Ko Teianei te Tuatau no te Kimi ia Iehova

“E ko Iehova, kua akara mai aia mei te rangi ki raro nei ki runga i te tamariki a te tangata, kia kitea me te vaira tetai e kite oonu tona, tetai tangata te kimi ra ia Iehova.​—SALAMO 14:2, “NW.”

1, 2. (a) Eaa te manako o te aronga e manganui no te Atua, ko Iehova? (e) E akapeea tatou i kite ei e te kite maira Iehova i te manako kore ua o te tangata nei?

I TEIA tuatau nei, kua kopaeia te Atua mou ko Iehova e te aronga irinaki kore e Atua tetai, te aronga manako e kare e kitea te Atua, te aronga akamori i te au atua pikikaa, e te au mirioni ua atu te karanga ra e te irinaki ra i te Atua mari ra kua akakore iaia na ta ratou e rave ra. (Tito 1:16) E manganui te manako ra mei te tangata apii o Tiamani o te 19 anere mataiti ra koia Nietzsche e “kua mate te Atua.” Te kite kore ra ainei a Iehova i teia manako neneva? Kare, no te mea kua akauru aia ia Davida kia tata: “Te tuatua ra te neneva i roto i tona ngakau: ‘Kare e Iehova.’ Kua rave ratou i te kino, e mea viivii anake ta ratou ravenga. Kare rava tetai i rave i te meitaki.”​—Salamo 14:1, NW.

² E kua tata ua atura a Davida: “E ko Iehova, kua akara mai aia mei te rangi ki raro nei ki runga i te tamariki a te tangata, kia kitea me te vaira tetai e kite oonu tona, tetai tangata te kimi ra ia Iehova.” Ae, te kite ra te Atu Ngateitei i te aronga te kimi ra i te kite iaia e kia tavini atu iaia. E no reira, e mea puapinga no tatou kia kimi pakari iaia i teianei. Ka riro tona aiteanga mei te tuke anga o te ora mutu kore e te akapou anga mutu kore ra.​—Salamo 14:2, NW; Mataio 25:41, 46; Ebera 11:6.

3. Eaa te tika te vai maira no te tuatau ki mua?

³ No reira, te kite nei tatou eaa i puapingaʼi kia tauturu tatou ia etai ke atu kia kimi ia Iehova i teianei. E au mirioni ua atu te au tangata kare i aravei ake i tetai Kite no Iehova e kare katoa i akarongo ana i te “tuatua meitaki no te patireia.” Mei teaa te maata atu o te numero o te “urupu maata” te ka kitea mai i mua ake i te “tumatetenga maata,” kare tatou i kite. Inara e mea papu te vaira te tika no te aronga maata atu kia kimi e kia kitea te Atua ko Iehova i te tuatau vaitata ua ki mua, i mua ake ka tu reiti ei. Ko te uianga i teianei e, Eaa ta tatou ka rave ei tauturu i te aronga e rau ngauru ua atu tauatini kia kite i te Atua?​—Mataio 24:14, NW; Apokalupo 7:9, 14, NW.

4, 5. I ta ratou kimi anga no tetai atua, eaa ta te aronga e manganui te iki ra?

⁴ E manganui te au tangata i teianei ao i teia tuatau te kimi nei, inara te kimi nei i teaa? E toko iti ua te kimi tika ra i te Atua mou okotai, koia a Iehova. E manganui ua atu te iki ra i tetai atua tei tau ki to ratou uaorai inangaro e to ratou au akaapa anga katoa oki. Mei ta tetai tangata i rave te ikianga no Marike ko George Gallup, Jr., i tuatua e: “Kare e kitea e koe te maata o te tuke anga i rotopu i te aronga aere pure ma te aronga kare e aere pure ana no te pae i te kikite pikikaa, te kore e tutaki i te tero, e te keia, ko te tumu maata no te tini o te akonoanga atua akaoaoa ua.” Kua kapiti katoa mai aia e “e manganui te akamata ra i tetai akonoanga atua te ngoie ua ra no ratou ei tamataora ua ia ratou . . . Kua tapaia e tetai tangata e e akonoanga atua à la carte.”

