“Kia Akameitakiia te Akaipoipo i te Tangata Ravarai”

“Kia akameitakiia te akaipoipo i te tangata ravarai, e te viivii kore oki te roi.”​—EBERA 13:4.

1. Eaa ta te aronga e manganui i kite no runga i te akaipoipo puapingaia ra?

E AU mironi ua atu au tangata, i teia tuatau ngoie ua nei te kopae anga, te rekareka nei i te akaipoipo tamouia ra. Kua kitea e ratou tetai mataara no te akapuapinga, noatu te au tuke anga tangata e te au tu akono. Te kitea nei te reira au tu akaipoipo i roto i te Au Kite o Iehova ra. I te maata anga io ratou te akatika ra te au tokorua e i tupu ana kia ratou te au tuatau meitaki e te kino oki, e pera katoa etai au tumu no te akaapa anga tetai i tetai. Inara, kua kite ratou e akapeea te akatere anga i to ratou pai akaipoipo na roto i te au uriia kare ra i pakari roa. Eaa ra etai tumu i raukai ia ratou kia vai marie ua te aerenga?​—Kolosa 3:13.

2. (a) Eaa etai au tumu papu no te akatinamou i te akaipoipo anga ra? (e) Eaa etai au tumu te ka akakino i te akaipoipo anga? (Akara i te pia i te kapi 14.)

² Ko etai au tuatua akakite anga na tetai papaki tei mataora ra e tei tamou marie ra to ratou akaipoipo Kerititiano e meitaki tikai no te akara. Kua karanga tetai tane e 16 mataiti tona akaipoipo angaia: “I te au taime katoa e tupu mai ei tetai pekapeka, kua tauta tikai maua kia akarongo atu tetai i te tumu manako o tetai ra.” Te akakite maata mai nei teia i tetai o te au tumu akaketaketa anga i te au akaipoipo anga e manganui​—koia te tuatua akapiri anga manako tikai i te atea ra. Kua karanga tetai vaine, e 31 mataiti te akaipoipo anga: “Ko te mou rima e te raveanga i te au apinga kangakanga e tamou i to maua inangaro i rotopu ia maua kua riro te reira ei tuanga mua.” E ko te reira tetai atu tu no te akapiri anga manako. Kua akaketaketa mai tetai atu nga tokorua, e vaitata i te 40 mataiti to raua akaipoipo anga, i te puapinga maata o te akono tamou anga i te tu tuatua mataora, te rauka anga te kata ia raua uaorai e tetai i tetai oki. Kua karanga katoa raua e na te reira i tauturu kia kite raua i te meitaki e te kino i tetai e tetai inara te akaari anga i te aroa apa kore. Kua taiku katoa oki te tane e kia mareka i te akatika anga i te au tarevake e kia tataraara i muri akera. Me e vaerua tetai te ka akatika ua, ka rauka te akamingi i te akaipoipo anga kia tau auraka ra kia motu.​—Philipi 2:1-4; 4:5, Kingdom Interlinear.

E Tauianga Reva

3, 4. Eaa te au taui anga manako tei tupu maira no runga i te tu tiratiratu i te akaipoipo anga? Ka rauka ainei ia koe i te oronga mai etai akatauanga?

³ I nga raungauru mataiti tokoiti ua i topa akenei, takapini i teianei ao, kua taui te au manako no runga i te tu tiratiratu i te akaipoipo. Te irinaki ra tetai papaki o te aronga akaipoipoia e kare i te tarevake kia inangaro atu i tetai ke ra, e takiota tuatua no te akaturi i teia tuatau nei kare e kino, e maata atu oki me te kite ra tona tokorua e te ariki katoa ra i te reira ravenga.

