Arataki te Vaerua o Iehova i Tona Au Tangata

“Kia aratakiia au e toou Vaerua meitaki i te enua o te aronga tiratiratu.”​—SALAMO 143:10.

1, 2. Penei eaa te akatupu ra i te apiapi no te au tavini tiratiratu o Iehova ra?

‘TE MAROMAROA nei au! Teiea te ngai e kiteaʼi e au te pumaana? Kua akaruke ainei te Atua iaku?’ Kua tupu ainei tera tu manako kia koe? Me te pera ra koe, kare e ko koe anake. Noatu rai e te noo nei te au tavini tiratiratu o Iehova i roto i te parataito vaerua ruperupe, i etai tuatau ka aro atura ratou i te au manamanata apiapi, au taitaia, e te au timataanga matauia e te tangata nei.​—1 Korinetia 10:13.

² Penei kua o atu koe ki roto i tetai taitaiaanga roa me kare tetai tu maata te apiapi. Penei te maromaroa ra koe no te matenga tetai taau i akaperepere ra e kua tupu te manako e ko koe anake te vai nei. Me kare penei te taitaia ra toou ngakau no tei makiia toou oa akaperepere. Penei te akakore ra te reira au turanga i toou rekareka e te au e penei ka akaoko katoa i toou akarongo. Eaa taau ka tau kia rave?

E Pati ki te Atua no Tona Vaerua

3. Me te akakore ra tetai apinga i toou tu au e te rekareka, eaa te mea pakari kia rave koe?

³ Me te akakore ra tetai apinga i toou tu au, te rekareka, me kare etai atu tu tau i te atua, e mea pakari kia pure no te vaerua tapu o te Atua, me kare tona mana rave angaanga. No teaa ra? No te mea te uua maira te vaerua o Iehova i te au ua meitaki te ka tauturu i te au Kerititiano kia aro atu i te au manamanata, te au tu taitaia, e te au timataanga. I muri ake i tana akamatakiteanga i “te au angaanga a te kopapa,” kua tata te apotetoro ko Paulo: “Kareka ta te vaerua e akatupu, ko te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, te maru, te akono meitaki: kare ua e ture e akakore i te reira.”​—Galatia 5:19-23.

4. Me ka aravei atu i etai tu taitaia me kare timataanga, eaa ka tau ei kia taka meitaki taau pure anga?

⁴ No te tu o te taitaia taau e aro atura, penei ka kite koe e tei roto koe i te tu kino i te ngere i toou tu maru, me kare te kore e riririri ua. Ei reira kia taka meitaki te pureanga ki te Atua ko Iehova ra no te ua o te vaerua ra koia te maru. Me te aro atura koe ki etai timata anga, ko te ua o te akono meitaki taau ka anoano. Pera katoa oki, e mea tau kia pure no te tauturu a te Atua no te akakoreanga i te timataanga, no te akaora anga mei ia Satani, e no te pakari te anoanoia kia akakoromaki atu i te taitaia ra.​—Mataio 6:13; Iakobo 1:5, 6.

5. Me no te kino roa te au turanga apiapi e kare koe e kite ko teea ua o te vaerua taau ka pure, eaa te mea tau naau kia rave i reira?

⁵ Inara i etai tuatau, penei no te maata te au turanga apiapi me kare oripu ua te manako e kare koe e kite ko teea te ua o te vaerua taau e anoano ra. Penei kua kino te rekareka, te au, te maru, e etai ke atu tu katoa i tau i te Atua ra. Ka peea i reira? Eaa ka kore ei e pati ki te Atua i te vaerua tapu uaorai e na te reira e akatupu i te au ua anoanoia ra kia tupu ruperupe i roto i toou oraanga? Penei ko nga ua anoanoia ra ko te inangaro me ko te rekareka me kare ko te au e penei ko te kairo anga o te au ua o te vaerua ra. Pera katoa e pure ki te Atua kia tauturu ia koe kia aru i te arataki anga a tona vaerua, no te mea ko tana ia e akono ra ei taki aere i tona au tangata.