⁵ Ka karanga tetai papaki, “Te meitaki ua ra taku akonoanga atua.” Inara, ko te uianga tau tikai, “Te meitaki ra ainei taku akonoanga atua ki te Atua?” E tika, te rekareka ua ra te maata anga o to Kerititome e to te akonoanga Initu kia akamori atu i te au tiki e te au itoro. Ko te maata anga o taua aronga te karangaia ra e Kerititiano te kite ra e te rava ua ra tetai atua Toru Tai ingoa kore no ratou. E tere atu i te 900 mirioni Mutiremi te irinaki ra, ia Allah. I tetai pae e au mirioni ua atu te aronga atua kore te na ko ra e kare e Atua.

Te Aronga te Anoano ra i te Tauturu

6. Eaa ta te aronga e manganui te tatau ra i Te Punanga Tiaki Anga e kite nei?

⁶ Inara peea tetai papaki o tatou nei te tatau putuputu ra i teia makatini? Kua kimi ana tatou i te Atua mou ra e kua kitea aia e tatou. Kua papu ia tatou e tika te au tuatua ia Iakobo 4:8: “E akavaitata atu ki te Atua, e nana e akavaitata mai kia kotou na.” Na te rave kapiti anga ma te putuputuanga Kerititiano, kua akavaitata atu tatou ki te Atua, e kua kite pu tatou tatou uaorai e i akapeea to Iehova ra i te akavaitata anga mai kia tatou nei.​—Ioane 6:44, 65.

7. Akapeea tatou i kite ei e e manganui te au tangata te manako maira kia akono i te tuatua mou?

⁷ Inara, te kite nei tatou e te vaira tetai aronga e manganui te mataora ua ra i te kapiti mai ma te au tangata o Iehova i etai tuatau mari ra kare i rave papu i te akavaitata atu kia Iehova na te akatapu anga e te papetito anga. Akapeea tatou i kite ei i teia? I te 1990 vaitata i te tai ngauru mirioni te au tangata tei akaputu atu ki te Oroa Akamaara anga i te matenga o Iesu. Inara e ia te rave ra i te akakitekite anga i te tuatua meitaki no te Patireia? E manga tere ua i te a mirioni. Tera te aiteanga e vaitata i te ono mirioni te oaoa maira i te tuatua mou e te rekareka ra i te kapitianga mai ma tatou katoa i etai tuatau inara kare i akamata ake i te akamaroiroi i te reo ma o te tuatua mou na roto i te tutuanga i te tuatua meitaki o te Patireia. Kare e ekoko anga e i etai tuatau e manganui te tuatua ra no Iehova e tona tutara i te Patireia. Inara, kare ratou i akataka papu ake ia ratou uaorai ei au Kite no Iehova. Te anoano katoa nei tatou i te tauturu i teia aronga.​—Zephania 3:9; Mareko 13:10.

8, 9. (a) Eaa ta Iehova e akamaroiroi maira ia tatou kia rave? (e) Eaa ra i pakari kore ei kia kore e akono i ta Iehova ako anga?

⁸ E mea meitaki no tatou kia akamaroiroi atu i teia aronga kia mataora, ei au Kite no Iehova no te rave i te tuanga openga o te angaanga maata te raveia nei i teianei i te ao katoa. E akara i te patianga aroa a Iehova ia Maseli 1:23: “E ariu mai kotou i taku e ako atu nei: i na, e riringi ua atu au i taku vaerua ia kotou, e akakite pu tikai au ia kotou i taku nei tuatua.” (Akaaiteia atu kia Ioane 4:14.) Mei teaa ra te akamaroiroianga kia kite e ka akono maira Iehova i to tatou raveanga papu i te au takainga kia akataka ia tatou uaorai ma tona ingoa e te akamori anga iaia! E mea papu, e kare tatou e anoano kia kapitiia atu ki te aronga te akatakaia maira ia Maseli 1:24, 25: “Kua kapiki atu au, e kare i tika ia kotou; kua akatika atu au i toku rima, e kare rava e tangata i akono mai; Kua ope ra taku i ako atu i te akarukeia e kotou, e kare i akono mai i taku i akaapa atu.”

