Akaoraanga i te Oraanga ki te Toto​—Ka Akapeea?

“Ka iki i te ora . . . na te akarongoanga i to te [Atua] reo . . . , ko ia oki toou ora e te roa o toou puke ra.”​—DEUTERONOMI 30:19, 20, NW.

1. Eaa te tu ke anga o te au Kerititiano mou i to ratou akangateitei anga i te oraanga?

E MANGANUI te au tangata te tuatua ra e te akangateitei ra ratou i te oraanga, e kua oronga mai i to ratou manako ei akapapu anga koia oki te akautunga anga i te mate, te titiri pepe, me kare te arumakianga manu. Inara te vaira te mataara taka ke no te au Kerititiano mou kia akaari i te akangateitei anga i te oraanga. Te na ko ra a Salamo 36:9 e: “Tei ia koe oki [e te Atua] te tumu o te ora.” E apinga orongaia mai na te Atua te ora, ka ariki te au Kerititiano i tona manako no te toto ora.

2, 3. Eaa tatou i tau ei kia tamanako i te Atua no runga i te toto? (Angaanga 17:25, 28)

² Tei runga to tatou ora i te toto, te rave ra i te apinga no te okitene takapini i to tatou kopapa, e te takore atura i te kapono rua okitene te akatupu ra kia akatano atu tatou ki te taui anga o te reva, e te tauturu ra ia tatou i te paruru atu i te maki kikino. Kua akapapa e kua oronga katoa mai oki Tei oronga maira i te ora no tatou i te titiu umere taʼe ua i roto i te kopapa ei tamou i te oraanga tei tapaia ra e toto. Te akakite maira te reira i tona manako mutu kore i te akatinamou anga i te oraanga tangata nei.​—Genese 45:5; Deuteronomi 28:66; 30:15, 16.

³ Ka tau te au Kerititiano e te au tangata katoa oki kia ui kia ratou uaorai: ‘Ka rauka ainei i te toto i te akaora i toku oraanga na tana angaanga natura ra, e peneiake ka akaora te toto na tetai mataara mamao atu te itaeanga?’ Noatu rai e te kite ra te maata anga o te tangata i te kapiti anga o te oraanga ma te au angaanga o te toto, e maata rava atura rai te o maira ki roto. Te manako ra te au Kerititiano, te au Mutiremi, e te ngati Iuda ki tetai Tei Oronga maira i te ora nana uaorai i akakite i tona manako no te ora anga e te toto. Ae, e maata ta Tei Anga mai ia tatou i tuatua no runga i te toto.

To te Atua Turanga Mou no Runga i te Toto

4. I te tuanga mua o te tuatua enua o te tangata nei, eaa ta te Atua i tuatua no runga i te toto?

⁴ Kua taikuia te toto e tere atu i te 400 taime i te Tuatua a te Atua, koia te Puka Tapu. I roto i te au tuanga mua, ko ta Iehova ra akauenga: “Te au mea ravarai te ora ra e te neke ra, ka riro ia ei kai na kotou. . . . Inara auraka rava kotou e kai i te kiko te vaira rai te ora toto i reira.” E kua kapiti katoaia mai e ia: “No to kotou ora toto ka maro tikai au i tetai tutakianga.” (Genese 9:3-5, New International Version) I tuatua atu a Iehova kia Noa koia ra te metua o te anaunga tangata nei. E no reira, ko te au tangata ravarai kua akamatakiteia mai e te manako ra Tei Anga maira e ko te toto ko te ora ia. Pouroa te aronga te karanga ra e kua kite ratou i te Atua e ko Tei Oronga mai i te Ora ka tau katoa kia kite e e turanga mou Tona no runga i te rave anga i te toto ora.

