Akapeea Tatou i te Akaoki Anga i te Tutaki ia Iehova?

KUA akaari maira te Atua ko Iehova i te akaraanga meitaki rava no te oronga. Kua tuku mai aia ki te au tangata ravarai i te “ora, e te aʼo, e te au mea katoa.” (Angaanga 17:25) Te akaiti ra te Atua i tana ra ki rungao i te au tangata kino e te tuatua tika anake. (Mataio 5:45) E tikai, ‘te oronga maira Iehova i te ua no runga i te rangi, e te tuatau mou, e te akaki anga mai i to tatou ngakau ki te kai ma te rekareka.’ (Angaanga 14:15-17) No teaa ra, “te au mea memeitaki i o maiia ra, e te au mea tika ravarai, no runga ïa, no runga mai i te Metua o te au mārama ra”!​—Iakobo 1:17.

I te pae i te au apinga aroa katoatoa a te Atua, kua tuku mai aia i te marama i te pae vaerua e te tuatua mou. (Salamo 43:3) Kua akameitaki maataia to Iehova au tavini akaaka ma te au kai vaerua tana e oronga maira i te tuatau tau na roto i te “tavini akono meitaki e te pakari.” (Mataio 24:45-47) Ka puapinga tatou mei te au apinga vaerua a te Atua no te mea kua rauka iaia i te rave i te au tangata ara e te mate ua kia akaongiia kiaia ra. Akapeea? Na roto i te matenga o tana Tamaiti, ko Iesu Karaiti, tei oronga i tona ora ei oko no te manganui. (Mataio 20:28; Roma 5:8-12) Mei teaa te apinga aroa mei ko mai i te Atua, ko Iehova!​—Ioane 3:16.

Rauka Ainei Tetai Ua Atu Tutaki?

E anere ua atu mataiti i mua ake i orongaia mai ei te oko, kua ariki oonu tikai tetai tata taramo akauruia i te tu tangi tei orongaia mai e te Atua, te akaora anga, e te tauturu e kua tuatua aia: “Eaa ra taku e apai atu na Iehova, i te au takinga-meitaki katoa nona iaku nei? Ko te kapu ora taku ïa e apai ki runga, ka kapiki ei i te ingoa o Iehova, Ka akatupu au i taku i tia ia Iehova, i teianei ki mua i te aroaro o tona katoa ra au tangata.”​—Salamo 116:12-14.

Me te akatapu ra tatou ia tatou uaorai ma te ngakau katoa kia Iehova, ka kapiki tatou i tona ingoa na roto i te akarongo e te tutaki i ta tatou au tia tei maaniia kiaia. Ei Au Kite o Iehova, ka rauka ia tatou i te akameitaki i te Atua na te tuatua meitaki anga iaia i te au taime ravarai e te akakiteanga i te tuatua no runga i tona Patireia. (Salamo 145:1, 2, 10-13; Mataio 24:14) Inara kare e rauka ia tatou i te akapuapinga maata ia Iehova, nana oki te au mea ravarai, me kare te akaoki i te tutaki iaia no tana au puapinga ravarai kia tatou.​—1 Paraleipomeno 29:14-17.

Te rave anga i te au oronga anga tauturu no te akamaata i te au inangaro o te Patireia kare te reira i te mataara no te akaoki i te tutaki me kare te akapuapinga ia Iehova. Tera ra, te reira tu oronga anga ka rauka ia tatou i te au tuatau no te akaari i to tatou aroa no te Atua. Te au tauturu tei orongaia, kare no te akakeu anga karapii me kare kia kiteaia e te tangata e kia akapaapaaia, mari ra ma tetai vaerua oronga ua e te akamaata i te akamori anga tika, ka oronga mai i te mataora ki tei oronga e te akameitakianga a Iehova. (Mataio 6:1-4; Angaanga 20:35) Ka rauka tetai tangata kia akapapuia i tetai tua anga i roto i teia tu oronga anga e te tupuanga ki te mataora na roto i te tuku tamou anga i tetai mea mei tana au apinganui no te turu i te akamori anga tika e te tauturuanga i te aronga tei tau. (1 Korinetia 16:1, 2) E tau ainei teia kia raveia na roto i te oronga anga taite?

E Tau Ainei Koe Kia Oronga Taite

Kua tuatua a Iehova na roto i tana peroveta ko Malaki e: “Ka apai mai na kotou i te ngauruanga o te au apinga ravarai ki roto i te are vairanga, kia mangaia taku are nei, ei timata anga te reira iaku nei i tenana, te tuatua mairā Iehova Sabaota ra; i te kore anga au i te kiriti anga i te au māramārama o te rangi ra, ka riringi atu ei i te apinga maata ua atu, kare e ngai e o ei, ei meitaki no kotou.” (Malaki 3:10) Tetai atu uri anga te tatau ra: “E apai mai i te katoa anga o te taite ki roto i te are vairanga.”​—An American Translation.

