RUNANGA PUKA I RUNGA I TE INITANETI Punanga Tiaki
Punanga Tiaki
RUNANGA PUKA I RUNGA I TE INITANETI
Reo Rarotonga
  • PIPIRIA
  • AU PUKA
  • AU UIPAANGA
  • w93 4/1 kapi 8-13
  • E Aru i te Marama o te Ao Nei

Kare e vitio.

Akakoromaki mai kare te vitio e angaanga.

  • E Aru i te Marama o te Ao Nei
  • Te Punanga Tiaki—Akakiteanga i te Patireia o Iehova—1993
  • Tumu Tuatua
  • Tetai Atu Manako
  • Tetai atu Tu Marama
  • Te Ao Poiri i te Pae Vaerua
  • “Te Mārama Maata”
  • “Na Roto Mai Iaia te Ora”
  • Au Apinga Oronga Mai na Iehova
  • Te Takore ra te Marama Mei te Atua i te Poiri!
    Te Punanga Tiaki Akakiteanga i te Patireia o Iehova—2002
  • “Ko te Mārama kua Tae Mai ki te Ao Nei”
    Te Punanga Tiaki—Akakiteanga i te Patireia o Iehova—1991
  • ‘E Aao i te au Apinga no te Marama’
    Te Punanga Tiaki—Akakiteanga i te Patireia o Iehova—1991
  • Aronga Turama i te Marama—No Teea Akakoroanga?
    Te Punanga Tiaki—Akakiteanga i te Patireia o Iehova—1993
Tetai Atu
Te Punanga Tiaki—Akakiteanga i te Patireia o Iehova—1993
w93 4/1 kapi 8-13

E Aru i te Marama o te Ao Nei

“Ko te aru mai kiaku nei . . . e mārama ora tona.”​—IOANE 8:12.

1. Eaa te puapinga maata o te marama ra?

EAA taau ka rave me kare e marama? E tamanako ana me ka ara mai koe i te au ra katoatoa o te mataiti e e 24 ora e poiri ua. E tamanako ana i tetai ao kare ona kara, no te mea me kare e marama kare e kitea te kara. E tika ra, me kare e marama, e kore katoa oki tatou nei! Eaa i kore ei? No te mea, i te rave anga i te kairo anga i te reva e te vai ka riro na te ririnui o te marama e ngote ake i te reira ki roto i te au ngangaere e matie ra tona kara, kia tupu te kai na tatou​—te au ua, te au kai tanu, e te ua rakau oki. E tika rai, i etai tuatau ka kai tatou i te kiko manu. Inara kua kai taua au manu ra i te au ngangaere me kare i etai atu au manu tei kai ra i te au ngangaere. E no reira, kua riro na te marama i oraʼi to tatou oraanga kopapa nei.

2. Eaa te au tumu ririnui o te marama te vai nei, e eaa ta teia e akakite mai nei kia tatou no Iehova ra?

2 No ko mai to tatou marama i te ra, e etu ia. I te tuku mai anga to tatou ra i te marama maata ra, te vaira ia e etu kare i te maata roa. E manganui tei maata roa atu iaia ra. Te pupu anga etu ta tatou e noo nei, koia te vananga rangi Miriki Uei (Milky Way), e tere atu i te tai anere pirioni au etu. E kapiti atu i te reira e au pirioni ua atu pupu vananga i te ao katoa e pini ua ake. Mei teaa ra te maata o te au akaputu anga etu! E maata katoa oki te au tu marama te kaka maira mei ia ratou katoatoa! Mei teaa ra te tumu ririnui no te marama ia Iehova ra tei anga mai i te reira au mea ravarai! Kua tuatua maira a Isaia 40:26 e: “Ka nānā na i to kotou mata ki runga, ka akara: naai te reira i anga? te arataki ra aia i taua au nuku ra ki vao ma te tatauia: kua tapa anakeia to ratou au ingoa e ia; no tona ra ririnui, e te mana maata, i kore ei tetai i ngaro.”