5. Eaa te tumu maata i kore ei to Iseraela e kai i te toto?

⁵ Kua taiku akaou te Atua i te toto i te orongaanga i te Ture kia Iseraela. Kia tau ki te urianga Tanaka a te ngati Iuda, te tatau ra ia Levitiku 17:10, 11: “E to te ngutuare o Iseraela, e to te au tangata ke e tuitarere ua i roto ia ratou, kia kai i te toto ra, ka anaana tikai toku mata i te reira tangata, i tei kai i te toto ra, e tipu ke atu au iaia i tona iti-tangata. Tei te toto oki te ora e oraʼi te au mea katoa ra.” E tika penei e puapinga to te reira ture no te ora anga, inara e maata atu te o maira. Na te akonoanga i te toto ei mea taka ke, ka akaari to Iseraela i to ratou irinaki anga ki te Atua no te ora. (Deuteronomi 30:19, 20) Ae, ko te tumu tikai no ratou kia kopae i te raveanga i te toto, kare e no te akakino i te ora anga, mari ra no te aiteanga taka ke ki te Atua ra.

6. Eaa ka papu ei ia tatou e kua mou a Iesu i ta te Atua ra turanga no te toto?

⁶ Tei ea to te akonoanga Kerititiano turanga no runga i te akaora anga i te oraanga tangata na te toto? Kua kite a Iesu eaa ta tona Metua i tuatua no runga i te raveanga toto. Ko Iesu, “kare i rave i te tarevake, [e] kare i kitea te pikikaa i tona vaa.” Tera te aiteanga kua akono apa kore ua aia i te Ture, kapiti katoa i te ture no te toto. (1 Petero 2:22, Knox) Kua akanoo aia i te akaraanga no tana au pipi, kapiti katoa i te akaraanga no te akangateitei i te oraanga e te toto katoa oki.

7, 8. Akapeea i taka meitaki ei e te piri maira ta te Atua ture ki te au Kerititiano katoa?

⁷ Te akakite maira te tuatua enua kia tatou eaa tei tupu i muri iora i te tuku anga a te pupu akaaere Kerititiano i te tika me ka anoanoia te au Kerititiano kia akono i te au ture katoatoa o to Iseraela ra. I raro ake i ta te Atua arataki anga, kua karanga ratou e kare te au Kerititiano e anoanoia kia akono i te ture a Mose mari ra te “mea tika” e “auraka [ratou] e kai i te manga i apaiia na te au idolo ra, e te toto, e te mea kukumi uaia ra [kiko kare i akataeia te toto], auraka oki e akaturi.” (Angaanga 15:22-29) Kua akataka meitaki maira ratou e ko te kopaeanga i te toto te aiteite ra te puapinga ki to te kopaeanga itoro e te rave akaturi katoa oki.a

⁸ E kua akono tikai te au Kerititiano mua ra i te reira ture anga na te Atua. Kua tuatua tetai, tangata apiiia no Peritane ko Joseph Benson: “Ko teia ture anga i te kai i te toto, tei orongaia kia Noa e tona au uanga katoatoa, e tei oronga akaouia ra ki to Iseraela . . . kare rava i akakoreia, mari ra, kua akatinamouia i te Koreromotu Ou, Angaanga xv; e no reira kua akamanaia ei apainga tamou mutu koreia.” Inara, ka akakore ainei ta te Puka Tapu e tuatua ra i te au ravenga a te aronga rapakau o teia tuatau nei, mei te pamu toto ra, te taka meitaki ra e kare i raveia i to Noa tuatau e pera katoa i te tuatau o te au apotetoro ra?

