“E Aao i te Paruru Umauma Katoa Mei te Atua Maira”
AAO ainei te au Kerititiano i te paruru umauma? Eaa ratou ka aao ei i te reira tu apinga no te tamaki? Kare ainei ratou i te aronga inangaro i te au? (2 Timoteo 2:24) Ae, koia oki ratou. Noatu rai, te o atura te au Kerititiano mou ravarai ki roto i tetai ta anga—koia oki e mea te tauta ra ratou, kare no te tamate, mari ra no te autu atu.
Naringa kare a Satani i patoi ra, kare rava te reira tu ta anga e anoanoia. Inara kua patoi aia e kua arataki ke atu ia Adamu raua ko Eva ki roto i te pirianga kiaia no te patoi atu. Mei te reira taime mai kua akatupu te akatereanga i teianei ao na roto i te mana o “taua vaerua kino ra,” ko te Tiaporo ko Satani. (1 Ioane 5:19) Ko te aronga te kauraro atura i te Ngateitei tika ra ko Iehova, kia patoi ratou i te mana o te teianei ao e tona tutara. Kia ta atu ratou no to ratou oraanga i te pae vaerua. Te akoia nei te au Kerititiano i teia tuatau: “E aao i te paruru umauma katoa mei te Atua maira e raukaʼi ia kotou i te tu ketaketa atu i te patoi i te au ravenga pakari a te Tiaporo.”—Ephesia 6:11, NW.
Te Paruru Umauma
Ka akara ana e te anoano ra tatou i “te paruru umauma katoa mei te Atua maira” i te mea e kia paruru meitakiia tatou. Ka akara ana i reira tatou ki te tuanga tataki tai o teia paruru umauma mei tei akatutuia e te apotetoro ko Paulo e te rave atu i tetai kimikimi anga tiratiratu ia tatou uaorai no te akara e me te papa tikai ra tatou no te tamaki anga i te pae vaerua.—Ephesia 6:14-17, NW.
“Ka tu ketaketa, i reira, ma to kotou au taukupu te tatua angaia i te tuatua mou.” (Ephesia 6:14a, NW) I te au tuatau Puka Tapu kua aao te au vaeau i tetai kiri tatua pakiri manu mei te 14 teni mita te atea. Kua tauturu teia kiri tatua ia ratou i te paruru i to ratou au taukupu. Me uuti tetai vaeau i tona kiri tatua kia piri, teia te aite anga e kua papa aia no te tamaki.
Mei teaa atura te tau i reira, e kia akaaiteia te tuatua mou na te atua ki te kiri tatua o tetai vaeau! Te akatutu meitaki ra teia e e tau tatou kia akono mou piri tikai i te Tuatua na te Atua, mei te mea kua tatuia tatou e te reira. E tau tatou kia akaata oonu i te papaanga manako o te Tuatua na te Atua. Ka paruru teia ia tatou mei te arataki ke angaia e te au pikikaa e te au akavare anga. Pera katoa, te au tuatua mei to Iehova vaa ka turu te reira e te akamaroiroi ia tatou i te pae vaerua e te akamaroiroi i to tatou tu akono tau tikai.
“Te aaoanga i te tapoki umauma o te tuatua tika.” (Ephesia 6:14e, NW) Ka riro te tapoki umauma o tetai vaeau ei paruru i tetai mero kopapa puapinga—ko te ngakau. I to tatou tapoki umauma vaerua tei orongaia mai e te Atua, na te tuatua tika e paruru i to tatou ngakau. I tau ki te Tuatua Tapu, e akatutu anga tau te ngakau no te akakite mai e eaa to roto ake ia tatou—to tatou manako ngakau, au manako e te au akakoro anga. I te mea te tuatua katoa ra te Puka Tapu e ka akatupu te ngakau i te mea kino, no reira e mea puapinga i te tatanu i tetai tu tauta no te mou ki runga i ta Iehova turanga o te tuatua tika. (Ieremia 17:9) Te akarongo ki te Atua auraka te reira ei akaari anga pikikaa i vao ake mari ra kia riro te reira no roto mai. Te umuumuia ra e kia akatupu tatou i tetai aroa matutu o te tuatua tika e tetai makitakita anga matutu aiteite no te kino. (Salamo 45:7) I reira to tatou ngakau e paruruiaʼi.
