua akenei e tei manako e kua tae mai te kapikianga no te rangi ra kia akara matatio i te reira e te tu manako pure.

E tau te reira peretana kia ui ki aia uaorai: ‘Kua akakeu mai ainei etai atu iaku kia vai araara te manako no te oraanga i te rangi?’ Kare oki te reira i tau, kare te Atua i oronga ki tetai ua atu kia iki mai i etai atu no teia tika anga. Ko te tu manako ua, kare te reira i te akakite anga e kua akatainuia e te Atua, e kare katoa aia e akatainu i te aronga tuanga o te Patireia kia rongo i tetai au reo mei te tu e e tuatua akakite.

Ka ui tetai papaki kia ratou uaorai: ‘I mua ake ka riro mai ei ei Kerititiano, me i kai apinga akakona ana rai au? Me te kai vairakau nei au te ka taparu i te manako? Me i orongaia mai ana tetai tauturu no toku au manako manamanata me kare manako ngakau?’ Kua tuatua tetai papaki kua tamaki atu ana oki ratou i mua ana i te manako e ko te manakonakoanga ia no te rangi. Etai pae kua tuatua e kua apai ke te Atua i to ratou manakonakoanga no te enua e kua oronga i to te rangi ra. Kare te reira ravenga i tau i ta te Atua ra. Oti akera, kare te akarongo i te mea papu kore; e mea papu ia.​—Ebera 11:6.

Ka ui katoa tetai kiaia uaorai: ‘Me te anoano nei au i te turanga teitei? Me te noinoi nei au no tetai ngai mana taoonga i teianei me kare ei ariki e ei taunga kapitiia ki te Mesia?’ I te anere mataiti mua T.N., i te aere anga te patianga ki vao kia kimi i te tomo anga ki te Patireia i te rangi, kare oki te katoatoa o te au Kerititiano akatainuia e mou ra i te taoonga tiaki ei au mema no te pupu akaaere me kare ei aronga pakari me kare ei au tauturu orometua. E manganui oki e au vaine, e kare oki o ratou mana takake; e kare katoa tei akatainuia e te vaerua e oronga mai i te marama maata tikai, i te Tuatua a te Atua, i te mea kua rauka ia Paulo i te akakite e i te ako i etai o tei akatainuia ra. (1 Korinetia 3:1-3; Ebera 5:11-14) Te aronga tei a ratou te kapiki anga o te rangi ra kare ratou i akariro ia ratou e aronga ngateitei e kare ratou i akamaata atu e ko ratou tei akatainuia. Mari ra, te akaari nei ratou i te tu akaaka tei tau oki ki te aronga tei a ratou “te manako o te Mesia.” (1 Korinetia 2:16, NW) Kua kite katoa ratou i tei anoanoia e te tuatua tika a te Atua kia rauka i te katoatoa o te au Kerititiano, noatu to ratou manakonakoanga e no te rangi me kare no te enua nei.

Kare tei manako e e kapiki anga tona i te rangi e oronga mai ki tetai peretana te au eeuanga umere. E mataara rai ta te Atua no te pirianga manako i tana i oronga i te kai vaerua ki te akaaerenga i te enua nei. (Mataio 24:45-47) No reira auraka tetai ua atu e manako e me akatainuia tetai Kerititiano ka rauka iaia te mana pakari teitei ra i rungao i te “urupu maata” e manakonakoanga enua to ratou. (Apokalupo 7:9, NW) Te akatainuanga ki te vaerua kare te reira e kitea na roto i te rave maroiroi i te tutu aere, te pauanga i te au uianga Puka Tapu, me kare te au ako Puka Tapu, i te mea te au Kerititiano e manakonakoanga no te enua to ratou, te rave pera katoa ra ratou. Mei te aronga akatainuia ra, e oraanga Kerititiano mako katoa to ratou. No teia tika, ko Samasona e etai atu no mua ake i te tuatau Kerititiano tei a ratou oki te vaerua o te Atua e kua ki oki i te toto mapu e te kite. Inara, kare e tai o te ‘au kite o te reira urupu maata’ i rauka te manakonakoanga no te rangi ra.​—Ebera 11:32-38; 12:1; Exodo 35:30, 31; Au Akava 14:6, 19; 15:14; 1 Samuela 16:13; Ezekiela 2:2.

Akamaara Naai e Rave te Iki

Me ui tetai taeake akarongo no runga i teia kapikianga ki te rangi, te tangata pakari ikiia ra me kare etai atu Kerititiano maroiroi ka rauka kia uriuri atu i te reira ki aia. Inara kare tetai peretana e tika kia oronga i teia tika no tetai atu, e ko Iehova oki te ka oronga i teia manakonakoanga no te rangi ra. Tetai ua atu tei rauka te kapikianga no te rangi kare rava oki ratou e ui ki tetai Kerititiano ke e kua rauka ainei iaia te reira manakonakoanga. Tei akatainuia ra, “kua akaanau akaouia, eiaa no te ua pe ua nei, no te ua pe kore ra, i te tuatua ora a te Atua, ko te ka tika i te vairanga, kare rava e mutu ra.” (1 Petero 1:23) Na roto i tona vaerua e te Tuatua, ka tanu te Atua i te “ua” te ka akariro i te reira uaorai ei “mea anga ouia ra,” ma te manakonakoanga i te rangi ra. (2 Korinetia 5:17, NW) Ae, na Iehova e rave i te ikianga.

Me apii tatou i te Puka Tapu ki te aronga ou, i reira, kare i te mea meitaki kia akakeu atu e kia tauta kia uriuri me kua rauka rai te kapikianga i te rangi ra. Inara akapeea me kua akono kore te akarongo o tetai tei akatainuia ra, e ka anoanoia tetai mono no te reira? Ka tau oki kia tamanako e ka oronga atu te Atua i te kapikianga ki te rangi no tetai atu tei oronga ua ana i te tu mako i roto i te angaanga akarongo ki to tatou Metua i te rangi ra no tetai au mataiti e manganui.

I teia tuatau, te tumu maata o te tuatua akakite a te Atua koia oki kare e no te au tangata kia riro mai ei au mema o ta te Mesia ra vaine akaipoipo i te rangi. Mari ra, “te tuatua nei te vaerua ma te vaine akaipoipo ou ra, E aere mai”! E patianga teia no te oraanga i roto i te enua parataito. (Apokalupo 22:1, 2, 17) I to te aronga akatainuia aere anga ki mua i roto i teia angaanga, te akaari nei “ma te manako akaaka roa,” e kia angaanga, ‘kia kitea tikaia to kotou kapiki angaia e te iki angaia.’​—Ephesia 4:1-3, NW; 2 Petero 1:5-11.