Tetai atu Tu Marama

3. Eaa te puapinga maata o te marama i te pae vaerua mei ko mai ia Iehova ra?

3 Ko Iehova katoa oki te Tumu no tetai ke atu tu marama, ko tei akakite mai ia tatou i te akara anga i te pae vaerua ra, e akamarama anga i te pae vaerua. Te akataka maira tetai tikitinari i te “akamarama” na teia mataara: “Kia oronga i te kite kia: apii; kia oronga i te kite oonu i te pae vaerua ra.” E kua akataka mai i te “akamarama anga” e: “e akamatara anga mei te kite kore e te akakite anga tau kore ra.” Te orongaia maira te akamarama anga i te pae vaerua mei ko mai ia Iehova ra na te kite tika tikai i tana Tuatua, koia te Puka Tapu. Na te reira e raukaʼi ia tatou te kite e koia te Atua e eaa katoa oki tana au akakoroanga. “Ko te Atua oki, ko tei akaue i te mārama kia kakā mai no roto i te poiri ra, ko tei kakā mai ïa i roto i to tatou ngakau, kia rauka te mārama ra o te kite i te kakā o te Atua i te mata o Iesu Mesia ra.” (2 Korinetia 4:6) E no reira, na te au tuatua mou i roto i te Tuatua a te Atua e akamatara mai ia tatou i te kite kore e te akakite anga tau kore ra. Kua karanga a Iesu: “Ka kite ïa kotou i te tuatua-mou, e na te tuatua-mou kotou e akarangatira.”​—Ioane 8:32.

4, 5. Akapeea te akono anga a te kite mei ko mai ia Iehova ra i te marama i roto i to tatou au oraanga?

4 Ko Iehova, te Tumu o te akamarama anga mou i te pae vaerua, ko “te Kite katoatoa ra” ia. (Iobu 37:16) Pera katoa, te akakite maira a Salamo 119:105 i te Atua e: “E lamepa taau tuatua i toku nei vaevae, e turama no toku nei arataa.” E no reira ka rauka iaia i te akamarama mai kare i tetai atu anake takainga no tatou i te pae vaerua mari ra i te arataa i mua katoa atu ra. Me kare te reira tu, ka riro te oraanga mei te akaoro anga motoka i tetai mataara oriori aere ua i runga i tetai maunga i te po poiri ra e kare e mori o te motoka e kare katoa oki i tetai atu ngai ke ra. Ka tau te marama i te pae vaerua mei ko mai i te Atua ra kia akaaiteia atu ki te marama mei ko mai i nga mori o mua o te motoka ra. Na te marama e akamarama meitaki mai i te mataara kia raukai ia tatou te kite papu i te ngai ta tatou e aere ra.

5 Te akakite maira te totou ia Isaia 2:2-5 e i to tatou tuatau nei te akaputu ra te Atua i te au tangata no to te pa enua ravarai te anoano ra i te akamarama anga i te pae vaerua kia raukaʼi ia ratou te apii e te akono i te akamori anga mou. Te tuatua ra te irava 3 e: “Nana e apii mai ia tatou i tona au aerenga; e ka aere tatou na tona ra au arataa.” Te pati maira te irava 5 i te aronga kimi i te tuatua mou: “E aere mai kotou, taki aere tatou na te mārama o Iehova.”

6. I te openga ka taki atu te marama mei ko mai ia Iehova ra ia tatou ki ea?

6 E no reira, ko Iehova te tumu no nga tu marama e rua ei puapinga no te oraanga: te pae kopapa e te pae vaerua oki. Na te marama i te pae kopapa e tauturu i to tatou au kopapa nei kia ora i teianei, penei no etai 70 me kare 80 mataiti me kare tere atu. Inara ko te marama i te pae vaerua ka taki atu ki te ora mutu kore ki runga i te enua parataito. Te tau ra te reira ki ta Iesu tuatua i tana pure ki te Atua: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.”​—Ioane 17:3.

