Akapeea ra Koe e Puapingaiaʼi Mei te Evangeria?
E MANAKO teiteiia ana te Puka Tapu no tona tata anga puapinga—e etai aronga irinaki kore i te Atua katoa. Ko te tika ra, e meangiti ua te tatau ra i te reira no te taangaanga i ta te reira e akakite ra. Pera katoa, i te mea e ko te tuatua meitaki o roto i te reira kua vaitata i te rua tauatini mataiti te taito, e manganui te au tangata te irinaki ra e tau te reira kia akaouia, kia uriia ki te reo o teia tuatau. Kua taito me kore kua puapinga kore ainei te Evangeria? Kare rava ia.
E mirioni ua atu te au tane e te au vaine, te mapu e te pakari, taeria te mirioni, tei kite e e ravenga puapinga maata tikai te Puka Tapu no te tauturu. Mei tei tatauia i roto i te tuatua akamata anga o te Today’s English Version: “Kare te Puka Tapu i te puka maata ei akara ua e ei akateitei ua; e Tuatua Meitaki ra te reira no te au tangata ravarai i te au ngai katoatoa—e tuatua akakite tei tau kia maramaia e kia taangaangaia ki roto i te oraanga tataki tai.”
Eaa ra te aiteanga o te Evangeria kia koe? Te taangaanga ra ainei koe i te reira ei arataki i toou oraanga i te au ra tataki tai? E akamanako ana e akapeea etai pae tei akarongo i te tuatua meitaki i te anere mataiti mua i te puapinga angaia e e akapeea etai pae i te puapinga angaia i to tatou tuatau nei.
Au Tangata tei Tauturuia e te Evangeria
I to Iesu tuatau te au tangata tataki tai mei te aronga ravakai maroiroi e te au metua vaine kua reka i te tuatua meitaki e kua apii i te tuatua mou no to te Atua akakoroanga no te tangata. Kua taui tikai te tuatua meitaki i to ratou oraanga e e putuputu te taime kua apai mai kia ratou i te tauturu maata. Ei akaraanga, kua rapakauia a Maria Magadala mei raro ake i te mana o te au temoni. Kua akaruke a Zakaio, e rangatira koi tero i mua ana, i tona oraanga noinoi. (Luka 8:2; 19:1-10) Te matapo e te au repera kua tauturuia i to ratou aere anga mai kia Iesu, ko tei tutu aere ra i te tuatua meitaki. (Luka 17:11-19; Ioane 9:1-7) Kua rauka tikai ia Iesu i te tuatua e: “Kua kite akaou te matapo, e kua aaere ua te au pirikoki, kua tamaia te au repera e kua akarongo te aronga taringa turi, e kua akatuia te mate e ki te putaua, te akakiteia atura te tuatua meitaki kia ratou.”—Mataio 11:5, NW.
Inara, ko tei puapinga maata atu i to ratou akaoraanga, te tu o te taui anga a te tuatua meitaki i te reira au tangata tataki tai ei au peretana. Kua ki te aronga ngakau tiratiratu i te manakonakoanga no te tuatau ki mua. Kua tuku ratou i to ratou irinaki ki roto i to te Atua Patireia—e apinga meitaki atu i tetai evangeria pirianga tangata ua nei. (Mataio 4:23) Kare to ratou manakonakoanga i tamanamanataia e to Iesu mate. Te akamaramaanga i te au mea i muri ake i te reira tupu anga, te karanga ra a Angaanga 5:42 (NW) no tana au pipi e: “I te au ra ravarai i roto i te iero e mei tera are ki tera are kua rave tamou ratou ma te kore e akamutu i te apiianga e te akakitekiteanga i te tuatua meitaki no runga i te Karaiti, ko Iesu.” I te anere mataiti mua, kua rauka i te au tangata i te au enua e manganui te tauturu i te pae vaerua no te mea kua ariki ratou i te reira tutu aereanga.
Ko te Patireia te nuti meitaki rava atu i te reira tuatau. Te vaira ainei te tuatua akakite o te Patireia ei tuatua meitaki?
Eaa ra te Aiteanga o te Tuatua Meitaki i Teia Tuatau?
Me te anoano ra koe i tetai ao au e te tinamou, e mea papu i reira, te nuti o te Patireia e mea meitaki. Ko te tika, i roto i te ao tei ki i te anere i te mirioni au tangata tei ngere i te kai akamatutu e te mate pongi ra, ma te au maki matakuia i te akamatakuanga i te au tangata ravarai, ma te tupu anga maata o te kino, e ma te totoaanga i te ravenga poritiki kare e marikonga, ko te reira anake te tuatua meitaki tika kare rava e ope. Te akatutu maira te reira i te manakonako anga anake no te taui anga meitaki ma te tika.
