Kia Piri Vaitata kia Iehova

“E aruaru tikai i te pure.”​—ROMA 12:12, NW.

1. Eaa to Iehova anoano no te pure, eaa te akamaroiroi anga ta te apotetoro ko Paulo i oronga mai no runga i te pure?

KO Iehova “te Atua nana e oronga mai te manakonako anga” ki tona au tangata tiratiratu katoa. I te mea koia “Tei akarongo i te pure ra,” te akarongo ra aia ki ta ratou patianga no te tauturu kia rauka te manakonako anga rekareka tana e tuku ra ki mua ia ratou. (Roma 15:13, NW; Salamo 65:2) Na roto i tana Tuatua, koia te Puka Tapu ra, te akamaroiroi ra aia i tona au tavini ravarai kia aere atu kiaia i ta ratou tuatau ua ka inangaro. Tei reira aia, te anoano maira kia orongaia atu no roto roa i to ratou manako. Ko te tika, te akamaroiroi maira aia ia ratou kia “aruaru tikai i te pure” e “auraka e tukutuku i te pure.”a (Roma 12:12, NW; 1 Tesalonia 5:17) Ko te anoano ia o Iehova kia tamou te au Kerititiano katoatoa i te kapiki anga kiaia na roto i te pure, ma te riringi atu anga i to ratou ngakau kiaia e te raveanga i te reira na roto i te ingoa o tana Tamaiti Akaperepere, koia a Iesu Karaiti.​—Ioane 14:6, 13, 14.

2, 3. (a) Eaa te Atua i akamaroiroi mai ei ia tatou kia “aruaru tikai i te pure”? (e) Eaa ta tatou akapapu anga e te anoano ra te Atua ia tatou kia pure?

² Eaa ra te Atua i oronga mai ei kia tatou i teia akamaroiroi anga? No te mea ka rauka i te au taomianga e te au apainga o te oraanga nei kia akateiaa maata ia tatou e ka ngaropoina ia tatou te pure. Penei ka pokia tatou e te au manamanata e ka akariro kia kore o tatou e rekareka anga i te manakonako anga e ka akamutu ua te pureanga. I te manako anga i teia au mea, ka tau te au akamaaraara anga no tatou ei akamaroiroi ia tatou kia pure e kia akavaitata roa atu ki te tumu o te tauturu e te akapumaana, koia a Iehova to tatou Atua ra.

³ Kua tata te pipi ko Iakobo e: “E akavaitata atu ki te Atua, e nana e akavaitata mai kia kotou na.” (Iakobo 4:8) Ae, kare te Atua i te teitei roa e kare katoa oki i te mamao roa kia akarongo mai i ta tatou au tuatua anga kiaia, noatu rai to tatou tu apa ua nei. (Angaanga 17:27) Pera katoa oki, kare ona tu manako kore ua e kia kore e akamanako mai. Kua tuatua te tata taramo e: “Tei te aronga tuatua-tika ra to Iehova mata, e tei ta ratou kapiki tona taringa.”​—Salamo 34:15; 1 Petero 3:12.

4. Akapeea te akatutu anga i to Iehova ra tu akarongo anga mai i te pure?

⁴ Te pati maira Iehova i te pure. Penei ka tau tatou kia akaaite atu i teia ki tetai akaputuputu anga ki tetai ngai e manganui te au tangata tei kapitiia atu i te tuatua anga. Ko koe tetai i reira, te akarongorongo atura ki etai ke te tuatua ra. Ko taau tuanga e akarakara ua. Inara kua ariu atura tetai kia koe e kua tuatua atu i toou ingoa, e kua tuatua tika atura kia koe. Kua akakeu toou manako i te reira na tetai tu takake. Mei te reira katoa, te akarongo tamou maira te Atua ki tona au tangata, noatu tei ea ratou ra. (2 Paraleipomeno 16:9; Maseli 15:3) No reira te akarongo maira aia i ta tatou au tuatua, mei te mea rai e te akara paruru maira e te akamanako maira. Me kapiki tatou i te ingoa o te Atua na roto i te pure, kua akakeu mai tona manako i reira, e kua ariu mai tona manako kia tatou na roto i te tu taka papu. Na tona au mana, ka rauka ia Iehova te kite e te marama i te pati anga tei orongaia mei roto mai i te ngai ngaro o tona ngakau e tona manako noatu kare e reo. Kua akapapu maira te Atua kia tatou e ka akavaitata mai aia ki te aronga katoatoa te kapiki maira i tona ingoa e te kimi ra kia piri vaitata kiaia ma te ngakau tae.​—Salamo 145:18.

