Ka Rauka ia Koe te Pumaana i te Au Tuatau Manamanata
AKAPEEA ra tatou i te akara anga i te au manamanata o te ngakau? Mei te mea e kua akatapuia tatou kia Iehova, e tau ainei tatou kia akara ki rungao i te reira ei mea tuke ua ake rai no te mea no to tatou manakonakoanga umere e ta tatou au tumu i te pae vaerua? Ko te aite anga ainei o te reira au tu manako ngakau e e tau kore tatou i te pae vaerua no te angaanga a te Atua?
“E tangata a Elia e manako ngakau tona mei to tatou rai,” i tata ei te pipi ra a Iakobo. (Iakobo 5:17, NW) Noatu e kua taangaanga te Atua ia Elia na roto i tetai mataara tuke ua ake rai, kua kite katoa te reira peroveta akarongo ra i te manamanata. “Kua oti ua”! i na Elia ei i tetai atianga. “E teianei, e Iehova, ka rave mai koe iaku; kare oki oku e meitaki maata i toku ai metua ra.” (1 Ariki 19:4) Te tangata akono tikai ko Iobu ra, te vaine akarongo ra ko Hana, e tetai atu au tavini tiratiratu o Iehova kua kite katoa ratou i te manamanata. Pera katoa te tata taramo tu atua ra ko Davida tei pure e: “Kua maata io nei te mamae o toku ngakau: e akaora koe iaku i toku au tumatetenga nei.”—Salamo 25:17.
Ta Iehova taangaanga anga i te au tangata i roto i tana angaanga ra kare te aite anga e ka matara takiri mai ratou mei te au manamanata. Te vaira rai to ratou tu apikepike i te pae kopapa e te au manako ngakau e ka kite i te manamanata i raro ake i te timata anga. (Angaanga 14:15) Me kapitiia ki tetai pae e tauturu meitaki ake to te au tavini o te Atua no te autuanga i te taitaia manako ngakau. Ka akara ana tatou i tetai o te au akaraanga Puka Tapu kia kitea e eaa tei tauturu i tetai o te au tangata no te aro atu i to ratou taitaia o te manako e te au manamanata o te ngakau.
Kua Kite te Apotetoro Manamanata ra i te Pumaana
Kua kite te apotetoro Paulo ra e mei teaa te tu o te taitaia ra. Kua karanga aia e: “Ia matou oki i tae ki Makedonia ra, kare rava e akaangaroi anga o to matou kopapa, . . . e tamaki anga to vao, e mataku oki to roto. Na te Atua ra, ko te akapumaana i te aronga akaaka ra, i akapumaana mai ia matou i te aere anga mai o Tito ra.” (2 Korinetia 7:5, 6) Kua akatupuia to Paulo tu taitaia e te au turanga manamanata tei tupu katoatoa i te taime okotai. E “tamaki anga to vao”—takinga kino anga pakari tei akatumatetenga i te oraanga. (Akaaiteia atu kia 2 Korinetia 1:8) Pera katoa e “mataku oki to roto” i te tu ra o te au manamanata no te au putuputuanga, mei to Korinetia rai.
I nga marama ua i mua atu, kua tata a Paulo i tana reta mua ki te au Kerititiano Korinetia. I roto i reira e manganui tana au turanga kino pakari i akaapa i roto i te putuputuanga e kua manamanata atura aia e akapeea te au Korinetia i te ariu anga mai ki tana reta. Inara, kua akapumaanaia a Paulo i to Tito aere anga mai mei Korinetia ma tetai ripoti meitaki no runga i to ratou tu ariu anga mai. Ma te aiteite rai, penei ka taangaanga a Iehova i tetai o tona au tavini no te apai mai kia tatou i te tuatua meitaki ma te akamaru anga i to tatou manamanata.
Akapeea te Akara Anga i te Au Tuku Anga Angaanga Tei Orongaia Mai e te Atua
Ko tetai au Kerititiano e manga manamanata rai to ratou i ta ratou angaanga orometua. E tikai, kua manako etai au tavini o Iehova e e aka angaanga roa ia ratou no te rave i te au tuku anga angaanga tei orongaia mai e te Atua. Ei akaraanga, kua manako a Mose e kare aia i tau ei komono no te Atua te akono anga i te au Iseraela i Aiphiti. I rotopu i tetai atu au mea, kua karanga aia e kare aia i te tangata kite ei vaa tuatua. (Exodo 3:11; 4:10) Inara na te irinaki anga i te Atua e te rauka anga mai a Aarona ei vaa tuatua nona, kua akamata a Mose i te akatupu i tana tuku anga angaanga.
