Tatanuanga i te Tu Tangata Ou i te Akaipoipo Anga

“Kia akaouia kotou i te mana te taangaanga ra i to kotou manako, e kia aao i te tu tangata ou.”​—EPHESIA 4:23, 24, NW.

1. Eaa i kore ei e tau kia manako mama uaia te akaipoipo?

KO TE akaipoipo tetai o te au takainga maata rava ta tetai ka rave i tona oraanga, e no reira kare e tau kia mama ua te manako anga i te reira. No teaa ra? No te mea te umuumuia ra tetai taputou anga no te oraanga roa ma tetai atu peretana ra. Ko tona aite anga e kapitianga i to tetai oraanga katoa ra ma taua peretana ke atura. Te anoanoia ra te ikianga pakari me kia riro taua taputou anga ra ei mea meitaki. Te umuumu katoa ra te reira i tetai mana tau ei ‘taangaanga i te manako e na te reira e akatanotano i te tu tangata ou ra.’​—Ephesia 4:23, 24; akaaiteia atu kia Genese 24:10-58; Mataio 19:5, 6.

2, 3. (a) Eaa te anoanoia ra no te iki anga pakari i tetai toko rua no te akaipoipo? (e) Eaa te kapitiia ra i te akaipoipo?

² Te vaira te tumu meitaki no te kore e rapurapu ua te akaipoipo anga, kia kika vivikiia atu e te anoano ririnui o te kopapa. Te umuumuia ra tetai tuatau no te tupu anga te tu tangata pakari e tona tu tikai. Na roto katoa oki i te tuatau e tupu mai ei te kite e te marama te ka riro ei pange no te iki anga meitaki ra. Na reira, te iki anga i tetai tokorua tau no te oraanga penei ka maata atu te tu puapinga. Te akataka meitaki maira tetai materi Hisepania e: “E meitaki atu te aaere ei takaua i to te akaipoipoia kino ra.”​—Maseli 21:9; Koheleta 5:2.

³ Ko te ikianga i te tokorua tika ko te tumu anga ia no te akaipoipo puapinga ra. No te reira ka tau te Kerititiano kia aru i te au kaveinga Puka Tapu ra, kare e na te akaraanga kopapa manea e te manako ngakau tau kore ua e te au taomi anga a te inangaro ra. E tere atu te akaipoipo anga i te kapiti anga i nga kopapa e rua ra. Ko te kapiti anga ia i nga tu tangata e rua ra, e rua ngutuare tangata e nga tu apiianga oki, e penei e rua nga tu peu e nga reo katoa. Ko te kapitianga i nga tangata e rua i te akaipoipo te anoanoia ra e kia taangaanga meitakiia te arero; ma te mana tuatua, penei ka turaki tatou ki raro me kare ka akatu ki runga. Mei teianei katoa, ka kite tatou i te pakari o ta Paulo ra apiianga kia ‘akaipoipo anake i tei tau ra i te Atu’ koia oki, i tetai taeake akarongo ra.​—1 Korinetia 7:39; Genese 24:1-4; Maseli 12:18; 16:24.

Aroanga i te Au Tu Ngata o te Akaipoipo

4. Eaa ka tupu mai ei te pekapeka e te taitaia i etai taime i roto i te akaipoipo?

⁴ Noatu rai e e meitaki te pange, ka tupu rai te tuatau no te pekapeka, te taomianga, e te taitaia. E au mea matauia te reira no tetai ua atu tangata nei, me kua akaipoipo e me kare. Ka tupu rai te au manamanata no te pae i te puapinga e te maki, te taitaia i tetai ua atu pirianga. Te taui anga o te tu manako ka taki atu ki te u anga etai nga tu tangata noatu rai i roto te au akaipoipo anga memeitaki ra. Ko tetai atu tumu no te mea kare e tangata tei rauka meitaki ra iaia i te akatere i te arero, mei ta Iakobo i tuatua maira: “Te apa anake nei tatou i te au mea katoa e manganui. E kia kore tetai tangata e apa i te tuatua ra, e tangata meitaki rava aia, e tika iaia kia tapeka i te kopapa katoa ra. . . . Koia katoa te arero nei e melo mea ngiti, e akatietie maata ra tana. Ka akara na i te maata o te vaie e ka i te ai mea ngiti ra!”​—Iakobo 3:2, 5.