⁴ Kua tuatua tetai akaaere Kerititiano i te turanga e: “Kua akaruke takiri to teianei ao i tetai ua atu tauta anga kia akono i tetai ravenga tika. Kua manakoia te tu akono viivii kore e e peu taito ia.” Kua aati atea ua te aronga rave poritiki, tarekareka, e te tamataora i te au turanga a te Puka Tapu no te tu akono meitaki, e kua akonoia te reira tu tangata ei aronga rongonui. Kare e akairo tei akapiriia atu ki tetai ua atu tu raveanga tarevake me kare akamerengo anga i te inangaro ainga. Vaitata e kare e manakoia ana te tu ma e te tiratiratu i roto i te pupu tangata apinganui ra. E na runga i te kaveinga e ‘ko tetai meitaki no te ua mokora e meitaki katoa oki no te toa mokora,’ kua aru te au pupu katoa i te reira akaraanga e kua rave i ta te Atua e akaapa ra. Kua riro ia mei ta Paulo i tuatua ra: “E no te kite kore i te akama, kua oronga ia ratou uaorai i te peu kanga ra, ei rave i te au mea viivii katoa ra, ma te anoano maata.”​—Ephesia 4:19; Maseli 17:15; Roma 1:24-28; 1 Korinetia 5:11.

5. (a) Eaa ta te Atua ra turanga no te akaturi? (e) Eaa te kapitiia ra ki roto i ta te Puka Tapu taiku anga i te tuatua “poneia”?

⁵ Kare ta te Atua ra au turanga i tauiia. Ko tana turanga e ko te noo kapiti anga ei tane e te vaine kare i akaipoipoia e nooanga akaturi ia. Ko te tiratiratu kore i te akaipoipo e akaturi katoa ia.a Kua tuatua taka meitaki te apotetoro ko Paulo e: “Kare ainei kotou i kite e, kare te aronga tuatua-tika kore e noo i te basileia o te Atua? Auraka e vavare: kare te kanga, e te akamori idolo, e te akaturi, e te akavaine, e te aronga sodoma, E te keia, e te noinoi apinga, e te konā kava, e te akakino, e te āru, kare anake ia e noo i te basileia o te Atua. Mei te reira oki tetai papaki o kotou na: kua oreiia ra kotou, kua akatapuia ra kotou, kua akatikaia ra kotou, i te ingoa o te Atu ra o Iesu, e te Vaerua o to tatou Atua.”​—1 Korinetia 6:9-11.

6. Eaa te akamaroiroi anga te kiteia ra e tatou i ta Paulo au tuatua ia 1 Korinetia 6:9-11?

⁶ Ko tetai tumu akamaroiroianga i taua irava ra ko ta Paulo tuatua e, “Mei te reira oki tetai papaki o kotou na. kua oreiia ra kotou.” Ae, e manganui i muatangana ra tei oro na roto i te “peu kanga maata ra” o teianei ao kua rako tangata maira ratou, kua ariki ia Karaiti e tona atinga, e kua oreiia kia ma. Kua iki ratou kia akamareka i te Atua ra na te akonoanga i te au oraanga meitaki e kua mataora atu oki i te reira tupu anga.​—1 Petero 4:3, 4.

7. Eaa te tuke anga te vaira i te maramaanga i te “tu akono kore,” kore e eaa to te Puka Tapu manako?

⁷ I tetai pae, ko te akataka anga a to te ao nei i teia tuatau no te tu akono kore kua tavaiia kia kore e tau atu ki to te Atua ra manako. Te akatakaia maira e tetai tikitinari te “akono kore” ei mea “tuke roa ki te akono anga tika tei akanooia ra.” Ko te “akono anga tika” o teia tuatau nei, tei akatika ua ra i te ainga i mua ake i te akaipoipo anga e te ainga ma etai atu kare ra i tona tokorua pera katoa oki te rave totoma, ko ta te Puka Tapu ia e akaapa ra e ei tu akono kore ia. Ae, mei te manako mai no te Puka Tapu ra, e kino rava te tu akono kore e aati anga i ta te Atua ra ture no te tu akono.​—Exodo 20:14, 17; 1 Korinetia 6:18.

