Tiaki Anga i ta Iehova Au Mamoe Akaperepereia ma te Maru

KUA akarongo meitaki tikai te aronga pakari. Kua teretere ratou mei te 50 kiro mita mei Ephesia ki Mileto kia rauka mai te au ikuiku anga mei te apotetoro Paulo. I teianei kua maromaroa ratou i te akarongo anga e ko teia to ratou taime openga i te kite anga iaia. No reira kua kite ratou e ko te au tuatua te ka aru mai e mea puapinga maata tikai ia: “E teianei, e matakite ia kotou uaorai, e te anana katoa i akariroiaʼi kotou e te Vaerua Tapu ei [au akaaere] i rungao ra, kia [tiaki] oki kotou i te [putuputuanga] a te Atua, ko tana i oko i [te toto o tana uaorai Tamaiti].”​—Angaanga 20:25, 28, 38, akaaite NW.

Ko ta Paulo tuatua anga poto ua no runga i te au tiaki kua papu te reira i te akaari mai i tetai papaanga tuatua apinganui ki te aronga pakari o Ephesia. Kua kite ratou i te angaanga o te akapupuanga mai i te au mamoe i te au ngai uta i te pae mai. Kua matau katoa ratou i te au tuatua anga no runga i te au tiaki i roto i te au Tuatua Tapu Epera. E kua kite ratou e kua akaaite a Iehova iaia uaorai ei Tiaki no tona iti tangata.​—Isaia 40:10, 11.

Kua tuatua a Paulo ia ratou ei “au akaaere” i rotopu i “te anana,” e ei “au tiaki” o “te putuputuanga.” Inara te tuatua “au akaaere” te akakite maira e eaa ta ratou tuku anga angaanga, te tuatua “tiaki” te akatutu ra e akapeea ratou i te rave anga i te reira akaaerenga. Ae, kua anoanoia te au akaaere kia akono i te mema okotai o te putuputuanga na roto i taua tu aroa rai ta tetai tiaki ka rave i te akono anga i tana anana mamoe.

I teia ra, e meangiti ua te aronga pakari tei kite tikai i te akapupuanga i te au mamoe tikai. Inara te akakite ra te Puka Tapu i te au tuatua e manganui no runga i te au mamoe e te au tiaki, na roto tikai i tetai tu akatutu anga, i riro ei ta Paulo au tuatua ei mea tau tikai. E maata ua atu te ka rauka i te apiiia mei te au papaanga o te au tiaki ta te Atua i mareka ra i te au tuatau taito. Ka riro ta ratou akaraanga puapinga tikai ei tauturu i te aronga pakari o teia tuatau kia kite e eaa te au tu ta ratou ka anoano no te akatupu e raukaʼi i te tiaki i te putuputuanga a te Atua.

Te Tiaki Mataku Kore ko Davida

Me akamanako tatou i te au tiaki o te au tuatau Puka Tapu, i te maata anga o te taime ka maara ia tatou a Davida, no te mea kua akamata aia ei tangata akapupu mai i te au mamoe. Ko tetai apii anga mua ta tatou ka mou mai mei to Davida oraanga koia oki ei tiaki kare ia i tetai taoonga rongonui. Ko te tika, i te tae anga mai te peroveta ko Samuela no te akatainu i tetai tamaiti a Iese ei ariki no Iseraela no te tuatau ki mua, i te akamata anga kua akangaropoina takiriia a Davida mapu ra. No muri anake i ta Iehova kopae anga i tana au tamaroa mamaata e itu i taikuiaʼi a Davida, tei roto ra i te ngai ‘tiaki anga mamoe.’ (1 Samuela 16:10, 11) Noatu rai, to Davida au mataiti tei akapouia ei tiaki kua akapapa te reira iaia no te angaanga taumaro anga o te tiakianga i te pa enua o Iseraela. “I iki akera [a Iehova] i tona tavini ia Davida, tana i rave mai mei te koro mamoe ra . . . kia angai aia i tona tangata ia Iakoba,” i karangaʼi a Salamo 78:70, 71. Ma te tau i reira, kua tata a Davida i te Salamo 23 manea e te rongo meitakiia, te akamataanga ma te au tuatua: “Ko Iehova toku tiaki.”

Mei ia Davida, e tau te aronga pakari i roto i te putuputuanga Kerititiano kia tavini ei au tiaki tauturu akaaka e auraka e kimi i te rongonui kare i tau no ratou. Mei ta te apotetoro Paulo i tata kia Timoteo, ko te aronga te kimi ra i teia apainga tiakianga te ‘inangaro ra i te angaanga meitaki,’ kare i te tu rongonui.​—1 Timoteo 3:1.