Inangaro ra a Iehova i te Tauturu Mai

6. Akapeea ta Iesu akamaroiroi anga i tana au pipi ma te anoanoia kia pure tamou marie tikai?

⁶ I te kimi anga te au pipi a Iesu Karaiti ra i te apiianga no runga i te pure, i tetai tuanga kua raurau aia ia ratou kia pure no te vaerua o te Atua ra. Kua akamata a Iesu na tetai akatutu anga tei akapapaia ei akakeu ia ratou kia aruaru i te pure. Kua karanga aia: “E oa to tetai i o kotou na, ka aere atu ei aia kiaia i te turuaipo, ka karanga atu ei kiaia ra e, E taku oa, o mai ana e toru manga; Kua tapae mai nei tetai oa oku nei i tona aerenga, e kare aku kia tuku atu i mua i tona aroaro. E kia tuatua mai aia i roto ra, kia na ko mai, Auraka e akapekapeka mai iaku: kua tamouia te pa, tei runga au i te roi e taku au tamariki katoa; kare e tika iaku kia tu ki runga e o atu naau. E akakite atu au kia kotou, Kore ua aia i tu ki runga e oronga atu i te mea e oa aia nona; e tu ra aia i te pati akatenga, ka oronga atu ei i tana i anoano ra.”​—Luka 11:5-8.

7. Eaa te tumu o ta Iesu au tuatua ia Luka 11:11-13 ra, e eaa te akapapu anga ta te reira i oronga mai kia tatou no te Atua e tona vaerua katoa oki?

⁷ Te inangaro ua ra a Iehova i te tauturu i tona au tavini tiratiratu katoatoa tei akatapuia ra, e ka akarongo atu aia i ta ratou au patianga. Inara me ‘ka rave ua atu te reira tangata i te patianga,’ mei ta Iesu i raurau atura, ka akakite te reira e e inangaro ngakau tikai tona e te akaari mai ra i te tu akarongo. (Luka 11:9, 10, NW) Kua tuatua katoa atura a Iesu: “Koai ïa metua i o kotou nei, e apai atu i te toka na tana tamaiti, kia pati mai aia i te manga? e kia pati mai i te ika, e apai atu aina i te ovi nana ei ika? E kia pati aia i te ua moa, e apai atu aina i te sekopio? E te tika na ia kotou, kino ua rai, kia oronga i te mea meitaki no ta kotou tamariki, ka tangaʼi oki i to kotou Metua i te ao ra, i te oronga i te Vaerua Tapu i te aronga e pati atu aia ra!” (Luka 11:11-13) Me ka rave tetai metua i te enua nei, noatu e e tu kino tona no te ara tei akatuangaia maira, ka oronga i te au apinga meitaki na tana tamaiti, e mea tika e ka oronga ua atu to tatou Metua i te rangi ra i tona vaerua tapu ki tetai ua atu o tona au tavini tiratiratu tei pati taakaaka ra i te reira.

8. E akapeea te pirianga o te Salamo 143:10 kia Davida, kia Iesu, e ki te au tavini oki o te Atua i teia tuatau nei?

⁸ E puapingaʼi i te vaerua o te Atua ra ka tau tatou kia inangaro i te aru i tana arataki anga mei ia Davida ra. Kua pure aia: “E apii mai koe iaku kia rave au i to inangaro; ko koe oki taku Atua: kia aratakiia au e toou Vaerua meitaki i te enua o te aronga tiratiratu.” (Salamo 143:10) Ko Davida tei arumakiia ra e te ariki o Iseraela ko Saula, kua anoano aia na te vaerua o te Atua e arataki iaia kia papu ei iaia e e tiratiratu tona aerenga. I muri akera kua aere mai a Abiatara ma tetai tiputa oronga taunga ra tei akonoia kia raukai te kite i to te Atua ra anoano. Ei komono no te kautaunga a te Atua ra, kua apii atura a Abiatara ia Davida i te aerenga tika nona kia marekaʼi a Iehova ra. (1 Samuela 22:17–23:12; 30:6-8) Mei ia Davida rai, kua riro a Iesu na te vaerua o Iehova e arataki, e ko te tika katoa oki ia no te au pipi akatainuia o Karaiti ei pupu katoa ra. I te 1918-19, kua riro to ratou tu mei to tetai aronga akataka keia ra i te totaiete tangata nei, e kua manako to ratou au enemi no te au akonoanga ke ra e ka rauka te akapou atu ia ratou ra. Kua pure taua aronga akatainuia ra no tetai mataara ei akakore i to ratou tu rave kore i te angaanga, e i te 1919, kua pau maira te Atua i ta ratou au pure, kua akaora mai ia ratou, e kua rave akaou ratou i tana angaanga. (Salamo 143:7-9) E tika tikai, kua tauturu e kua arataki to Iehova vaerua i tona au tangata i reira, mei ta te reira e rave nei i teianei.