I muri mai kare a Mose i irinaki akaou ana ki runga ia Aarona. Ma te aiteite rai, i te akamata anga ka kite etai pae e e ngata te angaanga orometua Kerititiano, inara me rauka mai ia ratou te tereni anga kua riro mai ratou ei aronga evangeria karape. Ei akaraanga, e manganui te Au Kite o Iehova tei maata mai ei aronga tutu tamou e ei au painia e te aronga angaanga evangeria. E mea pumaana te kite e ka rauka ua rai Iehova i te irinakiia e tau meitaki ei te au orometua Kerititiano e e akamaroiroiia ratou no te rave i ta ratou tuku anga angaanga tei orongaia mai e te Atua.—Zekaria 4:6; 2 Korinetia 2:14-17; Philipi 4:13.
Pumaana me Tamanamanataia e te Au Mea Tei Kore i Rauka i te Rave i Mua Ana
Penei ka ati ngakau tatou no te mea kare i rauka ia tatou i te rave maata atu i ta te Atua angaanga. Ko tetai taeake tei kore i maroiroi ana no tetai au mataiti, kua akamata akaou aia i te rave i te angaanga tutu aere. I muri poto ua ake, kua rokoia aia e te maki e kua akanoo tamouia aia ki runga i te roi. Kua karanga te taeake ati ngakau e: “I mua atu ana, te taime tikai te maroiroi ra au, kua oro ke au i taku apainga. I teianei, te taime tikai te inangaro nei au kia maroiroi, kare e rauka iaku.”
Kare ainei i te mea pakari no te rave maroiroi tikai i teianei i te akapou atu i te maroiroi manako ngakau ki runga i tei tupu i mua ana? Kare to Iesu nga teina kopapa ko Iakobo raua ko Iuda i riro mai ana ei nga tangata irinaki kia tae roa i muri ake i tona matenga e te tuakaou anga. Naringa raua i manako i te ka rauka ia raua i te rave i mua ana no teia nei, kare te reira i tapu ana ia raua kia riro mai ei au tavini no te Atua e pera katoa ei au tata Puka Tapu.
Auraka Rava e Ngaropoina i te Pure
Me taitaiaia, e tau to te Atua iti tangata kia pure akatenga. Te tika e, te vaira te au pure e manganui tei tuatuaia i te au tuatau manamanata i roto i te Tuatua Tapu. (1 Samuela 1:4-20; Salamo 42:8) Penei ka manako etai pae e: ‘E taitaia tikai au e kare e rauka iaku i te pure.’ Eaa i reira i kore ei e tamanako ia Iona? Iaia i roto i te kopu o te ika ra, kua karanga aia e: “Ka ngaevaevaʼi toku vaerua i roto iaku ra, kua maara iora au ia Iehova, e kua tae taku pure ki roto kia koe, ki roto i to nao tapu ra. . . . Ma te reo akameitaki; taku oki i tia ra, ko taku ïa e apai. Te ia Iehova te ora.” (Iona 2:4-9) Ae, kua pure a Iona, e kua akapumaana te Atua iaia ma te akaora atu iaia.
Noatu e i painia ana tetai tuaine i Tuitene no tetai mataiti roa, kua viviki aia i te kite i te taitaia e te roiroi noatu te meitaki ra tana angaanga tutu aere. Kua taiku aia i tona tu ati ngakau na roto i te pure kia Iehova. I nga mea ra i muri mai, kua rauka iaia tetai kapiki anga tereponi mei ko mai i tetai taeake i te opati manga o te Totaiete Punanga Tiaki. Kua ui mai aia me ka rauka rai iaia i te tauturu no tetai ra i te epetoma i roto i te angaanga akatoro anga i te Betela. Kua karanga teia tuaine i muri mai e: “Na te turanga Betela e te rauka anga te tuatau no te kite i te angaanga akatoro anga e te piri anga atu ki roto i te reira i oronga mai i te maroiroi maata tei anoanoia e au.”