Rave Anga Kia Tau ki ta te Atua Akakoroanga

5. (a) Eaa ta te ako kia “aruaru tikai i te pure” te akakite maira no ta tatou au pure? (e) Akapeea ta te Atua ra pauanga i te au pure?

⁵ Te ako kia tamou marie i te pure te akakite maira e i etai tuatau ka tuku a Iehova ia tatou kia tamou i te pureanga no tetai tumu no tetai tuatau i mua ake i te kitea anga e kua akarongo mai aia i te reira. Penei ka manga roiroi tatou i te patianga i te Atua no te akaperepere anga me kare aroa takinga meitaki te akara anga te maata ra te anoanoia inara kua roa te tiaki anga. No reira, te pati maira te Atua ko Iehova ia tatou auraka e tuku ua ki te reira tu manako mari ra kia tamou i te pureanga. Ka tau tatou kia rave ua atu i te patianga kiaia i to tatou manako, ma te irinaki e te akangateitei maira aia i ta tatou pure e ka rave ra aia i tei anoano tikaia no tatou, kare e ko ta tatou ua i manako. Kare e ekoko anga ka akatau te Atua ra ko Iehova i ta tatou patianga kia tau kia tana akakoroanga. Ei akaraanga, penei e tupuanga kino tetai kia etai ke ra no ta tatou i pati ra. E akaaite atu tatou i te reira tumu ki tetai metua tei pati atura tana tamaiti kiaia i tetai patikara takatakai nona. Kua kite te metua e me ka oko aia i tetai patikara no tera tamaiti, ka inangaro katoa tetai mai tamaiti i tetai katoa nona. I te mea e ou roa tetai tamaiti no te patikara, penei ka manako te metua e eiaa e oko i tetai i te reira tuatau tikai. Mei te reira katoa, na roto i te marama o tana akakoroanga e te tuatau tau, ka tuku to tatou Metua i te rangi ra i tana tika eaa te mea meitaki tika tikai no tatou e no etai katoa oki.​—Salamo 84:8, 11; akaaiteia atu kia Habakuka 2:3.

6. Eaa te akatutu anga ta Iesu i oronga maira no runga i te pure, e eaa ta te tamou marie anga i te pure e akakite maira?

⁶ E meitaki tikai te akatutu anga ta Iesu i oronga ra no tei umuumuia ra no tana au pipi “kia tamou marie ratou i te pure, auraka e maromaroa.” E vaine takaua tetai, kare i rauka iaia te akatika anga, kua manono ra aia i tana patianga ki tetai tangata akava e tae roa i te openga kia rauka iaia te akatika anga. Kua kapiti maira Iesu: “Kare aina oki te Atua e akatika mai i tona uaorai tangata i ikiia ra?” (Luka 18:1-7) Na te tamou marie i te pure e akaari i to tatou akarongo, i to tatou irinaki anga ia Iehova, i to tatou inangaro kia akavaitata atu kiaia e ka rave ei i ta tatou patianga, e ka vaio ei i te akatupu anga ki roto i tona nga rima.​—Ebera 11:6.

Au Akaraanga no te Piri Vaitataanga Kia Iehova

7. Akapeea tatou i te aru anga i te akarongo o Abela i te piri vaitataanga kia Iehova?

⁷ E maata te au tataanga i te Puka Tapu i te au pure tei raveia e te au tavini o te Atua ra. “Kua tataia ei ikuiku anga no tatou, na roto i to tatou tiaki marie anga e na roto i te akapumaana anga mei te au Tuatua Tapu penei ake e ka rauka ia tatou te manakonakoanga.” (Roma 15:4, NW) Na to tatou akamanakoanga i etai akaraanga no te aronga tei akavaitata tamou ra kia Iehova, e akamaroiroi i to tatou manakonako anga. Kua oronga a Abela i te atinga arikiia mai e te Atua ra, e noatu e kare e pure i akakiteia mai, kare e ekoko anga e kua pati aia kia Iehova na roto i te pure kia arikiia mai tana oronga anga. Te na ko ra ia Ebera 11:4: “No te akarongo i meitaki ravaʼi ta Abela atinga i apai i te Atua i ta Kaina, i tuatuaia mai ei aia e e tangata tuatua-tika aia.” Kua kite a Abela i ta te Atua ra totou ia Genese 3:15, inara kia akaaiteia mai ki ta tatou i kite i teia nei, e meangiti ua tana i kite ra. Inara, kua akono a Abela kia tau ki tana i kite i reira. Mei te reira katoa i teia tuatau, ko tetai papaki tei ou ua te inangaro i te tuatuamou a te Atua ra kare i maata to ratou kite, inara te pure ra ratou e ka akono i ta ratou i kite, mei ia Abela rai. Ae, ka rave ratou i te akarongo.