Te taite ko te tuanga ngauru te reira o tetai ua atu mea. E 10 patene tei orongaia me kare tei tutakiia ei akairo. Te rave tikaiia ra te taiteanga no te au akakoro anga o te akonoanga. Koia oki te aiteanga ko te orongaanga i te ngauru o tetai puapinga no te akamaata i te akamori anga.

Kua oronga te pateriareka a Aberahama (Aberama) ki te ariki taunga a Melekizedeka o Salema okotai ngauru o te au apinga tei autuia i rungao ia Kedalaoma e tetai atu au pupu ke. (Genese 14:18-20; Ebera 7:4-10) I muri mai, kua tia a Iakoba no te oronga okotai ngauru o tana au apinga ki te Atua. (Genese 28:20-22) I nga turanga okotai, kua riro te oronga anga ngauru ei mea oronga uaia, no te mea kare a te reira au Epera i mua ana au ture tei maani ia ratou kia oronga i te au taite.

Taiteanga i Raro Ake i te Ture

Ei iti tangata no Iehova, kua rauka i te au Iseraela te au ture taiteanga. Kua kapiti mai ki teia te rave anga o te rua ngauru anga o te au apinga i te mataiti, noatu e kua manako etai aronga apiipii e okotai anake rai taite i te mataiti. Kare okotai taite i tutakiia i te tuatau o te mataiti Tapati, i te mea e kare e puapinga i tamanakoia atu. (Levitiku 25:1-12) Kua orongaia te au taite kapiti atu ki te au popo mua o te enua ki te Atua.​—Exodo 23:19.

Okotai ngauru o te au kai o te enua e te au ua rakau e pera katoa te tupu anga o te au puakatoro e te au anana ka apainaia ki te ngai tapu e ka orongaia ki te au Levi, tei kore i rauka ia ratou tetai tuanga o te enua. E oti ka oronga atu ratou okotai ngauru i ta ratou i rauka no te turu i te taunga anga a Aarona. E tikai kua ruruia te titona kua tauiia te ua o te rakau ra e te rakau orive ra ei uaina e te inu i mua ake i te taiteanga. Me inangaro tetai Iseraela i te oronga moni kare i te au apinga, ka rauka iaia inara, kia oronga akaou atu aia i te rima o tona puapinga ra.​—Levitiku 27:30-33; Numero 18:21-30.

Akara anga e kua akapae katoa akaouia tetai taite. Te maata anga o te taime, kua taangaangaia te reira e tetai ngutuare tangata me akaputuputu mai te au tangata no te au oroa. Inara akapeea me e mamao roa te ara ki Ierusalema no te apai meitaki anga i teia tu taite? Ka tauiia i reira te titona, te uaina ou, te inu, e te au animara ei moni te ka ngoie ua i te apai. (Deuteronomi 12:4-18; 14:22-27) I te openga o te toru e te ono mataiti o te itu mataiti tapati, kua akapaeia te taite no te au Levi, te aronga ke o te enua, te au takaua, e te au tamariki metua kore.​—Deuteronomi 14:28, 29; 26:12.

I raro ake i te Ture, kare e utunga no te pokaanga i te taite. Mari ra, kua tuku a Iehova i te au tangata ki raro ake i tetai apainga pakari tau no te oronga i te au taite. I tetai au taime kua anoanoia kia akakite ratou ki mua iaia e kua tutakiia te taite. (Deuteronomi 26:13-15) Tetai ua atu mea tei tapupuia mai ma te tau kore kua manakoia te reira ei apinga keiaia mei te Atua.​—Malaki 3:7-9.

Kare te taiteanga i te akanoo anga teiaa. Te tika, te akono anga te au Iseraela i teia au ture, kua puapinga maataia ratou. Kua akamaata te taite i te akamori anga tika ma te kore e tuku i te manako puapinga kore ki runga e i akapeea i te maani anga i te au apinga no te reira. No reira kua riro te taiteanga ei akanoo anga meitaki no te katoatoa i Iseraela. Inara te tau ra ainei te taiteanga no te au Kerititiano?

Ka Taite Ainei te Au Kerititiano?

No etai taime i teianei, kua matauia te taiteanga i roto ia Kerititome. Kua akakite The Encyclopedia Americana e: “Kua . . . matau marieia te reira te tae anga ki te 6 anere mataiti. Kua akakitekite te Council of Tours i te 567 e te rua o te Council of Macon i te 585 i te taiteanga. . . . Kua tupu te takino anga ei mea matauia, i te taime tikai me orongaia me kare okoia te tika anga i te maata anga o te taime ki te aronga noa ua nei no te koi i te au taite. Te akamataanga kia Pope Gregory VII kua akakiteia teia rave anga ei mea tureia. Kua oronga i reira te manganui o te aronga noa ua nei i to ratou tika anga no te taite ki te au are akamori anga e te au are pure. Kare te akonoanga Taui Anga i takore ana i te taiteanga, e kua rave uaia atu te reira i roto i te Ekaretia Roma Katorika e i te au enua Porotetani.” Kua takoreia te taiteanga me kare kua komono marieia i te au enua tukeke, e e meangiti ua te au akonoanga te rave ra i te reira i teianei.

