Kiteaanga te Taviri ki te Inangaro Taeake

“Kapiti katoa to kotou . . . akono i te Atua oki, ki te [inangaro, “NW”] taeake.”​—2 PETERO 1:5-7.

1. Eaa tetai tumu maata te akariro ra i te au akaputuanga o te au tangata o Iehova ra ei au atianga mataora tikai?

I TETAI tuatau kua topa ra kua aere atu tetai taote kare aia i te Au Kite no Iehova ra ki te orongaanga pepa no tana tamaine no ko mai i te Apii Punanga Tiaki Puka Tapu o Gileada, te ngai i tereniiaʼi aia no te angaanga mitinari. No te maata tona marekaanga i te tu mataora o te urupu tangata i reira kua manako aia e e meangiti ua te maki i roto i te reira au tangata ra. Na teaa i akariro kia mataora taua urupu tangata ra? No te reira tumu, eaa te akariro ra i te au akaputuanga ravarai o te au tangata o Iehova ra, i te au putuputuanga, te au uipaanga kotinga, e i te au uruoaanga tapere katoa oki, ei au atianga mataora? Kare ainei no te inangaro taeake ta ratou e akaari ra tetai ki tetai? Kare e ekokoanga, ko te inangaro taeake tetai tumu i tuatuaiaʼi e kare atu e pupu akonoanga te rauka ra ia tatou kia maata te rekareka, te mataora, e te marekaanga i to ratou akonoanga mei te Au Kite o Iehova ra.

2, 3. Eaa nga tuatua Ereni e rua te akakite maira e ka akapeea tatou e tau ei kia akamanako atu tetai i tetai, e eaa to raua nga tu taka meitaki ra?

² Ka tau ra tatou kia manakonako i te kite i taua inangaro taeake ra i te manakoanga i te au tuatua a te apotetoro ko Petero ia 1 Petero 1:22: “E tenana kua tamā i to kotou au [meta, NW] i te akarongo anga i te tuatua-mou i te Vaerua ra, e kua tae i te [inangaro, NW] taeake pikikaa kore ra, kia aroa maata kotou ia kotou uaorai ma te ngakau kinokino kore.” Ko tetai tumu anga o te tuatua Ereni tei uriia i konei e ‘inangaro taeake’ e phi·liʹa ia (inangaro). E pirianga vaitata tona aiteanga ki te aiteanga o te a·gaʹpe, ko te tuatua ia te putuputu ra te uriia e “aroa.” (1 Ioane 4:8) Noatu rai e te taiku putuputuia ra te inangaro taeake e te aroa mei te mea rai e aiteite raua, e tu takake to raua. Kare tatou e tau kia manako oripu ua e e aiteite raua tetai ma tetai, mei ta te aronga uri i te Puka Tapu e manganui e rave ra. (I roto i teia atikara e i roto i tetai atu te ka aru mai, ka akara taki tai aere i teia nga tuatua.)

³ No te tuke anga i rotopu i teia nga tuatua Ereni e rua nei, kua akakite mai tetai tangata apii e ko te phi·liʹa e “tuatua tikai no te pumaana e te piri vaitata e te inangaro.” I tetai tua, ko te a·gaʹpe e maata atu tona piri anga ki te manako. E no reira ia tatou e akaueia mai ra kia aroa (a·gaʹpe) atu i to tatou aronga enemi, kare ra o tatou inangaro no ratou. Eaa ka kore ei? No te mea “e kino te tuatua meitaki i te kapiti anga kikino ra.” (1 Korinetia 15:33) I te akakiteanga akaou mai e e tuke anga tetai te vaira te au tuatua a te apotetoro ko Petero e: “Kapiti katoa to kotou . . . [ki te inangaro, NW] taeake oki, ki te aroa.”—2 Petero 1:5-7; akaaite Ioane 21:15-17.a

