Te Au Mapu​—Eaa ta Kotou e Aruaru Na?

“E rere ke koe i te au anoano o to mea ou anga ra: e aruaru ra i te tuatua-tika, te akarongo, te aroa, te au, ko koe e te aronga katoa e akamori i te Atu ma te ngakau mā ra.”​—2 TIMOTEO 2:22.

1. Eaa to tatou manakonakoanga no te aronga mapu i rotopu ia tatou nei?

KUA akakite mai te nutipepa Penetekote Dagen (Te Ra) o Tuitene, “ko te Au Kite o Iehova te pupu te rauka maira ia ratou te numero maata roa o te au mema ou i te au mataiti ravarai e tei ia ratou ra te urupu maata rava o te aronga mapu.” Penei ko koe tetai tuanga o teia urupu mapu ma ra, e te mataku oki i te Atua ra. Penei kua akatupuia ake koe i te mataara Kerititiano mei toou meangiti mai anga, e penei kua akarongo ana koe e kua ariu mai ki te tuatua no te Patireia ko koe anake ua. Me eaa te turanga, te rekareka nei matou e kua riro mai ko koe tetai i rotopu ia matou nei. Ko to matou manakonako e ka aruaru ua atu koe i te arataa no te tuatua tika, mei ta te au mapu Kerititiano i rave i te anere mataiti mua ra. Penei te akataka meitaki maira te au tuatua a te apotetoro ko Ioane ia koe e: “No te mea te maroiroi na kotou, e te vai rai te tuatua a te Atua i roto ia kotou na, e kua vi taua vaerua kino ra ia kotou.”​—1 Ioane 2:14.

2. Eaa te au tumu te ka akariro i te aruaruanga i te tuatua tika kia rave anga ngata i te tuatau o “te puera anga ei mapu”?

² E manganui​—ae te maata anga—​o te au Kerititiano mapu i teia tuatau nei te tu ngaueue kore atura i te au taomianga o teianei ao. Inara, penei te kite ra koe e kare i te rave anga ngoie ua te tamou anga i te reira tu. Kia tae koe ki “te puera anga ei mapu,” ka tupu kia koe etai manako ngakau ou e te ketaketa. (1 Korinetia 7:36, NW) I taua taime rai, penei te tupu ra kia koe te manako ngakau no te maata te apainga i te ngai apii, i te ngutuare, e i roto oki i te putuputuanga. E pera katoa e taomianga oki tetai mei ko mai ia Satani te Tiaporo uaorai. I tona manako anga kia manganui ua atu tana e akavare, ka anga atu aia ki te aronga te akara anga ngoie ua ra te peke iaia​—mei tana i rave i te kainga i Edene rai. I reira, kua taanga atura aia i tana ravenga kikite, kare ki te mea kua pakari, te mea maata atu te kite koia a Adamu, mari ra ki runga i te mea ou, e te meangiti ra te kite koia te vaine, ko Eva. (Genese 3:1-5) E au anere ua atu mataiti i muri iora, kua rave akaou atura a Satani i etai tu kikite mei te reira rai ki runga i te putuputuanga Kerititiano ou i Korinetia ra. Kua karanga te apotetoro ko Paulo e: “Te mataku nei ra au, ko te akakinoia aea to kotou ngakau kia kore atu te tavaitai ua e tau i te Mesia nei, mei ta te ovi i pikikaa atu ia Eva i tona pakari.”​—2 Korinetia 11:3.

3, 4. Eaa etai apinga ta Satani te Tiaporo ka taangaanga ei akavare i te aronga ou ra, e penei eaa te ka tupu mai?

