Au Uianga a te Aronga Tatau

Ka tau ainei tetai Kerititiano kia tomo ki roto i tetai pitiniti ma tetai tangata akarongo kore, i te mea te akakite maira te Puka Tapu kia tatou e: “Auraka kotou e kapitiia ma te tau kore i te aronga akarongo kore ra”?

Te kite ra tatou i te ako anga ia 2 Korinetia 6:14-16: “Auraka kotou e kapitiia ma te tau kore i te aronga akarongo kore ra: eaa to te tuatua-tika tau anga i te tuatua-tika kore? e eaa to te mārama tau anga i te poiri? Eaa to te Mesia tau anga ia Beliala? e eaa to te tangata akarongo ra puapinga i te tangata akarongo kore? E eaa to te nao o te Atua ra aite anga atu i te idolo?”

Kare e tumu no te irinaki e kua oronga te apotetoro Paulo i teia ako anga ma te manako atu i te akatumuanga i te au arairai anga tikai, mei to te Kerititiano tei tomo ra ki roto i tetai pitiniti ma tetai tangata akarongo kore ra. Inara, te tau ra tana ako anga no te reira, e pera katoa no tetai atu au rave anga o te oraanga.

Kua tata a Paulo i te reira ako anga ki tona au taeake Kerititiano i Korinetia taito ra. Te nooanga i roto i tetai rave anga oire pikikaa tikai ra, kua noo ua ratou i te autu atu i te au kino i te pae o te tu akono e te pae vaerua. Me kare ratou e matakite, ka rauka te maeu anga ki te au mana tau kore i te akaparuparu marie i to ratou manako tamou ei iti tangata takake, ‘ei uki ikiia ra, e kau taunga ariki, e iti-tangata tapu, e aronga okoia.’​—1 Petero 2:9.

I mua ake ka tata ei i te ka mama mai ia 2 Korinetia 6:14-16, kua rave ana a Paulo i tetai manamanata pakari tei tupu i rotopu i tona au taeake Kerititiano. Kua tuku ua ratou i tetai rave anga tau kore pakari kia tupu i rotopu ia ratou, no reira kua akatere a Paulo ia ratou kia akaatea, me kore kia akatakake, i te tangata ara tataraara kore ra. (1 Korinetia 5:1) Te akaari maira te rave tarevake a te reira tangata e ka riro te piri anga kino me kore te tomo anga paruru koreia ki roto i te reva akono o teianei ao ei pa i te au Kerititiano.

Kua anoanoia te au Kerititiano Korinetia kia kopae i te piri anga ki te tangata tei akaateaia, inara ko te aite anga ainei e te anoano ra ratou i te akatakake takiri ia ratou uaorai mei te aronga akarongo kore? Kia kopae takiri ainei ratou i te au aravei anga katoatoa me kore te au raveraveanga ma te au Kerititiano kore, te riroanga mai ei akapupuanga noo takake, mei te au ngati Iuda tei akaatea atura ki Qumran i te pae i te Tai Mate? Ka tuku ana ia Paulo kia pau: “Te tata atu nei au i teianei episetole ia kotou na e, auraka kotou e kapiti atu ki te kanga: Auraka ra te au kanga ravarai, . . . o teianei ao ra; naringa oki te reira, e akaruke mai kotou i teianei ao e tikaʼi.”​—1 Korinetia 5:9, 10.

Te taka ua ra te aite anga o taua au tuatua. Kua kite a Paulo e te vaira rai te au Kerititiano i runga i teia paraneta, te nooanga i rotopu e vaitata rai te aravei anga i te au ra takitai ma te aronga akarongo kore tei akaaka ra to ratou tu akono e tei tuke ra ta ratou au turanga. I te mea e kare te reira e rauka i te kopaeia, e tau te au Kerititiano kia matakite i te au kino o te reira au tu aravei anga.