Au Akaraanga no te Inangaro Taeake Takake Rava

4. Eaa ra a Iesu raua ko Ioane i inangaro takake ei no raua uaorai tetai no tetai?

⁴ Te oronga maira te Tuatua a te Atua i etai au akaraanga meitaki i te inangaro taeake takake rava. Ko teia inangaro takake kare i te tupuanga no tetai tu manako poitirere ua mari ra kua akanooia ki runga i te arikianga no etai au tu meitaki rava. Kare e ekoko anga e ko te akaraanga meitaki te kiteia ra ko to Iesu Karaiti inangaro no te apotetoro ko Ioane. E tika ra, e inangaro taeake to Iesu no tana au apotetoro tiratiratu katoa ra, e ko te reira no te tumu meitaki ia. (Luka 22:28) Ko tetai mataara i akaariia mai e ia te reira na te oreianga i to ratou vaevae, na te reira i oronga i te apii anga ia ratou no te taakaaka. (Ioane 13:3-16) Inara e inangaro takake to Iesu ia Ioane, tei putuputu ra a Ioane i te taiku anga. (Ioane 13:23; 19:26; 20:2) Mei ia Iesu ra, e tumu tona no te akaari i te inangaro no tana au pipi e tana au apotetoro oki, e mea tau rai e kua oronga a Ioane i tetai tumu kia inangaro takake a Iesu iaia no tona arikianga oonu ia Iesu ra. Te kite ra tatou i te reira i te au tataanga a Ioane, i tana Evangeria e pera katoa tana nga reta akauruia ra. E putuputu ra tana taiku anga i te aroa i aua tata anga ra! Ko te ariki anga maata rava o Ioane i to Iesu au tu i te pae vaerua te kitea ra i nga pene a Ioane 1 e te 13 ki te 17, e pera katoa oki tana akakite anga putuputu i to Iesu vai mai anga i mua ake i tona riroanga ei tangata.​—Ioane 1:1-3; 3:13; 6:38, 42, 58; 17:5; 18:37.

5. Eaa te ka rauka kia tuatuaia no te inangaro takake o Paulo raua ko Timoteo no raua uaorai?

⁵ Mei te reira katoa oki, kare tatou e tau kia manako kore i te inangaro taeake takake rava i te apotetoro ko Paulo raua ko tona oa Kerititiano koia Timoteo raua, raua rai, ko tei papu ra te akatumu anga ki runga i to raua arikianga i te au tu o tetai e tetai. Te vaira te au tuatua meitaki a Paulo i tana au tataanga no Timoteo, mei teia: “Kare oki oku e tangata mei iaia nei te tu i te ngakau, i te akono tikai i ta kotou na. . . . Kua kite ra kotou iaia, e mei ta te tamaiti akono anga i te metua ra, ko tana ïa akono anga iaku i te angaanga i te evangelia nei.” (Philipi 2:20-22) E manganui tana taiku anga ia Timoteo i roto i tana nga reta kiaia ra te akakite maira i to Paulo inangaro pumaana no Timoteo. Ei akaraanga, e akamanako ana ia 1 Timoteo 6:20: “E Timoteo e, e akono meitaki i tei tukuia atu ia koe na.” (Akara katoa 1 Timoteo 4:12-16; 5:23; 2 Timoteo 1:5; 3:14, 15.) E maata oki te tuke anga o ta Paulo nga reta kia Timoteo i tana reta kia Tito ra i te akataka anga i to Paulo ra inangaro takake no teia tangata ou nei. E mea tau kua pera katoa to Timoteo manako ngakau no to raua pirianga oa, mei tei kitea ra i ta Paulo au tuatua ia 2 Timoteo 1:3, 4: “I te mea e tika iaku kia manako ia koe i taku nei pure, . . . Te manako nei au i taua aue noou ra, e anoano maata toku kia kite atu au ia koe, kia akakiia mai au i te rekareka.”

6, 7. Eaa te manako ngakau o Davida raua ko Ionatana no raua uaorai, e no teaa ra?