Akapeea ta te Vaerua Tauturu Anga

9. (a) Akapeea ta te vaerua tapu rave anga ei “tauturu”? (e) Akapeea tatou i kite ei e kare te vaerua tapu i te peretana? (Akara i te tataanga i raro ake.)

⁹ Kua tapaia e Iesu Karaiti te vaerua tapu e “e tauturu.” Ei akaraanga, kua tuatua aia ki tana au pipi: “Ka pati au i te Metua e nana e oronga mai tetai atu tauturu kia noo mai ki o kotou na e tuatau ua atu, ko te vaerua ia o te tuatua mou, kare ra e rauka i to te ao nei, no te mea kare i akara i te reira e kare katoa i kite i te reira. Kua kite ra kotou i te reira, no te mea te vaira ia ia kotou na e tei roto ia kotou.” I roto i etai atu au apinga, ka riro taua “tauturu” ra ei puapii, no te mea kua taputou maira a Karaiti e: “Ka riro taua tauturu ra, koia te vaerua tapu, ta te Metua ka tono mai i toku ingoa, nana e apii ia kotou i te au mea katoa e ka akaoki mai ki to kotou manako i te au mea ravarai taku i tuatua atu kia kotou na.” Ka akakite katoa mai te vaerua ia Karaiti, e kua akapapu atura aia ki tana au pipi: “Ei meitaki no kotou kia aere ke atu au. No te mea me kare au e aere ke atu, kare rava te tauturu e tae mai kia kotou nei; inara me ka aere au i toku aerenga, naku e tono mai iaia kia kotou.”​—Ioane 14:16, 17, 26, NW; Ioane 15:26; 16:7, NW.a

10. Na teea au mataara ta te vaerua tapu akapapu anga e ei tauturu?

¹⁰ Kua riringi maira a Iesu i te vaerua tapu tei totouia maira ki runga i tana au pipi mei te rangi mai, i taua ra o Penetekote i te 33 T.N. (Angaanga 1:4, 5; 2:1-11) E tauturu, kua oronga atura te vaerua kia maata atu to ratou kite i te anoano o te Atua e tona akakoroanga e kua akatuera atu i tana Tuatua totou kia ratou. (1 Korinetia 2:10-16; Kolosa 1:9, 10; Ebera 9:8-10) Kua oronga katoa oki taua tauturu ra i te mana ki te au pipi a Iesu kia riro ei au kite ki to te pa enua ravarai. (Luka 24:49; Angaanga 1:8; Ephesia 3:5, 6) I teia tuatau nei, ka rauka i te vaerua tapu i te tauturu atu i tetai Kerititiano akatapuia kia tupu tona kite me ka rave aia uaorai i te au apinga vaerua te orongaia maira e te Atua na roto i “te tavini akono meitaki e te pakari.” (Mataio 24:45-47) Ka rauka i te vaerua o te Atua i te oronga i te tauturu na te akatupuanga i te maroiroi e te ririnui te anoanoia ra kia akakitekite aere ei tavini no Iehova ra. (Mataio 10:19, 20; Angaanga 4:29-31) Inara, te tauturu katoa ra te vaerua tapu i te au tangata o te Atua ra na roto i etai atu mataara.