5, 6. (a) Eaa te anoanoia ra me tupu mai etai tu kite kore anga? (e) Penei eaa te mea tau kia raveia ei akaora i te ngai kino ra?

⁵ Me tupu mai te au taomi anga i te akaipoipo anga ra, eaa ta tatou ka rave ei akono i te reira turanga? Akapeea e raukai ia tatou i te arai anga kia kore etai kite kore anga e tupu ua atu ei taumaroanga e kia riro atu te reira ei akaputa i te pirianga? Ei konei te mana te taangaanga ra i te manako e rave ei i tana tuanga. Ko teia vaerua akakeu e mea tau me kare e tau kore ia, ka akamaroiroi i te pae vaerua me kare ka akatopa ki raro, tei tutaraia e te au manako kopapa ra. Me e akamaroiroi anga tana, ka rave te reira tangata i te rapakau i te ngai kino, kia tamou i tona akaipoipo anga ki runga i te arataa tika. Kare e tau te taumaroanga e te au pekapeka anga kia akaope i tetai akaipoipo. Ka rauka ua te akameitaki i te reva e kia akaora i te akangateitei anga e te kite na te akonoanga i te apiianga Puka Tapu.​—Roma 14:19; Ephesia 4:23, 26, 27.

⁶ I raro ake i teia au turanga te tau meitaki ra ta Paulo au tuatua: “Ei aronga ikiia e te Atua, tei tapu e te akaperepereia, ka akakakau ia kotou uaorai ma te ngakau aroa ua, te takinga meitaki, te manako akaaka, te tu maru, e te akakoromakianga roa. E tamou rai i te akakoromaki anga tetai i tetai e te akakore ua anga i te ara tetai e tetai me e tumu ta tetai no te tapepeanga ki tetai. Mei ia Iehova i akakore ua maira i ta kotou ara, kia pera katoa oki kotou. Inara i te pae i teia au mea nei, e akakakau ia kotou uaorai i te aroa, no te mea e tapeka anga tiama te reira o te taokotai anga.”​—Kolosa 3:12-14, NW.

7. Eaa to tetai papaki manata i to ratou akaipoipo anga?

⁷ E ngoie ua te irava no te tatau, inara i raro ake i taomi anga o te oraanga i teia tuatau nei, kare ia i te mea ngoie i te akono i te au taime ravarai. Penei eaa te manamanata te akatumu mai ra? I etai taime, ma te kite koreia atu, penei te noo ra tetai Kerititiano ma te akono anga e rua nga kaveinga tuke ra. I te Are Uipaanga Patireia, tei rotopu aia i te au taeake, e ka akono aia i te takinga meitaki e te manako tau. Inara, i te kainga, i te rave anga i te angaanga ngutuare, penei ka akangaropoina ua aia i tona pirianga i te pae vaerua. Tera raua ko te tane anake e te vaine, “koia” e “ia.” E i raro ake i te tu ngata penei ka tuatua ua aia i etai au apinga kare rava e tuatuaia i te Are Uipaanga Patireia ra. Eaa tei tupu? No te atianga poto ua, kua ngaro tona tu akatangata Kerititiano. Kua ngaropoina i te tavini o te Atua ra e te vaira aia ei taeake Kerititiano (me kare ei tuaine) i tona kainga. Kua riro te mana taangaanga i te manako ra ei tau kore e kare i te tau tikai ra.​—Iakobo 1:22-25.