³ I teia tuatau nei, penei te mataku katoa ra to kotou au metua Kerititiano no kotou na. Kare e te manako ra ratou e e kino ta kotou ka rave, mari ra te kite ra ratou mei te au mea i tupu ana e e ngoie ua te aronga ou i te aru i te au angaanga kikite a Satani. (Ephesia 6:11, tataanga i raro ake) E mamao roa mai i te akara anga kino ra, kua akariroia ta Satani au ereere kia akara anga rekaia, kia inangaroia. Te akapapa manea maira te tivi i te tu noinoi apinga, te pirianga ainga muna kore, te akatotoa anga i te ta ua, e te rave purepure oki ei tamataora anga. Penei ka akakiia te au manako o te aronga ou i te au mea kare ra i ‘te mou tikai, kare i tau meitaki, kare i te tuatua-tika e te viivii kore, e kare e rekarekaia.’ (Philipi 4:8) Ko te taomianga a te uki tetai atu apinga akakino ia a Satani. Penei ka tuku te taoamianga a toou uki ia koe ki roto i tetai tu ketaketa kia aru atu i to ratou tu oraanga, te kakau, e te akamanea anga. (1 Petero 4:3, 4) Kua akakite maira tetai tangata tata nutipepa ko William Brown e: “Me e Atua okotai tetai, e Atua no teianei ao no te aronga mapu ko te Atua ia no te akatano anga kia aiteite atu. . . . Ko te tuke anga i te aronga o toou uki e tumatetenga kino atu ia i te mate ra.” Kua aaki maira tetai tamaine e Kite i Itale ra: “Kua akama au i te akakite ki toku au oa i te apii e e Kite au. E no te mea kua kite au e kare a Iehova e mareka mai iaku, kua mii au e kua maromaroa takiri.”

⁴ Auraka e vavareia​—te anoano ra a Satani kia arataki atu ia koe ki te kino noou. E manganui te aronga ou te vaira i roto i teianei ao te ka mamae i te akakore anga to ratou oraanga a te tuatau o te mate maata ra no te mea kua tuku ratou ia ratou uaorai kia arataki keia atu. (Ezekiela 9:6) Ko te mataara okotai e oraʼi na te aruaru anake i te tika ra.

E Matakite i te Pirianga Oa Kikino Ra

5, 6. (a) Eaa te au akaaoanga ta te tangata ou ra ta Timoteo i aro atu iaia i noo ra ki Ephesia? (e) Eaa ta Paulo akoanga no Timoteo ra?

⁵ Ko te reira te tumu o te ako ta te apotetoro ko Paulo i oronga atura ki te tangata ou ra kia Timoteo. No te tere atu i te tai ngauru mataiti, kua aere kapiti atu a Timoteo ma te apotetoro ko Paulo i tana tutaka anga ei orometua mitinari. I te tuatau ia Timoteo e rave ra i te angaanga orometua i te oire peikani o Ephesia ra, te noo ra a Paulo i roto i tetai are tapekaanga o Roma te tiaki ra i tona tamate angaia. I te vaitata anga te tuatau o tona matenga, kare e ekoko anga e te akamanako ra a Paulo e ka akapeea a Timoteo i reira. E oire a Ephesia tei matauia no tona apinganui, te akaturi, e te tamataora tau kore ra, e kare o Timoteo taeake akaperepere no te ako tauturu atu iaia ra.

⁶ E no reira kua tata atura a Paulo i tana “tamaiti akaperepere” i teianei au tuatua: “Kare ra to te are maata nei au āriki i te āriki auro anake, e te ario, e mea rakau tetai, e te karakaraea, e no te meitaki oki tetai papaki, e no te kino tetai. E teianei, kia tamā marie te tangata iaia uaorai i teianei au tuatua, e riro aia ei āriki no te meitaki, e akatapuia ïa, e te tau oki i to te Atu ra anoano, e te manea oki kia rave i te au angaanga memeitaki katoa ra. E rere ke koe i te au anoano o to mea ou anga ra: e aruaru ra i te tuatua-tika, te akarongo, te aroa, te au, ko koe e te aronga katoa e akamori i te Atu ma te ngakau mā ra.”​—2 Timoteo 1:2; 2:20-22.

7. (a) Eaa te ‘au ariki no te kino ra’ ta Paulo i akamatakite maira? (e) Akapeea e raukai i te au mapu i teia tuatau nei i te akono i ta Paulo i tuatua ra?

⁷ Kua akamatakite atura a Paulo ia Timoteo e noatu rai ko etai o rotopu i te au taeake Kerititiano ra penei e ‘āriki no te kino tetai’​—e aronga tataki tai etai kare i meitaki te tu akono ia ratou uaorai. Me e kino te kapiti anga no Timoteo ma tetai papaki o te au Kerititiano akatainuia ra, e maata atu ia te kino i te kapiti anga te Kerititiano ou i to teianei ao i teia tuatau nei! (1 Korinetia 15:33) Kare te aite anga o teia e kia kore koe e akaoaoa atu ki toou au taeake i te apii ra. Inara ka tau koe kia matakite e auraka kia kapiti maata roa ma ratou ra, noatu e me ka akara anga taka ke koe ia ratou i etai tuatau ra. E mea ngata rava teia i etai tuatau. Kua tuatua mai tetai tamaine no Paratiri: “E mea ngata ia. Te putuputu nei au te patiia mai e toku au taeake apii kia aere atu ki te au pati e te au ngai kare ra i tau no te au mapu Kerititiano. Kua karanga ratou: ‘Eaa! Kare koe e aere? E neneva tikai koe!’”