Te Ao Poiri i te Pae Vaerua

7. Eaa i maataʼi to tatou anoano i te akamarama anga i te pae vaerua i teianei kia tare atu i to mua ana ra?

7 Te maata nei te anoanoia o te marama i te pae vaerua no tatou i teia tuatau kare i aiteia i mua ana. Te akakite mai ra te au totou mei ia Mataio pene 24 e ia 2 Timoteo pene 3 ra e te vaitata nei tatou i te openga o teia akatereanga o te au mea nei. Ko eia e etai atu au totou katoa kua akakite mai i te au mea kikino tei tupu ana i to tatou tuatau nei, ma te akakite anga mai kia tatou e tei roto tatou i “te tuatau openga.” Kua tau tikai ki taua au totou ra, kua kitea te tumatetenga i rungao i te tumatetenga. Te rave kino e te ta ua kua tupu kia maata roa e kia matakuia. E tere atu i te tai anere mirioni au oraanga kua mate i te au tamaki. Te ori aere nei te au maki mate, mei te AIDS matakuia ra, e mirioni ua atu tei rokoia, e kua tere atu i te 160,000 kua mate i te AIDS i te Unaite Teite anake ua. Kua ngaangaa te oraanga ngutuare tangata e kua manakoia te tu meitaki no te pirianga ainga e e akonoanga kua takere ia.

8. Eaa te turanga te aro mai nei i te au tangata i teianei, e no teaa ra?

8 Kua karanga tetai tekeretere tianara o te Taokotaianga Enua i mua ko Javier Pérez de Cuéllar e: “Te oronga maira te turanga o teianei ao i te akapapu anga maata e te [akakore nei] te putaua i te pirianga o te au totaiete.” Kua akakite mai aia e “e tere atu i te tai pirioni te aronga te noo nei i teianei i roto i te putaua tikai” e na “teia tu i akatupu i te au tumu no te pekapeka e te ta ua.” Na teia “au tu kino,” e nana ei, “i akakore i te au rapakau te ka rauka i te au kavamani i te akatupu mai.” E kua akapapuia mai e tetai upoko akaaere no tetai akaaerenga mana e: “Ko te manamanata o rotopu te aro atu nei i te totaiete ko te kore e rauka te reira i te akatereia.” E tika rava te au tuatua ia Salamo 146:3 e: “Auraka e irinaki ki te ui ariki, i te tamaiti a te tangata nei, kare oki ona ora.”

9. Koai ma te tumu maata no te poiri te koropini nei i te au tangata i teianei, e naai e raukai te takore atu i teianei mana mei rungao ia tatou nei?

9 Te tau ra te turanga i teia tuatau nei ki te totou ia Isaia 60:2: “I na oki, e tapokiia oki te enua nei e te poiri, e te au tangata i te poiri tangotango ra.” Ko teia poiri te tapoki nei i te maata anga o te au tangata o te enua nei no te kore ratou e ariki i te marama i te pae vaerua no ko mai ia Iehova ra. E ko te tumu tikai o te poiri i te pae vaerua ko Satani te Tiaporo e tana au temoni, ko ratou te au enemi maata o te Atua o te marama ra. Ko ratou “te au tutara o teianei ao poiri.” (Ephesia 6:12) Mei ta 2 Korinetia 4:4 i tuatua ra, ko te Tiaporo “te atua o teianei ao,” ko tei “akapoiriia to ratou ngakau akarongo kore . . . kia kore te mārama o te evangelia kakā o te Mesia, ko te tutu o te Atua ra, kia kakā mai i roto ia ratou.” Kare e rauka i te tutara a te tangata nei i te takore atu i te mana o Satani i te ao nei. Na te Atua anake e raukaʼi.