8. Eaa te ka rauka kia tupu mai me e tau kore te mana taangaanga i te manako ra?

⁸ Eaa te tupuanga? Penei ka akamutu te tane i ‘te noo anga ma tana vaine ma te kite, i te akangateitei anga iaia ei te āriki paruparu ra.’ Penei katoa oki kare te vaine e kauraro marie atu i tana tane; kua ngaro ke tona “ngakau maru e te muteki ua” ra. Kua riro te mana taangaanga i te manako ra ei mea kopapa e kare i te mea vaerua. Kua peke i te “manako kopapa” ra. E no reira, eaa te ka tau kia raveia ei akatamou i taua mana taangaanga ra ei mea vaerua e kia tau oki? E akaketaketa tatou i to tatou tu i te pae vaerua ra.​—1 Petero 3:1-4, 7; Kolosa 2:18, NW.

E Akamaroiroi i te Mana

9. Eaa te au iki anga ta tatou ka akono i te oraanga i te au ra tataki tai ra?

⁹ Ko te mana taangaanga, ko te irinaki anga ia o te manako te ka akamata i te angaanga me ka akamata tatou i te tuku tika e te au iki anga. Te oronga tamou maira te oraanga i te au tuatau no te raveanga​—meitaki me kare kino, noinoi me kare noinoi kore, au mea akono me kare akono kore ra. Eaa te ka tauturu ia tatou kia tuku i te au tika meitaki? Na te mana te taangaanga ra i te manako me kua akanooia te reira ki runga i te raveanga i to Iehova ra anoano. Kua pure te tata taramo e: “E apii mai koe iaku, e Iehova, i te arataa ra o taau au akonoanga, e ka akonoia e au e tae ua atu ki te openga ra.”​—Salamo 119:33; Ezekiela 18:31; Roma 12:2.

10. Akapeea tatou me akamaroiroi na roto i te tu papu tikai i te mana taangaanga i te au manako ra?

¹⁰ Ka tauturu maira ia tatou te pirianga maroiroi ma Iehova ra kia akamareka iaia e kia ariu ke i te kino, kapiti katoa te tu tau kore i te akaipoipo anga. Kua akamaroiroiia to Iseraela e “kia rave koe i te mea meitaki, e te mea tika, ki mua i te aroaro o to Atua ra o Iehova.” Inara kua apii katoa atu te Atua e: “Ko kotou, tei inangaro ia Iehova, kia rikarika i te kino ra.” I te manako anga i te itu o nga Akauenga Tai Ngauru ra: “Auraka rava koe e akaturi,” kua anoanoia te au Iseraela kia rikarika i te akaturi. Kua akaari mai te reira akauenga i to te Atua ra manako maata no te tu tiratiratu i te akaipoipo.​—Deuteronomi 12:28; Salamo 97:10; Exodo 20:14; Levitiku 20:10.

11. Akapeea e raukai ia tatou i te akamaroiroi atu i te mana taangaanga i to tatou manako?

¹¹ Akapeea tatou me akamaroiroi ua atu i te mana no te taangaanga i te manako ra? Na te ariki anga i te au angaanga i te pae vaerua e te au puapinga o te reira. Tera te aite anga e ka tau tatou kia akatupu i te anoano kia apii putuputu i te Tuatua a te Atua e kia akamatau i te marekaanga i te uriuri kapiti anga i te au manako e te au apiianga na Iehova ra. Ka tau to tatou manako ngakau kia aite atu ki to te tata taramo ra: “Kua kimi au ia koe ma toku ngakau katoa: auraka au kia tatipake i taau ra au akauenga. Kua uuna au i taau tuatua ki roto i toku ngakau, kia kore au e ara ia koe ra. E apii mai koe iaku, e Iehova, i te arataa ra o taau au akonoanga, e ka akonoia e au e tae ua atu ki te openga ra. E apii mai koe iaku kia akono au i taau ture, ka akono rai au i te reira ma te ngakau katoa ra.”​—Salamo 119:10, 11, 33, 34.

12. Eaa te au mea te ka akataokotai ia tatou i te akaata anga i te manako o Karaiti ra?

¹² Ka tamouia teia tu no te ariki anga i ta Iehova ra au kaveinga no te tuatua tika kare e na te apiianga anake i te Puka Tapu mari ra na te pirianga putuputu katoa oki i te au uipaanga Kerititiano e na te raveanga kapiti katoa anga i te angaanga Kerititiano ra. Ka akamaroiroi tamou mai eia nga mana ririnui e rua i te mana taangaanga i to tatou au manako i reira to tatou tu oraanga noinoi kore e akaata uaʼi i te manako o Karaiti ra.​—Roma 15:5; 1 Korinetia 2:16.