8, 9. (a) Eaa ka raukai i te kapiti anga noatu i te aronga akara anga meitaki o teianei ao, i te akatupu i te kino no tetai Kerititiano ra? (e) Ko aea te ngai e kiteaʼi e koe te au oa meitaki?

⁸ Penei ka akara anga meitaki tetai papaki o te au mapu o teianei ao no te mea ua e kare ratou e kai avaava, kare e tuatua viivii, e kare katoa oki e rave ana i te akaturi. Inara, me kare ratou e aruaru ana i te tuatua tika, ka ngoie ua to ratou manakoanga kopapa e te tu akono i te mana mai ki runga ia koe. I te pae atu i te reira, eaa te maata te tau anga toou manako ma to te aronga akarongo kore ra? (2 Korinetia 6:14-16) Eaa oki, ka riro te au mea puapinga i te pae vaerua taau e mou akaperepere ra ei mea “neneva” ua kia ratou ra! (1 Korinetia 2:14) Ka rauka ainei ia koe te tamou anga ia ratou ei oa ma te kore koe e tuku ua i toou au kaveinga meitaki?

⁹ E no reira e kopae ke i te au kapiti anga kare e meitaki ana. E akakotinga mai i toou kapiti anga ki te au Kerititiano manako i te pae vaerua ra tei inangaro tikai ia Iehova ra. E matakite katoa oki i te au mapu i roto i te putuputuanga te manga ekoko ra me kare te akaapaapa ua ra. Ia koe e tupu ra i te pae vaerua, e mea tika ra e ka taui katoa taau ra iki anga i te au oa noou. Kua karanga tetai tamaine mapu e Kite ra: “Kua akariro au i etai aronga i roto i te au putuputuanga tuke tuke ei oa ou noku. Na te reira i akakite mai kiaku nei i te tau kore tikai o te au oa no teianei ao.”

Rere Ke Anga i te Au Anoano Tarevake

10, 11. (a) Eaa te aite anga e kia “rere ke koe i te au anoano o to mea ou anga ra”? (e) Akapeea e raukai i tetai i te “rere ke atu i te akaturi”?

¹⁰ Kua raurau atura a Paulo ia Timoteo e “rere ke koe i te au anoano o to mea ou anga ra.” Ia koe e ou ra, ko te anoano kia akara meitakiia mai, kia tamataora, me kare kia akamerengo i te anoano no te ainga ra ka riro ei akakeu anga ia. Me kare e tapupuia, ka taki atu te reira au tu inangaro ia koe kia rave i te ara. E no reira kua karanga a Paulo e kia rere ke i te au anoano te ka akakino mai​—kia oro mei te mea rai e tei roto te oraanga o tetai ra i te tu tumatetenga.a

¹¹ Ei akatauanga, kua takiia atu te anoano no te ainga i te au mapu Kerititiano e manganui ki roto i te kino i te pae vaerua ra. No te tumu meitaki, i reira, te tuatua maira te Puka Tapu kia tatou kia “rere ke atu i te akaturi.” (1 Korinetia 6:18) Me te aere kapiti ra tetai tokorua, no te inangaro ia raua rai, ka tau raua kia akono i teia kaveinga na te kopae ke anga i te au turanga no te timataanga​—mei te vai anga ko raua anake ra i roto i tetai pia taka ke me kare i tetai motoka te paka ua ra. E tangi anga peu takere ua te akapapa anga i tetai ei tiaki, inara ka tau te reira kia riro ei paruru anga tikai. E noatu rai e e mea tau ra etai au ravenga akakite i te inangaro, ka tau ra kia akanooia etai kotinga tau ei kopae ke i te tu akono viivii ra. (1 Tesalonia 4:7) Ka kapiti katoa oki te rere ke anga i te akaturi, i te kopae ke anga i te au teata me kare te akakite anga tivi te ka akatupu i te anoano tarevake ra. (Iakobo 1:14, 15) Me ka tomo atu te au manako akaturi ki roto i toou manako kare ra i anoanoia, e taui ke i te tumu anga i roto i toou manako. E tu e aaere, e rave i te tatau anga; e rave i etai angaanga no te ngutuare. E tauturu mana meitaki to te pure i roto i teianei tu.​—Salamo 62:8.b