E Toto i Roto me Kare ei Vairakau

9. I akapeea te akono anga i te toto ei vairakau i te tuatau taito ra, e tuke anga ki teea turanga o te Kerititiano?

⁹ Kare e no teia tuatau ua nei i raveiaʼi te toto ei vairakau. I te puka Flesh and Blood, na Reay Tannahill, te akakite maira e vaitata i te 2,000 mataiti, i Aiphiti e etai atu ngai, “kua manakoia te toto e ko te vairakau ngateitei ia no te repera.” Kua irinaki to Roma e ka rauka i te rapakau i te maki uti na te kai anga i te toto tangata. Kua tataia e Tertullian no runga i teia rave i te toto ei “vairakau”: “E akamanako ana i te aronga tei kaki noinoi ra, i te ngai tarekareka anga no te ta, kua rave i te toto ou o te aronga rave kino . . . e kua apai atu ei rapakau i to ratou maki utiia ra.” E tuke maata roa teia ki ta te au Kerititiano i rave: “Kare ua matou e kai i te toto manu i to matou kaikai anga . . . I te au timata anga i te au Kerititiano e oronga atu koe i te au totiti tei akakiia ki te toto. Te irinaki ra koe e, kare [te reira] i tau i te ture na ratou.” E akamanako i te tupu anga: Kare ratou e rave i te toto ei kai, ko te ora ia, kua akakore te au Kerititiano mua ra i te reira noatu me ka mate.​—Akaaiteia atu kia 2 Samuela 23:15-17.

10, 11. Eaa ka raukai kia irinakiia e te akakore ra ta te Atua turanga i te arikianga i te pamu anga toto?

¹⁰ Inara, i te reira tuatau kare te toto i pamuia ana, no te mea no te vaitata anga ki te 16 anere mataiti nei i tamataiaʼi te au kimikimi anga. E, i te 17 anere mataiti nei, kua akaapa tetai tangata kite i te kopapa tangata e to te manu i te Apii Teitei o Copenhagen: ‘Te akara anga ko te aronga te kika maira i te rave i te toto tangata ei rapakau i te au maki o roto i te kopapa te rave tarevake ra i te reira e te apa kino ra. Te akaapaia ra e aronga kai tangata. Eaa ra tatou i kore ei e rikarika i te aronga te taviivii ra i to ratou karaponga i te toto tangata? Mei te reira katoa oki te rauka anga o te toto ke no tetai motu o te aerenga toto, na roto i te vaa me kare na tetai apinga pamu. Te mouia ra te aronga mana o teia ravenga i te mataku na te ture a te Atua.’

¹¹ Ae, noatu rai i te au anere mataiti kua topa, kua kite te au tangata e kua akakore te ture a te Atua i te raveanga i te toto ki roto i te aerenga toto e te raveanga i te reira na roto i te vaa. Na te kiteanga i teia penei ka tauturu i te au tangata i teia tuatua kia marama i te turanga ta te au Kite o Iehova e akono nei, e ko tei tau ia ma to te Atua ra turanga. Ia ratou e manako teitei ra i te puapinga o te oraanga e te arikianga i akono no te rapakau anga, te akangateitei ra te au Kerititiano mou i te ora ei apinga orongaia mai e Tei Anga maira, e no reira kare ratou e tamata i te tamou i te oraanga na te raveanga i te toto.​—1 Samuela 25:29.

Akaoraanga i te Ora na te Rapakau Anga?

12. Eaa ta te au tangata manako meitaki ka tau kia akamanako no runga i te pamu anga toto?

¹² No te au mataiti e manganui kua karanga te aronga kite e te akaora ra te toto i te au oraanga. Penei ka akakite te au taote e ko tetai tangata tei maata tona toto i taʼe ana kua pamuia ki te toto e kua meitaki. E no reira kua kimi te manako o te au tangata, ‘Akapeea ra te pakari me kare te pakari kore o te turanga o te Kerititiano i te pae o te rapakau anga?’ I mua ake ka akamanako ei i tetai ua atu ravenga rapakau, ka tamanako te tangata karape i te au puapinga e pera katoa te au kino penei ka tupu mai. Akapeea i reira te pamu toto? Ko te tika tikai e ko te pamu anga toto te ki ra i te au kino e manganui. Ko etai tu o ratou e mate ia.