13. (a) Eaa i tau ei te pure ei apinga meitaki i te akamaroiroianga i te mana taangaanga i te manako? (e) Eaa ta Iesu ra akaraanga i akanoo mai no teia tu?

¹³ Ko tetai atu tumu ko ta Paulo ia i akakite maata maira i tana reta ki to Ephesia ra: “Ma te pure tukumoe kore, i te au pure ravarai, i te pati a te Vaerua, ma te akamaroiroi e te tamou i te reira.” (Ephesia 6:18) Ka umuumuia te au tane e te au vaine kia pure kapiti. E putuputu te reira au pure i te akatuera i te ngakau e ka taki atu ki te tuatua kapitianga tau e ka rapakau mai i tetai ua atu ngai i kino ra. I te au tuatau no te tamataanga e te timata anga ra, ka tau tatou kia ariu atu ki te Atua na roto i te pure, ma te patianga i te tauturu, no te maroiroi i te pae vaerua kia rave i te mea tau i te manako o Karaiti ra. Noatu e ko Iesu apa kore ua ra kua ariu atu aia ki tona Metua na roto i te pure i te au atianga e manganui ra, ma te patianga i te maroiroi. E oonu tana au pure e kua tae ki te ngakau ra. Mei te reira katoa oki i teia tuatau, i te au taime o te timata anga, ka kiteaia e tatou te maroiroi kia tuku i te tika tau na te kapikianga ia Iehova kia tauturu mai ia tatou kia kopae ke atu i te anoano tuku ua ki ta te kopapa e kia akakore i te tia o te akaipoipo anga ra.​—Salamo 119:101, 102.

Au Akatauanga Tuke no te Tu Akono

14, 15. (a) Eaa ta Iosepha i manako i te timata angaia ra? (e) Na teaa i tauturu ia Iosepha kia kopae ke i te timata anga?

¹⁴ Akapeea tatou me aro atu i te timata anga? No teia tu te taka meitaki ra ta tatou akara anga i rotopu i te mataara tei raveia e Iosepha e Davida. I te aruaruanga te vaine a Potiphara i te tauta i te akavare ia Iosepha manea ra, tei takaua ra i te reira tuatau, kua pau atura aia i te openga i te na ko anga: “E kare roa e tangata i maata i teianei are iaku; e kare roa ana [a to tane] apinga i tāpu iaku, mari ra ko koe, ko te vaine nana uaorai: eaa oki au e tikaʼi kia rave i tenana kino maata, e te ara i te Atua?”​—Genese 39:6-9.

¹⁵ Na teaa i tauturu ia Iosepha kia akono i te mataara tika i te mea e ngoie ua te tuku ua atu? Tei iaia tetai mana ririnui no te taangaanga i tona manako. E manako tikai tona i tona pirianga ma Iehova. Kua kite aia e na te raveanga i te poneia ma teia vaine inangaro tau kore nei ka riro ei ara kare ki tana tane anake ua mari ra ki te Atua ra koia tei puapinga atu.​—Genese 39:12.

16. I akapeea to Davida manako i te timata angaia ra?

¹⁶ Ei tuke anga, eaa tei tupu kia Davida? E tangata akaipoipoia aia, e manganui tana au vaine tei akatikaia ra e te Ture. I tetai aiai kua akara atu aia mei tona are ariki i tetai vaine te pai ra. Ko te vaine a Uria, ko Bate-Seba manea ra. Taka meitaki ra te iki anga a Davida kia rave​—kia akara ua atu i te tupu anga te inangaro i roto i tona ngakau ra, me kare kia ariu ke atu aia e ka kopae atu ei i te timata anga. Eaa tana i iki kia rave? Kua akaue aia iaia kia apaiia mai ki tona are ariki, e kua akaturi atura aia iaia ra. E kino rava atu oki, kua rave ua atu aia kia akono kia mate tana tane.​—2 Samuela 11:2-4, 12-27.

