Au Uianga a te Aronga Tatau

Mei te mea e e tangata tikai te taunga taito ko Melekizedeka tona ingoa, eaa ra te Puka Tapu i karangaʼi e kare ona “tui tangata”?

Kua tataia teia akakite anga i roto ia Ebera 7:3. Ka akara ana i te irava i tona akapapa anga tuatua:

“E taua Melekizedeka ariki no Salema ra, e taunga na te Atua teitei, ko tei aravei atu ia Aberahama i te oki anga mai, mei te tainga anga i te au ariki ra, e kua akaora atura iaia; Ko ta Aberahama i oronga mai i te ngauru o te tuanga i te au apinga katoa o taua pou ra; ko te Ariki o te tuatua-tika tetai akatauanga o tona ingoa, e muri ake, ko to Ariki o te au, koia oki te ariki o Salema ra; Kare e metua tane, kare oki e metua vaine, kare e tui tangata i te taoonga taunga ra, kare e rā mua, kare oki e openga o tona ora anga; i akariroia aia mei te Tamaiti a te Atua ra, ko te noo rai ei taunga e tuatau ua atu.”​—Ebera 7:1-3.

Mei tei taikuia atu, e tangata tika tikai a Melekizedeka, mei ia Aberahama tikai, no tana i raverave tika atura. (Genese 14:17-20; Ebera 7:4-10) Mei te mea e koia ia, e nga metua rai i reira to Melekizedeka, e metua tane tona e te metua vaine, e penei e e tamariki tana. No reira, ei tangata i vai ana tona tui tangata, me kore papaanga tupuna. Kua ope katoa tona oraanga pae kopapa. I tetai tu kua mate a Melekizedeka, i tau ki ta te apotetoro Paulo akakite anga ia Roma 5:12, 14. Inara mei te mea e kare tatou i kite e i naea a Melekizedeka i mate ei e te akaoti anga i te tavini ei taunga, mei tera te tu ra kua tavini aia ma te kore i kitea tona openga.

I roto ia Ebera, kua tuatua a Paulo no runga ia Melekizedeka i te uriurianga i ta Iesu Karaiti tuanga ei Taunga Maata e te teitei. Te tuatuaanga ia Melekizedeka ei akaari anga, me kore ei akara anga, no Iesu i roto i tana tuanga kautaunga, kua karanga a Paulo e: “E Iesu, ko tei akariroia ei taunga maata e tuatau ua atu, mei ia Melekizedeka ra.” (Ebera 6:20) Na teea tu?

Kua kite takere ana paa a Paulo e kare te papaanga Puka Tapu e oronga mai ana i te au tuatua rikiriki no runga i to Melekizedeka kapionga kopu tangata​—tona ai tupuna me kore tetai ua atu uanga tei vai ra. Kare te reira akakite anga tuatua i te papaanga Puka Tapu. Mei ta Paulo akara anga i tana i kite takere me kore ta tatou i kite ra, penei e e tau i reira kia tuatuaia no Melekizedeka e “kare e tui tangata” (New World Translation of the Holy Scriptures; American Standard Version), “ma te kore te akapapaanga aerenga” (W. J. Conybeare), me kore ra “kare e papaanga tupuna.”​—J. B. Phillips.

Mei teaa ra te tu e mei te reira rai a Iesu? Me orongaia, kua kite tatou e ko to Iesu Metua ko te Atua ko Iehova e ko tona metua vaine tangata nei ko Maria o te kopu o Iuda. Noatu ra, te vaira te tu aiteite i rotopu ia Melekizedeka e Iesu. Akapeea? Kare a Iesu i anauia i roto i te kopu o Levi, te kopu no te au taunga i roto i te iti tangata Iseraela. Kare, e kare a Iesu i riro mai ana ei taunga na roto i te tui tangata. E kare katoa a Melekizedeka, tei kore i riro mai ei taunga “i te ture tuatua kopapa ra,” koia oki, na te anau angaia mai ki roto i tetai kopu e te uanga taunga. (Ebera 7:15, 16) Mari ra i te mea e kia riro mai ei taunga na roto i tetai metua tangata nei tei riro ana aia uaorai ei taunga, “i tuatuaia mai [a Iesu] e te Atua, e e taunga maata mei ia Melekizedeka te tu.”​—Ebera 5:10.

Tera tetai, kare o Iesu au uanga me kore au komono i tona taoonga taunga. I teia tu rai, kare ona tui tangata. Ka rave mutu kore aia i tana tavini anga taunga ei ikuiku tauturu. Kua tuatua a Paulo no runga i teia tavini anga mutu kore, te na ko anga:

“Kareka [Iesu] ra, no te mea e tika i te noo anga e tuatau ua atu, e kare tona taoonga taunga e riro ia etai ke. E teianei e tika meitaki rava atu iaia kia akaora i te aronga e na reira atu iaia ra i te aere ki te Atua ra, e tika oki aia i te ora anga e tuatau ua atu ei pati i ta ratou.”​—Ebera 7:24, 25.

E tau i reira ta tatou uriuri anga i ta Paulo au tuatua ia Ebera 7:3 ei mea maata atu i te manga kite ua tei akaputuia ra i tetai ngai i to tatou upoko. E tau te reira kia akaketaketa i to tatou tu ariki no te apinga aroa ta te Atua ko Iehova i rave no tatou e raukaʼi te akakore anga ara ma te mutu kore e no te mataara tana i akanoo no tatou kia rauka te tauturu e te arataki anga e tuatau ua atu.