“Kare Rava e Rauka ia Maua i te Tuatua Ua!”

KO MICHAEL, e roia, kua tano e e tangata oraora aia no te komunikeiti. Kua anoano tikai tana ngai angaanga i te reira mei iaia ra. Inara i muri ake i te 16 mataiti o te akaipoipoanga, kua maroia a Michael kia kite e me aere mai aia ki te kainga ki tana vaine, ko Adrian, kua ngaro rai tana au ravenga tukatau no te komunikeiti. “Te kimi apa anga, te avirianga, te peianga i te au tuatua akakino,” i maara ei ia Michael, “ka karo ua rai maua ko Adrian, e kua manako mai au e ka akaroiroi teia ia maua. Kua manako mai au e me e akaipoipoanga teia, te titiri anga tamou o te tu merengo kore e te akariri anga. Me ka na reira ua rai maua no te toenga o to maua oraanga kapiti, ka inangaro au i te akaruke​—kare taku i te tuatua kanga ua. Kare rava e rauka iaku i te aro atu i te 20, 30, 40 mataiti o te reira tu akariri anga e te marokiakia putuputu.”

Kare teia au tu nei i tupu ua kia Michael raua ko Adrian. Te tika tikai ra te reira i te au tokorua e manganui tei taui ua to ratou pirianga mei te taanga ki te akamutu anga i te pupui. Ka aruru ua rai te pukapuka anga ngoie roa atu ki roto i te tamaki anga tuatua. Ka “akarongo” ratou i te au mea tei kare i tuatuaia. Ka tuatua ratou i te au mea kare i akakoroia. Ka tamaki ratou e ka akaapa, e oti ka noo ua ma te muteki anga riri tikai. Kare ratou e akatakake, e kare katoa ratou i te “kopapa okotai” tikai. (Genese 2:24) Kua akamutu takiri te pirianga. Te nekeanga ki muri tera te aite anga ko te takakeanga; te nekeanga ki mua tera te aite anga te aravei tika anga atu i te au tu ke ke. Ei kopae i te mamae anga i nga iki anga, ka tuku teia au tokorua i te akamamao anga ia ratou uaorai i te pae o te manako ngakau mei tetai e tetai.

Te anoano ra teia au tokorua ‘kia rauka te kite tikai’ i roto i to ratou akaipoipoanga. (Maseli 1:5) Ka rauka teia kite tikai i roto i te Tuatua na te Atua, koia te Puka Tapu. Te akapapu ra te rua o ta Paulo reta kia Timoteo no runga i te Puka Tapu e e “puapinga ra no te apiianga, te ako tika anga, te akatikatikaanga i te au mea.” (2 Timoteo 3:16, NW) Te tau tikai ra teia no te rapakauanga i te topa anga o te komuniketi anga i roto i te akaipoipo anga, mei ta tatou ka kite ra.