“Te Mārama Maata”

10. I akapeea ta Isaia totou anga mai e i to tatou tuatau nei ka akaitiia mai te marama ki runga i te au tangata katoa?

10 Inara, i te tuatau te tapoki ra te poiri tangotango i te maata anga o te tangata, kua totou katoa maira te Tuatua a te Atua ia Isaia 60:2, 3: “E iti mairā Iehova ki runga ia koe, e kitea ua ïa mai oki tona kakā ki runga ia koe ra. E aere mai oki te pa enua ki toou ra mārama.” Te tau ra te reira i ta Isaia pene 2, tei taputou maira e ko tei akamaramaia, koia te akamori mou ia Iehova ra e akatinamouia i te au ra openga nei e, mei ta te nga irava 2 e te 3 i tuatua ra, “e putuputu ua mai rai te au etene katoa ki reira. E manganui te tangata e aere ma te tuatua e, Aere mai, ka aere tatou ki runga i te maunga o Iehova” koia oki, ki tana akamori anga mou tei akateiteiia ra. E no reira noatu rai e te akatere ra a Satani i teianei ao, te akaitiia maira te marama mei ko mai i te Atua ra e te akamatara mai ra i te aronga maata mei roto mai i te poiri.

11. Koai te ka riro kia maata tana akakaka anga i to Iehova marama, e i akapeea ta Simeona ra akataka anga iaia?

11 Kua totouia mai te totou ia Isaia 9:1 e ka tono mai te Atua i tetai ki te ao nei kia akakite mai i tona marama. Te na ko maira te reira: “Te aronga i aere ua na te poiri ra, kua akara ïa i te mārama maata: te aronga i noo ki te ngai maru-mate, kua itiia ratou e te mārama.” Ko te reira “mārama maata” ko te Vaa Tuatua o Iehova koia a Iesu Karaiti. Kua karanga a Iesu e: “Ko au te mārama o teianei ao: ko te aru mai kiaku nei, kare aia e aere ua i te poiri, e mārama ora tona.” (Ioane 8:12) Kua kite tetai papaki i te reira noatu rai ia Iesu e tamaiti ou ra. Te akakite maira a Luka 2:25 (NW) e ko tetai tangata ko Simeona te ingoa e “tangata akangateitei tapu i te atua e te tuatua tika” e “i runga oki iaia te vaerua tapu.” I to Simeona kite anga i taua tamaiti ou ra ia Iesu, kua tuatua aia ki te Atua na roto i te pure: “Kua kite toku mata i taau apinga no te akaora anga tei akapapaia e koe ki mua i te aroaro o te au tangata ravarai, ko te marama no te takore anga i te arai i mua i to te pa enua katoa.”​—Luka 2:30-32, NW.

12. I naea e i akapeea oki to Iesu akamata anga i te takore atu i te arai o te poiri tei tapoki ra i te au tangata?

12 Kua akamata a Iesu i te takore atu i te arai o te poiri i runga i te au tangata i muri poto ake i tona papetito angaia ra. Te akakite maira a Mataio 4:12-16 kia tatou e na te reira i akatupu ia Isaia 8:23 e te 9:1 (Isaia 9:1, 2, NW), tei tuatua ra no te “mārama maata” te ka akamata i te kaka mai ki rungao i te au tangata te aaere ra i roto i te poiri i te pae vaerua. Te na ko maira a Mataio 4:17 e: “I reira to Iesu akamata anga i te ako, i te na ko anga e, Ka tataraara: te vaitata mai nei oki te basileia o te ao.” Na te tutuanga i te tuatua meitaki o te Patireia o te Atua ra kua akamarama maira a Iesu i te au tangata no runga i ta te Atua au akakoroanga. “Kua akakite maira [Aia] i te marama no te ora e te pe kore na roto i te tuatua meitaki ra.”​—2 Timoteo 1:10, NW.

13. I akapeea ta Iesu ra akataka anga iaia uaorai, e eaa i raukai iaia te rave i te reira ma te papu tikai?

13 Kua akakaka tiratiratu maira a Iesu i ta te Atua marama. Kua na ko maira aia: “I aere mai ei au i te ao nei ei mārama, kia kore tei akarongo mai iaku ra kia noo ua i te poiri. . . . Kare oki i taku uaorai te tuatua taku i karanga atu na; na te Metua ra i tono mai iaku nei, i akaue mai iaku i te tuatua, kia tuatua au e kia apii au. Kua kite oki au e, ko te ora mutu kore ïa tana i akaue ra.”​—Ioane 12:44-50.