No reira, te anoanoia ainei te au Kerititiano kia taite? I roto i tana papaanga tuatua Puka Tapu, kua tuatua a Alexander Cruden e: “Kare to tatou Akaora, kare katoa tana au apotetoro i akaue ana i tetai ua atu mea no runga i te au taite.” E tikai, kare te au Kerititiano i akaueia kia taite. Na te Atua uaorai i akaoti i te Ture a Mose, ma tana au akanoo anga no te taite, te patitianga i te reira ki te rakau tamamae anga o Iesu. (Roma 6:14; Kolosa 2:13, 14) I te mea e ka anoanoia no te oronga i tetai tuanga akakoroia no te tameangiti mai i te au kaiou a te putuputuanga, te rave ra te au Kerititiano i te au tauturu oronga uaia.

Akangateitei ia Iehova ma ta Kotou Au Apinga Puapinga Maata

Tera ra, me iki ua ake ana tetai Kerititiano ma te inangaro ua i te oronga i tetai okotai ngauru o tana puapinga no te akamaata i te akamori anga tika e tikai kare e patoi anga i tau ki te Tuatua Tapu no tana rave anga i te reira au oronga anga tauturu. I roto i tetai reta tei aru mai te oronga anga tauturu, kua tata tetai tamaiti e 15 ona mataiti i Papua Nu Kini: “I toku meangiti anga, e tuatua ua mai ana toku papa kiaku, ‘Me akamata koe i te angaanga, kia oronga koe i te popo mua kia Iehova.’ Kua maara iaku te au tuatua a Maseli 3:1, 9, te tuatua ra e kia oronga tatou i te popo mua kia Iehova no te akangateitei iaia. No reira kua taputou au i te rave i te reira, e i teianei te akatupu nei au i taku taputou. Te rekareka nei i te tuku atu i teia moni no te tauturu i te angaanga Patireia.” Kare te Puka Tapu e kapiki ra i te au Kerititiano kia rave i teia tu taputou. Inara, te riro ra te orongaanga ma te tau meitaki ei mataara memeitaki no te akaari i te tu inangaro tikai no te akamaataanga i te akamori anga mou.

Penei tei runga ua i tetai Kerititiano i te kore e tuku i tetai kotinga tikai ki runga i te au tauturu tana ka oronga no te akamaata i te akamori anga i te Atua ko Iehova. Ei akatutu anga: I tetai akaputuputuanga a te Au Kite o Iehova, te uriuri ra e rua nga tuaine no runga i te au tauturu te ka orongaia ki te angaanga Patireia. E raukaʼi te kai i te ngai o te akaputuputuanga, kua ui tetai o te nga tuaine, e 87 ona mataiti, eia moni ka pou te ka rauka iaia i te oronga i te reira. Kua karanga tetai mai tuaine, e 90 ona mataiti: ‘E oronga ua i taau i manako eia​—e tetai manga maata atu.’ Mei teaa te tu memeitaki ta teia tuaine pakari i akaari!

I te mea e kua akatapu to Iehova iti tangata i ta ratou apinga ravarai kiaia, te rekareka ra ratou i te oronga i te au moni tauturu e tetai atu au tauturu no te turu i te akamori anga tika. (Akaaiteia atu kia 2 Korinetia 8:12.) Te tika, te oronga maira te tu orongaanga Kerititiano i te au tuatau no te akaari i te tu ariki oonu no te akamori anga a Iehova. Kare teia tu orongaanga i tukuna uaia ki runga i tetai taite, me kare ngauru, e penei te vaira te au turanga e ka akakeuia tetai tangata no te oronga e maata atu no te akamaata i te au inangaro o te Patireia.​—Mataio 6:33.

Kua tuatua te apotetoro ko Paulo e: “E oronga te tangata ravarai i tana i akakoro i roto i tona ngakau; eiaa ma te noinoi, e mei te mea e no te umuumu: ko te tangata oronga ma te rekareka ta te Atua e inangaro.” (2 Korinetia 9:7) Me oronga koe ma te rekareka e te tau meitaki no te turu i te akamori anga tika, ka meitaki toou noo anga, no te mea te tuatua ra te materi pakari ra: “E akangateitei atu ia Iehova i taau ra au apinga, e te mataiā o taau katoa ra apinga kia tupu: Ka ki rava te au are vairanga apinga oou ra i reira, e ki oki taau au āriki i te wina ou e maringi ua atu.”​—Maseli 3:9, 10.