⁹ Ko te aronga kare e akono i te ako a Iehova e kia kimi iaia i te tuatau e kiteaʼi aia e ka akaruke i ta ratou tuku anga tika kia kite roa ratou i te akamataanga tikai o te mate maata ka kite ratou e i roa rava ta ratou tiaki anga. Ka akakite mai te reira tu i te ngere i te akarongo e te pakari e te manako kore anga i te aroa ua o Iehova.​—2 Korinetia 6:1, 2.

10. Eaa te kino o te manako kore e te akono kore?

¹⁰ Ei akatutu anga i te meitaki o te rave viviki, ka aru anake ainei koe i te tuatua meitaki a te taote i muri ake i te kite anga e kua tu koe i te nimonia tei kino roa ra? Me kare ainei, i to kite anga i te au akairo mua no te maki? Eaa i reira ka tiaki ei kia roa i mua ake ka akataka ke mai ei ia koe uaorai mei te ao maki o Satani e ka piri atu ei kia Iehova e tona au Kite? Ko te tupu anga no te akarongo kore, te manako kore, e te akono kore te akatakaia maira ia Maseli 1:26-29: “Ka kata katoa au kia rokoia kotou e te kino ra; e taitoito atu au, kia rokoia kotou e ta kotou e mataku ra; . . . Ei reira ratou e kapiki mai ei iaku, kare ra au e ki atu; e kimi vave mai ei ratou iaku, kare ra ratou e kite mai iaku: Ko ratou oki kare i inangaro i te kite, e kare i anoano i te mataku ia Iehova.” Auraka tatou kia kitea i ‘te kimianga ia Iehova’ i muri ake i te openga o te tuatau!

11. Eaa te tauturu te vai maira no te aronga te kimi ra kia tavini atu i te Atua?

¹¹ Penei ko tetai papaki te tatau nei i teia makatini te kimi ra i te Atua mou. Te rekareka nei matou e te rave tamou ra kotou i te kimikimi anga. Te pure nei matou e ka akakeu to kotou kite i te Puka Tapu ia kotou kia rave papu kia tu ngaueue kore no te tuatua mou. E akapapu i to kotou manako e kua papa te au putuputuanga tataki tai o te au Kite o Iehova kia tauturu atu ia kotou i ta kotou kimikimi anga.​—Philipi 2:1-4.

Te Tuatau no te Maroiroi e te Angaanga

12, 13. Eaa tatou i tau ei kia rave angaanga no runga i te akamori anga tika?

¹² Eaa ra i meitaki ei no tatou pouroa kia rave i te akataka ia tatou uaorai ma te Atua ko Iehova e te akamori anga mou iaia? No te mea te aere atu ra te au mea te tupu nei ki te akaotianga. Te viviki atura te urianga o te au kapi o te tuatua enua i te ka rauka i te tangata nei i te tatau. Kare teia i te tuatau no te noo ua ki runga i te aua me kare no te maanaana ua. Kua akataka papu maira Iesu: “Kare aia i ko nei iaku nei, ko toku ïa enemi, e te kore e akaputuputu katoa mai, kua akapueurikiriki ke ïa.” Kua na ko katoa aia: “Ko te tangata oki e akama iaku e taku nei tuatua, koia ta te Tamaiti a te tangata nei e akama, kia aere mai aia ma tona uaorai kakā e to te Metua, e to te au angela tapu ra.”​—Mataio 12:30; Luka 9:26.

¹³ Ko teianei te tuatau no te akamaroiroi e te rave i te angaanga! Te kite nei tatou e te aere atura te au mea e tupu nei i teianei ao ki ea, e te mama maira a Aramakito ki runga i te kotinga o te rangi ma te enua. No reira, ko te kapiki anga kia kimi ia Iehova i teianei i mua ake i te ‘ra o tona riri,’ i te tuatau te ka kitea atu aia ra. Kia tae ki te tumatetenga maata, kua tu reiti roa i reira.​—Zephania 2:2, 3; Roma 13:11, 12; Apokalupo 16:14, 16.

