To Iesu Oraanga e te Angaanga Orometua

I te Tai o Galilea

KUA oki atu te au apotetoro ki Galilea i teianei, mei ta Iesu i akaue atu kia ratou i mua akera kia rave. Inara kare i papu ia ratou e eaa ta ratou ka rave i reira. I muri iora, kua karanga atura Petero kia Toma, kia Natanaela, kia Iakobo e tona taeake kia Ioane, ma etai atu apotetoro e rua katoa ra: “Te aere nei au e tautai.”

Kua tuatua maira taua toko ono ra e: “Aere katoa tatou.”

I taua po roa ra, kare e apinga i mou mai ia ratou. Inara, koi akamata ua maira te marama, kua tae maira Iesu i te pae roto ra, kare ra te au apotetoro i kite e ko Iesu. Kua kapiki maira aia: “E te au tamariki ra, e manga ta kotou?”

“Kare ua”! ta ratou ia i kapiki atu kiaia na runga mai i te vai.

“Ka tuku i te kupenga ki te pae katau i te pai na, ka rauka ïa ta kotou,” ko tana i tuatua mai. Ei to ratou rave anga i te reira, kare ua atura i maranga ia ratou kia kite i te kupenga no te maata o te ika. “Ko te Atu”! ko ta Ioane i karanga. Kakau iora Petero i tona kakau i runga, e rere atura ki raro i te tai, e kua kau atura ki uta e vaitata i te 90 mita. Kua aere katoa atura etai nga apotetoro ra na runga i te poti rikiriki, ma te kikaanga i te kupenga kua ki i te ika.

I to ratou tae anga ki uta, te ka ra te ai, e te ika ki runga, e te varaoa oki. “Ka rave mai na i tetai aronga i ta kotou ika i rauka ra,” ta Iesu i karanga atu. Kua aere atura Petero ki runga i te poti e kika maira i te kupenga ki uta, e 153 ika mamaata i roto!

Kua pati atura Iesu: “Ka aere mai ka kai.”

Kare ua ra tetai pipi i ui atu kiaia, “Koai koe?” kua kite oki ratou e, ko Iesu ia. Ko te itu ia o tona akakite anga mai i muri ake i te tuakaouanga, e ko te toru ia ki te au apotetoro ei pupu. Kua oronga atura aia i te kai, te varaoa e te ika na ratou tatakitai.

I te oti anga ta ratou kaikai anga, penei kua tungou atura Iesu ki taua au ika mamaata i rauka maira e kua ui atu kia Petero: “E Simona a [Ioane, NW] e, te maata na toou anoano kiaku i teia?” Penei te aiteanga o tana tuatua e, Te maata atura ainei toou inangaro i te angaanga tautai i te angaanga taku i akapapa naau kia rave?

“Kua kite koe e, te anoano atu nei au ia koe,” ta Petero i karanga.

“Ka angai i taku au punua mamoe,” ta Iesu ia i karanga atu.

Kua karanga akaou aia ko te tu rua ia: “E Simona a [Ioane, NW] e, te anoano na koe iaku?”

“A, e te Atu, kua kite koe e, te anoano atu nei au ia koe,” ta Petero i pau atu.

“Ka tiaki i taku au mamoe,” ta Iesu i akaue akaou atu.

Ei reira, ko te tu toru ia, kua karanga atura aia: “E Simona a [Ioane, NW] e, te anoano na koe iaku?”

Kua aue a Petero i reira. Penei kua manako aia e te ekoko ra Iesu i tona tu tiratiratu. No te mea oki, i te timata angaia a Iesu i mua ua ake ra no tona ora anga, e toru katoa o Petero uuna anga iaia. E no reira kua karanga atura Petero: “E te Atu, kare ua e mea toe i te kitea e koe; kua kite koe e, te anoano atu nei au ia koe.”

Kua akaue atura Iesu, “Ka angai i taku au mamoe,” ko te tu toru ia.

Kua akono a Iesu ia Petero ei apinga akatangi maata ei akaketaketa anga ki etai katoa ra i te angaanga tana i anoano ra na ratou kia rave. Kare e roa atu ka akaruke mai aia i te enua nei, e te anoano ra aia na ratou e arataki i te angaanga tutu aere ki te aronga te ka kikaia mai ki roto i ta te Atua koro mamoe ra.

Mei ia Iesu i tapekaia e i tamateia ra no tona rave i te angaanga ta te Atua i akaue ra iaia kia rave, kua akakite katoa aia kia Petero e ka mamae aia mei te reira te tu. “I toou ou anga,” e na Iesu ei, “kua tatua koe ia koe uaorai, e kua aaere iora koe ki taau ngai i anoano ra: e kia ruaine koe, ka akatika koe i o rima, e na tetai ke koe e tākai, e apai atu ei ia koe i te ngai anoano koreia e koe ra.” Noatu rai te reira tu tamate anga te tapapa maira ia Petero, kua raurau atura Iesu iaia: “Ka aru mai iaku.”

I te ariuanga ki muri, kua kite atura Petero ia Ioane e kua karanga: “E te Atu, eaa ta teia tangata ka rave?”​—NW.

Kua tuatua maira Iesu kiaia: “Kia anoano au i te vaoo iaia e kia tae mai au ra, eaa taau i reira? Ka aru mai koe iaku.”

Kua riro te manako o te au pipi e manganui e ko te aiteanga o taua au tuatua a Iesu ra e kare rava te apotetoro ko Ioane e mate. Inara, mei ta te apotetoro ko Ioane i akataka maira i muri akera e, kare a Iesu i tuatua e kare aia e mate, mari ra kua tuatua ua a Iesu: “Kia anoano au i te vaoo iaia e kia tae mai au ra, eaa taau i reira?” Ioane 21:1-25; Mataio 26:32; 28:7, 10.

◆ Eaa te akakite maira e kare i papu i te au apotetoro e eaa ta ratou ka tau kia rave i Galilea ra?

◆ Akapeea i kite ei te au apotetoro ia Iesu i te Tai o Galilea ra?

◆ Eia to Iesu akakite anga mai i teianei mei tona tuakaouanga?

◆ I akapeea ta Iesu akaketaketa anga i tona anoano i tana au apotetoro kia rave?

◆ I akapeea ta Iesu akakite anga i te tu o te mate no Petero ra?

◆ Eaa te tuatua a Iesu no Ioane kare ra i taka meitaki i to te au pipi e manganui?