12. Akapeea koe e kite ei i te makitakita i te kino ra? E akatutuia mai.

¹² I rungao i te au mea ravarai, ka tau koe kia apii i te makitakita, te rikarika, e kia reka kore takiri i te kino. (Salamo 97:10) Akapeea koe me makitakita i tetai apinga kanga me kare akarekareka ua i te akamata anga ra? Na te manako anga i te au mea ka tupu mai! “Auraka e vavare; kare ua te Atua e vare: ko ta te tangata e ruru ra, ko tana ra ïa e kokoti. Ko tei ruru i ta tona uaorai kopapa, ka rauka iaia te kino i taua kopapa ra.” (Galatia 6:7, 8) Me ka timataia kia tuku ua ki te inangaro ra, e tamanako ana e eaa te tupu anga maata roa atu​—ka akapeea teia i te akamamae anga i te Atua ko Iehova ra. (Akaaiteia atu kia Salamo 78:41.) E tamanako katoa oki, i te ka rauka kia tupu mai penei e nui anga anoano koreia me kare e tupu anga no tetai maki mate, mei te AIDS rai. E akamanako ana i te taitaia o te manako ngakau e te kore anga te akangateitei anga ia koe uaorai te ka akamamae ia koe. Penei ka riro katoa oki ei tupu anga no te tuatau roa katoa. Kua akatika tetai vaine Kerititiano e: “Kua rave maua ko taku tane i te pirianga ainga i mua ake i to maua aravei anga tetai i tetai. Noatu rai e e Kerititiano maua tokorua i teianei, kua riro to maua oraanga pirianga ainga kua topa i mua ana ei tumu no te pekapeka e te vareae i to maua akaipoipo anga.” Kare katoa oki e tau kia kore e manakoia, te ngere i toou au tuatau no te angaanga na te Atua ra pera katoa te akaateaia ki vao i te putuputuanga Kerititiano ra. (1 Korinetia 5:9-13) E tau ainei tetai ua atu akamareka anga poto ua kia tutakiia i te reira tutaki maata rava?

Aruaru Anga i Tetai Pirianga Vaitata ma Iehova

13, 14. (a) Eaa i koreia i rava ua, e kia rere ke i te kino ra? (e) Akapeea e raukai i tetai ‘te aruaru kia kite ia Iehova’?

¹³ Inara, kare i rava ua, e kia rere ke i te kino ra. Kua raurau katoaia a Timoteo kia “aruaru ra i te tuatua-tika, te akarongo, te aroa, te au.” Te akakite maira te reira i te rave anga pakari. Kua pati aiteite katoa oki te peroveta ko Hosea i te iti tangata tiratiratu kore o Iseraela ra e: “Ka aere mai, tatou ka oki kia Iehova ra . . . e aruaru ei tatou kia kite ia Iehova.” (Hosea 6:1-3) Kua rave ainei koe uaorai i tetai aruaru anga mei te reira? E maata atu te kapitiia maira i te reira i te aere ua anga ki te au uipaanga e te kapiti anga i toou nga metua i te angaanga tutu aere. Kua aaki maira tetai vaine Kerititiano e: “I akonoia mai au e toku nga metua i roto i te tuatua mou, e i papetitoia au i te tuatau e ou ra toku mataiti. . . . takitai ua ake toku kore anga e tae ki te uipaanga e kare oki au i kore e tutu aere no tetai marama, inara kare au i akatupu i tetai pirianga vaitata noku uaorai ma Iehova.”

¹⁴ Kua akatika katoa tetai atu mapu e koia oki tetai tei kore i kite tikai ia Iehova ei Oa e ei Metua, ma te manako anga iaia mei tetai Vaerua kitea kore ra. Kua topa aia ki roto i te rave anga akaturi e kua riro ei metua vaine kare i akaipoipoia e 18 ona mataiti. Auraka rava e rave i taua tu tarevake ra! “E aruaru . . . kia kite ia Iehova,” mei ta Hosea i manono maira. Na roto i te pure e te aaere anga ma Iehova i te au ra tataki tai katoa ra, ka rauka ia koe i te akariro iaia ei oa mou tikai noou. (Akaaiteia atu kia Mika 6:8; Ieremia 3:4.) “Kare ra aia i atea ke atu ia tatou katoa nei” me ka kimi tatou iaia ra. (Angaanga 17:27) E no reira e mea tau tikai kia akanooia te porokarama apii putuputu naau uaorai i te Puka Tapu ra. Kare te reira ravenga e anoanoia kia maata roa e kia riro ei rave anga ngata oki. “I te au ra katoatoa te tatau nei au i te Puka Tapu no etai 15 miniti ua,” ta tetai tamaine ou i tuatua ko Melody tona ingoa. E akataka i te tuatau no te tatau i Te Punanga Tiaki e te Awake! (E Ara!). E akateateamamao no te au uipaanga a te putuputuanga kia raukai ia koe te “akamaroiroi atu [ia etai ke ra] kia maata te aroa, e i te angaanga memeitaki ra.”​—Ebera 10:24, 25.

