Akamataraanga i te Mea Ngaro o te Ingoa Maata Rava Atu

E mea meitaki i te kite e ko te Korana Mutiremi e te Puka Tapu Kerititiano te tuatua ra no te ingoa maata rava atu. Teia uriuri anga te akamarama maira i te aiteanga e te puapinga o te ingoa maata rava atu. Te akaari katoa ra e akapeea te reira ingoa i te piri anga atu ki te au tangata katoatoa e ki to tatou oraanga no te tuatau ki mua i runga i te enua.

E MIRIONI ua atu te au tane e te au vaine tei ora ana e tei mate i runga i teia enua. I te maata anga o te taime kua mate atu ratou ma to ratou ingoa, e kua akangaropoinaia atu ratou. Inara ko tetai atu au ingoa maata​—mei ia Avicenna, Edison, Pasteur, Beethoven, Gandhi, e Newton—​te ora ua atura. Teia au ingoa te akapiriia atura ki te au mea i rauka, te au mea i kitea, e te au mea i maaniia e te aronga no ratou teia au ingoa.

Inara, te vai ra tetai ingoa tei maata atu i te au ingoa katoatoa. Pouroa te au mea umere i teia ao katoa, tei topa ki muri e to teia tuatau te piri atura i te reira. Te manakonako anga o te au tangata no tetai oraanga roa e te mataora te kapitiia atura ki teia ingoa!

E manganui tei inangaro kia rauka te kite no teia ingoa. Kua kimi ratou i te reira e kua ui ana no te reira, inara kare i kitea e ratou. No ratou kua vai rai teia ei mea ngaro. Ko te tika, kare e rauka i tetai tangata te kite i teia ingoa na te Ona rava o te reira e akakite atu i te reira kiaia. Ma te mataora, kua akamataraia te mea ngaro o teia ingoa akaaite koreia. Na te Atua uaorai i rave i teia kia rauka i te aronga e irinaki ra kiaia i te kite iaia. Kua akakite aia i tona ingoa kia Adamu, i reira kia Aberahama, kia Mose, e ki etai atu o Tona au tavini tiratiratu i taito ra.

Te Kimi Anga i te Ingoa Maata Rava Atu

Kua akakite te Korana no tetai tangata “tei kite oonu i te au Tuatua Tapu.” (27:40) I te akatakaanga i teia irava, kua akakite tetai tuatuaanga tei kiteaia e ko Tafsīr Jalālayn e: “E tangata tuatua tika a Asaf te tamaiti a Barkhiya. Kua kite aia i te ingoa maata rava atu o te Atua, e me kapiki aia i te reira i tetai ua atu taime, kua pauia mai aia.” Te akamaara maira teia kia tatou i te tangata tata Puka Tapu ko Asapha, tei tuatua ia Salamo 83:18 e: “Kia kite ratou e, ko Iehova toou ingoa, e ko koe anake Tei Teitei i te enua katoa nei.”

Ia Korana 17:2, ka tatau tatou e: “Kua oronga matou i te au Tuatua Tapu kia Mose e kua akariro ia ratou ei arataki no to Iseraela.” I roto i te reira au Tuatua Tapu, kua tuatua atura Mose ki te Atua i te nakoanga: “I na, kia tae au ki te tamariki a Iseraela ra, e kia karanga atu au kia ratou e, I tonokia mai au e te Atua o to kotou ai metua kia kotou nei; kia tuatua maira ratou kiaku e, Koai tona ingoa? e akapeea atu au kia ratou?” Kua pau atura te Atua kia Mose i te nakoanga: “E na ko atu koe ki te tamariki a Iseraela, Na te Atua o to kotou ai metua ra, ko Iehova, te Atua o Aberahama, te Atua o Isaaka, e te Atua o Iakoba, au i tono mai kia kotou nei: ko toku ïa ingoa e tuatau ua atu.”​—Exodo 3:13, 15.