8. Eaa i papu ei ia tatou e i piri vaitata atu a Aberahama kia Iehova, e eaa te uianga tau na tatou kia ui ia tatou uaorai?

⁸ Ko tetai atu tavini tiratiratu o te Atua ko Aberahama ia, koia “te metua o te aronga katoa e akarongo to ratou.” (Roma 4:11, NW) I teia tuatau, e tere atu i to mua ana, te anoanoia nei te akarongo maroiroi no tatou, e ka tau tatou kia pure ma te akarongo, mei ia Aberahama rai. Te tuatua ra ia Genese 12:8 e, “kua akatu oki aia i tetai atarau na Iehova i reira, e kua tautopa iora aia i te ingoa o Iehova.” Kua kite a Aberahama i te ingoa o te Atua e kua taiku i te reira i te pure anga. E putuputu aia i te tamou marie anga i te pure ma te ngakau tae, e kua tautopa iora “i te ingoa o Iehova i reira, ko te Atua mutu kore ra.” (Genese 13:4; 21:33) Kua kapiki ra a Aberahama i te Atua no te akarongo tei riro ra aia kia akamaaraaraia. (Ebera 11:17-19) Na te pure i tauturu ia Aberahama kia rekareka maata i te manakonako anga i te Patireia. Te aru ra ainei tatou i ta Aberahama akaraanga no te tamou marie i te pure?

9. (a) Eaa ra i puapinga maataʼi ta Davida au pure ki to te Atua au tangata i teia tuatau? (e) Penei eaa te ka tupu i ta tatou pureanga mei ia Davida rai kia piri vaitata atu ia Iehova?

⁹ E meitaki katoa a Davida i te tamou marie anga i te pure, e te akatutu maira tana au taramo e eaa te au pure tei tau ra. Ei akaraanga, e mea tika no te au tavini o te Atua kia pure no te au mea mei te ora rai me kare akaora anga (Salamo 3:7, 8; 60:5), arataki anga (Salamo 25:4, 5), paruru anga (Salamo 17:8), akakore anga ara (Salamo 25:7, 11, 18), e tetai ngakau ma (Salamo 51:10). I to Davida kite anga i te tu taitaia, kua pure aia: “E akarekareka mai i te meta o to tavini.” (Salamo 86:4, NW) Ka tau katoa tatou kia pure no te ngakau rekareka, i te kiteanga e te inangaro ra a Iehova kia rekareka tatou i to tatou manakonako anga. Kua piri vaitata ua a Davida ia Iehova ra e kua pure: “Te aru topiri vaitata nei toku meta ia koe; te mou piri mai nei to rima katau iaku.” (Salamo 63:8, NW) Ka piri vaitata ua atu ainei tatou ia Iehova, mei ia Davida rai? Me ka pera tatou, nana katoa e mou mai ia tatou.

10. Eaa te au manako tarevake o te tata taramo ko Asapha ra i tetai tuatau, inara eaa tana i kite i muri iora?

¹⁰ Me ka piri vaitata ua atu tatou ia Iehova, ka tau tatou kia kopae ke i te vareae anga i te aronga rave kino ra no to ratou oraanga manako kore ua e te maata i ta ratou apinga. Kua manako a Asapha te tata taramo ra i tetai tuatau e kare e puapinga kia tavini atu ia Iehova, no te mea ko te aronga rave kino “ko tei manuia i teia nei ao.” Tera ra, kua kite aia e kua tarevake tona manako e ko te aronga rave kino tei “te ngai pateka.” Kua kite aia e kare atu e ngai meitaki mari ra ko te piri vaitata anga kia Iehova ra, e kua akataka atura aia iaia uaorai na teia mataara: “Ei ia koe rai au; na to rima katau i mou mai iaku. I na oki, te aronga e taka ke ia koe ra, ka pou ïa. . . . E mea meitaki ra iaku kia akavaitata atu ki te Atua: kua irinaki au i te Atu ra, ia Iehova, kia akakite rai au i taau katoa ra au angaanga.” (Salamo 73:12, 13, 18, 23, 27, 28) Kare ei te manako vareae i te oraanga o te aronga rave kino manako kore ua ra, te aronga kare ra e manakonako anga, e aru ra tatou ia Asapha i te piri vaitataanga ia Iehova ra.