Me taitaiaia tatou, e mea meitaki no te akamaara e ko te pure tetai mataara no te ta atu i te tu taitaia. (Kolosa 4:2) Ei pau i ta tatou au pure, penei ka akatuera a Iehova i tetai ngutupa te arataki atura ki te angaanga maata i tana angaanga tavinianga, me kore ra penei ka akameitaki aia i ta tatou angaanga orometua ma te rave anga angaanga akamaataia. (1 Korinetia 16:8, 9) I roto i tetai ua atu rave anga, “na Iehova te meitaki i apingaʼi te apinga, kare oki e kapiti katoaia mai te kino i te reira.” (Maseli 10:22) E papu e ka taaki teia i to tatou vaerua.
Tamanamanataia Ainei e te Au Ekoko Anga?
I tetai au atianga, penei ka tupu te au ekoko anga i te au tavini o Iehova. Me ka tupu ake te reira kia tatou, auraka tatou e taopenga viviki ua e kua ngere tatou i ta te Atua mareka anga. Kare a Iesu i kopae ana i te apotetoro ko Toma no te ekokoanga i te au ripoti tei kitea no te tuakaou anga o tona Pu. Mari ra, kua tauturu aroa ua a Iesu ia Toma kia ngaro tona au ekoko anga. E mei teaa atura to Toma rekareka i tona kite anga e te ora ra a Iesu!—Ioane 20:24-29.
Na ta ratou apiianga pikikaa, te koumuumu anga, e te vai atura, kua akatupu te “aronga akono kore i te Atua” tei tomo ki roto i te putuputuanga Kerititiano o te tai anere mataiti i etai pae kia ekoko ma te manamanata. No reira, kua tata te pipi a Iuda e: “Ka aroa atu i tetai pae, ei akonoanga ke ïa, E ka akaora oki i tetai pae ma te mataku, i te aō anga ia ratou no roto i te ai.” (Iuda 3, 4, 16, 22, 23) Te tamou anga kia rauka ta te Atua tamanako anga takinga meitaki, ko to Iuda au taeake akamori—te aronga pakari tikai o te putuputuanga—kua anoanoia ratou kia akaari i te tu takinga meitaki ki te aronga ekoko tei tau ra. (Iakobo 2:13) Kua takinoia to ratou oraanga mutu kore, no te mea tei roto ratou i te tumatetenga o “te ai” o te akapou anga mutu kore. (Akaaiteia atu kia Mataio 18:8, 9; 25:31-33, 41-46.) E mei teaa atura te mataora me oronga takinga meitakiia te tauturu ki te au taeake irinaki te ekoko ra e kua riro akaou mai ratou kia maroiroi i te pae vaerua!
Me na te au timata anga pakari e akatupu ia tatou kia ekoko e tei ia tatou nei te Atua, te anoanoia ra tatou kia tuatua ma te akataka tikai i ta tatou au pure. I raro ake i teia au turanga nei, e aruaru ua rai tatou i te pure na te patianga kia Iehova no te pakari. Te oronga ua ra aia ma te kore e akakino mai ia tatou no te ngereanga i te pakari e te pureanga atu no te reira. Kia ‘pati ra ma te akarongo, e te ekoko kore’ no te mea ko tei ekoko ra “e tau ïa i te ngaru tai e puia e te matangi, e tikitiki akera” i te au ngai ravarai. Kare a teia au tu tangata nei mea e rauka mai mei te Atua ra no te mea kare ratou e papu ana i ta ratou ka tuatua, “e te tinamou kore” i te pure e i to ratou au aerenga ravarai. (Iakobo 1:5-8) No reira kia tuku i to tatou akarongo ki roto ia Iehova ko te ka tauturu mai ia tatou i te akara i te au timata anga ma te tau e te tamou marie atu ia ratou. Penei na te au taeake irinaki e akakite mai i te au Tuatua Tapu kia tatou me kore ra i te tuatau o tetai apii Puka Tapu. Penei na te au rave anga tei akatereia na roto i ta te Atua oronga anga e tauturu ia tatou kia kite e eaa ta tatou ka rave. Penei ka o mai te au angera i te akatereanga ia tatou, me kore ra ka aratakiia tatou e te vaerua tapu. (Ebera 1:14) Te mea puapinga ra kia pure tatou no te pakari ma te irinaki pu tikai ki roto i to tatou Atua aroa.—Maseli 3:5, 6.
E Akamaara e ka Oronga a Iehova i te Pumaana Anga
Kua irinaki a Paulo ki runga ia Iehova e kua kite iaia ei Tumu no te pumaana. Kua tata te apotetoro e: “Kia akameitakiia te Atua, te Metua o to tatou Atu ra o Iesu Mesia, te tumu o te aroa, e ko te Atua nona anake te pumaana; Ko tei akapumaana mai ia matou i to matou au mate katoa nei, kia tika ia matou kia akapumaana i te aronga i rokoia e te mate ra, i te pumaana a te Atua i pumaanaʼi matou uaorai nei.”—2 Korinetia 1:3, 4.