14. Eaa ta tatou au tumu no te kimianga i te Atua ra?

¹⁴ Ko te tuatau tau tikai teianei no te au tangata katoatoa kia kimi i ta te Atua ra akaperepereanga. Kua taka meitaki ta te apotetoro ko Paulo i akakite maira ia Angaanga 17:26-28 (NW): “Na [te Atua] i anga i te tangata o te pa enua katoa nei no roto mai i te tangata okotai ra, kia noo ki runga i te tua katoa o te enua nei, e kua akanoo aia i te tuatau e te kotinga o te nooanga o te tangata nei, kia kimi ratou i te Atua, penei ko te aa atu ratou iaia e ka kitea tikai aia, noatu rai, e ko te tika, kare aia i mamao atu ia tatou tataki tai. Nana oki tatou i orai e i aaere ei e i vai ei.” Ko tera tuatua openga ra, “Nana oki tatou i orai e i aaere ei e i vai ei,” te oronga maira i te tumu tau no tatou kia kimi i te Atua. E akameitaki i te aroa ua o Iehova, te vai nei tatou i te ngai kokota o te enua mea ngiti nei mari ra tei te ngai tano te reva. Kare aina tatou e tau kia akameitaki i te Atu Ngateitei o te ao katoa e pini ua ake? Kare aina i te mea tika no tatou kia akaari i to tatou akameitaki anga iaia na roto i te tu tau tikai?​—Angaanga 4:24.

15. (a) Eaa ta te tata tuatua enua ko Arnold Toynbee i manako e ko te akakoroanga ia no te akonoanga atua teitei atu? (e) Eaa ta tatou ka tau kia rave ei akakaka i te Atua ra?

¹⁵ Kua tata te tata tuatua enua ko Arnold Toynbee e: “Ko te akakoroanga mou o te akonoanga teitei i te Atua ko te akatotoa i te au ako e te au tuatua mou e tona tumu i te pae vaerua ki roto i te au meta e manganui katoa te ka rauka kia itaeia, kia raukai i te reira au meta tataki tai katoa i te akatupu i te openga tika no te Tangata. Ko te openga tika no te tangata ko te akakaka ia i te Atua e te rekareka anga Iaia e tuatau ua atu.” (An Historian’s Approach to Religion, nga kapi 268-9) Kia raukai te akakaka i te Atua, ka tau tatou kia kimi iaia na mua e kia rauka te kite tika iaia e tona au akakoroanga. No reira rai, ta Isaia kapiki anga i tau ei: “E kimi kotou ia Iehova, koi kitea ake aia, e kapiti kotou iaia, koi vaitata mai aia: Kia akaruke te tangata kino i tona aerenga, e te tangata tuatua-tika kore i tona manako: ka oki ei aia kia Iehova, e nana aia e aroa mai; e ki to tatou Atua, te maata ra oki iaia te akakore i te ara.”​—Isaia 55:6, 7.

Eaa te Tauturu Tau ta Tatou ka Oronga?

16. (a) Eaa te akaaoanga te aro maira i te putuputuanga Kerititiano? (e) Na teea mataara tau ka raukai ia tatou i te tauturu ia etai ke atu ra kia tavini ia Iehova?

¹⁶ Ko teia aronga e au mirioni ua atu te akarongo maira e kare ra i akamata ake i te akakitekite aere, te tuku maira ratou i tetai akaaoanga kia tatou katoatoa. Eaa ta tatou ka rave na roto i tetai mataara tau ei aronga pakari, ei au orometua tavini, ei au painia, e ei aronga akakitekite aere kia tauturu atu i teia aronga oaoa mai i te tuatua mou kia riro ratou ei aronga rave i te akamori anga mou ma tatou katoa nei? Ko tetai tu no te oronga i te tauturu tau te anoanoia ra, na te aere atu ki to ratou kainga e ka rave atu ia ratou ki te Are Uipaanga Patireia kia rekareka putuputu katoa ratou i te puapinga no to Iehova ra vaerua. Ko ta Paulo ako ki te au Epera ra, i te Ebera pene 10, nga irava 24 e te 25, e mea rapurapu ia i teia tuatau nei mei te tu rai i reira ra: “E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra, i te vaitata anga mai.” Te akamaroiroi atu nei matou i te aronga katoatoa te inangaro ra kia kite i to Iehova mareka anga mai e, kia taokotai putuputu atu ma te au Kite o Iehova i to ratou Are Uipaanga Patireia.