“Ma te Ngunguru e Kore e Tika Kia Tuatua Ra”

11. Me te maata roa ra te taitaia, eaa ta te Kerititiano ka tau kia rave?

¹¹ Me ka tupu te taitaia ki tetai Kerititiano na tetai tu kino e akara anga maata roa tona, eaa tana ka rave? E pure i reira no te vaerua tapu, e ka tuku atu nana e rave i tana angaanga! “Te piri katoa maira te vaerua no te tauturu i to tatou apikepike,” ta Paulo i tuatua, “no te manamanata i tei tau ia tatou kia pure ra mei tei anoanoia e tatou ra kare tatou i kite, inara na te vaerua uaorai e pati i ta tatou ma te au ngunguru anga kare e tuatua. Inara ko tei kimi i te au ngakau ra kua e eaa te aiteanga o te vaerua, no te mea te pati ra te reira tei tau i te Atua ra no te aronga tapu.”​—Roma 8:26, 27, NW.

12, 13. (a) Akapeea te akapiri anga ia Roma 8:26, 27 ki te au pure tei orongaia i roto i te au turanga taitaia roa? (e) Eaa ta Paulo ratou ko tona au taeake i rave ia ratou i roto i te roromianga kino i Asia ra?

¹² Taua aronga tapu ta te vaerua o te Atua i pati ra no ratou, ko ta Iesu au pipi akatainuia ra, e manakonako anga to ratou no te rangi. Inara me e kapikianga toou no te rangi me kare e manakonakoanga no te enua nei, ei Kerititiano, ka rauka ia koe te tauturu a te vaerua tapu o te Atua ra. I etai tuatau te oronga tika tika maira a Iehova i te pauanga i tetai pure akataka papuia. I etai tuatau, penei no te maata i toou apiapi, kare e rauka ia koe i te tuatua i toou au manako e penei e ngunguru anake ua taau i tuku kia Iehova kare e tuatua. Ko te tika, penei kare koe i kite eaa te mea meitaki noou e ka pati no te apinga tarevake, e meitaki ra kia pure koe no te vaerua tapu ra. Kua kite te Atua e te inangaro ra koe kia raveia tona anoano, e te kite ra aia eaa tikai taau e anoano ra. Pera katoa, na tona vaerua tapu, kua akono aia kia tataia e manganui te au pure ki roto i tana Tuatua, e te taiku ra i te au turanga taitaia. (2 Timoteo 3:16, 17; 2 Petero 1:21) E no reira, ka rauka ia Iehova i te akara ki runga i etai manako tei tuatuaia ra ki roto i taua au pure akauruia ra ei akakiteanga i taau ka inangaro kia tuatua ei tavini nona ra, e ka rauka iaia i te pau mai i te reira naau.

¹³ Penei kare a Paulo e tona au taeake i kite eaa ta ratou ka pure no te tuatau e tupu ra te tumatetenga i Asia. Kua ‘romia uaia ratou, kare atura e maroiroi, e kare ratou i manako e e ora, e manako mate to ratou.’ Inara kua kimi i te au pure anga a etai ke ra e kua irinaki i te Atua, te ka rauka iaia i te akatu mai i tei mate, e kua akaora aia ia ratou ra. (2 Korinetia 1:8-11) E akapumaana tikai te kite anga e te akarongo ra te Atua ko Iehova e te akono ra i te au pure a tona au tavini tiratiratu!

14. Penei eaa te tu meitaki te ka tupu me ka akatika ua a Iehova i tetai tu taitaia kia tupu marie no tetai tuatau?

¹⁴ E putuputu te akaaerenga o te au tangata o te Atua i te rokoia e te au taitaia. Mei tei akakiteia i mua akenei, kua takinga kinoia ratou i te Tamaki Mua o Teianei Ao. Noatu rai e kare ratou i kite meitaki i to ratou turanga e no reira kare i kite tikai eaa ta ratou ka pure, te vaira i roto i te Tuatua a Iehova te au pure totou tana i pau no ratou ra. (Salamo 69, 102, 126; Isaia, pene 12) Inara ka peea me ka akatika ua a Iehova i tetai taitaia kia tupu ua atu no tetai tuatau? Penei ka riro te reira ei akakite anga, penei ka akakeu i tetai papaki kia takave mai i te tuatua mou, e ka oronga i te tuatau no te au Kerititiano kia akaari i te aroa taeake na te pure anga me kare te tauturu anga i te au taeake akarongo te tamamaeia ra. (Ioane 13:34, 35; 2 Korinetia 1:11) Kia manako e te arataki ra a Iehova i tona au tangata na roto i tona vaerua tapu, te rave ra i tei meitaki no ratou, e te rave tamou ra i te au apinga na te mataara te ka akangateitei e te akatapu i tona ingoa tapu ra.​—Exodo 9:16; Mataio 6:9.