Akakino Anga i te Putuputuanga Kerititiano

8. Akapeea te tu akono kore i te pa anga i te aronga i roto i te putuputuanga Kerititiano ra?

⁸ No te tupu anga maata te akaturi i teia tuatau nei kua akatupu te reira i te taomi anga i to te aronga o roto i te putuputuanga Kerititiano. Ka mana te reira ki runga ia ratou na roto i te totoa anga, te au porokarama tivi tau kore ra, te au vitio, e te au puka viivii no te tatau anga. Noatu rai e e tuanga meangiti ua o te au Kerititiano te akakinoia ra, e mea tau kia akamanakoia e ko te maata anga o te aronga akaateaia ki vao i te au pupu o te Au Kite o Iehova ra no te tu akono tau kore ei Kerititiano kare ra i tataraara kua piri atu ki tetai tu ainga akono kore ra. I te pae meitaki ra, e tuanga maata o taua aronga akaateaia ra ki vao kua kite i to ratou tarevake, e kua tamata i te tama i to ratou oraanga, e i muri akera kua akaokiia mai ki roto i te putuputuanga.​—Akaaiteia atu kia Luka 15:11-32.

9. Akapeea ta Satani akono anga i te aronga matakite kore ra?

⁹ Kare e ekoko anga e te aaere nei a Satani mei te riona ngunguru ra, e kua papa no te apuku i te aronga kare e matakite. Ko tana au ravenga me kare “au angaanga kikite,” te ereere ra i te au Kerititiano matakite kore i te au mataiti ravarai. Te vaerua o tona ao te vai nei e noinoi, e akanavenave, e te akatupu inangaro. Te akapaapaa ra i te anoano i te kopapa. Te akakore ra i te akono meitaki.​—Ephesia 2:1, 2; 6:11, 12, tataanga i raro ake; 1 Petero 5:8.

10. Koai ma te riro ua ra i te timata anga, e no teaa ra?

¹⁰ Koai ma i roto i te putuputuanga ra te ka rauka kia maeuia atu ki te au timata anga no te tu akono kore ra? Ko te maata anga o te au Kerititiano ra, te aronga pakari i te putuputuanga ra, te au akaaere tutaka aere, te aronga o Betela, te au painia e manganui ra te au ora tutu aere i te au marama tataki tai, te au metua te maata ra te angaanga i te akono i te anau, me kare te aronga ou te aro atura i te taomi anga a to ratou au oa. E mea matauia na te katoatoa te timata anga kopapa nei. Ka rauka i te akaraanga akainangaro i te akakeu i te reira i te tuatau manako koreia ra. E no reira a Paulo i tataʼi: “Ko te manako ra e te tu ra aia, kia matakite aia ko te inga aea. Kare kotou i rokoia e te timataanga, mari ra mei ta te tangata nei rai [e te vaine oki].” E mea tangi rai, inara ko tetai papaki Kerititiano e taoonga apainga to ratou kua tuku ua ki teia maunu no te tu akono kore.​—1 Korinetia 10:12, 13.

Akatatipakeia e kua Akavareia

11-13. Eaa etai au turanga tei taki atura ki te tu akono kore?

¹¹ Eaa te au timata anga e te au turanga tei taki atura i tetai papaki ki te ravenga neneva o te akaturi e te poneia. E manganui e te tuke tuke e penei katoa e e tuke i tetai enua e tana peu mei tetai ke atura. Inara, te vaira etai turanga tumu tikai te mama maira i te au enua e manganui. Ei akaraanga, te ripotiia maira e ko tetai papaki kua akanoonoo i te au pati te vai ua ra te kava e maata no te inu. Ko etai kua inangaro i te au akatangi anga imene no teianei ao e te uraanga akakeu i te inangaro ra. I etai ngai i Aperika, e au tangata apinganui etai​—kare i te aronga akarongo—​e au vaine tavini ta ratou; ko tetai papaki o te au vaine kua timataia kia kimi i te puapinga tinamou i roto i te reira turanga noatu rai e te rave ra i te tu akono kore. I etai atu au ngai kua akaruke atu te au tane i to ratou ngutuare tangata kia aere i te rave angaanga kia rauka mai te moni no te oraanga, i te au maina (mines) me kare i etai atu ngai ke ra. I reira kua timataia to ratou tiratiratu e te akarongo na tetai turanga me kare etai mataara kare ra e tupu me i noo ratou ki te kainga.

