To Iesu Oraanga e te Angaanga Orometua

I te Rima Katau o te Atua

I TE riringianga mai i te vaerua tapu ia Penetekote ra e akapapu anga ia e kua tae akaou atura Iesu ki te rangi. Na te orama i akakitea atura ki te pipi kia Setephano i muri poto akera i akapapu katoa e kua tae Aia ki reira. Ia Setephano e peiia ra ki te toka no tana akakitekiteanga tiratiratu, kua tuatua viviki aia ma te maata: “I na, te kite atura au i te rangi i te vetea angaia, e te Tamaiti na te tangata i te tu anga i te rima katau o te Atua ra.”

Iaia i te rima katau o te Atua ra, kua tapapa atura Iesu i te akauenga no ko mai i tona Metua ra: “E rave koe i te akavianga i rotopu i to au enemi.” Inara i taua tuatau ra, i mua ake ka rave ei aia i te akavi i tona au enemi, eaa ta Iesu i rave? Kua tutara aia, me kare kua akaaere, i rungao i tana au pipi akatainuia ra, ma te aratakianga ia ratou i ta ratou angaanga tutu aere e te teateamamaoanga ia ratou kia riro, na te tuakaou anga e tau ei ei au ariki kapitiia atu ma ia katoa i te Patireia o tona Metua.

Ei akatau anga, kua iki a Iesu ia Saula (tei matau meitakiia ra tona ingoa Roma i muri iora, ko Paulo) ei tamata i te angaanga akariro i te au tangata i etai atu enua ke ke ei pipi. E maroiroi a Saula no te Ture a te Atua, inara kua tarevake te taki anga iaia a te au arataki akonoanga ngati Iuda ra. Ko tei tupu, kare e kua akatika anake a Saula i te ta anga ia Setephano mari ra kua aere atura aia ki Damaseko ma te akatika anga no ko mai i te taunga maata ko Kaiapha kia rave tapeka mai aia i te au tane e te au vaine ki Ierusalema tana i kite i reira e e au pipi na Iesu. Inara, ia Saula e aere atura i te mataara, kua kaka viviki maira tetai marama e takapini iaia e kua topa iora aia ki raro i te enua.

Kua karanga maira tetai reo no ko mai i tetai tumu akara koreia ra: “E Saula, e Saula, eaa koe i takinga-kino mai ei iaku?” “E te Atu, koai koe?” Ko ta Saula ia i ui atu.

“Ko au ko Iesu taau i takinga-kino mai nei,” ko te pau anga te reira.

Kua tuatua atura Iesu kia Saula tei matapoia ra i taua marama semeio ra, e aere koe ki roto i te oire i Damaseko ka tiaki mai i te au akauenga i reira. I reira kua mama atura Iesu kia Anania koia tetai o tana au pipi, na roto i te orama. Kua akakite atura Iesu kia Anania no runga ia Saula: “E āriki ikiia oki aia naku, ei apai i toku ingoa ki mua i te aroaro o te au etene, e te ui ariki ra, e te tamariki na Iseraela ra.”

E tika, na ta Iesu turuanga, ko Saula (tei matauia i teianei e ko Paulo) ma etai atu aronga tutu evangeria kua kite i te puapinga maata i ta ratou angaanga tutu aere e te apiianga. Ko te tika, e vaitata i te 25 mataiti i muri ake i to Iesu mama anga kiaia i te mataara ki Damaseko ra, kua tata a Paulo e ko “te evangelia” kua “akakiteia akenei ki te tangata ravarai i raro ake i teianei rangi.”

I muri mai i te topaanga etai mataiti e manganui, kua akakite atura Iesu i etai au orama ki tana apotetoro akaperepere, kia Ioane. Na teia au orama ta Ioane i akataka maira i roto i te puka Apokalupo o te Puka Tapu, kua riro aia, mei te mea rai, e kua ora aia kia kite i te okianga mai o Iesu i tona mana Patireia. Kua na ko maira Ioane e “na te akauru anga,” kua apaiia maira aia kia tae mai ki te tuatau o “te ra o te Atu ra.” Eaa teia “ra”?