I teianei ka akara ana tatou i te rua o ta Paulo reta ki te au Korinetia. Kua tuatua aia e te tau meitaki ra te au Kerititiano ei au orometua no te Atua, ei au komono te tupauanga ia Karaiti. Kua akakite aia kia ratou kia paruru i tetai ua atu tumu no te akatatipakeanga ko te takino mai akonei i ta ratou angaanga orometua. (2 Korinetia 4:1–6:3) Kua raurau titika atu a Paulo i tona au taeake Kerititiano, tei riro ra ei au tamariki pae vaerua nana, kia maora atu i to ratou au tu aroa. (2 Korinetia 6:13) I muri ake i te reira kua raurau aia e: “Auraka kotou e kapitiia ma te tau kore i te aronga akarongo kore ra.” Kua taangaanga aia i tetai putunga akatuke anga tau no te akataka tikai i te reira manako.

Te akaari maira te aerenga tuatua e kare a Paulo e tuatua ra no runga i etai ngai tikai o te oraanga, mei te pitiniti me kore te ngai angaanga, e te akanooanga i tetai ture tau tikai kia akatumuia no te reira. Mari ra, te oronga maira aia i tetai ako anga atea, te tau e te tauturu ki te au taeake tana e akaperepere tikai ra.

Te tau ainei teia ako anga i roto i te akaraanga o tetai Kerititiano tei inangaro ra i te akaipoipo? Ae. I roto i tana reta mua, kua ako te apotetoro i te au Korinetia tei inangaro i te akaipoipo kia rave i te reira “kia tau ra i te Atu.” (1 Korinetia 7:39) Kua akataka tikai aia i te tu pakari o teia au tuatua i tona tata anga i muri mai e, mei tei akakiteia ia 2 Korinetia 6:14-18. I te mea e te manakonako ra tetai Kerititiano i te akaipoipo ki tetai kare i te tavini no Iehova e kare i te pipi na Karaiti, e tau aia, te tane me kore te vaine kia tamanakoia e te akapiri atura ki tetai tangata akarongo kore. (Akaaite Levitiku 19:19; Deuteronomi 22:10.) Ma te taka meitaki, ka apai ua mai te tau anga tau kore tikai i te au manamanata, kapiti mai te au mea pae vaerua rai. Ei akaraanga, penei e e aruaru te tangata akarongo kore i te akamori anga i tetai atua pikikaa i teianei me kore i te tuatau ki mua. Kua akakite a Paulo e: “Eaa to te Mesia tau anga ia Beliala?”

Akapeea i reira, i tetai atu ravenga o te oraanga​—te rave kapiti anga i te pitiniti ma tetai tangata akarongo kore? I etai au tu penei ka manako tetai Kerititiano e na te angaanga anga i tetai oraanga e te akonoanga i tona ngutuare tangata e ka umuumuia te tomoanga ki roto i te piri anga pitiniti ma etai atu kare i te taeake Kerititiano. (1 Timoteo 5:8) Ka tamanako ana i tetai au akaraanga ua:

Penei ka inangaro tetai Kerititiano i te akamata i tetai pitiniti okookoanga au tu apinga okooko, inara ko te ravenga ua rai na te ariki anga i tetai akapatana anga ma tetai tangata te ka rauka maira te au apinga me kore te au moni. Ka inangaro akaou atu tetai Kerititiano i te rave i te angaanga pama (me kore te akono puakatoro); inara kare e enua toe, no reira ka anoanoia aia kia rave atu i te reira na te akapiri anga atu ki tetai tangata tei puareinga ua ra i te riiti i te enua kiaia tera ua kia piri atu aia ki roto i te puapinga te ka rauka mai. Penei e kare e rauka i tetai akaou Kerititiano i te tomo ki roto i te pitiniti parama no te mea e meangiti ua ta Kaisara au raitini e oronga ana, e kua rave takereia te reira; ko te mataara anake ua koia oki na te akapiri anga iaia ki tetai kopu tangata akarongo kore tei raitiniia.​—Mareko 12:17.

E au akatutu anga ua teia. Kare matou e tauta ra i te takino i te au ravenga te ka rauka i te rave, e kare katoa matou e maani nei i tetai ua atu akakite anga o te akatika anga me kore te akatika kore anga. Inara na te akamanako anga i teia au akaraanga, kare ainei koe e kite ana no teaa te ako anga ia 2 Korinetia 6:14-18 kare e tau kia kopaeia?