“Na Roto Mai Iaia te Ora”

14. Akapeea te akataka anga mai ia Iesu ia Ioane 1:1, 2 ra?

14 Ae, i tono mai a Iehova i tana Tamaiti ki te enua nei ei marama akakite ki te au tangata i te mataara ki te ora mutu kore. E tamanako ana i akapeea te akakite anga mai i teia ia Ioane 1:1-16 (NW). Te tatau ra i nga irava 1 e te 2: “I te akamataanga te Tuatua ra, e i vai ana te Tuatua ki te Atua, e ko te Tuatua ra e atua ia. I te akamataanga mairai aia i vai ei ki te Atua.” I konei kua tapa a Ioane ia Iesu na te taoonga “Tuatua” mua ake i tona ra riro anga ei tangata. Na te reira i akataka i te angaanga tana i rave ra na te Atua ko Iehova ei Vaa Tuatua. I ta Ioane tuatua anga e “i te akamataanga te Tuatua ra,” ko tona aite anga e ko te Tuatua te akamataanga o ta Iehova ra au angaanga, koia “te akamataanga o te au mea katoa tei angaia e te Atua ra.” (Apokalupo 3:14, NW) Na tona turanga maata i rotopu i te au mea ora na te Atua ra i anga i oronga mai i te tumu tikai nona kia tapaia e “e atua,” e mea mana. Te tapaia rai aia ia Isaia 9:5 (Isaia 9:6, NW) ko te “Atua Mana,” kare ra i te Atua Mana Katoatoa.

15. Eaa tetai atu akakitekite anga ta Ioane 1:3-5 e oronga maira kia tatou no runga ia Iesu?

15 Te tuatua ra a Ioane 1:3 e: “I ora te au mea ravarai na roto iaia ra, i te pae iaia ra kare okotai mea i ora.” Te karanga ra a Kolosa 1:16 e “nana oki i anga i te apinga tini ravarai nei, ko to te rangi, e to te enua nei.” Kua karanga a Ioane 1:4 e “na roto mai iaia te ora, e ko taua ora ra to te tangata nei ia marama.” E no reira na te Tuatua ra i anga mai i te au tu mea ora ravarai; pera katoa oki na roto i tana Tamaiti, ka rave te Atua kia tika te au tangata ara e te mate nei kia rauka mai te ora mutu kore. E mea tika ra e ko Iesu tikai te mea mana ra ta Isaia 9:1 (Isaia 9:2, NW) i karanga ra e ko “te mārama maata.” E kua karanga a Ioane 1:5 e: “I kaka mai ana te marama i roto i te poiri ra, kare ra te poiri i mana ki rungao i te reira.” Ko te aiteanga o te marama ko te tuatua mou e te tuatua tika ia, ei tuke anga ki te poiri, ko tona ra aiteanga ko te tarevake e te tuatua tika kore oki. E no reira te akakite maira a Ioane e kare e autu te poiri ki rungao i te marama ra.

16. I akapeea ta Ioane Papetito tou mai anga i te maata o ta Iesu ra angaanga?

16 Kua maro maira a Ioane i reira i nga irava 6 ki te 9: “Tera tetai tangata kua tonokia mai ei komono no te Atua: ko Ioane [Papetito] tona ingoa. Kua aere mai teia tangata ei kite, ei akakite aere i te marama ra, kia akarongo te au tu tangata ravarai na roto iaia. Kare ra ko ia [ko Ioane] taua marama ra, mari ra nana i akakitekite aere i taua marama ra [koia a Iesu]. Ko te marama mou te ka akamarama mai i te au tu tangata ravarai e kua vaitata te aere mai ki te ao nei.” Kua tou atura a Ioane ki te Mesia te aere maira e kua akaariu atura i tana au pipi Kiaia ra. I muri iora, kua orongaia atu ki te au tu tangata ravarai te tuatau no te ariki anga i te marama. E no reira kare a Iesu i aere mai ei puapinga no te ngati Iuda anake ua mari ra kia puapingaia te au tangata ravarai​—te apinganui e te putaua, kare e manako e no teea pupu tangata mai.