Auraka e Akariri i te Vaerua

15. Eaa ta te au Kerititiano ka irinaki i te vaerua o Iehova kia rave i teaa no ratou?

¹⁵ No reira, me e tavini koe no Iehova, e pure no te vaerua tapu i te tuatau taitaia e i etai tuatau ke atu oki. E kia papu te aru i tana arataki anga, no te mea kua tata a Paulo: “Auraka e akariri atu i te Vaerua Tapu o te Atua, i akairoiaʼi kotou e tae ua atu ki te rā e raukaʼi te ora ra.” (Ephesia 4:30) E akairo te vaerua o te Atua e te vai nei ra, me kare e ‘akairo no te ka tae mai,’ no te au Kerititiano tiratiratu akatainuia ra​—koia oki, te oraanga mate kore i te rangi ra. (2 Korinetia 1:22; Roma 8:15; 1 Korinetia 15:50-57; Apokalupo 2:10) Ka rauka katoa i te au Kerititiano akatainuia e te aronga e manakonako anga to ratou no te enua kia irinaki i te vaerua o Iehova i te rave kia maata no ratou ra. Ka rauka i te reira te arataki ia ratou no roto i te oraanga tiratiratu e kia tauturu ia ratou i te kopae ke i te au angaanga ara te ka taki atu ki te mareka kore no te Atua ra, te ngere i tona vaerua tapu, e te kore e rauka te ora mutu kore ra.​—Galatia 5:19-21.

16, 17. Penei akapeea te Kerititiano i te akariri anga i te vaerua ra?

¹⁶ Akapeea tetai Kerititiano, i te rave kiteanga me kare kite kore, i te akariri anga i te vaerua? Te akono ra a Iehova na tona vaerua e akatupu te taokotai anga e te akataoonga i te au tangata tau i roto i te putuputuanga. E no reira, me ka urutoe tetai mema o te putuputuanga i te aronga pakari akataoongaia ra, e ka akatotoa i te tuatua akakino, e te vai atura, kare aia i aru ana i te arataki anga a te vaerua o te Atua kia au e kia taokotai. Na roto i te reira tu, te akariri ra aia i te vaerua.​—1 Korinetia 1:10; 3:1-4, 16, 17; 1 Tesalonia 5:12, 13; Iuda 16.

¹⁷ I tana tataanga ki to Ephesia, kua akamatakite a Paulo i te au ravenga pikikaa, te riri anga roa, te keia, te tuatua tau kore, te au manako tuke no te akaturi, te tu akono akama, e te au tuatua viivii oki. Me ka tuku tetai Kerititiano iaia uaorai kia aru ua atu i te reira au mea, te patoi ra aia i te ako a te Puka Tapu tei akauruia ra e te vaerua. (Ephesia 4:17-29; 5:1-5) Ae, no tera tuanga te akariri ra aia i te vaerua o te Atua.

18. Eaa te ka rauka kia tupu ki tetai ua atu Kerititiano tei akamata ra i te kopae ke i te ako i te Tuatua a te Atua tei akauruia ra e te vaerua?

¹⁸ Inara, ko tetai ua atu Kerititiano te akamata ra i te kopae ke i te ako a te Tuatua a Iehova tei akauruia ra e te vaerua penei ka akamata i te akatupu i te au manako me kare ravenga te ka taki atu ki te rave ara akakoroia e ka ngere i te akaperepere a te atua ra. Noatu rai e kare aia e rave ana i te ravenga ara i teianei, penei te aere atura aia na te reira aerenga. Ko te Kerititiano te aere ke ra i tetai mataara ke kare i te aratakianga a te vaerua te akariri ra aia i te reira. Ka riro katoa oki e te patoi ra aia e te akariri ra ia Iehova, koia ra te Tumu o te vaerua tapu. Kare rava tei inangaro ra i te Atua e anoano kia rave akapera!