I te tuatau taito, kua kite to Iseraela i teia ingoa maata o te Atua. Kua taangaangaia rai te reira ei tuanga no to ratou uaorai au ingoa. Mei ta tetai rai ka kite i te ingoa ko Abdullah, ko tona aiteanga “Tavini o te Atua,” kua rave te iti tangata o Iseraela i taito ra i te ingoa Obadia, te aiteanga “Tavini no Iehova.” Kua tapaia te metua vaine o te peroveta ko Mose e ko Iokebeda, penei ko te aite anga “E Kaka Oki a Iehova.” Te aite anga o te ingoa ko Ioane “Kua Takinga Meitaki Mai a Iehova.” E ko te aite anga o te ingoa o te peroveta ko Elia “Ko Iehova Toku Atua.”

Kua kite te au peroveta i teia ingoa maata e kua taangaanga i te reira ma te kauraro anga oonu tikai. Kua kiteaia te reira i roto i te au Tuatua Tapu, maata atu i te 7,000 au taime. Kua akamaata atu a Iesu Karaiti, te tamaiti a Maria i teia i te karanga anga i roto i tana pure ki te Atua: “Kua akakite atu au i toou ingoa i te au tangata o teianei ao, taau i o mai noku ra . . . E kua akakite atu oki au kia ratou, e e akakite atu rai au, i toou ingoa: e ei roto ia ratou te akaperepere taau i akaperepere mai iaku ra.” (Ioane 17:6, 26) I roto i tana tuatua rongonui no runga i te Korana, kua tuatua a Baydāwī no runga ia Korana 2:87, te nakoanga e kua rave a Iesu i te “akaoki mai i te au tangata mate na roto i te ingoa maata rava atu o te Atua.”

Eaa ra i reira tei tupu i riro ei te reira ingoa ei mea ngaro? Eaa ra ta te reira ingoa ka rave i te tuatau ki mua no tatou tataki tai?

Akapeea ra te Ingoa i Riro ei ei Mea Ngaro?

Te manako ra etai pae e ko te aite anga o “Iehova” i roto i te reo Epera ko “Allah” (Atua). Inara te aite ra a “Allah” ia ʼElo·himʹ, i roto i te reo Epera, tei manea maata atu i te tuatua ʼelohʹah (atua). Kua tupu tetai irinaki anga purepure i rotopu i te ngati Iuda tei paruru ia ratou kia kore e tuatua i te ingoa tu-atua, ko Iehova. No reira, me kite ratou i te ingoa Iehova ia ratou e tatau ra i te au Tuatua Tapu, kua riro ei peu na ratou i te karanga e ʼAdho·naiʹ, ko tona aite anga “Atu.” I etai au ngai, kua taui katoa ratou i te kopapa tuatua Epera o mua ana mei ia “Iehova” kia ʼAdho·naiʹ.

Kua aru katoa te au arataki akonoanga o Kerititome i te reira mataara. Kua mono ratou i te ingoa Iehova, i te “Atua” (“Allah” i roto i te reo Arapia) e te “Atu.” Kua tauturu atu te reira i te tupu anga o te apii anga pikikaa o te Toru Tai, tei kore i akatumuia i roto i te au Tuatua Tapu. E no teia, e mirioni ua atu tei akamori tarevake ia Iesu e te vaerua tapu e kua manako ia raua e kia aite ki te Atua.a

No reira, te kapiti ra te au arataki o te akonoanga ngati Iuda e to Kerititome i te apai anga i te apa no te totoa anga o te kite kore i te ingoa maata rava atu. Inara kua totou te Atua e: “E akatapu oki au i toku ingoa maata, . . . e kite oki te au etene e ko Iehova au.” Ae, ka akatupu te Atua kia kitea tona ingoa i te au pa enua ravarai. No teaa ra? No te mea kare aia i te Atua anake no te ngati Iuda me kore no tetai iti tangata anake me kore au tangata. E Atua ra a Iehova no te au tangata katoatoa.​—Ezekiela 36:23; Genese 22:18; Salamo 145:21; Malaki 1:11.