Noatu e e angaanga akaaka ta Davida ei tiaki mamoe tikai, i tetai au taime kua anoanoia te manava maata. Ei akaraanga, i tetai ati anga i te apai anga te riona i te au mamoe mei te anana a tona papa e i tetai atu taime na te tapa, kua tu mataku kore atu a Davida e te tamate i te nga manu ta. (1 Samuela 17:34-36) Kua riro teia ei akaari anga umere o te tu manava me tamanako tetai e ka rauka i te riona i te tamate i te au manu e mamaata atu iaia uaorai. Ko te tapa paraoni Suria tei noo ana ki Paretaina, mei te 140 kiro karama te teiaa, ka rauka i te tamate i tetai ria ma tetai papaki anga okotai o tona maikuku ririnui.

Ko to Davida manako anga manava no te au mamoe a tona papa e akaraanga meitaki ia no te au tiaki i roto i te putuputuanga Kerititiano. Kua akamatakite te apotetoro Paulo i te aronga pakari o Ephesia no “te luko taae . . . kare e akaperepere i te anana.” (Angaanga 20:29) I teia au tuatau rai, ka tupu mai te au ati anga me anoanoia te au tiaki Kerititiano kia akaari i te tu manava e raukaʼi i te paruru i te turanga pae vaerua o te au mamoe a Iehova.

Koi riro e te au mamoe kia paruru mataku koreia, e tau katoa ratou kia akonoia ma te tu maru tikai, i te aruanga i te tiaki aroa ko Davida e te Tiaki Meitaki, ko Iesu Karaiti. (Ioane 10:11) Te kiteanga e na Iehova te anana, e tau te aronga pakari e auraka e rima teiaa i te au mamoe, “auraka ma te akaueue ua ki runga i te tuanga a te Atua ra.”​—1 Petero 5:2, 3; Mataio 11:28-30; 20:25-27.

Orongaanga i Tetai Tutaki

Ko te pateriareka ra ko Iakoba tetai tiaki tei rongo meitakiia. Kua tamanako aia iaia uaorai ei rave i te apainga o te akono anga i te au mamoe tataki tai tei orongaia kiaia kia akono. No reira no tana akono anga ma te akarongo ra i te au anana a tona Papa ongai, ko Labana, i muri ake i te 20 mataiti kua rauka ia Iakoba i te karanga e: “Kare rava taau mamoe, e taau puakanio i maemo ta ratou anaunga, kare oki te au toa o taau ra anana i kaingaia e au. Ko tei etieti i te puaka taae ra, kare ïa au i apai atu kia koe na; naku ïa i tutaki; e ko tei riro i te ao ra, e ko tei riro oki i te po, kua umuumu mai koe i te tutaki iaku nei.”​—Genese 31:38, 39.

Ka akaari te au tiaki Kerititiano i tetai manako anga maata atu no te au mamoe ta te Tiaki o to tatou au meta ra, ko te Atua ko Iehova, “i oko i [te toto o tana uaorai Tamaiti, NW].” (Angaanga 20:28; 1 Petero 2:25; 5:4) Kua tuatua a Paulo i teia apainga puapinga i tona akamaara anga i te au Kerititiano Epera e ko te au tangata te rave ra i te arataki anga i roto i te putuputuanga “te tiaki ra ratou i to kotou au [meta ei aronga te ka oronga i tetai tutaki, NW].”​—Ebera 13:17.

Kua akaari katoa mai to Iakoba akaraanga e ko te angaanga a tetai tiaki kare e taime i kotingaia. E rave anga ao e te po te reira e i te maata anga o te taime ka umuumuia te akaatinga anga iaia uaorai. Kua akakite aia kia Labana e: “I mate au i te pukakā i te ao, e te anu i te po; e kare oki aku e moe.”​—Genese 31:40.

Kua tika tikai teia i te aronga pakari Kerititiano aroa e manganui i teia ra, mei ta te kite anga te ka aru mai e akatutu maira. Kua tukunaia tetai tungane ki roto i te pia akono pakari o tetai are maki i muri ake i te tupu anga tetai makitoro anga tuma roro ma te au manamanata. Kua akanoo tona ngutuare tangata kia noo i te pae iaia i roto i te are maki i te ao e te po. Ei oronga mai i te turu anga akono e te akamaroiroi anga tei anoanoia, kua akatikatika tetai o te aronga pakari o te reira ngai i tana akapapa anga raverave ua e raukaʼi iaia i te atoro i te tangata maki ra e tona ngutuare tangata i te au ra takitai. No te rave anga rapakau anga akono pakari a te are maki ra, kare i rauka putuputu ana iaia i te atoro i te ao. Tera te aite anga i te maata anga o te taime kua aere te tangata pakari ki te are maki i te roa anga o te po. Inara kua rekareka aia i te aere ki reira i te au po ravarai. “Kua kite mai au e kua anoanoia e kia atoro atu i te taime tei tau ra ki te tangata maki, kare ki te taime tei tau ra kiaku,” i karangaʼi te tangata pakari. I te meitaki anga mai te tungane kia akanekeia atu ki tetai ngai o te are maki, kua tamou ua atu rai te tangata pakari i te rave i tana au atoro anga akamaroiroi i te au ra.