⁶ Te oronga katoa maira te Au Tuatua Tapu Ebera i etai akaraanga meitaki, mei to Davida raua ko Ionatana. Ka tatau tatou e i muri ake i ta Davida ta anga ia Golia, “piri rava akera te ngakau o Ionatana ki te ngakau o Davida, aroa aturā Ionatana iaia mei te mea ko tona uaorai [meta, NW].” (1 Samuela 18:1) No te arikianga i ta Davida akaraanga no te maroiroi no te ingoa o Iehova e tona tu mataku kore i te aere atu anga kia aravei i taua tuputupua ra ia Golia kare e ekoko anga kua akariro ia Ionatana kia inangaro takake ia Davida ra.

⁷ No te maata te inangaro o Ionatana ia Davida kua tuku ua aia i tona uaorai oraanga ki roto i te turanga kino i te paruruanga ia Davida mei te Ariki ia Saula ra. Kare e tuatau i reka kore ei a Ionatana no to Davida iki angaia e Iehova kia riro koia te ariki o Iseraela i muri akera. (1 Samuela 23:17) Kua tau katoa to Davida inangaro oonu no Ionatana ra, mei te kitea ra e i tana i tuatua no tona aueanga i te matenga o Ionatana ra: “E tumatetenga toku ia koe, e taku taeake e Ionatana e! e mataora maata toku ia koe: e anoano maata roa toou iaku, e anoano maata ïa i to te vaine.” E tika rava, kua akairoia to raua pirianga ma te ariki anga mou tikai.​—2 Samuela 1:26.

8. Koai ma nga vaine e rua tei akakite ra i te inangaro takake no raua uaorai, e no teaa ra?

⁸ Tei ia tatou katoa oki te akaraanga meitaki i roto i te Au Tuatua Tapu Ebera no te inangaro takake o nga vaine tokorua, ko Naomi raua ko tana tamaine ongai kua takaua, koia a Ruta. E akamanako ana i ta Ruta au tuatua kia Naomi: “Auraka koe e tuatua raurau mai kiaku e akaruke ia koe, e kia oki au i toku nei aru anga atu ia koe: i te ngai taau e aere ra, e aere katoa ïa au; e te ngai taau e noo ra, e noo katoa ïa au ko toou iti-tangata, ko toku katoa ïa iti-tangata; e toou ra Atua, ko toku ïa Atua.” (Ruta 1:16) Kare ainei tatou e tau kia manako e na te tu akono o Naomi, e tana tuatuaanga no Iehova, na te reira i tauturu kia akakeuia teia tu akono ariki anga a to Ruta tuanga ra?​—Akaaite Luka 6:40.

Te Akaraanga o te Apotetoro ko Paulo

9. Eaa te akaari maira e e akaraanga meitaki a Paulo no te inangaro taeake ra?

⁹ Mei ta tatou i kite ana, e inangaro taeake takake rava to te apotetoro ko Paulo no Timoteo. Inara kua akanoo katoa oki aia i tetai akaraanga meitaki no te akakiteanga i te inangaro taeake pumaana no tona au taeake katoa ra. Kua akakite atu aia ki te aronga pakari no Ephesia mai e “ka toru akenei oku mataiti, kare [aia] i tivata i te ako atu i te tangata ravarai e pini ua ake, ma te roimata, i te po e te ao.” E inangaro taeake pumaana? Kare e ekokoanga no te reira! E kua pera katoa to ratou manako anga no Paulo. I to ratou rongoanga e kare ratou e kite akaou iaia, “aue anake iora ratou ravarai, takave maira ki runga i te kaki o Paulo, kua ongi maira iaia.” (Angaanga 20:31, 37) E inangaro taeake tei akatumuia ki runga i te ariki anga? Ae! Te kitea katoa ra tona inangaro taeake mei tana au tuatua ia 2 Korinetia 6:11-13: “E to Korinetia e! te karanga ua atu nei to matou vaa ia kotou, kua maora ua to matou ngakau. Kare kotou i apiapi ia matou, kua apiapi ra kotou i roto i to kotou uaorai [inangaro maru, NW]. E kia pera katoa mai kotou ia matou, (te karanga atu nei au mei te mea e e tamariki kotou naku,) kia maora katoa oki kotou.”