“Ma to kotou au vaevae te akatamaka angaia i te apinga o te tuatua meitaki o te au.” (Ephesia 6:15, NW) Te akatamakaia ainei toou vaevae na teia tu? Te apai putuputu ainei toou nga vaevae ia koe ki te angaanga orometua no te akakitekite i te tuatua meitaki? Te tauta ainei koe no te akamako i taau tu angaanga tutu aereanga e te apiianga? E tika, te vaira etai au ngai kare e ariki mai ana. Penei e tuke te tu o te au tangata tataki tai, kare e manako inangaro, me kore ra e tu patoi pakari to ratou. Penei ra na ta tatou tutu aereanga e apai mai i te takinokino anga ki runga ia tatou. Inara na roto i te aruaruanga, ka akatupu te au Kerititiano i te tu tamou marie, e tu teia te ka oronga mai i te paruru anga no te patoi i ta Satani au tamaki anga. Noatu kua takinokinoia, e tangata tutu aere maroiroi a Paulo, e te akamaroiroiia ra tatou ‘e aru mai iaia ra mei iaia katoa i aru i te Mesia nei.’—1 Korinetia 11:1.
Te rave putuputu anga i te angaanga tutuanga Patireia na te reira e akamaroiroi i to tatou tu papu ki roto i te tuatua meitaki. Tei maata atu, na te reira e angaanga mai ei to Iehova vaerua na roto ia tatou no te akatupu anga i tona anoano. Te tika ra, na teia tu angaanga e akatupu ia tatou ei au taeake angaanga ma te au angera—pera katoa ki te Atua ko Iehova uaorai. (1 Korinetia 3:9; Apokalupo 14:6) Te ‘maata te rave anga i te angaanga a te Atu’ ka akatupu te reira ia tatou ‘kia maroiroi, auraka e ngaueue.’ (1 Korinetia 15:58) Mei teaa te umere ta teia paruru anga ka oronga mai!
“E aao i te paruru maatamaata o te akarongo.” (Ephesia 6:16, NW) Ma tetai paruru maatamaata, kua paruru tetai vaeau o te au tuatau taito ra iaia uaorai mei te au korare e te au kakao. Me poka aia i te taangaanga i tetai paruru, ka mamae pakari aia me kore ka mate. Te aro atura te au Kerititiano i te au apinga tamaki tamate maata rava atu—‘te au tao ai a tei kino ra.’ Te kapiti atura ki teia te au tumu ravarai tei rauka ia Satani i te taangaanga no te akaparuparu i to tatou akarongo e te tamate ia tatou i te pae vaerua. Te kapiti maira te takinokino anga, te au pikikaa, te au kite akavareia o teianei ao, te au mekameka apinganui, e te timata anga no te piri ki roto i te ainga tau kore. No te paruru ia tatou mei teia au mea ravarai, ka anoano tatou i tetai paruru maatamaata. Kare okotai ngai ia tatou e tau te akaruke uaia ma te paruparu.
Kua rauka ia Aberahama e tana vaine ko Sara te akarongo matutu. Kua tere roa atu raua i te mataiti no te anau tamariki, kua tuku raua i te akarongo ki roto i ta te Atua taputou e ka anauia mai tetai uanga na raua. I muri mai, kua akaari a Aberahama i te akarongo umere i tona akarongo anga i te kapiki anga no te akaatinga ia Isaaka, tana tamaiti anake ua na Sara akaperepereia ra. Kua tapu a Iehova i to Aberahama rima e kua oronga i tetai atinga komono. Inara kua papa a Aberahama no te akarongo. No teaa ra? No te mea e akarongo papu tikai tona e ka akatu mai a Iehova i tana tamaiti e te akatupu i te au taputou tei raveia nona ra.—Roma 4:16-21; Ebera 11:11, 12, 17-19.