Oronga i Toou Ngakau ki Toou Nga Metua

15. (a) Eaa ra i rave anga ngataʼi i etai tuatau kia akarongo atu tetai i tona nga metua ra? (e) Eaa ra i riro ei te akarongo ei mea matauia e ei meitaki ia no te mapu?

¹⁵ Ka rauka ra kia riro nga metua mataku i te Atua ra ei tumu no te tauturu tikai e te turu anga. Inara e akamanako ana i taau tuanga ka tau kia rave: “E akarongo atu i to kotou au metua i tei tau i te Atu ra; e tuatua-tika oki te reira. ‘E akangateitei i to metua tane e to metua vaine;’ (ko te akauenga muatangana ia i pauʼia i te meitaki i akakiteia mai,) ‘Kia meitaki koe, e kia akaroaia toou puke rā i te enua nei.’” (Ephesia 6:1-3) E tika, te pakari maira koe e penei te anoano ra kia tere atu toou tu rangatira. Penei katoa oki te kite ra koe e te apikepike maira toou nga metua. “To tatou nga metua kopapa nei,” kua akatika maira te apotetoro ko Paulo e, “ka rauka ua ia ratou te rave i ta ratou i manako e ei meitaki.” (Ebera 12:10, The Jerusalem Bible) Inara, kia akamanakoia te au puapinga katoatoa, ko koe rai tei meitaki no te akarongo anga ia raua ra. Te aroa ra toou nga metua ia koe e te meitaki ra to raua kite ia koe i tetai ua atu tangata ke ra. Noatu rai e kare koe e akatika ua ana i ta raua, e mea matauia e ko te meitaki noou ta raua i roto i to raua ngakau. Eaa ka arai atu ei i ta raua tautaanga kia akono ia koe ‘e te apii ra ia koe kia pakari ma te ako a Iehova ra’? (Ephesia 6:4) E tika e, “e akavaavaa te neneva i te apii a tona metua tane.” (Maseli 15:5) Ka kite ra te mapu pakari i te mana o tona nga metua ra e ka akaari atu i te akangateitei anga tau.

16. (a) Eaa i pakari kore ei no te au mapu kia uuna i te au manamanata i to ratou nga metua? (e) Penei eaa te mea tau na te au mapu kia rave e meitaki mai ei te komiunikeiti anga ma to ratou nga metua ra?

¹⁶ Ka kapiti katoa te reira i te tuatua anga i te tuatua mou ki toou nga metua, ma te akakite anga kia raua me e manamanata toou, mei te au tu ekoko anga no runga i te tuatua mou ra e me kua topa akaou koe ki roto i te tu akono tau kore ra. (Ephesia 4:25) Te uuna anga i te reira au tu taitaia mei toou nga metua ka akatupu kia maata atu te au manamanata. (Salamo 26:4) E tika ra, ko tetai papaki o te au metua e meangiti ua te tautaanga i te komiunikeiti. “Kare rava toku metua vaine e noo ki raro e ka tuatuaʼi ei maua,” ta tetai tamaine ou ia i akaapa ana. “Kare rava au e maroiroi kia tuatua atu i toku manako no te mea te mataku ra au e ko te akaapa mai aia iaku.” Me ko koe tetai i roto i tetai turanga mei tera, e iki pakari i tetai tuatau tau no te akakite atu ki toou nga metua eaa to manako. “O mai na to ngakau kiaku nei, e taku tamaiti e,” ta Maseli 23:26 ia i raurau maira. E tamata putuputu i te uriuri i toou manako ma raua katoa ra, i mua ake ka tupu ei te au manamanata kikino rava.

E Aruaru i te Tuatua Tika!