Ta Mose i Apii mai ei Tiaki

Te akatutu ra te Puka Tapu ia Mose ei ‘maru maata i to te tangata ravarai o te ao katoa nei.’ (Numero 12:3) Inara, te akaari maira te papa anga e kare teia i tupu ua ana i te au taime ravarai. Ei tangata mapu, kua tamate aia i tetai Aiphiti no te rutuanga i tetai taeake Iseraela. (Exodo 2:11, 12) Kare tikai teia i te rave anga a tetai tangata maru! Inara, a muri akera ka taangaanga te Atua ia Mose no te arataki i tetai iti tangata e te mirioni ua atu na roto i te metepara ki roto i te Enua Taputouia. Te taka meitaki ra i reira, e te anoano ra a Mose i te terenianga maata atu.

Koi rauka takere ei ia Mose te terenianga noa nei “i te au tuatua pakari a to Aiphiti,” e maata atu tei anoanoia iaia no te tiaki i te anana a Iehova. (Angaanga 7:22) Eaa atu te tu terenianga te ka raveia? No te 40 mataiti kua tuku ua te Atua ia Mose kia tavini ei tiaki akaaka i roto i te enua o Midiana. Iaia e akono ra i te au anana a tona papa ongai ko Ietero, kua akatupu a Mose i teia au tu memeitaki mei te akakoromaki, te maru, te akaaka, te akakoromakianga roa, te tu maru e te akatere iaia uaorai. Kua apii katoa aia i te tiaki ia Iehova. Ae, te akonoanga i te au mamoe tikai kua akapapa meitaki te reira ia Mose kia riro mai ei tiaki tau meitaki no te iti tangata o Iseraela.​—Exodo 2:15–​3:1; Angaanga 7:29, 30.

Kare ainei teia i te au tu tikai te anoanoia e tetai tangata pakari e raukaʼi i te akono i te iti tangata o te Atua i teia ra? Ae, no te mea kua akamaara a Paulo ia Timoteo e ko te “tavini o te Atu nei . . . kia maru ra aia i te tangata katoa nei, e te tau oki kia apii ia etai ke, e te akakoromaki marie, ma te apii maru marie atu i te aronga i patoi maira.”​—2 Timoteo 2:24, 25.

Penei te vaira te au taime me manamanata tetai tangata pakari iaia uaorai no te mea e ngata iaia i te akatupu i teia au tu ma te ki katoa. Noatu rai, kare aia e tau kia akamutu. Mei ia Mose rai, penei kua roa te tuatau i te akatupu katoa anga i te au tu tei anoanoia no tetai kia riro mai ei tiaki meitaki. Inara, kare e roa, ka tutakiia mai teia tauta anga ma te akatenga.​—Akaaite 1 Petero 5:10.

Ei tangata pakari, penei kare koe e taangaanga maataia ana mei tetai pae atu. Penei e, mei ia Mose rai, te tuku ra a Iehova ia koe kia akatupu maata atu i tetai au tu puapinga? Auraka e akangaropoina e te ‘tiaki ra Iehova ia koe.’ Inara, e tau katoa tatou kia akamanako i te anoano ‘kia kakau ia tatou uaorai i te akaaka; e patoi te Atua i tei nengonengo, e oronga mai i te meitaki no tei akaaka.’ (1 Petero 5:5-7) Me rave koe uaorai i teia au mea e te ariki i te terenianga ta Iehova e tuku maira, ka puapinga maata atu koe kiaia, mei ia Mose rai.

E Mea Akaperepereia ta Iehova Au Mamoe Pouroa

Kua kite te au tiaki irinakiia e te aroa o te au tuatau Puka Tapu tetai rave anga apainga i te au mamoe tataki tai. Kia tau katoa teia i te au tiaki i te pae vaerua. Te taka meitaki ra teia mei ta Paulo au tuatua: ‘E matakite i te anana katoa.’ (Angaanga 20:28) Koai ma te ka kapitiia ki roto i “te anana katoa”?