Kua rauka katoa ia Mose te tu akarongo tei anoanoia e tatou. Kua kopae aia i te apinganui o Aiphiti, te ikianga i te mamae o te takinokino anga ma te iti tangata o te Atua. No teaa ra? No te mea kua rauka iaia te akarongo e te ora ra Iehova e ka apai mai i te ora ki te au Iseraela. No te matutu tikai i to Mose akarongo “i maroiroi rava atura aia i te akara anga atu iaia, i tei kore e kitea kia akara ra.”—Ebera 11:6, 24-27.
E akarongo ainei to tatou no Iehova tei tau kia akaaiteia ki teia? To tatou pirianga kia Iehova e piri vaitata ainei te reira i te mea e vaitata atu tatou i te rauka i te kite iaia? Te puareinga ainei tatou no te rave i tetai ua atu atinga me kare te akakoromaki i tetai ua atu tu ngata no te rave tamou i to tatou pirianga ki te Atua? E akarongo ki katoa ainei to tatou ki roto ia Iehova? (Ebera 11:1) Me koia ia, kare ta Satani au tao ai ka ra e maro mai i tona aerenga na roto i to tatou paruru o te akarongo.
“E ariki i te pare o te ora.” (Ephesia 6:17a, NW) Ka riro te pare o te vaeau ei paruru i tona katu e te roro—te mero no te akatere anga i te uaua e te manako. Kua akaaiteia te manakonakoanga Kerititiano o te ora ki tetai pare no te mea na te reira e paruru i te manako. Kua akaouia te manako o tetai Kerititiano na roto i te kite tika tikai, inara te riro ra rai no tetai tangata apikepike e te tiama kore. (Roma 7:18; 12:2) Me tuku ua tatou i te manako kia akakiia e te au manako viivii te ka takore i te akarongo tei orongaia mai e te vaerua o teianei ao, ka ngaro i reira to tatou tu papu no te ora e penei i te openga kua mate te reira. I tetai tua, me akaki putuputu tatou i to tatou manako ki te au tuatua akamaroiroianga a te Atua, ka vai marama ua te reira e te areare. Te akono ainei koe i toou pare o te ora ma te tamou piriia?
“Te koke o te vaerua, koia oki, te tuatua na te Atua.” (Ephesia 6:17e, NW) Te tuatua e, ko te paruru anga meitaki rava atu ko tetai akakino anga meitaki ia, kua tika teia i roto i te tamaki anga a te au Kerititiano. I to tatou nga vaevae, tei akatamakaia i te tuatua meitaki o te au, e apai ra ia tatou ki rotopu i te aronga irinaki kore, kare tatou i akaruke uaia ma te kore e apinga tamaki. Te Tuatua na te Atua, te Puka Tapu, ka angaanga te reira ei koke ririnui no te tiakoke atu i te au pikikaa i te pae vaerua e te au manako tau kore e te tauturu i te au tangata ngakau tika kia kitea e ratou te tu rangatira i te pae vaerua.—Ioane 8:31, 32.
Kua akaari a Iesu i te ririnui o teia apinga tamaki i tona akao anga mai i te Tiaporo ko Satani ra ki roto i tetai tamaki anga. Te timata angaia aia i roto i te metepara, kua paruru a Iesu iaia uaorai i te patoi atu e toru au akakino anga a satani na te taangaanga meitaki anga i te Tuatua na te Atua e te tuatuaanga e: “Kua oti oki i te tataia.” (Mataio 4:1-11) Me apii tatou i te taangaanga i teia koke ma te karape tikai, ka rauka ia tatou i te tauturu i te aronga maru kia aere mai ki vao mei raro ake i ta Satani mana ririnui. Pera katoa rai te aronga pakari o te putuputuanga te taangaanga ra ratou i te Tuatua na te Atua no te paruru i te anana mei te au tangata tataki tai tei tauta i te takino i te akarongo o te aronga apikepike.—Angaanga 20:28-30.