11. Eaa i akaraanga meitaki ei a Daniela no te piri vaitataanga kia Iehova, e akapeea tatou me aru iaia?

¹¹ Kua rave tamou marie tikai a Daniela i te pure, noatu rai i te aro atu anga i te tu kino i roto i te vaarua riona ra no te kore i akarongo i te ture a te aronga mana ra no te pure. Kua tono mai a Iehova “i tana angela, e kua topiri i te vaa o te au liona,” e kua ora a Daniela. (Daniela 6:7-10, 22, 27) Kua maata te akameitaki anga ia Daniela na tona tamou marie anga i te pure. Te rave tamou marie katoa ra ainei tatou i te pure, e kia maata atu oki me aro atu i te patoi angaia ta tatou tutuanga i te Patireia?

Ko Iesu, to Tatou Akaraanga

12. (a) I te akamataanga tana angaanga orometua, eaa te akaraanga ta Iesu i akanoo mai no te pure, e akapeea te au Kerititiano e puapingaiaʼi i te reira? (e) Eaa ta te pure akaraanga a Iesu e akakite maira no te pure?

¹² Mei te akamataanga mai rai tana angaanga orometua i te enua nei, kua kitea tona akono anga i te pure. Ko tona tu akono anga i te pure iaia i papetitoia ra kua akanoo mai i te akaraanga meitaki no te aronga te papetitoia ra i te vai i teia tuatau nei. (Luka 3:21, 22) Ka rauka i tetai te pure no ta te Atua tauturu kia rave aia i tei akatutuia maira e te papetitoanga i te vai. Kua tauturu katoa a Iesu ia etai ke ra kia akavaitata atu kia Iehova na roto i te pure. I tetai atianga ia Iesu e pure ra i tetai ngai, kua karanga atura tetai pipi ana kiaia i muri iora: “E te Atu, e apii mai ia matou nei i te pure.” Kua taiku atura Iesu i tei matauia e ko te pure akaraanga, tei akataka maira i te turanga tau no te au tumu te akakite maira e ko te ingoa o te Atua e tana akakoroanga ka tau kia taikuia na mua. (Luka 11:1-4) E no reira, i roto i ta tatou au pure ka tau tatou kia manako i te tu puapinga e te tau katoa oki, auraka e manako kore i “te au mea e maata ua atu te meitaki.” (Philipi 1:9, 10) Inara, te vaira etai tuatau te umuumuia ra tetai apinga takake me kare e manamanata takake tetai tei tau ra kia taikuia. Mei ia Iesu rai, e mea tika no te au Kerititiano kia pure ki te Atua kia oronga mai i te maroiroi kia rave i tetai angaanga me kare kia rauka te aro atu i etai timataanga me kare au tu kino. (Mataio 26:36-44) Ko te tika, ka tau te pure anga tataki tai kia kapiti vaitata i te au tu ravarai o te oraanga.

13. Akapeea ta Iesu akakite mai anga i te puapinga maata o te pure no etai ke ra, e eaa te tupuanga puapinga no ta tatou au pure na tetai atu?

¹³ Na tana akaraanga meitaki, kua akaari maira Iesu i te puapinga maata o te pureanga no etai ke ra. Kua kite aia e ka makitakitaia tana au pipi e ka takinga kinoia, mei iaia rai. (Ioane 15:18-20; 1 Petero 5:9) No reira, kua pati aia i te Atua “kia tiaki ia ratou i taua vaerua kino ra.” (Ioane 17:9, 11, 15, 20, NW) I tona kiteanga i te timataanga takake tei vai maira ki mua no Petero, kua karanga atura aia kiaia: “Kua rave ana au i te pati akatenga noou kia kore toou akarongo e ope.” (Luka 22:32, NW) Mei teaa ra te puapinga me ka tamou marie tatou i te pureanga no to tatou au taeake, te manakoanga ia etai ke ra e kare i to tatou anake ua au manamanata e to tatou puapinga anake ra!​—Philipi 2:4; Kolosa 1:9, 10.

