Te Au Ngai Uruoaanga Tapere o te “Apiianga Atua”
E AU tangata ravarai te anoano ra kia apiiia e Iehova te akara pakari atura ki te au Uruoaanga Tapere o te “Apiianga Atua.” Te porokarama no nga ra e a ka akataka atea mai i te au tu aiteanga puapinga o te apiianga Puka Tapu te ka paruru i te au Kerititiano i roto i teia tuatau e tupu nei te au manamanata e te oripu ua anga o teianei ao. Ka tauturu te porokarama ia ratou i te patoi pakari atu i ‘te mea tei patoi i te apiianga meitaki no te oraanga.’ (1 Timoteo 1:10, NW) Ka akamaroiroi katoa te reira i te katoatoa te ka aere atu kia riro ei au pu apii meitaki no te Tuatua a te Atua.
E au akaraanga meitaki tikai no tatou kia aru! Kare e Pu Apii Maata Rava Atu mari ua ko te Atua ko Iehova uaorai! No reira, tano rai ta Eliu i tuatua kia Iobu e ko Iehova “e maata tana i apii ia tatou i ta te au puaka o te enua nei, e e pakari maata tana i o mai no tatou i to te au manu o te reva nei.” Kua ui katoa aia no runga ia Iehova: “Koai tetai tei ikuiku mei iaia?” (Iobu 35:11; 36:22, NW) Kua taikuia te Atua ia Isaia 30:20, (NW) e ko te “Pu Ikuiku Mekameka.”
Te rua anake kia Iehova ei pu apii ko tana Tamaiti, ko Iesu Karaiti. Kua kiteaia aia e ko te “Pu Apii” e te “Pu Ikuiku,” tei taikuia mei te reira no etai 50 taime i roto i te au Evangeria. Noatu tana au akaora anga umere e manganui e etai au temeio, kare a Iesu i kiteaia e ko te Taote mari ra ko te Pu Apii, te Pu Ikuiku.—Mataio 8:19; Luka 5:5; Ioane 13:13.
Tano tikai i reira, kua apii a Iesu i tana au pipi e tana au apotetoro kia riro ei au pu apii mei iaia tikai. Ka kite tatou i teia ia Mataio 10:5 ki te 11:1 e Luka 10:1-11. I mua poto ua ake i tona aereanga ki te rangi, kua oronga atu a Iesu ki tana au pipi i te angaanga apii kitea uaia tei rekotiia i Mataio 28:19, 20, (NW): “E teianei ka aere kotou e akariro i to te pa enua katoa ei pipi, ka papetito atu ia ratou i te ingoa o te Metua e no te Tamaiti, e no te vaerua tapu, ma te apiianga ia ratou, kia akono i te au mea ravarai i akaue atu au kia kotou.” Te puka o Angaanga, pera katoa te au reta akauruia tei aru mai i te reira i roto te au Tuatua Tapu Ereni Kerititiano, te akakite maira e i akapeea te au pipi maroiroi mua a Iesu i te raveanga i teia angaanga apii, ma te maroiroi, te karape, e te akono meitaki.
Teia angaanga apii e rapurapu anga maata tikai tona i teia tuatau mei tetai atu tuatau i mua ana. Te noo nei tatou i te au ra openga o teianei akatere anga o te au mea nei, e no te reira, te o maira te au oraanga. E kore ei te au tangata e piri atu i roto i te au ara a Babulonia Maata e e raukaʼi tetai tuanga o tona au mate, e tau ratou kia apiiia e kia tauturuia kia aere ke mai ki vao mei roto ia Babulonia e kia iki i te tavini atu ia Iehova e tona Patireia.—Apokalupo 18:4.
Ei tauturu i te Au Kite o Iehova i ta ratou tauta anga i te akatupu i ta ratou angaanga apii, te oronga maira a Iehova na roto i tana akaaerenga i te Au Uruoaanga Tapere “Apiianga Atua.” Ka akamata teia au uruoaanga no nga ra e a i te Tua Tonga i te akamata anga o te tuatau maana o te 1993. E tau te au tavini akatapuia o Iehova kia akapapu e kia piri atu penei e tai ua ake o teia au uruoaanga, kia tae atu e kia akarongo atu mei te akamataanga te imene e te pure i te avatea Paraparau e tae ua atu ki te pure openga i te avatea Tapati.