17, 18. Eaa te ka tauturu i tetai mapu kia tamou marie i tana aruaru anga i te tuatua tika ra?

¹⁷ I te vaitata anga ki te openga o te rua o tana reta ra, kua akamaroiroi atu a Paulo ia Timoteo: “E tamou ua koe i taau au mea tei apii ra e kua aruaruia kia irinaki.” (2 Timoteo 3:14, NW) E rave koe kia tau ki te reira. Auraka e tuku i tetai ke ra me kare i tetai ua atu apinga kia akaanga ke ia koe mei taau aru anga i te tuatua tika ra. Ko to Satani ao​—ma tana au maunu akavare katoa ra​—kua ki katoa ia i te rave anga kikino anake. Kare e roa atu ka mamae te reira e te aronga katoa oki e tuanga nona i te akapouanga takiriia. (Salamo 92:7) E tauta pakari kia kore koe e akapouia ma te urupu katoa o Satani ra.

¹⁸ Ma te reira akakoroanga i roto i toou manako, ka tau koe kia akara matatio tamou i taau au akakoroanga, toou anoano, e te au manako oki. E ui kia koe uaorai, ‘Te tamou marie nei ainei au i te turanga teitei no taku tuatua e toku tu akono me kare toku nga metua e te au mema katoa oki o te putuputuanga e kite mai ana iaku? Eaa te tu oa taku e iki ana? Te riro ra ainei na toku uki o teianei ao e akaue mai eaa toku kakau e toku akamanea anga oki? Eaa te akakoroanga taku i akanoo noku uaorai? Kua akatinamouia ainei toku ngakau ki runga i te angaanga orometua i te au tuatau ravarai​—me kare ki runga ua i tetai angaanga i roto i te akatereanga a Satani no te au mea nei?’

19, 20. (a) Eaa ra i kore ei e tau tetai mapu i te tuku kia mana tetai apinga ke ki runga i tona manako i ta Iehova ra au umuumuanga mai? (e) Eaa te au apinga ka tau te aronga mapu kia akono no ratou uaorai?

¹⁹ Penei te kite ra koe i tei anoanoia kia akatikatika koe i toou manako anga. (2 Korinetia 13:11) Auraka e tuku kia mana tetai apinga ke ki runga i toou manako. Kia maara, kare a Iehova e manako mai ana kia maata atu mei taau ka tau kia oronga. Kua ui te peroveta ko Mika e: “Eaa ta Iehova inangaro ia koe ra, mari ra ko te rave i te tuatua-tau, e kia inangaro i te aroa, e te aerenga akamako tikai i to Atua ra?” (Mika 6:8) Kare teia i te mea ngata roa me ka akono koe i ta Iehova ra au apinga ei tauturu ia koe. E noo vaitata ki toou nga metua. E kapiti putuputu atu ma te putuputuanga Kerititiano ra. E mea meitaki oki, e tamata koe kia kite i te aronga pakari o te putuputuanga ra. Te manako maira ratou i te meitaki noou e ka tau ratou ei tumu no te turu e te akapumaana oki ia koe. (Isaia 32:2) I rungao i te au mea ravarai, e tatanu i te pirianga vaitata, e te maana ma te Atua ko Iehova ra. Nana e oronga mai i te ririnui e te anoano kia aruaru ua atu i te mea tika ra!

²⁰ Inara, ko tetai papaki o te aronga mapu, te akakino ra i ta ratou tamata anga kia tupu i te pae vaerua na te akarongorongo anga i te au akatangi anga imene tau kore. Na te atikara e aru mai nei e oronga mai i te manakoanga taka ke no teianei tumu tuatua.

[Au Tataanga Rikiriki i Raro]

Te Maara ra Ainei Koe?

◻ Eaa ra te aronga mapu i ngoie uaʼi te riro i ta Satani ra “au angaanga kikite”?

◻ Eaa ra i kino ei te kapiti vaitata anga ma te au mapu o teianei ao?

◻ Akapeea koe me rere ke i te ainga akaturi ra?

◻ Akapeea e raukai ia koe te aruaru i te pirianga vaitata ma Iehova ra?

◻ Eaa ra i puapinga maataʼi te komiunikeiti ma toou nga metua ra?

[Tutu i te kapi 16]

Ka rave pakari te au tokorua kia kite tetai i tetai i roto i te au turanga, mei te tupa orooro vai toka rai, kare e akataka ke ia raua i etai atu au tangata ra