13, 14. (a) Eaa etai mataara tei akapapuia mai e e kino te pamu anga toto? (e) I akapeea te akatutu anga mai a tei tupu ki te pope ra i te au tu kino o te toto no te oraanga?

¹³ I mua ua akenei kua akakite nga taote ko L. T. Goodnough raua ko J. M. Shuck: “Kua kite te pupu rapakau e kua roa, e ko te akaputu anga toto e meitaki ta tatou i kite i te rave anga i te reira, e kino ra ta te pamu toto ka apai mai. Ko tetai kino putuputu no te pamu toto te vai nei e non-A, non-B hepatitis (NANBH); ko etai atu kino te kapiti maira i te hepatitis B, alloimmunization, e tupu anga no te pamu toto mai, e immunologic suppression e te maata roa te auri.” I te akamanako ‘ua anga’ i tetai okotai ua o taua au kino ra, kua kapiti katoa maira taua ripoti ra: “Kua manakoia e vaitata i te 40,000 au tangata [i te Unaite Teite anake ua] te ka tu i te NANBH i te au mataiti tataki tai e ka tae ki te 10% o teia aronga ka tu i te cirrhosis e/me kare te hepatoma [liver cancer].”​—The American Journal of Surgery, Tiunu 1990.

¹⁴ I te tupu anga kia atea te kite anga i te kino o te au maki mei te pamu anga toto mai, te kimi akaou nei te au tangata i to ratou manako no runga i te pamu toto. Ei akatauanga, i muri mai i te pupui angaia te pope i te 1981, kua rapakauia aia i tetai are maki e kua tukuia mai ki vao. I muri iora kua oki akaou atura aia no nga marama e rua, e no te kino o tona maki kua manakoia e penei ka akaoti aia i te angaanga e ka noonoo ua ei pirikoki. Eaa te tumu? Kua rokoia aia e tetai maki cytomegalovirus no te toto tei orongaia kiaia. Ka manako etai pae e, ‘Me e kino to te toto tei orongaia ra ki te pope, akapeea i reira te toto te orongaia nei kia tatou tangata noa nei?’

15, 16. Eaa i kore ei e meitaki te pamu toto noatu e i akara matatioia te toto no te au maki mate ra.

¹⁵ ‘Inara kare ainei e rauka ia ratou i te akara matatio i te toto no te au maki mate ra?’ ka ui ua atu tetai. E akamanako ana i tetai akatauanga no te akara matatio anga no te hepatitis B. Kua akakite mai te Patient Care (Peperuare 28, 1990) e: “Kua topa mai te maki hepatitis i muri ake i te pamu anga toto i te akara matatioanga i te toto e pini ua ake no [te reira], inara te vaira e 5-10% o te maki hepatitis i muri ake i te pamu anga toto no te hepatitis B mai te akamata anga.”

¹⁶ Te kiteia ra te puapinga kore o te reira akara matatio anga i tetai atu maki mate no te toto mai koia te​—AIDS. Ko teia maki totoa e AIDS, ma tona tu kino, kua akaaraara i te au tangata kia kite i te mate no te toto kino mai. E tika, te raveia ra te akara anga i teianei i te toto no teia maki. Inara, kare te toto e akara matarikiia ana i te au ngai ravarai, e i te akara anga penei ka apai aere te au tangata i te maki AIDS i roto i to ratou toto no etai mataiti e kare e kitenaia e te au akara anga o teia tuatau nei. No reira ka tu te aronga maki i te AIDS​—e kua tu ke ana i te AIDS—​mei te toto tei akaraia ana e kua akatikaia!