17. Me ka tauturu tatou i te aronga te apii ra i te Puka Tapu i ta ratou kimi anga ia Iehova, eaa nga uianga te tau ra kia pauia?

¹⁷ Me te apii ra tatou ma tetai te aere putuputu maira ki te au uipaanga, ka rauka ainei ia tatou i te tauturu iaia kia tau ei akakitekite aere i te tuatua meitaki? (E akara i te Organized to Accomplish Our Ministry, nga kapi 97-9.) E kia riro maira aia ei akakitekite aere noatu kare i papetitoia, te orongaia atura ainei te patianga kia aru putuputu mai ma tatou katoa i te rave i te angaanga tutu aere i te ngai tangata e ki etai o ta tatou au apii Puka Tapu e pera katoa te oki akaou anga i te aravei? E akara i Te Punanga Tiaki Anga o Peperuare 1, 1990, te kapi 29.) Tera te tu, me tau anake taua aronga ou ra no te aere ki vao, te akamaroiroi ra ainei tatou ia ratou na te tuku anga kia kite tikai ratou i te au tupu anga meitaki no ta tatou angaanga tutu aere?​—Mataio 28:19, 20.

E Meitaki ra Kia Kimiia a Iehova

18. Akapeea ta Iehova akaari mai anga i tona aroa ki te au tangata nei?

¹⁸ No te atinga oko o Iesu Mesia, kare a Iehova e akamou i ta tatou ara kua topa e to tatou rave kore i tona anoano me ka tataraara tatou e ka akono ei i te akarongo. E akamanako i te au tuatua a Davida: “Kare akenei aia i akaoko mai ia tatou e kia aite ki ta tatou au ara; kare oki i tutaki mai ia tatou e kia aite ki to tatou au kino. Mei te teitei o te au rangi i runga i te enua nei, mei te reira te maata o tona aroa i te aronga i mataku iaia ra. Mei te itinga o te rā e taka ke i te opunga o te rā ra, ko tana ïa akataka ke anga i ta tatou au ara ia tatou nei. Mei te aroa o te metua ki tana ra au tamariki, ko to Iehova ïa aroa ki te aronga i mataku iaia ra. Kua kite oki aia i to tatou tu; te manako ra aia e, e one tatou nei.”​—Salamo 103:10-14; Ebera 10:10, 12-14.

19. Eaa te akamaroiroi anga te vaira no te aronga tei aere ke atura mei te tuatua mou?

¹⁹ E Atua puapinga tikai a Iehova e te aroa. Me ka aere tatou kiaia ma te taakaaka e te tataraara, ka akakore aia i te ara e ka ngaro ke atu te reira i tona manako. Kare roa aia e akamoupuku e, e tuatau ua atu, ma te tamamae anga ki roto i te ai mutu kore i era ei akautunga. Kare, mei ta Iehova i tuatua ra: “Ko au, ko au nei rai, ko tei taparapara i taau ra au tuatua kino noku uaorai, e kare oki au e manako akaou i taau ra au ara.” Mei teaa ra te akamaroiroi anga ta te reira no tetai ua atu tei aere ke ra mei te tuatua mou e kua akono kore i to ratou pirianga ma Iehova! Te akamaroiroi katoaia ra ratou kia kimi ia Iehova i teianei e kia oki akaou mai i te angaanga kapiti anga ma te au tangata no tona ingoa ra.​—Isaia 43:25.

20, 21. (a) Eaa te akaraanga akamaroiroi ta tatou i kite ia Iuda i taito ra? (e) Eaa ta te aronga o Iuda i rave kia raukai ta Iehova akameitaki anga?