Kare e rauka ia tatou i te akapuapinga i te Atua Ngateitei. Nana te au auro e te ario katoatoa, te au puaka i te tauatini au maunga, e te au mea puapinga maata ma te kore e rauka i te tareia. (Salamo 50:10-12) Kare rava e rauka ia tatou i te akaoki i te tutaki i te Atua no tana au puapinga ravarai no tatou. Inara ka rauka ia tatou i te akaari i to tatou tu ariki oonu iaia e no te akameitaki anga o te orongaanga i te angaanga tapu ki tona akapaapaa anga. E ka papu ia tatou e ka maringi mai te au akameitakianga puapinga maata ki te aronga tei oronga ua no te akamaata i te akamori anga ma e te akangateitei i te Atua aroa e te tau metiaki ko Iehova.​—2 Korinetia 9:11.

[Pia i te kapi 29]

TE AKAPUTU ANGA MAI ETAI PAE NO TE ANGAANGA PATIREIA

◻ AKAPUTU ANGA NO TE ANGAANGA I TEIANEI AO: E manganui te akapae ra me kare te akapapa ra i tetai moni no te tuku ki roto i te au pia tauturu tei akairoia: “Au Tauturu no te Angaanga i Teianei Ao a te Totaiete​—Mataio 24:14.” I te au marama katoatoa e tuku mai ana te au putuputuanga i teia au moni ki te opati maata o teianei ao i Brooklyn, New York, me kare ki te opati manga vaitata.

◻ APINGA AROA: Kia tuku tikaia mai te au moni tauturu tei oronga uaia ki te Watch Tower Bible and Tract Society of Pennsylvania, 25 Columbia Heights, Brooklyn, New York 11201, me kare ki te opati manga o te Totaiete i toou ngai. Ka rauka katoa te au apinga akamanea me kare ra tetai atu au apinga puapinga i te orongaia mai. Kia aru mai tetai reta poto ua i te au apinga tei akaputuia no te akakite i teia oronga anga tauturu.

◻ AKANOO ANGA I TE TURANGA NO TE TAUTURU: Penei ka orongaia te moni ki te Totaiete Punanga Tiaki Anga kia tukuia ki tetai ngai tei irinakiia, e a tetai taime me anoanoia e te reira tangata, ka akaokiia te reira kiaia.

◻ AKAPAPU ANGA: Kia puapinga te Totaiete Punanga Tiaki Anga i tetai tika anga no te akapapu anga i te ora anga me kore i tetai moni pakari no te akaangaroi anga. Kia akakiteia ki te Totaiete i tetai ua atu akanoo anga mei teia.

◻ AKAPAPA ANGA PANGIKA: Penei kia tukuia te au akapapa anga pangika, te au pepa tuku anga, me kare te au akapapa anga akaangaroi no tetai tangata ki roto i te tataanga irinakiia no me kare tei maaniia kia tutakiia me mate ake ki te Totaiete Punanga Tiaki Anga, i tau ki te au ikuiku anga a te pangika o te reira ngai. E tau kia akakiteia te Totaiete no teia ua atu tu akanoo anga.

◻ PINGA AKAPUTUIA E TE PONI: Penei ka orongaia te au apinga akaputuia e te poni ki te Totaiete Punanga Tiaki Anga ei apinga aroa me kare i raro ake i tetai akanoo anga ka aere ua rai te puapinga ki tei oronga mai i te reira.

◻ ENUA: Penei ka orongaia te au enua e te au are ka rauka i te oko ki te Totaiete Punanga Tiaki Anga ei apinga aroa me kare te akono anga i tetai pepa koreromotu ki tei oronga mai i te reira, te ka rauka iaia i te noo ki roto i te tuatau te ora ra aia. E tau kia araveiia atu te Totaiete i mua ake ka orongaʼi i tetai ua atu enua ki te Totaiete.

◻ AU KOREROMOTU E TE AU TATAANGA IRINAKIIA: Penei ka tikaia te apinga me kare moni ki te Watch Tower Bible and Tract Society of Pennsylvania na roto i tetai koreromotu tikaia e te tataia, me kare kia akairoia te Totaiete ei puapinga no tetai tataanga koreromotu irinakiia. Tetai tataanga irinakiia tei orongaia ki tetai akaaerenga akonoanga ka riro te reira ei au puapinga i te pae o te tero i tetai taime. E tau kia tukunaia tetai kopi o te koreromotu me kare tataanga irinakiia ki te Totaiete.

No tetai akakite anga tuatua maata no runga i teia au mea, e tata ki te Treasurer’s Office, Watch Tower Bible and Tract Society of New Zealand, P.O. Box 142, Manurewa, New Zealand, me kare ki te opati manga vaitata o te Totaiete.