10. Te ngere anga i teaa o te inangaro taeake tei aru ra ki to Paulo akakite anga i tona timata anga ia 2 Korinetia pene 11?

¹⁰ Te taka meitaki ra, e ngere to Korinetia ra e manganui i te ariki anga inangaro taeake no te apotetoro ko Paulo ra. E no reira, kua akaapa tetai papaki o ratou ra e: “E mea teimaa tana leta e te maroiroi, kareka te tu o tona kopapa, e mea apikepike, e te reo tarevakaua.” (2 Korinetia 10:10) No reira rai a Paulo i taiku ei i to ratou “au aposetolo mamaata katoa ra” e kua akakeuia kia tuatua atu i te au timataanga i akakoromakiia e ia, tei tataia ia 2 Korinetia 11:5, 22-33.

11. Eaa te akakite anga te vaira no to Paulo inangaro no te au Kerititiano i Tesalonia ra?

¹¹ Te kitea puia ra to Paulo inangaro pumaana i te aronga tana i ako atura i tana au tuatua ia 1 Tesalonia 2:8 e: “Koia katoa matou, no te maata o to matou [inangaro maru, NW] ia kotou, kua tika rava ia matou i te oronga atu i te evangelia a te Atua ia kotou na, e auraka oki i te reira anake, ko matou katoa uaorai oki, no te mea kua riro kotou ei akaperepere na matou.” Ko te tika, no taua inangaro nona ra i te au taeake ou ra kare i rauka iaia i te tiaki kia rongo aia e te akapeea ra ratou​—no tona anoano maata kia kite aia e akapeea to ratou akakoromakianga i te takinga kinoanga​—kua tono atura aia ia Timoteo, tei oronga maira i te ripoti meitaki tei akapumaana maata maira ia Paulo. (1 Tesalonia 3:1, 2, 6, 7) E meitaki tikai te akakite anga a te Insight on the Scriptures e: “E ere mou piri tikai te inangaro taeake i rotopu ia Paulo e te aronga tana i ako atura.”

Ariki Anga​—Te Taviri ki te Inangaro Taeake

12. Eaa te au tumu te vaira no tatou kia akaari i te inangaro pumaana no to tatou au taeake?

¹² Kare e ekoko anga e ko te taviri ki te inangaro taeake ko te ariki anga ia. Kare ainei e e au tu meitaki to te au tavini akatapuia katoatoa o Iehova ra te ariki ra tatou, te akatupu ra i to tatou inangaro, e te akariroanga kia rekareka tatou ia ratou? Pouroa tatou te kimi ra i te Patireia o te Atua e tana tuatua tika. Pouroa tatou te maro pakari atura i to tatou nga enemi matauia e toru ra: ko Satani e tana au temoni, te ao kino i raro ake i ta Satani akatere anga, e te au tu noinoi tei akatuangaia maira i to tatou kopapa apa ua nei. Kare ainei e tau kia akono tatou i te turanga e te rave ra to tatou au taeake i te meitaki te ka rauka ia ratou i raro ake i taua au turanga katoa ra? Pouroa te au tangata i teianei ao tei to Iehova tua me kare tei to Satani tua. Ko to tatou au taeake tungane e te tuaine tei akatapuia ra tei to Iehova tua, ae, to tatou tua, e no reira ka tau no to tatou inangaro taeake.

13. Eaa ra i tau ei kia inangaro pumaana atu tatou i te aronga pakari ra?

¹³ Ka peea oki te arikianga i to tatou aronga pakari? Kare ainei e tau tetai ngai pumaana i to tatou au ngakau no ratou i te manakoanga i te mataara o ta ratou angaanga maata i te au apinga no te putuputuanga? Mei ia tatou katoa nei, te akono ra ratou i te au apinga na ratou uaorai e to ratou ngutuare tangata. Tei ia ratou katoa oki te au apainga mei ta tatou rai i te apii anga tataki tai, te aere ki te au uipaanga putuputuanga, e te aere i te angaanga tutu aere. E kapiti katoa mai, tei ia ratou te apainga no te akapapa porokarama no te au uipaanga, te rave i te ako anga ki te au tangata, e te akono i te au manamanata te ka tupu mai i roto i te putuputuanga, te riro ra i etai taime kia pou etai ora no te akarongorongo anga akavaanga. E mea tika, ka anoano tatou “kia mou i te reira tu tangata ei aronga akaperepereia.”​—Philipi 2:29, NW.