17. Akapeea te akakino anga a te pamu toto penei kare e kitea vaveia?

¹⁷ Kua taiku katoa nga Taote ko Goodnough e Shuck i te “immunologic suppression.” Ae, te akaputu nei te akapapu anga e noatu rai e ka rave meitakiia te akara matatio anga ka akatupu ra te toto i te akakino anga i te ravenga paruru o tei maki ra, e ka eeu mai i te ngutupa no te cancer e te mate. E no reira, i tetai apii i Kanata no te “aronga maki tei tu i te cancer o te upoko e te kaki kua akakite mai e ko te aronga tei pamuia ki te toto i te kiriti angaia [tetai] tuma kua kite i te topa kino anga te tu o te paruru anga i muri iora.” (The Medical Post, Tiurai 10, 1990) Kua akakite mai te au taote no te Apii Teitei o Southern California e: “Ko te tupu akaou anga o te au cancer katoatoa o roto i te karaponga e 14% to te aronga kare i pamuia ki te toto e e 65% no te aronga tei pamuia ki te toto. Ko te cancer o te tuanga o te vaa, te aerenga mai o te reo, e te iu me kare te tuanga i te pae mai, ko te tupu akaou anga e 31% to tei kore i pamuia ki te toto e e 71% to te aronga tei pamuia ki te toto.” (Annals of Otology, Rhinology & Laryngology, Mati 1989) I te akara anga ko te akakore anga i te paruru ko tetai tumu ia no te aronga tei pamuia ki te toto i te vai angaia e putuputu ratou i te tu i etai maki ke.​—Akara i te pia, kapi 10.

Etai Rapakau i te Pae Atu i te Toto?

18. (a) Te akaariu ke nei te au kino o te pamu anga toto i te au taote kia rave i teaa? (e) Eaa te akakite anga no etai atu au tu rapakau te ka tau koe kia akakite ki toou taote?

¹⁸ Penei ka manako tetai papaki e, ‘E kino rai te pamu toto, inara e rapakau ke atu ainei etai?’ E mea tau ra no tatou kia umuumu i te rapakau anga teitei te turanga, e no reira e au mataara tau ainei i te ture e te tano no te au manamanata i te pae rapakau e auraka i te toto? E mea mataora ra, ae. Te akakite maira The New England Journal of Medicine (Tiunu 7, 1990) e: “Te au taote, te tere atu nei te matakite i te au kino o te [AIDS] e etai atu au maki tei tupu mai no te pamu anga toto, te akamanako akaou nei i te au kino e te au puapinga o te au pamu anga toto e te ariu ke ra ki etai atu tu rapakau, e kapiti katoa i te kopae takirianga i te pamu toto ra.”b

19. Eaa ka papu ei toou manako e ka rauka ia koe i te akakore i te toto e ka akonoiaʼi te rapakau anga kia puapingaia?

¹⁹ Kua roa te au Kite o Iehova i te akakore anga i te pamu toto, kare e no te au kino te ka tupu ki te oraanga, mari ra no te akarongo ki ta te Atua ra ture no te toto. (Angaanga 15:28, 29) Inara, kua puapingaia ta te au taote karape akono anga i te aronga maki e au Kite e kare i rave i te toto, ma tona au tu kino katoa. Mei ta tetai o te au akatauanga e manganui i akakite maira i te puka rapakau anga, Archives of Surgery (Noema 1990) i te uriuri anga i te pau anga pukuatu o te aronga maki e au Kite tei akatika ra to ratou akava ngakau kia raveia te reira ma te kore ua e orongaia te toto. Kua na ko taua ripoti ra: “Ko te kite anga i te raveanga i te vai anga pukuatu no te tere atu i te 25 mataiti i te au Kite o Iehova kua rauka i teianei te pau anga pukuatu meitaki ma te kore e oronga i te apinga toto . . . Kare e au mate i rokoia, e kua akaari mai te au apiianga mua e ko teia aronga maki e ngoie ua te tau no te pau anga maata.”

Te Toto Puapinga Maata Rava

20, 21. Eaa ka tau ei kia matakite te au Kerititiano kia kore e akatupu i te tu manako e “vairakau kino te Toto”?