²⁰ No teia tu e akaraanga akamaroiroianga to tatou ia Asa te Ariki o Iuda i taito ra. Kua takoreia atu e ia te akamori pikikaa i tona patireia, inara kua vai mai etai tuanga akamori anga etene. Te akataka maira te tataanga ia 2 Paraleipomeno 15, i nga 2 Paraleipomeno 15 irava 2 ki te 4, e eaa ta te peroveta ko Azaria i tuatua kia Asa ei akamaaraara anga: “Tei ia kotou a Iehova, ko kotou i piri mai kiaia ra; kia kimi kotou iaia, ka kitea aia e kotou; kia akaruke ra kotou iaia, ka akaruke aia ia kotou. E manganui oki te rā kare o Iseraela Atua tikai, . . . To ratou ra tumatetenga anga ra, kua ariu ratou ki te Atua o Iseraela kia Iehova, e kua kimi ratou kiaia, kitea iora aia e ratou.”

²¹ Kare a Iehova i pipini kanga ua i te Ariki ko Asa ra, mari ra kua “kitea iora aia.” I akapeea to te ariki ra tu akono i te reira tuatua? I roto tikai i taua pene rai, i nga 2 Paraleipomeno 15 irava 8 e te 12 te pau maira: “E kite akerā Asa i teianei au tuatua, . . . kua akamaroiroi iora aia, e kua apai ke atura i te au idolo viivii no te enua katoa ra . . . e kua patu akaou iora i te atarau a Iehova ki mua i te tomoanga o te are o Iehova: Kua papau iora [Iuda] i te koreromotu e kimi i te Atua o to ratou ai metua ia Iehova, ma to ratou ngakau katoa, e to ratou [meta, NW] katoa oki.” Ae kua kimi maroiroi ratou ia Iehova “ma to ratou ngakau katoa e ma to ratou [meta, NW] katoa oki.” Eaa tei tupu ki taua iti tangata katoa ra? Te akakite maira te 2 Paraleipomeno 15 irava 15 kia tatou e: “Mareka rava akera Iuda katoatoa i taua taputou ra: kua taputou oki ratou ma to ratou ngakau katoa, e kua kimi ratou iaia ma to ratou anoano katoa; e kua kitea oki aia e ratou: e kua oronga mai a Iehova i te au ia ratou e pini ua ake.”

22. Eaa te akamaroiroi maira ia tatou i teianei kia rave i te angaanga na Iehova?

²² E i teianei, kare ainei te reira i te akamaroiroi anga no tatou katoatoa kia rave papu i te akamori anga ma ia Iehova? Te kite nei tatou e te vaira te tika no etai atu au mirioni ke kia akapaapaa katoa ia Iehova. Kare e ekoko anga e te rave nei e manganui o teia aronga i te taui anga i to ratou oraanga kia tau ki ta te Tuatua Tapu akapapa anga no te angaanga kia Iehova. Te tupu maira te kite oonu e te akarongo o tetai papaki, te kimi ra ia Iehova, e kare e roa atu ka akakeuia kia oronga i te reo ma kia etai ke atu na te raveanga atu kia ratou i te kite oonu no te tuatua mou no Iehova e tana au akakoroanga no tona Patireia. E no teaa ra i puapinga maataʼi no tatou katoatoa kia kimi ia Iehova i teianei i te tuatau te ka kitea aia ra? No te mea kua vaitata tana ao ou i taputou maira!​—Isaia 65:17-25; Luka 21:29-33; Roma 10:13-15.

Maara Ainei ia Koe?

◻ Koai ma te akaari ra i te tu manako kore i te Atua mou, ko Iehova?

◻ Eaa te akatupu anga a te akonoanga atua ki runga i te tu akono?

◻ Penei eaa te tupu anga ka rauka i te au Kite rave angaanga?

◻ Eaa i tau ei teia tuatau no te akamaroiroi e te rave angaanga?

◻ Eaa i puapingaʼi kia kimi ia Iehova?

[Tutu i te kapi 10]

E manganui te au oa o te au Kite o Iehova tei aere ana ki te Oroa Akamaara Anga penei ka riro mai ei au tavini no te Atua

Te Aronga i te Oroa Akamaara Anga 1990 e: 9,950,058

Te take o te aronga akakitekite aere i te 1990 e: 4,017,213

[Tutu i te kapi 12]

I to te Ariki ko Asa tuatau ra, kua ariu atu te iti tangata kia Iehova