No reira a Iesu i totou ei no to tatou tuatau: “Kia tutu aereia teia tuatua meitaki o te patireia ki te au enua tei tangataia ei kite ki te au pa enua ravarai; i reira e tae mai ei te openga.” (Mataio 24:14, NW) Kua akatupuia teia au tuatua na roto i tetai tu umere tikai i te Au Kite o Iehova e tutu aere ra i te tuatua meitaki tere atu i te 200 au enua. Kua akameitaki tetai puka Katorika, te Nova Evangelização 2000, i te Au Kite no teia, te karangaanga: “Te kite ra tatou i te Au Kite o Iehova kiea? Ki te au ngutupa o te au ngutuare. E kia riro ei Kite no Iehova, i te pae atu i te riroanga no Iehova, e tau tetai kia riro ei kite. No reira, te kite ra tatou ia ratou te angaanga ra, te akakitekite ra, te oronga ra, i tei tupu ia ratou.”
Inara, kare tetai e puapinga otomatiki uaia mei te tuatua meitaki. Ka tauturu ua te reira i te aronga tei akarongo e tei akono. E raukaʼi te akaari i teia manako, kua oronga a Iesu i te parapore no runga i tetai tangata te aere ra ki vao i te ruru ua. Te au tu one tuketuke tei topa te ua ki runga te akatutu maira i te au turanga ngakau tuketuke e akaariia ra e te aronga tei akarongo i te tuatua meitaki. Kua karanga a Iesu e: “Kia akarongo tetai i te tuatua o te basileia nei, e kare i kite, te aere maira taua vaerua kino ra, e rave atu i tei ruruia ki roto i tona ngakau . . . Kareka tei topa ki roto i te ngai one meitaki ra; koia te tangata e akarongo, e kite akera, e ua maira tana, taki tai anere, taki ono ngauru, e taki toru ngauru i te ua okotai.”—Mataio 13:18-23.
Mei te tuatau o te anere mataiti mua, te maata anga o te tangata i teia tuatau te tauta meangiti ua ra kia marama i te tuatua meitaki. Kare i rauka ia ratou te marama i te reira, e no reira kare i rauka te puapinga. Tetai pae kua ariki i te tuatua meitaki e kua apii e akapeea i te apai anga mai i to ratou au oraanga kia rotai atu ki to te Atua anoano. Na teia mataara kua akameitakiia ratou. Te o atura koe ki teea pupu?
Te Mana o te Evangeria i Teia Tuatau
Te akakite maira te au tupuanga e ko te maramaanga i te tuatua meitaki te tauturu ra i te aronga “manako anga kore, e te Atua kore.” (Ephesia 2:12; 4:22-24) Kua anoano a Roberto no Rio de Janeiro mai i te tauturu. Mei tona mapu anga, kua arataki aia i te oraanga kanga maata, tei kapitiia atu i te au apinga akakona, te akaturi, e te keikeia. I muri mai kua apainaia atu aia ki roto i te are auri. Iaia i reira kua apii a Roberto i te Puka Tapu ma tetai Kite tei atoro mai. Kua tere meitaki tikai aia ki mua i te pae vaerua, e kua akameangiti maataia tona tuatau nooanga ki roto i te are auri.
I muri ake i te tukuna angaia, kua aravei a Roberto i tetai tamaine mapu tana i keia ana e i akamataku atu i te pupui. Te apii katoa ra aia i te Puka Tapu ma te Au Kite o Iehova. Eaa tei tupu? Te ka aru mai e tuanga no tetai reta, te akakiteanga i tei tupu: “Kua aravei raua tetai i tetai ki roto i te Are Uipaanga Patireia no te taime mua i muri ake i te ta anga. Kua tukia tikai te ngakau e teia aravei anga. Kua aue raua e kua takave ei tungane e te tuaine. I teianei te akapaapaa ra tei keia ana e tana i keia ia Iehova.”
Ko Isabel katoa tetai, tei anoano i te tauturu, no te mea kua kiteaia aia no tona manava kino. Kua o oonu tikai aia ki roto i te angaanga vaerua e te angaanga purepure e kua tamamaeia e te au temoni. I tona apii anga i te Puka Tapu ma te Au Kite o Iehova, kua kite aia i te tauturu a te tuatua meitaki. I etai taime i muri mai, kua akaruke aia i te akatere anga a te au temoni e kua taui i tona tu—te openga iora kua kite i te akatere i tona manava kino. I teianei e Kerititiano akono meitaki aia, kua kiteaia ei tamaine takinga meitaki i tana raveanga ia etai ke.