Te Ingoa Maata Rava Atu e to Tatou Oraanga i te Tuatau ki Mua

Kua karanga te au Tuatua Tapu e: “Ko te kapiki i te ingoa o [“Iehova,” NW] ra, e ora ïa.” (Roma 10:13) To tatou ora i te ra akavaanga te piri atura ki to tatou kiteanga i te ingoa o te Atua. Te kite i tona ingoa te kapiti maira i te kiteanga i tona au tu, au angaanga, e te au akakoroanga ma te oraanga kia rotai atu ki tana au kaveinga teitei. Ei akaraanga, kua kite a Aberahama i te ingoa o te Atua e kua kapiki i te reira ingoa. Ko tei tupu, kua rekareka aia i te pirianga meitaki ma te Atua, kua akaari i te tu akarongo kiaia, kua irinaki kiaia, e kua akarongo atu kiaia. No reira kua riro mai a Aberahama ei oa no te Atua. Pera katoa, te kiteanga i te ingoa o te Atua te uti atura ia tatou kia vaitata atu kiaia e te tauturu ra ia tatou kia akatupu i tetai pirianga kiaia, te mou piri anga atu ki tona aroa.​—Genese 12:8; Salamo 9:10; Maseli 18:10; Iakobo 2:23.

I roto i te Puka Tapu ka tatau tatou e: “Kua akarongo mairā Iehova, e kua kite e kua tataia iora tetai buka manakoanga ki mua iaia, no te aronga e mataku ia Iehova, e tei manako i tona ra ingoa.” (Malaki 3:16) Eaa ra tatou ka ‘manako atu’ ei i te ingoa maata rava atu? Te aite anga tikai o te ingoa Iehova “Nana e Akariro kia Tupu.” Te akaari maira teia ia Iehova e ko Tei akariro iaia uaorai kia tupu mai ei Akatupu i te au koreromotu. Ka apai ua mai rai aia i tana au akakoroanga kia kiteaia. Koia te Atua mana katoatoa, Tei Anga anake, tei iaia te au tu meitaki ravarai. Kare rava e tuatua okotai te ka riro ei akamarama i to te Atua tu-atua natura. Inara kua iki te Atua i te ingoa maata rava atu nona uaorai​—Iehova—​e te apai maira te reira ki te manako i tona au tu katoatoa, e te au akakoroanga.

I roto i te au Tuatua Tapu, te akakite maira te Atua ia tatou no tana au akakoroanga no te tangata. Kua anga te Atua ko Iehova i te tangata kia rekareka i te oraanga mutu kore e te mataora i roto i te Parataito. Tona anoano no te tangata koia oki kia riro mai te au tangata katoatoa ei ngutuare tangata okotai, taokotaiia i roto i te aroa e te au. Ka akatupu te Atua o te aroa i teia akakoroanga i te tuatau e vaitata maira ki mua.​—Mataio 24:3-14, 32-42; 1 Ioane 4:14-21.

Te akataka maira te Atua i te au tumu i mamae ei te tangata e te akaari maira e ka rauka te ora. (Apokalupo 21:4) Ia Salamo 37:10, 11, ka tatau tatou e: “E roa poto ake, e kare ua te tangata kino ra, koia tika rai, ka akara koe i tona ngai, e kare ua! Kareka te aronga maru ra, ka noo ïa i te enua, e ka rekareka ratou i te maata o te au ra.”​—Akara katoa ia Korana 21:105.

Ae, ka kiteaia te Atua na tona ingoa maata. Ka kite te pa enua e koia a Iehova. Eaa ia akameitaki anga umere i te kite i te ingoa maata rava atu, kia akakite atu no te reira, e kia mou piri atu ki te reira! Na te reira mataara, ka akatupuia ta te Atua akakoroanga rekareka i roto ia tatou tataki tai: “No te mea te inangaro maira aia iaku, ka akaora au iaia: ka akateitei au iaia ki runga, no te mea te kite ra aia i toku ra ingoa. E kapiki mai aia iaku ra, e naku e [“pau,” NW] atu kiaia; . . . Ka akamataora atu au iaia i te aʼo roa, e akakite au kiaia i te ora naku.”​—Salamo 91:14-16.

[Au Tataanga Rikiriki i Raro]

[Tutu i te kapi 5]

I te pu ngangaere i ka ra, kua akataka atu te Atua iaia uaorai kia Mose e ko ‘Iehova, te Atua o Aberahama’

[Akameitakianga]

Moses and the Burning Bush, na W. Thomas, Sr.