Kua oronga a Iesu i tetai akatutu anga no runga i tetai tangata tei rauka ra e tai anere au mamoe inara kua viviki aia i te kimi no tetai tei aere ke ra no te akaoki mai i te reira ki roto i te anana. (Mataio 18:12-14; Luka 15:3-7) Pera katoa e tau tetai akaaere kia manako atu i te mema takitai o te putuputuanga. Te angaanga kore i roto i te angaanga orometua me kore i te aereanga ki te au uipaanga Kerititiano, kare te aite anga e kare te au mamoe i te tuanga akaou no te anana. Ka vai rai aia ei tuanga no “te anana katoa” ta te aronga pakari i “oronga i tetai tutaki” kia Iehova.

Kua manata tikai tetai pupu aronga pakari e ko etai pae tei piri mai ana ki te putuputuanga kua topa ki roto i tetai turanga angaanga kore. Kua akapapaia tetai akapapaanga no teia aronga, e oti kua raveia te tauta anga takake no te atoro ia ratou e te tauturu ia ratou no te oki mai ki ta Iehova anana mamoe. Mei teaa atura to te aronga pakari tu akameitaki i te Atua e e tere atu i tetai rua e te apa mataiti, kua rauka ia ratou i te tauturu e tere atu i te 30 au tangata kia maroiroi akaou i roto i te angaanga a Iehova. Ko tetai o ratou tei tauturuia ra kua maroiroi kore ana no etai 17 mataiti!

Te puapinga o teia apainga, kua akakite maataia teia ki te au akaaere no te tika no runga i te au mamoe e kua ‘okoia i te toto o ta te Atua uaorai tamaiti.’ (Angaanga 20:28) Kare e tutaki anga maata atu tei tutakiia no teia au mamoe akaperepereia. Ka akamanako ana i te au taime e te au tauta anga katoatoa tei akapouia ki runga i te angaanga orometua o te kimi anga e te tauturu anga i te au tangata takitai ma te tu mamoe! Kare ainei i reira e tau e kia tukuia tetai tauta anga mei teia no te akono ia ratou katoatoa i roto i te anana mamoe a te Atua? E tikai, e mea akaperepereia te au mamoe katoa i roto i te putuputuanga.

Noatu e me piri tetai mema o te anana ki roto i te rave anga tarevake pakari, kare ta te aronga pakari apainga e taui. Ka tamou ua atu ratou i te manako ei au tiaki, ma te maru e te tu maru te tautaanga i te akaora i tei rave i te tarevake me ka rauka. (Galatia 6:1, 2) Ma te mii tikai, i tetai au akaraanga kua kiteaia mai e kua ngere tetai mema o te putuputuanga i te tu maromaroa atua no te au ara pakari tana i rave. I tau ki te Tuatua Tapu e apainga i reira na te au tiaki aroa no te paruru i te toenga o te anana mei teia tu kino.​—1 Korinetia 5:3-7, 11-13.

Noatu eaa te tu, te tuku ra te Atua ko Iehova i te akaraanga tiama o te akaarianga i te tu tangi ki te au mamoe tei ngaro. Te karanga ra to tatou Tiaki ma te tu tangi e: “Naku e kimi i tei ngaro ra, e e akaoki mai i tei iia keia, e e tākaikai i tei aati ra, e e akamaroiroi i tei maki ra.” (Ezekiela 34:15, 16; Ieremia 31:10) Ei aru i teia akaraanga meitaki tikai, kua raveia tetai akanoo anga aroa no te au tiaki pae vaerua i teia tuatau kia atoro i te au tangata tei akaateaia ki vao, penei e ka ariu mai i teianei ki ta ratou tauturu. Teia au tauta anga tangi no te akaoki mai i teia au mamoe tei ngaro, kua akatupu ia i te ua memeitaki. Kua karanga tetai tuaine tei akaokiia mai e: “I te atoro anga mai te aronga pakari, ko te akamaroiroi anga te reira taku i anoano no te oki akaou mai.”

Kare e ekoko anga e ta Paulo au tuatua ki te aronga pakari o Ephesia i Mileto kua ki te reira i te aiteanga puapinga​—no ratou e te au tiaki i teia tuatau. Ko tana tuatua anga no runga i te au tiaki, e akamaara anga te reira o te au tu tei inangaroia mei te au tiaki—​te au tu mei te akaaka e te manava, tei akaariia e te ariki tiaki ko Davida; tetai manako anga no te apainga e te akono ma te paruru, tei kitea i ta Iakoba angaanga anga i te ao e te po; e tetai tu puareinga no te ariki i te terenianga maata atu ma te akakoromaki, mei tei akaariia e Mose. E tikai, ka riro teia au akara anga Puka Tapu ei tauturu i te aronga pakari o te putuputuanga no te akatupu e te akaari i te au tu tei anoanoia e raukaʼi ia ratou ma te maru i te ‘tiaki i te putuputuanga a te Atua, tana i oko i te toto o tana uaorai tamaiti.’