Ae, kare te tuatua meitaki i te mea tamanako uaia. E mana tikai to te reira i te akatuke i te au oraanga. (1 Korinetia 6:9-11) E maata tikai te ka rauka i te reira i te rave. Te tou katoa ra te reira ki te au akameitakianga i te tuatau ki mua.
Au Akameitakianga te Vai ra ki Mua
Kia tau i ta te Atua ra Tuatua, te vai maira ki mua te au manakonako anga umere. Ka kite tatou i te tupuanga o ta Iesu pure no te Patireia o te Atua kia tae mai e kia tupu Tona anoano ki te enua nei mei to te rangi katoa ra. (Mataio 6:10) Kare e roa atu ana ka akaateaia te akatere anga o te au mea nei ma tana au kino taitaia e te ta ua, e ka tutara to te Atua kavamani i te rangi, tona Patireia ki rungao i te au tangata ngakau tika tei puareinga i te akarongo atu e i te akono i te tuatua meitaki.—Daniela 2:44.
Ka aru mai te au akameitaki anga tikai i te au tangata akono meitaki e aratakiia ra kia taui i te enua kia riro ei parataito te ngai ka noo te aronga ngakau maru e tuatau ua atu. (Salamo 37:11, 29) Papu e, e tuatua meitaki e ka ngaro takiri atu te kino, te maki, te onge, te taero anga, e te au tamaki! Te kite ra ainei koe ia koe e toou ngutuare tangata i te nooanga ki roto i te reira ao ou ma te au e te oraanga matutu kare e mataku no te maki me kore te mate?—Apokalupo 21:4.
E tika, e manganui te tamanako ra i te reira tuatua meitaki e e mea mama roa me kore e mea manako uaia. Inara kua tarevake ratou. Kua akatumuia te tuatua meitaki ki runga i te au tika ketaketa tikai, e kua taui te reira i te au mirioni au oraanga. No reira, auraka rava e taitaia me kare etai pae e irinaki.
E akamanako i tetai tangata akono meitaki tei oko enua mei tetai ngai tutupu, te manakonakoanga kia puapingaia mei tana iniveti (invest) anga. Ka akakino ainei tetai ua atu tangata iaia no tei iniveti aia i tana moni na teia mataara? Kare. Te akara anga, ka karanga te au tangata e te rave ra aia i te reira na te tu pakari tikai. Eaa i reira i koreʼi e akara atu ki mua no runga i te Patireia, e iniveti ki roto i te tuatua meitaki? I te mea, ka rauka te ora na te arikianga i te tuatua meitaki, kare e iniveti anga ke atu te ka apai mai i te tutaki maata.—Roma 1:16.
Akapeea koe i te iniveti anga ki roto i te tuatua meitaki? Te mea mua, e puareinga ua kia apiiia e te Atua. I reira e angaanga kia rotai atu ki taau i apii. E aru i te au mea ngoie ua tei umuumuia, mei tei akapapaia e te peroveta Epera i taito ra: “Eaa i reira ta Iehova i inangaro mei ia koe na mari ra kia taangaanga i te tika e kia inangaro i te takinga meitaki e kia mako i te aaereanga ma te Atua?” (Mika 6:8, NW) Te apiianga i te aaere ma te Atua te anoanoia ra te taime e te maroiroi. Inara, ka rekareka te Au Kite o Iehova, tei tauturu ia Roberto e Isabel, i te tauturu ia koe no teia—mei ta ratou i tauturu i etai au mirioni tangata i te au mataiti i topa.
I te tapapaanga atu i te tupuanga o ta te Atua au koreromotu, e utuutu i taau iniveti anga na te aruanga kia tau toou oraanga i te tuatua meitaki, te mataoraanga i te au o te manako e te akatupuanga i tetai pirianga vaitata ma te Atua. Ka paruruia taau iniveti anga—kare te taitaia i te pae o te moni me kare te tamanamanata anga poritiki e tamataku atu i te reira. E te openga iora, ka apai mai te reira i te tutaki umere. Eaa ra te reira tutaki? Kua tata te apotetoro ko Ioane e: “Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.”—1 Ioane 2:17.
[Tutu i te kapi 7]
Kua pururu te au ua o te tuatua meitaki ki runga i te au one tuketuke
[Akameitakianga]
Garo Nalbandian