Ko tetai Kerititiano tei tomo ra ki roto i tetai pitiniti ma tetai tangata akarongo kore, noatu e e kopu tangata e me kare, penei e e aravei atu i te au manamanata e te au timata anga tapapa koreia. Penei ka taopenga te patana e ko te ravenga e raukaʼi tetai puapinga tau tikai na te kore anga e ripoti i te au moni tei rauka me kare te kore anga e akono i te au papaanga e te au moni tei rauka ra a te aronga angaanga, noatu e te aati ra te reira i te au ture a te kavamani. Penei e ka mataora ua aia i te tutaki i te au tangata taritari ma te uuna ua ra no te au apinga kare i papaia i runga i te pira tikai. Ka piri ainei tetai Kerititiano ki roto i tetai ua atu tuanga o te reira me kore ra tu tika kore mei te reira? E eaa ta te Kerititiano ka rave me tae mai te taime no raua kia taina i te au pepa tero me kore tetai atu au pepa ture e akapeea raua i te rave anga i te pitiniti?​—Exodo 23:1; Roma 13:1, 7.

Penei ka inangaro te oa pitiniti akarongo kore i te akaputu i te au apinga te piri atura ki te au orote peikani, te tuku i te au kati orote na roto i te ingoa o te kamupani, e te akamanea i te pitiniti no te au orote akonoanga. Kua ui a Paulo e: “Eaa to te nao o te Atua ra aite anga atu i te idolo? ko te nao oki [tatou] o te Atua ora ra.” Mei teaa atura te tau i te tuatua: “E teianei, te na ko mairā Iehova, ‘E aere mai kotou ki vao, mei roto mai ia ratou ra, kia taka ke kotou, e auraka e rave ua atu i te mea viivii;’ ‘e naku e āriki atu ia kotou’”! (2 Korinetia 6:16, 17) Na te taangaanga anga i te reira ako anga pakari, kua iki te manganui o te au Kerititiano i te au tu ngai angaanga tei maeu atura ia ratou ki te au manamanata rikiriki te ka tupu mai.​—Ebera 13:5, 6, 18.

Kare te putuputuanga i akatumuia kia akono ma te tiaki me kore te kimikimianga i te au mea ravarai ta te au Kerititiano ka rave i ta ratou ngai angaanga, noatu e e aronga angaanga me kore e au ona pitiniti. E tikai, me kiteaia ake e kua piri atu tetai Kerititiano ki roto i te rave tarevake anga, mei te turuanga i te akamori anga pikikaa me kore etai tu pikikaa me kore kekeiaanga, ka rave i reira te putuputuanga i te au takainga no te tamou i te au turanga a Iehova.

Inara ko te tumu manako tikai, koia oki ka riro ta Paulo ako anga akauruia, “Auraka kotou e kapitiia ma te tau kore i te aronga akarongo kore ra,” ei tauturu i te au Kerititiano kia kopae i te au manamanata e tetai ua atu rave anga utunga tei anoanoia. Ka akamanako tikai te au Kerititiano pakari i te reira ako anga e kare e iki no te tomo atu ki roto i te au turanga te ka riro ra ratou i raro ake i te taomi anga maata no te tuku ua i ta ratou au kaveinga Puka Tapu. Me manako tetai tangata e kia tomo aia ki roto i te pitiniti ma tetai tangata akarongo kore ra, kare tetai pae e anoanoia kia viviki ua i te akava me kore te akakino iaia, te kiteanga e ka apai aia i te apainga mei tana iki anga. Ma te tumu tikai, kare a Paulo e akanoo ra i tetai ture tau tikai kia akatumuia no te tomoanga ki roto i te pitiniti ma tetai tangata akarongo kore. Noatu rai, auraka e kopae i tana ako anga. Kua akauru te Atua i te reira ako anga e kua papa i te reira i roto i te Puka Tapu ei puapinga no tatou. Te pakari ra tatou i te aru i te reira.