¹² I te au enua te puapingaia maira kua topa tetai papaki ki roto i te ereere a Satani na te vai putuputu anga ma tetai tane me kare vaine e kare tetai ei tokotoru i reira​—mei te noo kapiti anga putuputu i roto i te motoka no te apiianga i te akaoro ko raua anake ua.b Ka tau katoa oki te aronga pakari kia matakite e auraka e aere e ako atu i tetai tuaine ko raua anake ua ra. Ka rauka ua te au tuatua anga kia riro ei akatupuanga i te manako ngakau e tupu maira ei turanga akama no raua ra.​—Akaaiteia atu kia Mareko 6:7; Angaanga 15:40.

¹³ Ko te au turanga tei taikuia i mua akenei kua taki atu i etai au Kerititiano kia kore e matakite e kia rave i te au angaanga akono kore ra. Mei tei tupu katoa ra i te anere mataiti mua ra, kua tuku ua ratou ia ratou uaorai ‘kia akatatipakeia e kia riro ua atu i te timataanga a to ratou uaorai anoano kopapa ra,’ tei taki atura ki te ara.​—Iakobo 1:14, 15; 1 Korinetia 5:1; Galatia 5:19-21.

14. Eaa ra te tu noinoi i riro ei, ei tumu tikai no te au akaturi?

¹⁴ Na te akamanako anga matakite i te au akaateaanga ki vao i te putuputuanga te akaari maira e au tumu matauia etai i raveiaʼi te tu akono kore. I etai au tupuanga e tu noinoi tetai. Eaa ra tatou i tuatua akaperaʼi? No te mea i te au akaturi anga, ko tetai tangata me kare ko etai tangata te ka mamae. Penei ko tona tokorua tikai. E mea papu e ko te tamariki katoa, me e tamariki tana, no te mea me ka tupu te kopae anga no te akaturi, ka riro ko te tamariki tei anoano ra i te tinamou no te ngutuare tangata taokotaiia penei ko ratou te ka mamae maata roa. Te manako ua ra tei akaturi ra i tona uaorai marekaanga e tona puapinga anga. E tu noinoi ia.​—Philipi 2:1-4.

15. Penei eaa etai au tumu tei taki atu i etai kia akaturi?

¹⁵ Te mea matauia e kare te akaturi e angaanga tupu poitirere ua mai. I tupu marie mai, kare i kitea, e topa anga i roto i te akaipoipo anga. Penei ko te pirianga manako kua riro ei mea rave manako kore uaia, me kare e ua kore ia. Penei e meangiti ua te akamaroiroi anga o tetai i tetai. Penei kare raua i akakite i te ariki anga o tetai i tetai. Penei kare nga tokorua e akamerengo ana tetai i tetai no te pae i te ainga no tetai tuatau. E mea papu oki me tupu te akaturi, kua meangiti ua te pirianga ma te Atua ra. Kare a Iehova i manako taka meitakiia ei Atua ora tei kite ra i to tatou au manako katoa e ta tatou au angaanga oki. E penei katoa oki e i roto i te manako o tei akaturi ra, kua riro te “Atua” ei tuatua ua, kare ona tuanga i roto i te oraanga i te au ra tataki tai. Kua riro i reira kia ngoie ua i te rave i te ara ki te Atua.​—Salamo 51:3, 4; 1 Korinetia 7:3-5; Ebera 4:13; 11:27.