14. Akapeea tatou i kite ei e i piri vaitata a Iesu kia Iehova i te tuatau katoa o tana angaanga orometua i te enua nei, e akapeea tatou me aru iaia?

¹⁴ I tana angaanga orometua katoa, kua tamou marie a Iesu i te pure, ma te piri vaitataanga tikai kia Iehova. (Ebera 5:7-10) Ia Angaanga 2:25-28, kua taiku maira te apotetoro ko Petero ia Salamo 16:8 e kua akapiri atura i te reira ki te Atu ra kia Iesu Karaiti: “Te na ko maira oki a Davida iaia, ‘Kua tuku au ia Iehova ei mua ua rai iaku, tei toku rima katau oki aia, kia kore au e ngaueue.’” Ka rauka katoa ia tatou te rave akapera. Ka rauka ia tatou te pure kia vaitata mai te Atua kia tatou, e ka rauka ia tatou te akaari i to tatou irinaki anga ia Iehova na te manakoanga tamou iaia ki mua i to tatou mata. (Akaaiteia atu kia Salamo 110:5; Isaia 41:10, 13.) Na reira tatou i te kopae anga i te au tu taitaia ravarai, no te mea ka turu mai a Iehova ia tatou, e kare roa tatou e turori.

15. (a) No runga i teaa kare tatou e tau kia kore e tamou marie i te pure? (e) Eaa te akamatakite anga te orongaia maira no ta tatou akameitaki anga?

¹⁵ Auraka rava tatou e kore e akameitaki ia Iehova no tona au tu meitaki katoatoa kia tatou nei, ae, no “te rai o te aroa ua o te Atua,” tei kapiti katoa ra i te apinga aroa o tana Tamaiti ei atinga oko no ta tatou ara. (2 Korinetia 9:14, 15; Mareko 10:45; Ioane 3:16; Roma 8:32; 1 Ioane 4:9, 10) E mea tau i roto i te ingoa o Iesu, “te akameitaki anga i te Metua ra i te Atua, i te au mea katoa ma te tivata kore.” (Ephesia 5:19, 20; Kolosa 4:2; 1 Tesalonia 5:18) Ka tau rai tatou kia matakite kia kore ta tatou akameitaki anga no ta tatou apinga e riro kia kavanguia no te akapou anga i to tatou taime no te au apinga kare ra a tatou, me kare no to tatou uaorai au manamanata.

Tukuanga i ta Tatou Apainga kia Iehova

16. Me tupu mai te taitaia no ta tatou apainga, eaa te mea tau na tatou kia rave?

¹⁶ Na te tamou marie anga i te pure e akakite i te oonu o to tatou akono i te atua. Me kapiki tatou i te Atua, te meitaki ra te tupuanga kia tatou noatu rai i mua ake ka rauka mai ei tana pauanga. Me e apainga tetai te tamanata ra i to tatou manako, ka rauka ia tatou te piri vaitata atu kia Iehova na te aruanga i te ako e: “E tuku koe i taau apainga kia Iehova ra, e nana koe e tauturu mai.” (Salamo 55:22) Na te tukuanga i ta tatou au apainga ravarai​—te apiapi, te manamanata, te maromaroa, te mataku, e te vai atura—​ki runga i te Atua, ma te akarongo ki tikai kiaia, ka rauka ia tatou te ngakau maru, “te au o te Atua, ko tei maata ua atu i te kite tangata.”​—Philipi 4:4, 7; Salamo 68:19; Mareko 11:24; 1 Petero 5:7.

17. Akapeea e raukai ia tatou te au no te Atua ra?

¹⁷ Te rauka vave maira ainei te reira au no te Atua mai ra? Noatu rai e ka viviki ua te rauka anga tetai meitaki, ko ta Iesu i tuatua no te pureanga no te vaerua tapu te mou katoa ra ia: “E tamou i te patianga, e ka orongaia mai kia kotou; e tamou i te kimianga, e ka kitea e kotou; e tamou i te topapaanga, e ka vaiia mai te pa kia kotou.” (Luka 11:9-13, NW) I te mea na te vaerua tapu e akakore atu i to tatou tu apiapi, ka tau rai tatou kia tamou marie i te patianga no te au o te Atua e tana tauturu no ta tatou au apainga. Ka papu ia tatou e na te tamou marie anga i te pure, ka rauka ia tatou te tauturu umuumuia ra ma te ngakau maru katoa.

