Naai te Au Pure te Pauia Maira?

KO Iehova te Atua e pau maira i te au pure. Te kapiki ra tana Tuatua te Puka Tapu iaia ko te “Akarongo i te pure.” (Salamo 65:2) Te puareinga ra aia i te pau i te au pure. Inara taai au pure tana e pau tikai maira?

Te pau maira te Atua i te au pure a te aronga tataki tai te mareka ra iaia. E tu ngateitei to ratou mei te tata taramo rai tei tuatua: “Mei te aili e aue aere i te au vai peka ra, koia katoa toku vaerua i te aue aere anga ia koe, e te Atua e. Te kaki nei toku vaerua i te Atua, i te Atua ora ra.” (Salamo 42:1, 2) Inara, eaa te tika te vaira no te akapapu e te pau maira Iehova i te au pure a tona aronga akamori mou?

Akapapu Anga e te Pau Maira te Atua i te Au Pure

Tei roto i te Puka Tapu tetai papaanga maata te akapapuanga e te pau maira Iehova i te au pure a tona au tavini akono meitaki. Ei akaraanga, te pure anga te Ariki a Iehosaphata o Iuda no te akaora anga, kua pau te Atua i tana pure e kua oronga i te autu anga kiaia na te akatupuanga i tona au enemi kia ta atu i tetai e tetai. (2 Paraleipomeno 20:1-26) Te aro anga atu te Ariki ko Hezekia i tetai pupu vaeau pakari, kua pure atu aia ma te akaaka ki te Atua no te tauturu. Kua kite a Hezekia i te akaora anga a Iehova te ta anga atu tetai angera ie 185,000 au Asuria i te okotai po.​—Isaia 37:14-20, 36-38.

Eaa ra te Atua i pau mai ei i taua au pure ra? I teia nga turanga e rua, kua pati akatenga te au ariki e te rutianga i teia au tamaki ka akaata kino te reira ki runga i te ingoa o Iehova. (2 Paraleipomeno 20:6-9; Isaia 37:17-20) Kua manako ratou i tona tu. “Te tumu tikai o te pure,” te tuatua ra The International Standard Bible Encyclopedia, “kare ia i te tu meitaki o tetai tei pati ra mari ra no te akangateitei i to te Atua ingoa.” No reira, ka papu i te au tavini akono meitaki o Iehova e ka tauturu mai aia ia ratou “no tona ingoa.” Te papaanga te akapapu maira e kua pauia mai teia au pure, te oronga maira i te irinaki anga ki to te Atua iti tangata e te akarongo maira aia i ta ratou au pure.​—Salamo 91:14, 15; 106:8; Maseli 18:10.

Pera katoa me ka tupu mai tetai turanga e te o atura to Iehova ingoa, na te Atua e akara e me ka pauia mai te reira au pure e me kare. Penei e au tumu tau tana i kore ei aia e pau mai i etai au pure. Me te manako ra tatou e kare ta tatou au pure e rongoia maira, te meitaki ra tatou i te akamanako e eaa ra te tumu i pera ei.

Eaa Etai Au Pure i Kore ei e Pauia Mai

Kua tuatua a Iehova ki te au Iseraela “e kia akamaata kotou i te au pure, kare au e akarongo atu.” Te akakiteanga atu i te tumu, kua tuatua ua atu aia: “Kua ki oki to kotou rima i te toto.” (Isaia 1:15) Akapeea tetai ua atu i te kopae anga i te ture a Iehova e te inangaro i tetai tuatau kia rongoia mai aia? Te oronga maira te materi Puka Tapu i tetai pau anga papu, te tuatuaanga: “Ko tei ariu ke, i tona taringa kia kore e kite i te ture, e riro tana pure ei mea viivii.”​—Maseli 28:9.

Te oronga maira te Puka Tapu i tetai akaou tumu e no teaa te au pure kare e rongoia maira, te tuatua ra: “Te pati ra oki kotou, e kare a kotou i rauka, no te mea te apa na ta kotou pati anga, kia pou i te kaimoumouia e kotou i to kotou anoano tika kore ra.” (Iakobo 4:3) Kare rava a Iehova e pau mai i te au pure no te akamerengoanga i te au anoano tarevake. Kia akamaara katoa tatou e kare te Atua e ariu mai e te rave atu i te au akauenga mei ko mai i te au tangata. Koia te tamanako ra e akapeea aia i te pau anga mai i ta tatou au pure.

Ko te au pure te aere ra ki te Atua ma te ngakau ma ra, ma te manako tau, e na roto i tana mataara akataoongaia​—koia a Iesu Karaiti, te papu ra e ka pauia mai te reira. (Ioane 14:6, 14) Inara pera katoa te au pure te aravei atura i te au ikuiku anga i etai taime kua manakoia e kare te reira e rongoia maira. Eaa ra te Atua ka kore ei e pau mai i tetai au pure a tona au tavini?

