Au Uianga a te Aronga Tatau

◼ Koai ra te tata Puka Tapu e e “tianara” aia, mei tei taikuia i roto i te puka The Bible​—God’s Word or Man’s?a

Ko te reira puka tauturu i te Tuatua a te Atua kua tuatua i runga i te kapi 10: “E mea takake katoa te Puka Tapu no te mea e maata te au tuatua anga tei maro ia e te aronga tata i te reira. E 40 aronga, kapiti mai ki teia te au ariki, au tiaki, aronga tautai, au tavini tutara, au taunga, mei te okotai tianara, e te rapakau maki, tei rauka ta ratou tuanga i te tata anga i te au tuanga tukeke o te Puka Tapu. Kua putuputu te taime kua rave mai te aronga tata i te tuatua tei maro ia: koia oki te tata ra ratou i te au manako kare no ratou mari ra no te Atua.”

Kua ui mai tetai papaki e ko teea te au tata Puka Tapu tei kapitiia ki taua rave anga tukeke me kare au angaanga. No teia tumu, e akara ana i te ka aru mai, ine:

Au Ariki: E maata rai te au tata Puka Tapu e au ariki ratou. Ka tae viviki ua mai ki toou manako te ingoa o Davida e Solomona. (Salamo 3, te upokotuatua; Maseli 1:1; Koheleta 1:1) Inara, te imene i roto ia Isaia 38:10-20 kua tataia e Hezekia. (Isaia 38 Irava 9) E manganui te au aronga kite tei irinaki katoa e nana i atu ia Salamo 119, penei i mua ake ka riro ei ei ariki. E kua o katoa atu oki a Hezekia i te tata anga i te pene 25–29 o Maseli ra. (Maseli 25:1) Te pene openga o Maseli kua akapapaia te reira e “te ariki ra a Lemuela.” Kua kapiti mai tetai iaia e ko te Ariki ko Hezekia, etai ra kua manako e a Lemuela ko te Ariki ko Solomona ia.​—Maseli 31:1.

Au Tiaki: Ko Davida e te peroveta ko Amosa kua angaanga ana oki ei nga tiaki. (1 Samuela 16:11-13; 17:15, 28, 34; Amosa 1:1) Kua tata a Amosa i te puka Puka Tapu tei runga tona ingoa, e ko Davida kua atu aia e manganui o te au salamo. Te Salamo 23 rongonui kua akaari mai te reira i to Davida tu kite i te angaanga tiakianga.

Aronga tautai ika: E tika oki te au apotetoro a Iesu e aronga tautai te reira, mei a Ioane, e Petero tei akauruia i muri mai kia tata i te au puka o te Puka Tapu. (Mataio 4:18-22) I raro ake i te akauruia anga e te Atua kua tata oki a Ioane i tetai Evangeria e etai nga reta e toru o te puka o Apokalupo. Kua tata oki a Petero e rua nga reta tei akauruia.

Au tavini tutara: Ko Daniela e Nehemia e nga tavini oki no te kavamani ke rai tei mana ki rungao i to te Atua iti tangata. (Nehemia 1:1, 11; 2:1, 2; Daniela 1:19; 2:49; 6:1-3) E rua nga puka o te Puka Tapu tei runga te nga ingoa o teia nga tangata.

Au taunga: E rua o nga peroveta a te Atua kua tata i te au puka Puka Tapu e taunga oki raua. Ko Ieremia e Ezekiela. (Ieremia 1:1; Ezekiela 1:1-3) Tetai katoa, ko Ezera no te taunga Aarona aia “e tata tuatua karape i te ture a Mose.” “Kua akonokono ua ana oki aia i tona ngakau e kimi e e rave, i te ture a Iehova, e apii oki ia Iseraela i te au akonoanga e te au tuatua tau.”​—Ezera 7:1-6, 10, 11.

Tianara: Te taoonga ta Iosua e mou ra iaia e arataki ra i te nuku vaeau ia Iseraela e aere ra ki roto i te Enua Taputouia e kia tamaki atu ki te au tangata enemi e tau tikai i reira aia ei tianara. (Iosua 1:1-3; 11:5, 6) Kua rauka oki iaia te tikaanga kia tata i te puka a Iosua. E tetai katoa, tetai aronga tatau ka manako rai ia Davida ei tangata kua angaanga ana ei tianara i mua ake ka riro mai ei ei ariki.​—1 Samuela 19:8; 23:1-5.

Rapakau maki: Ei taopenga, kua akakite mai a Kolosa 4:14 “a Luka rapakau maki akaperepereia.” Kua tata a Luka i te Evangeria tei apai i tona ingoa, e pera katoa te Angaanga a te au Apotetoro.

[Au Tataanga Rikiriki i Raro]