17. Eaa ta tatou ka manako no to Davida ra tu i te pae vaerua?

¹⁷ Eaa ra to Davida manata? I tana aaki anga i tana apa ma te ngakau mamae ra ia Salamo 51, ka taka meitaki ia tatou etai au tika ra. Kua tuatua aia: “E anga ana koe i te ngakau mā i roto iaku nei, e taku Atua, e akaou ana oki koe i te vaerua tika tikai i roto iaku nei.” Te kitea meitakiia ra e i te atianga o tona timata anga ra, kare tona i te vaerua ma e te tika tikai. Penei kua akakore ua ana aia i te tatauanga i te Ture a Iehova, e no te reira tu, kua paruparu tona tu i te pae vaerua. Me kare penei kua tuku aia i tona ra taoonga e te mana ei ariki kia akaviivii i tona manakoanga e no reira kua topa aia ki roto i te anoano tika kore. E mea papu, ko te mana taangaanga i tona manako i te reira taime e noinoi ia e te ki i te ara. E na te reira tu, kua kite aia i tei anoanoia nona ra, ko tetai ‘vaerua ou, ei vaerua tika tikai.’​—Salamo 51:10; Deuteronomi 17:18-20.

18. Eaa ta Iesu apiianga no runga i te akaturi?

¹⁸ Kua akakinoia etai akaipoipo anga Kerititiano no te tuku ua tetai me kare raua uaorai nga tokorua ra kia topa atu ki roto i te tu paruparu i te pae vaerua mei to te Ariki ko Davida rai. Ka tau tana akaraanga kia akamatakite mai ia tatou e auraka e akara ua atu i tetai vaine ke ra, me kare tane, ma te akatupu i te inangaro, no te mea penei ka akatupu i te akaturi i te openga. Kua akaari mai a Iesu e kua kite aia i to te tangata ra manako ngakau i teia tu, no te mea kua tuatua aia: “Kua akarongo kotou e, i tuatuaia mai e te aronga taito ra e, ‘Auraka rava koe e akaturi:’ Te karanga atu nei ra au kia kotou, ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.” I te reira tu, e noinoi e te tu kopapa te mana taangaanga i te manako ra, e kare i te mea vaerua. Eaa i reira, te ka tau te Kerititiano kia rave kia kopae ke atu i te akaturi e kia tamou i to ratou akaipoipo anga kia mataora e te akamerengoanga?​—Mataio 5:27, 28.

E Akamaroiroi i te Tapeka Akaipoipo Anga

19. Akapeea e raukai te akamaroiroi anga i te akaipoipo?

¹⁹ Kua tata te Ariki ko Solomona e: “Maroiroi maata to te tangata kia rave mai i tetai ra, e tika ia raua katoa kia rave atu iaia ra; e te taura e toru enui ra, kare ïa e motu vave.” E tika ra, ka rauka i nga tokorua e rotai ra to raua akaipoipo anga, kia tu kapiti atu i tetai patoianga mai kia meitaki atu i ta te okotai ua ra. Inara me te aite ra to raua tapeka anga e mei tetai taura e toru enui ra ma te Atua katoa tetai i roto, ka maroiroi ra taua akaipoipo anga ra. E akapeea ra te Atua e o atu ei ki roto i te akaipoipo anga? Na te akonoanga nga tokorua ra i tana au kaveinga e tana apiianga no te akaipoipo anga.​—Koheleta 4:12.

20. Eaa te apiianga Puka Tapu te ka tau ei tauturu i te tane?

²⁰ E tika tikai, me ka akono tetai tane i te apiianga a nga irava te aru mai nei, ka meitaki atu te tumu anga o tona akaipoipo kia manuia:

“Koia katoa oki kotou, e te au tane, e noo ia ratou ra ma te kite, i te akangateitei anga i te vaine, i te āriki paruparu ra, e ei atu katoa oki i te aroa ua ra i te ora; kia kore ta kotou pure e topa.”​—1 Petero 3:7.