Kua kite a Iehova i te taime tau no te pau i te au pure. Noatu e ka pati te tamaiti i tetai patikara takatakai, penei kare tona papa e oko mai i te reira nona kia pakari roa mai aia i te akaoro i te reira ma te mako. Te aiteite katoa ra te tika ma etai au pure a te aronga te inangaro ra i te Atua. Te kiteanga i te mea meitaki no ratou, ka oronga mai aia i tei anoanoia i te tuatau tau.

Inara, kare e rauka i te au tavini o Iehova ta ratou au apinga pouroa i pure atu. No te tu tiama kore, penei ka anoano ratou i etai au mea kare e meitaki ana no ratou. Kare to ratou Metua aroa i te rangi ra e oronga ua i tetai mea kino, no te mea koia Tei Oronga i te ‘au mea memeitaki e te au mea tika ravarai.’ (Iakobo 1:17) Ma te aiteite rai, penei kare te Atua e oronga mai i tetai mea kare e anoanoia i tana akara anga. (Akaaiteia atu kia 2 Korinetia 12:7-10) Te pau maira i te au pure te rotai ra ki tona anoano e te akakoroanga no tona iti tangata.​—1 Ioane 5:14, 15.

“Akarongoia” a Iesu

E tangata pure a Iesu Karaiti. (Mataio 6:9-13; Ioane 17:1-26) Kua papu meitaki iaia e ka akarongo mai tona Metua i te rangi ra e te pau mai i tana au pure. Kua tuatua a Iesu i tetai taime: “E taku Metua, . . . kua kite au e, ka akarongo ua mairai koe iaku.” (Ioane 11:41, 42) Inara kare ainei a Iesu i poitirere ana i te openga tikai o tana rave anga i te enua nei? Kare ainei e kua kapiki aia ma te reo maata: “E taku Atua, e taku Atua, eaa koe i akaruke mai ei iaku?”​—Mataio 27:46.

Te tuatuaanga a Iesu i teia au tuatua, te tika anga te akatupu ra aia i tetai totou no runga i tona matenga. (Salamo 22:1) I roto i tetai tu kotingaia, penei katoa rai e ko ta Iesu i tuatua e kia akakore a Iehova i tana paruru anga ma te tuku i tana Tamaiti kia mate i tetai mate anga mamae tikai e te akama e raukaʼi i te timata i tona tiratiratu pakari ki te kotinga ra. Te akaari maira tetai makitoro anga o te au rave anga i te reira ra openga o to Iesu oraanga i te enua nei e kua akarongo mai te Atua i tana au pure.

I te po o tona tapeka angaia, kua pure a Iesu i roto i te aua o Getesemane. E toru ona taime i te pati anga: “E taku Metua, kia tika, kia apai keia teianei kapu iaku nei.” (Mataio 26:39, 42, 44) Kare a Iesu i tapupu ana i te oronga i tona oraanga ei tutaki no te au tangata irinaki. Kare, mari ra kua manako oonu tikai aia penei ka akangateiteiia tona Metua akaperepere maataia na te mateanga i runga i tetai rakau tamamaeia ei tangata taumaaia e te kino. Kua akarongo mai ainei a Iehova i ta Iesu pure?

I te au mataiti i muri mai, kua tata te apotetoro ko Paulo: “Kua tuku oki te Mesia i te pure, i tona ora anga, i te pati anga atu kiaia, ma te aue maata e te roi-mata i Tei tika kia akaora iaia mei te mate maira, e i akarongoia aia i tana i mataku ra.” (Ebera 5:7; Luka 22:42, 44) Ae, i te reira po mamae ra i mua ua ake i tona matenga, kua “akarongoia” mai a Iesu. Akapeea ra?

Kua tuku maira a Iehova koia oki “kua mama maira tetai angela no te rangi mai [kia Iesu], kua akamaroiroi maira iaia.” (Luka 22:43) No reira i te akamaroiroi angaia, kua rauka i reira ia Iesu i te aro atu i te matenga i runga i te rakau tamamae anga. Te akara anga, kua oronga a Iehova i te akapapu anga kiaia e kare tona matenga i runga i te rakau e apai mai i te akakino anga ki tona ingoa tapu mari ra i te openga ko te mea tikai ia te ka taangaangaia no te akatapu i te reira ma te maata. E tikai, kua akatuera te matenga o Iesu i runga i te rakau tamamae anga i tetai mataara no te au ngati Iuda, tei taumaaia i raro ake i te Ture, kia akaoraia mai mei te akaapa anga o te mate.​—Galatia 3:11-13.