Akakite Anga i te Inangaro Taeake

14. Eaa te au tuatua tapu te akaue maira ia tatou kia akaari i te inangaro taeake?

¹⁴ Ei akamareka ia Iehova, ka tau tatou kia akakite i te manako ngakau pumaana anga i te inangaro taeake no to tatou au taeake akarongo, mei ta Iesu Karaiti raua ko Paulo i rave ra. Ka tatau tatou e: “Na roto i te [inangaro taeake] e inangaro maru atu tetai i tetai.” (Roma 12:10, Kingdom Interlinear) “No te pae i te [inangaro taeake], kare e umuumuia kia tata atu matou kia kotou, no te mea te apiiia ra kotou uaorai e te Atua kia aroa tetai i tetai.” (1 Tesalonia 4:9, Int) “E tamou marie i to kotou [inangaro taeake].” (Ebera 13:1, Int) E mea tika ka mareka to tatou Metua i te rangi ra me ka akaari tatou i te inangaro taeake no tana tamariki i te enua nei!

15. Eaa etai mataara no te akakite i te inangaro taeake?

¹⁵ I te tuatau o te au apotetoro ra e mea matauia no te au Kerititiano kia aravei atu tetai i tetai ma “te ongi tapu” me kare “te ongi aroa ra.” (Roma 16:16; 1 Petero 5:14) E akakite anga tikai i te inangaro taeake! I teia tuatau nei, i te au tuanga maata o te enua nei, ko te akakite anga tau meitaki ko te katakata anga oaoa ma te ngakau tae e te mou rima ketaketa tikai. I te au enua Ratini, mei ia Meiko rai, ko te aravei anga na roto i te tu takave anga, e akakite anga inangaro tikai. Penei ko teia tu inangaro pumaana i te tuanga o te reira au taeake ko tetai tumu ia no te tupuanga maata te kiteia ra i to ratou au enua katoa.

16. Eaa etai tu te ka rauka ia tatou te akaari i te inangaro taeake i te au Are Uipaanga Patireia ra?

¹⁶ Me tomo atu tatou ki roto i te Are Uipaanga Patireia te tapaepae atura ainei tatou i te akakite i to tatou inangaro taeake? Ka akariro te reira ia tatou kia tuatua i etai tuatua akamaroiroianga, e maata oki ki te aronga akara anga taitaia ra. Te akaueia maira tatou kia “akapumaana atu i te ngakau taitaia.” (1 Tesalonia 5:14) Ko tera tikai tetai mataara na tatou no te pirianga manako pumaana no te inangaro ­taeake. Ko tetai atu mataara meitaki na te akakite i te ariki anga no tetai ako anga meitaki i te uipaanga, tetai tuanga o te porokarama tei rave meitakiia ra, te tauta anga meitaki na tetai te apiiia ra i tana tuatua anga i te Apii Orometua Tutaraatua ra, e te vai atura.

17. Akapeea i raukaʼi i tetai o te aronga pakari te inangaro o te putuputuanga ra?

¹⁷ Akapeea te patianga i etai ke atu ki to tatou au ngutuare no tetai kaikaianga e penei no tetai kapu ti ua i muri ake i te uipaanga me kare te reira i roa rava? Kare aina e tau kia akatere tatou i te reira mei ta Iesu apii ia Luka 14:12-14? I tetai tuatau i topa kua akataoongaia tetai taeake rave angaanga mitinari i mua ana, ei akaaere arataki i te putuputuanga i te ngai ko te katoatoa o etai pae atu e au tangata kara ke. Kua kite aia i te ngere o te inangaro taeake, e kua tamata aia i te rapakau i te reira turanga. Naea? I te au Tapati tataki tai i muri akera, kua pati aia i tetai ngutuare tangata ke ra i tera epetoma i tera epetoma no te kaikaianga. I te openga o te mataiti, kua akakite mai ratou pouroa i te inangaro taeake kiaia.