17. Eaa ta Ioane 1:10, 11 e akakite maira kia tatou no runga i te turanga i te pae vaerua o te ngati Iuda i to Iesu tuatau ra?

17 Te tuatua ua atura nga irava 10 e te 11 e: “I te ao nei aia, e na roto iaia i vai mai ei te ao nei, inara kare to te ao nei i kite iaia. I aere mai aia ki tona uaorai kainga, kare ra tona uaorai iti tangata i ariki atu iaia.” Ia Iesu i mua ake i tona riro anga mai ei tangata, kua na roto mai iaia te anga mai anga i te ao tangata nei. Inara, iaia i te enua nei kua kopae keia aia e te maataanga o tona uaorai au tangata, koia te ngati Iuda ra. Kare ra ratou i anoano kia akakiteia to ratou tu kino e te pikikaa. Kua maata atu to ratou inangaro i te poiri kare ra i te marama.

18. Akapeea ta Ioane 1:12, 13 akakite anga mai e ka riro tetai papaki ei tamariki na te Atua ma tetai akatuanga taka ke ra?

18 Te tuatua ra a Ioane i nga irava 12 e te 13: “Inara, ko te aronga tei ariki atu iaia ra, kua oronga atura aia i te tika kia riro ratou ei tamariki na te Atua, no to ratou akarongo anga i tona ingoa ra; e kua anauia ratou, kare i te toto kare oki i to te anoano kopapa me kare i to te tangata anoano, no te Atua ra.” Te akakite maira eia nga irava e i te akamata anga, kare te au pipi a Iesu i te tamariki na te Atua ra. I mua ake i to Karaiti aere anga mai ki te enua nei, kare te reira akatamariki anga kare katoa oki tetai manakonako anga i eeuia mai i te au tangata nei. Inara na te atinga oko tau tikai o Karaiti ta ratou i akarongo ra, kua akonoia atu tetai papaki tangata ra ei au tamariki e kua rauka ia ratou te manakonako anga no te oraanga ei au ariki ma Karaiti katoa ra i roto i te Patireia o te Atua i te rangi ra.

19. Eaa i tau ei e no Iesu te turanga meitaki roa no te akakaka mai i to te Atua marama, mei tei akakitea maira ia Ioane 1:14?

19 Te akamanakoia maira i te irava 14 e: “No reira kua riro mai te Tuatua ei kiko e kua noo i rotopu ia tatou, e kua rauka ia tatou tetai akara anga o tona kaka, e kaka tei te tamaiti anau tai anake ra no ko mai i tetai metua; e kua ki aia i te takinga meitaki oronga uaia e te tuatua mou.” I te enua nei, kua akakite mai a Iesu i te kaka o te Atua tei tau anake ra na te Tamaiti anau mua a te Atua e rauka ia ra. E no reira, na roto i tetai tu taka ke ra, kua tau meitaki aia ei akakite mai i te Atua e Tana au akakoroanga ki te au tangata ra.

20. Mei tei tataia ia Ioane 1:15, eaa ta Ioane e akakite mai nei kia tatou no runga ia Iesu?

20 I muri iora, kua tata te apotetoro ko Ioane i te irava 15: “Kua akakite mai a Ioane [Papetito] iaia, ae, kua kapiki tikai aia​—koia tei tuatua ra i te reira​—i te na ko anga: ‘Ko te aere mai i muri iaku nei kua riro koia ki mua iaku, no te mea i vai ana aia i mua iaku.’” Kua anauia mai a Ioane Papetito e ono marama i mua ake i to Iesu anau anga mai ei tangata. Inara e maata roa atu ta Iesu angaanga i rave i ta Ioane ra, e no reira kua tere atu aia ki mua ia Ioane i te au tu ravarai. E kua akatika oki a Ioane e i vai ana a Iesu i mua ake iaia ra, i te mea i vai ana a Iesu i mua ake i tona riro anga ei tangata.