E toru ra i muri mai, kua akatu mai a Iehova ia Iesu e kua tama iaia mei tetai ua atu akaapa anga akakino anga na te akateiteianga iaia ki tetai turanga teitei i te rangi. (Philipi 2:7-11) Mei teaa atura te mataara umere no te pau atu i te pure a Iesu no runga i “teianei kapu”! Kua pauia mai te reira pure i ta Iehova mataara. E kua kite a Iesu i te au akameitakianga umere no te mea kua akakite aia ki tona Metua i te rangi: “Kia tupu ra toou anoano, auraka toku.”​—Luka 22:42.

Akapeea a Iehova i te Pau Anga Mai i te Au Pure i Teia Tuatau

Mei ia Iesu ra, te aronga e kimianga i te akamareka ia Iehova i teia tuatau e tau ua rai ratou kia pati e kia tupu to te Atua anoano. Te anoanoia ratou kia rauka te akarongo e ka pau mai a Iehova i ta ratou au pure na roto i te mataara te ka akapuapinga maata ia ratou. Te tika ra, e ‘e maata ua atu tana ka rave i te au mea katoa ta tatou e pati nei, e ta tatou e manako nei.’​—Ephesia 3:20.

Kua kite tetai mapu vaine Kerititiano tei noo i ko i tona nga metua irinaki kore i te tika tikai o te reira tuatua tapu. I roto i tetai reta no ko mai i te Totaiete Punanga Tiaki Anga, kua patiia atu aia kia tamanako ma te pure kia rauka i te arikianga i tetai tuku anga angaanga orometua takake. Noatu e ko tona anoano manako ngakau tikai e ko te noo i te kainga i te tauturu i tona nga metua kia riro mai ei au Kerititiano, kua pati aia ki te Atua na roto i te pure: “Eaa toou anoano? Ko te ariki ainei i teia pati anga noatu te patoi ra toku nga metua, me kare ko te tauturu ainei i toku nga metua na te noo tamou ua atu anga ma raua?” I te au taime ravarai ka pure aia, kua akakite tona akava ngakau kiaia kia ariki i te pati anga. Kua manako aia e ko teia te pau anga no ko mai ia Iehova.

Kua akamaroiroi te Atua i teia vaine kia noo tamou ki tana pau anga. Te pati angaia aia kia neke atu ki te Airani Awaji, i Tiapani, kua poitirere tona nga metua e kua akaari i te patoi atu. Inara, te kare anga e rauka i te akakeu iaia kia taui i tona manako, kua manako tona mama i te apii i te Puka Tapu no te akara ua e no teaa tana tamaine i rave ei i te reira tuku anga. E toru marama i muri mai kua atoro atu tona nga metua iaia. Te kiteanga e mei teaa te meitaki tona akono angaia e tetai atu Au Kite o Iehova, kua akakeu tikaiia te papa ma te oonu e kua aue ua koia anake ua. Kare i roa ana kua akamata katoa aia i te apii i te Puka Tapu. I te openga kua papetitoia te nga metua o teia mapu vaine e kua akamata i te tavini ia Iehova ma te akono meitaki. Kare ainei te Atua ko Iehova i akameitaki i teia mapu vaine Kerititiano ma te maata tikai?

Paunaia Mai ta Ratou Au Pure

Te maara ainei ia koe te au tuatua a te vaine tei taikuia i te akamata anga o te atikara i mua ake? Kare rava aia i manako ana e ka pauia mai tana au pure. Inara, kua kite mai aia i muri mai e te pau maira te Atua i tana au pure. Kua akono te vaine ra i tetai papaanga o te au mea puapinga i tana au pure. I tetai ra kua akara aia na roto i te puka tata e kua kite mai e kua akarongo mai a Iehova i te maata anga o tana au pure, pera katoa te mea tana i ngaropoina! Kua kite i reira aia e te akono maira te Atua iaia e te pau maira i tana au pure na roto i tetai mataara maru tei akapuapinga maata tikai iaia.

Me te manako ra koe e kare taau au pure e pauia mai ana, e ui kia koe uaorai: ‘E piri anga ainei toku uaorai kia Iehova, tei “Akarongo i te pure?” Me kare, te rave ainei au i te au takainga no te apii no runga iaia e te riro anga mai ei tetai o tona au tavini akatapuia?’ Te pau maira aia i te au pure a te aronga te inangaro ra iaia e te rave i tona anoano. Te “tamou marie tikai i te pure” e te akarongoia maira, mei ta Iesu rai. (Roma 12:12) No reira, “e riringi i to kotou ngakau” kia Iehova e te rave i tona anoano. (Salamo 62:8) I reira e akarongoia mai ei ta kotou au pure.

I teia tuatau, e mirioni ua atu au tangata te pure ra no tetai mea takake. Ae, te akarongoia maira ta ratou au pure. Ka akara ana tatou e no teaa tatou ka papu ei e ka pauia mai teia au tu pure.