18. Akapeea tatou i te akaari anga i te inangaro taeake no to tatou au taeake tungane e te au tuaine maki ra?

¹⁸ Me makiia tetai taeake tungane me kare tuaine, i tona kainga me kare i te are maki, ka akariro te inangaro taeake kia akono tatou kia kite tera taeake maki e te manako atura tatou iaia. E akapeea oki te aronga te noo ra ki te au ngutuare netianga? Eaa oki ka kore ei e aere ua atu koe e aravei iaia, e tuatua atu na runga i te tereponi, me kare e tuku atu i tetai kaati akakite anga i etai au manako akapumaana?

19, 20. Akapeea tatou me akaari e kua maora katoa oki to tatou inangaro taeake?

¹⁹ I te akonoanga i te reira au akakite anga inangaro taeake, e ui tatou ia tatou uaorai, ‘Te tu papaki tai ra ainei toku inangaro taeake? Te mana ra ainei te au tu mei te kara o te pakiri, te kite apii, me kare te au apinga, i taku akakite anga i te inangaro taeake? Te anoanoia ra ainei au kia maora katoa oki i toku inangaro taeake, mei ta te apotetoro ko Paulo i raurau ra i te au Kerititiano i Korinetia kia rave?’ Ka akariro te inangaro taeake ia tatou kia manako papu i to tatou au taeake, ma te arikianga ia ratou no to ratou au tu meitaki ra. Ka tauturu katoa oki te inangaro taeake ia tatou kia rekareka i te puapinga anga to tatou au taeake i te pae vaerua kare e kia vareae i te reira.

²⁰ Ka tau katoa te inangaro taeake kia akamatakite ia tatou kia tauturu i to tatou au taeake i te angaanga orometua. E mea tau kia aite atu ki ta tetai o ta tatou au imene (Numero 92) e akakite maira:

“E tauturu takinga meitaki atu i te aronga apikepike katoa,

Kia mataku kore katoa oki ratou i te tuatua anga.

Auraka e manako kore i te aronga mataiti ou ra,

E tauturu ia ratou kia maroiroi e kia takore atu i to ratou mataku.”

21. Eaa te tupuanga ka tau tatou kia manakonako atu me ka akaari tatou i te inangaro taeake?

²¹ No reira eiaa e ngaropoina ia tatou e i te akakiteanga i te inangaro taeake, te tau ra te kaveinga ta Iesu i tuatua i tana Tuatua i runga i te Maunga ra: “Ka oronga, e ka rauka ta kotou; e ki te aite, e taomiia, e ruruia, e maringi ua atu, na te tangata e riringi mai ki roto i to kotou kakau. Ko te aite ta kotou e aite atu, ko ta kotou rai ïa kia akaaiteia mai.” (Luka 6:38) Ka akapuapinga tatou ia tatou uaorai me ka akaari tatou i te inangaro taeake, ma te akakiteanga i te akangateitei anga i te aronga e au tavini no Iehova mei ia tatou uaorai nei. E mataora tika tikai to te aronga te rekareka ra i te akakiteanga i te inangaro taeake!

[Au Tataanga Rikiriki i Raro]

Akapeea Koe Me Pau?

◻ Eaa te au tuatua Ereni te akataka ra i to tatou au manako ngakau, e eaa to raua tuke anga?

◻ Eaa te taviri ki te inangaro taeake?

◻ Eaa ta tatou au akaraanga no te Tuatua Tapu no te inangaro taeake takake ra?

◻ Eaa i tau ei kia inangaro pumaana tatou i to tatou au taeake e i te aronga pakari katoa oki?

[Tutu i te kapi 15]

Kua raurau te apotetoro ko Petero kia kapiti atu tona au taeake i te inangaro taeake ki to ratou akarongo e etai atu au tu Kerititiano