“E te au tane ra, e aroa atu kotou i ta kotou au vaine, mei te Mesia katoa i aroa i te ekalesia, e kua oronga iaia uaorai ei oko. E aroa katoa te au tane i ta ratou uaorai au vaine e tikaʼi, mei to ratou uaorai kopapa; ko tei aroa i tana uaorai vaine, kua aroa aia iaia uaorai.”​—Ephesia 5:25, 28.

‘E tu tana tane katoa, ma te akapaapaa iaia. E manganui te vaine akono meitaki, ko koe ra tei tu ke ia ratou katoa.’​—Maseli 31:28, 29.

“Ka rauka ainei i tetai tangata kia aaere na runga i te ngarau ka ra, e kare tona nga vaevae e pakapaka? Mei te reira katoa oki tetai ua atu tangata te rave ra i te piri atu anga ma te vaine a tetai tangata ke ra, kare tei amiri atu i taua vaine ra e vai akautunga koreia. Ko tei akaturi ra . . . te apai ra i tona meta kia kino.”​—Maseli 6:28, 29, 32, NW.

21. Eaa te apiianga Puka Tapu te ka tau ei tauturu i te vaine?

²¹ Me ka akarongo tetai vaine i te au apiianga Puka Tapu te aru mai nei, ka tauturu te reira i te akaroa anga i tona akaipoipo anga:

“E te vaine tini e, e kauraro marie i ta kotou au tane ra; kare tetai pae e akarongo i te tuatua ra, kia rauka mai ratou i te akono meitaki o ta ratou au vaine, auraka atu rai te tuatua; I te akara anga mai ratou i to kotou aerenga viivii kore i kapiti katoaia i te mataku [ma to kotou]. . . . ngakau maru e te muteki ua.”​—1 Petero 3:1-4.

“E o atu te tane i te mea takinga-meitaki [i te ainga] ki te vaine e tikaʼi: e pera katoa te vaine ki te tane. . . . Eiaa korua e akataka ia korua uaorai, mari ra ei ngai poto ake, kia tika ia korua.”​—1 Korinetia 7:3-5.

22. (a) Eaa etai atu au tu te ka akatuke i te akaipoipo kia meitaki? (e) Eaa to Iehova ra manako no te kopae anga?

²² Te akaari katoa maira te Puka Tapu e ko te aroa, te takinga meitaki, te ngakau aroa, te akakoromaki, te kite, te akamaroiroi anga, e te akapaapaaanga ko etai atu tuanga tau ratou o te poe no te akaipoipo. Ko te akaipoipo kare ra ratou i roto te aite ra ki tetai tiare kare e itiia e te ra e kare e tamauuia i te vai​—e takitai ua ake ona pueraanga. E no reira e akono i te mana taangaanga i to tatou au manako kia akakeu ia tatou i te akamaroiroi e te akaanga i te roi tetai i tetai i to tatou akaipoipo anga. Kia maara e e ‘mea riri oki na Iehova te kopae.’ Me te akonoia ra te aroa Kerititiano, kare e tau kia vai mai tetai ngai no te akaturi e te topa anga te akaipoipo. Eaa ra te tumu? No te mea “kare ua te aroa e kore.”​—Malaki 2:16; 1 Korinetia 13:4-8; Ephesia 5:3-5.

Ka Rauka Ainei ia Koe te Akataka?

◻ Eaa te pange no te akaipoipo mataora?

◻ Akapeea e raukai i te mana taangaanga i te manako i te akatuke i te akaipoipo?

◻ Eaa ta tatou ka rave ei akamaroiroi i te mana taangaanga i to tatou manako?

◻ Eaa te tuke o Iosepha ia Davida ra i raro ake i te timata anga?

◻ Eaa te apiianga Puka Tapu te ka tauturu i te au tane e te au vaine kia akamaroiroi i te tapeka o te akaipoipo?

[Au Tutu i te kapi 18]

Te taki rua ra ainei a tatou turanga e noo ra​—e takinga meitaki i te putuputuanga e e tu riri ua i te kainga?