²⁰ Inara, te vaira tetai uianga te kimianga i te meta te ka tau tatou tataki tai kia ui iaia uaorai. ‘Me kua iki au e auraka e ariki i te pamu toto, eaa te tumu? Eaa tikai taku tumu maata, e te mea mua oki?’

²¹ Kua akakite matou e te vaira etai au apinga rapakau meitaki kare i te toto e kare e akapiri atu i tetai ki te au tu kino te kapitiia atura ki te pamu anga toto. Te au tu kino mei te hepatitis e te AIDS rai kua akakeu i te aronga e manganui kia kopae ke i te toto kare no te akonoanga atua te au tumu. Ko tetai papaki ka tuatua maata ua ratou i te reira, mei te mea rai e te aaere ra ratou i raro ake i tetai reva e, “E Vairakau Kino te Toto.” Penei ka kikaia atu tetai Kerititiano ki roto i te reira aaere anga. Inara e aaere anga te reira i tetai mataara te ka akamutu ua. Akapeea ra i peraʼi?

22. Eaa te manako tika tikai no te ora e te mate te ka tau tatou kia akono? (Koheleta 7:2)

²² Te kite ra te au Kerititiano mou e noatu e meitaki te akonoia i roto i te au are maki memeitaki roa, a tetai tuatau ka mate rai te au tangata. Me ka pamuia ki te toto e me kare ia, ka mate ra te tangata. Kia tuatua e kare te reira i te tumatetenga. E tika tika rava ia. Ko te mate e tika ia no te oraanga i teia tuatau nei. Ko te aronga kare e manako i te ture a te Atua no te toto e putuputu te kite i te mate viviki me kare te mate e taroaroaia na te toto. Ko tetai papaki ka mate na te toto i pamuia ra kia ratou. Inara mei ta tatou ravarai ka kite, ko te aronga tei ora atu i te pamu anga toto te vaira kare i rauka te ora mutu kore, e no reira kare i rauka i te toto i te akaora tamou i to ratou oraanga. I tetai pae, ko te aronga tei kopae i te toto, no te akonoanga e/me kare no te au tumu rapakau anga, e kua ariki i etai atu tu vairakau kua meitaki i te pae rapakau. Penei ka akatere atu i to ratou oraanga no etai mataiti e manganui​—inara kare ia no te mutu kore.

23. Eaa te piri anga o ta te Atua au ture no te toto ki to tatou tu ara e te umuumu anga i tetai oko?

²³ I te mea te au tangata ravarai te ora nei i teia tuatau te mate aere ua atu nei ka taki atu ia tatou ki te tumu ta te Puka Tapu e tuatua nei no runga i te toto. Kua akaue te Atua i te au tangata ravarai auraka e kai i te toto. Eaa te tumu? No te mea kua akatutu ia te reira te ora. (Genese 9:3-6) I te Ture ra, kua akanoo mai aia i te au ture i te tuatuaanga i te tika e ara to te au tangata ravarai. Kua tuatua te Atua ki to Iseraela e na te orongaanga i te au atinga manu, ka akaari ratou e te umuumuia ra kia tapokiia ta ratou au ara. (Levitiku 4:4-7, 13-18, 22-30) Noatu e kare te reira i tana e akaue maira ia tatou i teia tuatau, e tumu maata ra tona i teianei. Kua akakoro te Atua kia oronga mai i te atinga ei tapoki takiri i te au ara o te aronga akarongo katoatoa​—koia te oko. (Mataio 20:28) Ko te tumu teia i tau ei tatou kia aru i to te Atua manako no te toto.

24. (a) Eaa ka tarevake ei kia akono e ko te akakino i te oraanga te tumu maata no tei tureia te toto? (e) Eaa tikai te tumu tau no tatou kia manako no te akono anga i te toto?