18. Eaa ta Iehova ka rave no tatou me kare tatou e kite meitaki eaa ta tatou ka pure i roto i tetai turanga?

¹⁸ Inara, akapeea me kare tatou i kite papu eaa te mea tau no te pure atu? Ka vairai to tatou au ngunguru anga ki roto ia tatou, kare e akakitea no te mea kare tatou i kite meitaki i to tatou turanga, me kare te ngere ra tatou i te kite e eaa ta tatou ka tuku atu kia Iehova. Ei konei e tau ei na te vaerua tapu ia e rave na tatou. Kua tata a Paulo: “Kare oki tatou i kite meitaki i te mea e tau kia pure tatou: na te Vaerua uaorai e pati i ta tatou ma te ngunguru e kore e tika kia tuatua ra.” (Roma 8:26) Naea ra? I roto i te Tuatua a te Atua te vaira te au totou akauruia ma te au pure te tau ra no to tatou turanga. Mei te mea rai e, ka tuku aia na te reira e tauturu ia tatou. Ka ariki aia i te reira e ko ta tatou ia ka pure atu naringa tatou i kite meitaki i to ratou aiteanga no to tatou turanga, e kia tau ki te reira ka akatupu maira aia i te reira.

Te Pure e te Manakonako Kia Tamouia

19. Eaa ka vai tamou ei te pure e te manakonako anga e tuatau ua atu?

¹⁹ Ka rave tamouia te pure anga ki to tatou Metua i te rangi e tuatau ua atu, e maata atu oki no runga i te akameitaki anga no te ao ou e tona au akameitakianga katoatoa. (Isaia 65:24; Apokalupo 21:5) Ka tamou katoa tatou i te rekareka i te manakonako anga, no te mea ko te manakonako anga i etai tu ka vairai e tuatau ua atu. (Akaaiteia atu kia 1 Korinetia 13:13.) Te au apinga ou ta Iehova ka akatupu mai me ka oti tana ra Tapati i akanoo nona uaorai no te pae ki te enua nei, kare e rauka ia tatou i te manako atu. (Genese 2:2, 3) No te tuatau mutu kore ua atu, ka oronga mai aia i te au poitirere anga aroa ua no te tuatau ki mua atu no tona au tangata, e te mou maira te tuatau ki mua i te au mea memeitaki i te tu no te raveanga i tona anoano no ratou.

20. Eaa te manako papu tau no tatou, e no teaa ra?

²⁰ Ma te reira manakonako anga rekareka i mua ia tatou, kia piri vaitata atu tatou katoatoa kia Iehova na te tamou marie anga i te pure. Auraka roa tatou e akaope i te akameitakianga i to tatou Metua i te rangi ra no to tatou au akameitakianga ravarai. A te tuatau tau ra ka tupu katoa ta tatou i tapapa atu ra ma te rekarekaia, e tere atu i tei rauka ia tatou kia tamanako e i tiaki atu, no te mea ka rauka ia Iehova ei “te maata ua atu tana kia rave i te au mea katoa ta tatou e pati nei, e ta tatou e manako nei.” (Ephesia 3:20) I te manako anga i teia, i reira, e oronga tatou i te akapaapaa te kaka e te akameitaki anga katoatoa e mutu kore ua atu ki to tatou Atua kia Iehova, koia “Tei Akarongo i te pure ra”!

[Au Tataanga Rikiriki i Raro]

Akapeea Koe Me Pau?

◻ Eaa i tau ei tatou kia tamou marie i te pure?

◻ Eaa ta tatou i kite no te au akaraanga i mua ake i te tuatau Kerititiano ra no te pure?

◻ Eaa ta te akaraanga a Iesu ei apii ia tatou no te pure?

◻ Akapeea tatou me tuku i ta tatou au apainga kia Iehova e eaa te tupuanga?

[Tutu i te kapi 17]

Kua tamou marie a Daniela i te pure noatu te akaoko anga kia tiriaia aia ki roto i te vaarua riona