E Pure Tamou Marie no te Vaerua Tapu

19. Eaa ra i anoano maataʼi te au tangata o Iehova i tona vaerua i teia tuatau nei?

¹⁹ Me ko koe tetai e tavini no Iehova, e rave tamou marie i te pure no tona vaerua tapu. Kia maata atu oki i teia “tuatau openga” nei, ma to ratou kino maata e ngata roa no te akono atu, ka anoanoia te tauturu no te au Kerititiano mei ko mai i te vaerua o te Atua ra. (2 Timoteo 3:1-5) Te Tiaporo e tana au temoni, tei uriia maira mei te rangi e tei te tuanga o te enua i teianei, te oripu ua nei ma te riri i te akaaerenga a Iehova ra. E no reira, i teianei e tere atu i to muatangana ra, te anoanoia ra e te au tangata o te Atua tona vaerua tapu ei taki, me kare ei arataki, ia ratou e kia raukai ia ratou i te akakoromaki i te au tu ngata e te takinga kino oki.​—Apokalupo 12:7-12.

20, 21. Eaa ka tau ei kia aru i te arataki anga a te Tuatua a Iehova, e tona vaerua, e tana akaaerenga ra?

²⁰ E akaari tamou marie i te ariki anga no te tauturu ta te Atua ko Iehova e oronga mai nei na roto i tona vaerua tapu ra. E aru i te arataki anga a tana Tuatua tei akauruia ra e te vaerua, koia te Puka Tapu. E taokotai tikai ma te akaaerenga a te Atua i te enua nei te takiia ra e tona vaerua. Auraka rava e tuku ia koe uaorai kia tapae ke na tetai aerenga tau kore i te tuatua tapu ra te ka riro mai ei akariri anga i te vaerua tapu, no te mea penei ka taki atu te reira ki te akakore mai anga i te reira e ka tupu te tumatetenga i te pae vaerua ra.​—Salamo 51:11.

²¹ Na te taki anga anake a te vaerua o Iehova te mataara ei akamareka iaia e raukai te oraanga ponuiaau, e te rekareka oki. Kia maara katoa, e kua tapa a Iesu i te vaerua tapu e e “tauturu,” me kare “Akapumaana.” (Ioane 14:16, tataanga i raro ake) Na te reira, ta te Atua ra akapumaana i te au Kerititiano e te akamaroiroi atu ia ratou kia aro atu i to ratou au tu taitaia katoa. (2 Korinetia 1:3, 4) Te oronga ra te vaerua i te mana ki te au tangata o Iehova kia tutu aere i te tuatua meitaki e te tauturu ra ia ratou kia akamaara akaou i te au tumu no te Tuatua Tapu te anoanoia ra no te oronga anga i te akakiteanga meitaki. (Luka 12:11, 12; Ioane 14:25, 26; Angaanga 1:4-8; 5:32) Na roto i te pure e te aratakianga a te vaerua, ka rauka i te au Kerititiano i te aravei atu i te au timataanga i te akarongo ma te pakari no te rangi maira. I roto i te au turanga o te oraanga katoatoa, i reira, ka rave tamou marie ua atu ratou i te pureanga no te vaerua tapu o te Atua ra. Ko te tupu anga, te arataki ra te vaerua o Iehova i tona au tangata.

[Au Tataanga Rikiriki i Raro]

Eaa Taau Au Pauanga?

◻ Eaa ka pure ei no to Iehova ra vaerua?

◻ Akapeea te vaerua tapu i riro ei ei tauturu?

◻ Eaa te aiteanga o te akariri i te vaerua, e akapeea tatou me kopae ke i te raveanga i te reira?

◻ Eaa i tau ei kia pure tamou marie no te vaerua tapu e kia aru katoa i tana taki anga?

[Tutu i te kapi 15]

Mei tetai metua aroa te oronga ra i te au mea memeitaki ua na tana tamaiti, mei te reira katoa a Iehova i te oronga i te vaerua tapu ki tona au tavini tei pure ra no te reira

[Tutu i te kapi 17]

Te kite ra ainei koe akapeea te vaerua o te Atua i te pati anga a te au Kerititiano manako pure ra?