Te tu karape o tetai vaeau ma te koke ra, kare te reira e aere ngoie ua mai. Te terenianga e te rave anga akatapuia no tetai tuatau roa te umuumuia ra kia taangaangaia te reira ma te viviki e te mako. Aiteite rai, i roto i te tamaki anga i te pae vaerua e tau kia raveia te apii anga maata e te rave anga putuputu i roto i te angaanga orometua e riro mai e ei tangata karape no te taangaanga i te Tuatua na te Atua. No reira kia tauta tatou i te tuku i tei anoanoia kia riro mai ei au tangata tiakoke ma te karape i te pae vaerua, tei mako meitaki no “te tika oki i te tua i te tuatua-mou ra.”—2 Timoteo 2:15.
Rave ua Atu i te Pure, e Tu Ketaketa
Pouroa te au potopotonga i to tatou paruru umauma i te pae vaerua e puapinga te reira no te tamouanga i to tatou tu akono mou tikai ki te Atua. Inara akapeea tatou i te tamou ua atu anga i teia paruru umauma ki runga? Te apii putuputu anga i te Puka Tapu, te akapapaanga i mua ake i te au uipaanga Kerititiano, e oti te akarongo meitaki anga e te angaanga kapiti anga ki te reira, na te reira e tauturu ia tatou i te tamou ua rai i to tatou paruru umauma. (2 Timoteo 3:16; Ebera 10:24, 25) Te angaanga orometua putuputu ma te maroiroi e te piri anga Kerititiano memeitaki ka tauturu katoa te reira i te tamou i to tatou paruru umauma takino anga e te paruru i te pae vaerua kia meitaki te turanga.—Maseli 13:20; Roma 15:15, 16; 1 Korinetia 15:33.
Akatupuanga i tetai tu manako tau e puapinga katoa te reira. E tau tatou kia patoi i te tuku ua i te au mekameka o teianei ao kia takino ia tatou. Mari ra, e tau tatou kia tatanu i tetai ‘mata meitaki.’ (Mataio 6:19-24) Ei aru ia Iesu Karaiti, e tau katoa tatou kia apii i te inangaro i te tuatua tika e te makitakita i te kino. (Ebera 1:9) Na teia au mea ravarai e tauturu ia tatou te tamou ua rai i te paruru umauma vaerua tei orongaia mai e te Atua.
I muri ake i te uriurianga i te au potopotonga tataki tai o te paruru umauma vaerua, kua taopenga a Paulo na te tuatuaanga e: “Ma te au tu pure ravarai e te pati akaaka anga . . . e rave ua rai i te pure i te au atianga ravarai i te vaerua. E i te reira, e vai araara ua i te au taime ravarai e ma te pati akaaka anga no te aronga tapu ravarai.” (Ephesia 6:18, NW) Ka akakitekite manako ua rai te au vaeau akono mou ki te opati maata o te vaeau e te akarongo i te au akaue anga. Ei au vaeau Kerititiano, te anoanoia ra tatou kia noo vaitata ua rai ma te Atua Ngateitei ra ko Iehova, na roto i tana “Tutara [maata] no te au tangata nei,” ko Iesu Karaiti. (Isaia 55:4) Ka rauka teia i te raveia, kare na roto i te pure maata ra, mari ra na roto i te pati anga akaaka o te ngakau ra ko tei akaata i tetai piri anga vaitata e te akono anga oonu ia Iehova. Na te akakitekite manako putuputu anga ma Iehova, ka rauka ia tatou te maroiroi i te au ra tataki tai no te tauturu ia tatou i roto i te ta anga.
Kua tuatua a Iesu: “Kua riro te re o teianei ao iaku.” (Ioane 16:33) Te inangaro katoa ra a Iehova ia tatou kia autu. Te vaitata anga mai te matenga o te apotetoro ko Paulo, kua rauka iaia i te tuatua e: “I kukumi ana au i te kukumianga meitaki, kua oti toku oro anga, i mou marie na au i te akarongo.” (2 Timoteo 4:7) Kia rauka i reira ia tatou i te rave i tetai tuatua anga mei te reira no runga i ta tatou tuanga i roto i te taumaro anga. I te mea te anoano tikai ra tatou i teia, e tau i reira tatou kia “tu ketaketa atu i te patoi i te au ravenga pakari a te Tiaporo” na te tamou ua anga i te paruru umauma katoa mei te Atua maira.—Ephesia 6:11, NW.