Na te apii matatio i te au totou Puka Tapu, kapiti katoa ta Iesu uaorai totou no te au ra openga, ka akakite mai e ko “te ra o te Atu ra” kua akamata ia i te mataiti 1914 tei akatupu ra i te tuatua enua, ae, i roto i teianei uki tikai! E no reira i te 1914 i oki akaou mai ei a Iesu ma te akara koreia, kare i maata tei manakoia e te au tangata katoa ko tona au tavini tiratiratu anake ua tei kite i tona oki mai anga. No te reira mataiti i akaue atu ei a Iehova kia Iesu kia rave i te akavianga i rotopu i tona au enemi!

I te akarongoanga i te ikuiku a tona Metua ra, kua tama mai a Iesu i te au rangi ia Satani e tana au temoni katoa, na te urianga mai ia ratou ki raro i te enua nei. I muri ake i te kiteanga i te tupu anga te reira i te orama ra, kua akarongo atura Ioane i tetai reo no te rangi mai i te na ko anga: “Teia mai nei te ora, e te maroiroi, e te basileia, o to tatou Atua, e te mana o tana Mesia”! Ae, i te 1914 i akamataʼi a Iesu i te tutaraanga ei Ariki!

Mei teaa ra te meitaki o te reira tuatua no te aronga akamori ia Iehova i te rangi ra! Kua raurauia ratou: “Kia rekareka, e te au rangi e, e ko kotou katoa oki ko tei noo i reira”! Inara eaa te turanga no te aronga i te enua nei? “E mate ra oki to te enua e to te tai,” ko ta taua reo no te rangi maira i tuatua, “tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.”

Tei roto tatou i taua tuatau poto ua ra i teianei tikai. Te akatakaia nei te au tangata i teianei ko tetai papaki kia tomo atu ki to te Atua ao ou e ko tetai kia mamae i te akapouanga. Ko te tika, te akatakaia nei toou uaorai ngai i teianei na te tu o toou akarongo anga ki te tuatua meitaki o te Patireia o te Atua te tutu aereia nei i te pa enua ravarai i raro ake i ta te Mesia arataki anga.

Kia oti akera te akatakaanga i te au tangata katoa, ei reira a Iesu Mesia ka akono ei ei Rima Rave no te Atua i te akaatea atu i te akatereanga katoa a Satani i te au mea i te enua nei e te aronga ravarai te turu ra i te reira. Na Iesu e akaoti i te reira takore atu anga i te rave anga kikino katoa i te tamaki te karangaia ra i te Puka Tapu ko Ara Makito, me kare Aramakito. I muri ake i te reira, ka rave a Iesu koia tei riro mai i teianei ei Peretana maata rava atu i te ao katoa e pini ua ake i raro mai i te Atua ia Iehova uaorai, ka opu atura ia Satani e tana au temoni e tapeka atu ia ratou no te okotai tauatini mataiti ki roto i tetai “vaarua takere kore,” koia oki; ko te tu mei te mate rai te angaanga kore anga. Angaanga 7:55-60, NW; Angaanga 8:1-3; 9:1-19; 16:6-10; Salamo 110:1, 2, NW; Ebera 10:12, 13; 1 Petero 3:22; Luka 22:28-30; Kolosa 1:13, 23; Apokalupo 1:1, 10, NW; Apokalupo 12:7-12; 16:14-16; 20:1-3; Mataio 24:14; 25:31-33.

◆ I muri ake i to Iesu aere atu anga ki te rangi, i ea tona ngai noo anga, e eaa tana i tapapa atu?

◆ I tutara a Iesu ki rungao iaai ma i muri ake i tona aere atu anga ki te rangi, e akapeea te akakite angaia tona tutara anga?

◆ I naea i akamataʼi “te ra o te Atu ra,” e eaa tei tupu i te akamataanga te reira?

◆ Eaa te angaanga akatakaanga te raveia nei i teianei tuatau te kapiti katoa nei ia tatou tataki tai, e tei runga i teea akatumu anga te rave anga i taua akatakaanga ra?

◆ Kia oti taua angaanga akatakaanga ra, eaa te au tupuanga te ka aru mai?