²⁴ E tarevake te tuku maata i te manako tikai ki runga i te au kino no te ora anga no te toto maira, no te mea kare ia i ta te Atua i manako. Penei kua puapingaia to Iseraela i te pae o te ora anga no te kore i kai i te toto, mei ia ratou i puapingaia ra no te kore i kai i te kiko puaka me kare te au manu kai kiko katoa ra. (Deuteronomi 12:15, 16; 14:7, 8, 11, 12) Kia maara ra, e i to te Atua akatika anga ia Noa kia kai i te kiko, kare aia i ture atu i te kai anga i te kiko o taua au manu ra. Inara kua akaue aia e auraka te au tangata e kai i te toto. E no reira kare te Atua i manako puapinga ia i te au tu kino penei ka tupu ki te ora anga. Kare te reira i te tumu maata no tana ture no te toto. E akakore te aronga akamori iaia i te akamatutu i to ratou oraanga i te toto, kare e ko te tumu maata no te raveanga i te reira e akakino i te ora anga, mari ra no te mea e tapu kore te reira. Kua kopae ratou i te toto kare no te mea e viivii mari ra no te mea e puapinga maata ia. Na te toto atinga anake e raukai ia ratou te akakore anga ara.

25. Akapeea te toto i te akaoraanga i te oraanga e mutu kore ua atu?

²⁵ Ko te tika katoa ia no tatou nei. Ia Ephesia 1:7 (NW), kua akataka maira te apotetoro ko Paulo e: “Nana [na te Mesia] i tatara mai ia tatou i te oko na roto i te toto nona ra, ae, te akakore anga i ta tatou ara, kia tau ki te apinganui o tona aroa ua.” Me akakore atu te Atua i te au ara a tetai tangata e ka manako atu i te reira tangata e e tuatua tika, tei taua tangata ra te manakonako anga no te ora mutu kore. No reira ka rauka i te toto oko o Iesu i te akaora tamou i te oraanga​—no te au tuatau, ko te tika, e tuatau ua atu ia.

[Au Tataanga Rikiriki i Raro]

Ka Rauka Ainei ia Koe te Akataka?

◻ Eaa te tumu maata ka akakore ei te au Kite o Iehova i te pamu anga toto?

◻ Eaa te akapapu maira e kare i te tau kore te turanga o te Puka Tapu no runga i te toto no te rapakau anga?

◻ Akapeea te kapiti anga te oko ma te ture o te Puka Tapu no te toto?

◻ Eaa te mataara okotai ua ta te toto ka akaora i te au oraanga e mutu kore ua atu?

[Pia i te kapi 10]

PAMU ANGA TOTO E TE MAKI

I muri ake i tetai tamanako anga pararauare e me te akariro nei te pamu anga toto kia ngoie ua tei maki ra i te tuia e te maki, kua akakite maira te Taote ko Neil Blumberg e: “O te 12 au kiriniki apii [no taua tumu ra], e 10 tei kite e ko te pamu anga toto te maata ra e te taka ke ra te kapiti anga ki te akatere anga kia maata te maki no te manumanu . . . Kapiti katoa oki, penei na te pamu anga toto i tetai tuatau i mua ake i te vai angaia i akakino i to tei maki ra paruru anga i te maki me te roa ra te ora anga o te tupu anga o te akakore anga a te pamu toto i te paruru maki mei ta etai apii e akakite maira . . . Me ka rauka kia akatotoaia teia au kimikimi anga e ka akapapuia, i te akara anga e ko teia au maki kikino i muri ake i te vai angaia ka riro koia te tarevake maata okotai tei matauia tei kapitiia atu ki te pamu anga toto te aiteite ra te tu.”​—Transfusion Medicine Reviews, Okotopa 1990

[Tutu i te kapi 8]

Te au tuanga teera toto tei akamaataia kia akara. “Te au maikororita tataki tai (0.00003 auniti) toto e 4 mirioni ki te 6 mirioni ona tuanga teera toto muramura.”​—“The World Book Encyclopedia”

[Akameitakianga]

Kunkel-CNRI/​PHOTOTAKE NYC