Te kite ra te Atua nona anake te pumaana ravarai i te manamanata tei kiteaia e tona au tavini e te inangaro ra i te oronga kia ratou i te akamaru anga. I te turanga o Paulo ra te manako anga i te au Korinetia ra, kua tae mai te akamaru anga na roto i tona taeake Kerititiano ko Tito. Ko teia tetai mataara e raukaʼi ia tatou te akapumaana anga i teia ra. Me manamanataia tatou, e tau i reira tatou kia kopae i te akatakake anga ia tatou uaorai. (Maseli 18:1) Te pirianga ma te au taeake Kerititiano, ko tetai mataara teia i ta te Atua akapumaana anga ia tatou. Penei ka manako tatou e: ‘E ati ngakau tikai au kare au e maroiroi ana no te piri atu ki toku au taeake Kerititiano.’ Inara, e tau tatou kia ta atu i teia au tu manako e auraka e akakore ia tatou uaorai mei te akapumaana anga ta te au taeake irinaki ka oronga mai.
Auraka e Tuku Ua Atu!
Penei kare etai pae ia tatou i kite ana i tetai timata anga tei mamae tatou ma te taitaia anga pakari. Inara penei ko te au maki apikepike, te matenga o tetai tokorua akaipoipo, me kore ra ko tetai turanga kino te ka apai mai i te manamanata manako ngakau. Me ka tupu te reira, auraka tatou e taopenga e e maki tatou i te pae vaerua. Penei te tau meitaki ra tetai tangata taitaia no te angaanga na te Atua, pera katoa te tauturu anga i tetai pae i te pae vaerua. Kua raurau a Paulo i te au taeake “kia tuatua ma te pumaana ki te au meta maromaroa,” te kore anga e manako tarotokaka e kua rave ratou i tetai mea tarevake e kua makiia i te pae vaerua. (1 Tesalonia 5:14, NW) Noatu e te piri atura te tu taitaia ki te tarevake e te manako apa, kare ko te reira te tu i te aronga te tavini ra i te Atua ma te ngakau ma. Noatu e te rave ra ratou i ta ratou akamori anga ma te ngata tikai, te arikiia ra rai te reira e Iehova. Te aroa ra aia ia ratou e te tauturu ra ia ratou e te akapumaana ra ia ratou.—Salamo 121:1-3.
Kua manamanata tikai te aronga akatainuia ra o te Iseraela vaerua i te au timata anga i te mataiti 1918. (Akaaiteia atu kia Galatia 6:16) Kua vaitata ta ratou akaaerenga tutu aereanga i te takoreia, ko etai pae ia ratou kua tapekaia ma te tarevake ua, e e manganui ia ratou tei riro mai ei aronga tiratiratu kore, ei aronga akaruke i te akarongo. Pera katoa, kare te aronga tiratiratu akatainuia i marama ana e no teaa te Atua i tuku uaʼi i teia au mea ravarai kia tupu. No etai taime ‘kua ruru ratou ma te roimata,’ inara kare ratou i tuku ua atu ana. Kua tamou ua atu ratou i te tavini ia Iehova e kua akara matatio katoa ia ratou uaorai. Tei tupu? Kua ‘oki mairai ratou ma te rekareka, te apai anga i ta ratou au ruru.’ (Salamo 126:5, 6) Kua kite te aronga akatainuia i teianei e kua akatika ua te Atua i teia au tu timata anga e raukaʼi i te tama ia ratou no te angaanga kokoti anga i te pa enua te aere maira.
Me ka manamanata ake tatou no te mea kua rokoia tatou e te au timata anga tukeke, ka puapingaia tatou mei ta te au anana iti akatainuia i kite ra. No reira auraka e tuku ua atu, e tamou ra i te rave i tei tau, noatu e me ka rave tatou i te reira ma te aueanga. Kare e roa, te vaira tetai mataara ki vao mei to tatou au timata anga, e ka ‘oki mairai tatou ma te rekareka.’ Ae, ko te rekareka—e ua no te vaerua tapu o te Atua—ka rauka ia tatou te reira no tei tamou marie tatou i te au timata anga. No tatou, te papu ra ka riro a Iehova “e ko te Atua nona anake te pumaana.”