Te Taviri no te Patoi Anga

16. Akapeea e raukai i te Kerititiano te patoi atu i te timata anga kia tiratiratu kore aia?

¹⁶ Me kite te Kerititiano iaia uaorai e te timataia ra ki roto i te arataa no te tiratiratu kore, eaa te au tumu tau kia tamanakoia? Te mea mua, ka tau kia tuku i te manako ki runga i te aiteanga o te aroa Kerititiano, tei akatumu ketaketaia ki runga i te au kaveinga o te Puka Tapu. Auraka roa e tuku na te inangaro kopapa me kare inangaro tane e te vaine e akatere i te au manako ngakau kia akakeu i te topa anga ki roto i te tu noinoi, te ka apai mai i te mamae ki etai ke ra. Kareka ra, e mea tau kia akonoia te turanga mei to Iehova ra manako. Ka tau te reira kia akamanakoia na roto i te tuanga maata no te putuputuanga e te tu akangateitei kore te ka apaiia mai ki te reira no te tu akono kino e pera katoa oki ki runga i te ingoa o Iehova ra. (Salamo 101:3) Penei ka kopae keia te kino na te akonoanga i te manako o Karaiti no runga i te tumu e ka rave ei kia tau ki te reira. Kia maara, kare te aroa noinoi kore mei to Karaiti ra e topa.​—Maseli 6:32, 33; Mataio 22:37-40; 1 Korinetia 13:5, 8.

17. Eaa te au akaraanga akamaroiroi mai i te tu tiratiratu tei ia tatou nei?

¹⁷ Ko tetai taviri no te patoi anga ko te akaketaketa i te akarongo e te akara anga i te manakonakoanga ki mua. Ko te aite anga o teia kia tamouia ki roto rava i te ngakau te au akatauanga meitaki no te tiratiratu ta te au tane e te au vaine pikikaa kore o muatangana, e pera katoa ta Iesu uaorai, i oronga mai. Kua tataia e Paulo: “No te mea e urupu maata o te au kite te takapini ra ia tatou, kua akaruke katoa tatou i te au teiaa ravarai e te ara tei akapuereere ra ia tatou, e oro tatou ma te tamou marie i te taemoemo anga tei tukuia maira ki mua ia tatou nei, ia tatou e akara tikai ra ki te Rima Rave Maata e te Akaoti i to tatou akarongo, ko Iesu. No te rekareka tei tukuia ki mua iaia ra kua akakoromaki aia i te rakau tamamae anga, te akakoreanga i te akama, e kua noo ki raro i te tua katau o te terono o te Atua. Ae, akamanako matariki oki iaia ko tei tamou marie i te au tuatua akakino a te aronga rave ara i akakore ra i te meitaki no ratou uaorai, kia kore kotou e akaroiroi e ka akaparuparu ei i to kotou meta.” (Ebera 12:1-3, NW) Kare te tangata pakari e tuku ua atu i te pai o te akaipoipo kia tomo, ka kimi ra aia i etai ravenga ei akaora i te au ngai kino ra kia raukai i te akameitaki mai i te reira akaipoipo, e na reira te kopae keanga i te vaarua topa anga no te ngakau pikikaa e te akavare anga.​—Iobu 24:15.

18. (a) Eaa ra te ngakau pikikaa i kore ei i te tuatua ketaketa roa no te akataka anga i te akaturi? (e) Eaa to te Atua ra manako no te akono anga i te au tia ra?

¹⁸ E ketaketa roa ainei te tuatua ngakau pikikaa no te tu akono kore? Ko te tamata anga kia akakore atu i te irinaki anga me kare tetai pirianga manako ra. E mea tika tikai e ko te tia no te akaipoipo anga te kapiti ra ia i te irinaki anga e te taputou kia aroa e kia akaperepere oki, i te tuatau meitaki e te tuatau kino katoa ra. Te kapiti ra i tetai apinga te manakoia ra e te aronga e manganui e kua piro no teia au tuatau e ora nei tatou​—ko te tuatua akangateitei ta tetai tei taiku ra i te tia anga no te akaipoipo anga. Kia akakore atu i te reira irinaki anga te rave ra i tetai tu akakore anga i tona tokorua ra. Te taka meitaki ra to te Atua manako no te au tia i te Puka Tapu: “Kia tia koe i te tia ki te Atua ra, e akamaroiroi i te akatae; kare oki aia e mareka i te neneva ra; e tenana e apai i taau i tia ra.”​—Koheleta 5:4.

