Koai Ma Tei Anau Akaouia Ra?

KA AERE ainei te au tangata meitaki ki te rangi? Te manako ra te manganui i te reira, inara kare a Iesu Karaiti i akatika ana. Te tuatuaanga ki te tutara ngati Iuda ko Nikodemo, tei aere uuna ua maira kiaia i te po, kua karanga a Iesu e: “Kare rava e tangata i tae ki runga i te rangi.”​—Ioane 3:13.

Inara, kua akakite a Iesu kia Nikodemo e ka tae mai te taime e raukaʼi i etai au tangata te tuatau no te tomo atu ki roto i te Patireia o te rangi. No teia i karanga ei a Iesu: “Kia kore te tangata e anau ki te vai, e te Vaerua, kare aia e o i te basileia o te Atua. Ko ta te kopapa e anau nei, e kopapa ïa; ta te Vaerua e anau ra, e vaerua ïa. Eiaa koe e poitirere ua, ko au i karanga atu kia koe e, Kia anau akaou kotou e tikaʼi.” Inara kua akamanako a Nikodemo e akapeea ra tetai e anau akaouiaʼi.​—Ioane 3:1-9.

Penei ka manako katoa koe e eaa te aite anga o ta Iesu tuatua. Te tuatua ra ainei tana tuatua no runga i te au kite anga taui viviki ta te manganui e manako ra e kua ki ratou i te vaerua tapu o te Atua?

Te Au Manako Ngakau e te Manako

Kua karanga etai pae e e kite ei me kua anau akaouia tetai tangata, ko te mea puapinga ko te kite manakoanga i te ririnui o te vaerua. Inara ka riro to tatou ngakau e te manako ei arataki ke ia tatou, i te mea tikai e kua akakeuia e te manako ngakau ketaketa.​—Ieremia 17:9.

Ko William Sargant, e tangata kimikimi i te au tu o te manako ngakau ki runga i te manako, kua taiku aia i te anoano “kia matakite i te au irinaki anga tei tupu i roto i te au turanga tei akakeuia te manako ngakau penei e te akapikikaa ra to tatou au roro ia tatou.” Kia tau ki ta Sargant, ko tetai akaraanga koia ko te tu o te tutuanga akaara anga e te au tamataku anga o te akautunga anga ai era. Koai te kare e inangaro kia anau akaouia no te aere ki te rangi i te mea e ko tetai anake ravenga atu ko te mamaeanga i te tamamae anga mutu kore? Kua karanga a Sargant e i raro ake i teia tu manako ngakau apiapi, “kua kopae keia te tumu anga, kua akapae keia te komopiuta noa nei o te roro no tetai tuatau poto, e kua ariki uaia te au manako e te au irinaki anga ou ma te kore e uiui anga.”​—The Mind Possessed.

No reira, akapeea tetai e kite ei e me kua ‘ariki uaia ma te kore e uiui anga’ tetai irinaki anga no runga i te anau akaou anga? Te kaveinga o te pakari mou kia aratakiia e te au mea ravarai ta te vaerua tapu o te Atua i akatupu i te au tata Puka Tapu kia papa. Te akamaroiroiia ra te au Kerititiano kia akamori i te Atua ‘ma to ratou mana o te tumu anga’ e te anoanoia ra ratou kia akapapu e ko ta ratou e irinaki ra e tika te reira.​—Roma 12:1, 2, NW; 1 Tesalonia 5:21.

Te anau akaou anga te akatuera ra te reira i tetai akameitaki anga puapinga maata rava atu tei orongaia ki te au tangata. Te piri atura te reira ki tetai tupu anga umere tikai i roto i te rave anga i te akakoro anga a te Atua. Koi tika ei teia au mea ravarai, te tupu maira te au uianga, mei teia: Koai ma tei anau akaouia ra? Akapeea teia e tupu ei? Eaa te au manakonakoanga te vaira i mua no teia au tangata nei? E ko ratou anake ainei te ka ora?

[Tutu i te kapi 3]

Kua manako a Nikodemo e akapeea ra tetai i te anau akaouia anga