Au Apinga Oronga Mai na Iehova

21. Eaa ra a Ioane 1:16 i tuatuaʼi e kua rauka ia tatou “te takinga meitaki oronga uaia i rungao i te takinga meitaki oronga uaia”?

21 Kua akamanakoia maira ia Ioane 1:16 e: “Na roto mai i tona ki i raukai ta tatou katoatoa, pera katoa te takinga meitaki oronga uaia i rungao i te takinga meitaki oronga uaia.” Noatu rai e kua anauia mai te au tangata i roto i te ara no te akatuanga angaia i te reira mei ia Adamu ra, te akakoro ra a Iehova i te akapou anga i teia akatereanga kino nei, te akaora anga i te aronga e au mirioni ua atu ki roto i te ao ou, te aka­tu­aka­ou­anga i tei mate ra, e te takore anga i te ara e te mate, e te akatupuanga mai i te oraanga mutu kore ki runga i te enua parataito ra. Pouroa teia au akameitakianga no te aroa ua, kare i te tutaki tau na te au tangata ki ra i te ara. E au apinga oronga uaia mei ko mai ia Iehova ra na roto ia Karaiti ra.

22. (a) Eaa te ka rauka mai no ta te Atua ra apinga aroa maata roa? (e) Eaa te patianga te orongaia maira kia tatou i roto i te puka openga o te Puka Tapu ra?

22 Eaa te apinga aroa maata roa tei akariro maira kia rauka teia au mea ravarai? “I aroa mai te Atua i to te ao nei [i te au tangata], kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) E no reira, e mea puapinga maata te kite tika tikai i te Atua ra e tana Tamaiti oki, koia “te Rima Rave Maata o te ora,” no te aronga te anoano ra i te marama i te pae vaerua e te ora mutu kore. (Angaanga 3:15, NW) Ko te tumu te reira i oronga mai ei te puka openga o te Puka Tapu i te patianga te aru mai nei ki te aronga pouroa te inangaro ra i te tuatua mou e te ora mutu kore oki: “E aere mai. E ko tei akarongo ra, ka tuatua katoa aia e, E aere mai. E ko tei kaki ra, ka aere mai. E tei anoano ua ra, ka rave ua mai aia i te vai ora.”​—Apokalupo 22:17.

23. Eaa ta te aronga mei te mamoe rai te tu ka rave me ka aere mai ratou ki te marama ra?

23 Kare te aronga taakaaka mei te mamoe rai te tu e aere mai ki te marama anake o te ao nei mari ra ka aru katoa oki i taua marama ra: “Ka aru mai te au mamoe iaia, kua kite oki ratou i [te tangitangi o te tuatua mou] i tona reo.” (Ioane 10:4) E tika rava, kua rekareka ratou “i te aru vaitata anga i tona takainga vaevae” no te mea kua kite ratou e na te raveanga i te reira ka rauka te ora mutu kore no ratou.​—1 Petero 2:21, NW.

Akapeea Koe me Pau?

◻ Eaa nga tu marama e rua te aere maira mei ko mai ia Iehova ra?

◻ Eaa ra i maataʼi te puapinga o te akamarama anga i te pae vaerua i teia tuatau nei?

◻ Na teea mataara i tau ei e ko Iesu “te mārama maata”?

◻ Eaa ta Ioane pene 1 i akakite mai kia tatou no runga ia Iesu ra?

◻ Eaa te au apinga aroa te tae maira ki te aronga te aru ra i te marama no to te ao nei?

[Tutu i te kapi 10]

Kua kapiki a Simeona no Iesu e “ko te marama no te takore anga i te arai i mua i to te pa enua katoa”

    Au Puka Reo Rarotonga (1983-2025)
    Akaruke
    Aere ki Roto
    • Reo Rarotonga
    • Akaari ki Etai Ke
    • Taau e Inangaro
    • Copyright © 2025 Watch Tower Bible and Tract Society of Pennsylvania
    • Ture no te Taangaanga Anga i te Web Site
    • Ture Akamanaia
    • Privacy Settings
    • JW.ORG
    • Aere ki Roto
    Akaari ki Etai Ke