19. Ei akatuke anga ki teaa ta Satani ka rekareka me ka topa tetai Kite?

¹⁹ Auraka e ekoko i te reira. Mei te tupuanga te rekareka maata i te rangi ra i te ora no tetai tei ara ra, e pera katoa oki te rekareka anga i te enua nei i roto i te au nuku o Satani, tei akaraia e tei akara koreia, me ka kore tetai o te Au Kite o Iehova ra e tamou marie i tona tu tiratiratu.​—Luka 15:7; Apokalupo 12:12.

Au Timata Anga Matauia e te Katoatoa

20. Akapeea tatou me patoi atu i te timata anga? (2 Petero 2:9, 10)

²⁰ I etai au tu e mea kore ainei e rauka kia akakore i te tu akono kore? E maata ainei te ririnui o te kopapa e to Satani kia kore e rauka i te au Kerititiano i te patoi atu e kia tamou marie i to ratou tu tiratiratu? Te akamaroiroi maira a Paulo na teia au tuatua: “E tuatua-mou ra ta te Atua, e kare aia e vaoo ia kotou kia timataia mari ra ko te tika ia kotou kia akakoromaki ra; e akatupu katoa aia i te akapuanga i taua timataanga ra, kia tika ia kotou kia akakoromaki.”​—1 Korinetia 10:13.

21. Eaa te au uianga te ka pauia i ta tatou apiianga i muri akenei?

²¹ Eaa ta te Atua e oronga maira ei tauturu ia tatou kia akakoromaki i te au timata anga e kia autu i te reira? Eaa tikai ta tatou tataki tai ka umuumu ei paruru i to tatou akaipoipo anga, i to tatou ngutuare tangata, e pera katoa te ingoa rongonui o Iehova e to te putuputuanga oki? Na ta tatou atikara i muri akenei e pau i aua uianga ra.

[Au Tataanga Rikiriki i Raro]

Te Maara Nei Ainei Koe?

◻ Eaa etai au tumu te ka tauturu kia akamaroiroi i tetai akaipoipo anga?

◻ Eaa tatou ka kopae ei to teianei ao manako no te tu akono?

◻ Eaa etai timata anga e etai turanga te ka taki atu ki te tu akono kore?

◻ Eaa te taviri maata no te arai atu anga i te ara?

◻ Akapeea ta te Atua ra tauturu mai ia tatou i te au tuatau o te timata anga?

[Pia i te kapi 14]

AU TUMU MATAUIA I TE AU AKAIPOIPO TAMOUIA

◻ Akono ngaueue kore i te au kaveinga Puka Tapu ra

◻ Nga tokorua e rua e pirianga ketaketa to raua ma Iehova

◻ Akangateitei te tane i tana vaine, i tona manako ngakau e i tana au apinga oki i manako ana

◻ E tuatua pirianga manako meitaki i te au ra tataki tai

◻ E kimi kia akamareka tetai i tetai

◻ E tu takatakata; e kia kata oki iaia uaorai

◻ Kia akatika ua e kua apa aia; e kia akakore ua i te apa

◻ E tamou i te inangaro kia oraora

◻ Kia taokotai i te akonoanga e te akoanga i te au tamariki

◻ Kia putuputu te taokotaianga i te pure anga kia Iehova

AU TUMU TAU KORE TEI AKAKINO I TE AKAIPOIPO

◻ Te noinoi e te manako marokiakia

◻ Te kore e rave i te angaanga kapiti

◻ Kino pakari te pirianga manako

◻ Te ngere i te uiui anga i rotopu i nga tokorua ra

◻ Tau kore te akatere anga i te moni

◻ Tuke anga o te turanga i te akonoanga i te tamariki e/me kore i te tamariki na tetai anake o raua ra

◻ Te angaanga roa anga te tane me kare te akono koreanga i te ngutuare tangata no te rave anga i etai atu angaanga

◻ Te kore e akono i te au mea anoanoia no te ngutuare tangata i te pae vaerua ra

[Tutu i te kapi 15]

Na te akangateitei tamouanga i te akaipoipo e apai mai i te mataora mutu kore