E Irinaki ia Iehova
“Te irinaki nei au kia koe, e Iehova.”—SALAMO 31:1.
1. Akapeea ta Salamo 31 akakite i te irinaki anga i to Iehova ra kite i te oronga mai i te akapuanga?
KUA IMENE mai tetai reo tangi reka no tetai tangata, noatu kua roiroi tona manako e te kopapa, kua tuku iaia uaorai ki runga ia Iehova. Ka autu te akarongo, te akakite maira te au tuatua no taua imene tapu ra. Kua kitea e teia tangata te akapuanga ki roto i nga rima te tiaki maira o te Mana Katoatoa, mei te arumaki anga a te aronga takinga kino ra. “Te irinaki nei au kia koe, e Iehova,” te aere anga tana taramo. “Auraka au kia akama e tuatau ua atu; e akaora iaku i taau ra tuatua-tika.”—Salamo 31:1.
2. (a) Ka rauka ia tatou te tuku i te irinaki ia Iehova ei punanga ketaketa no tatou ki runga i ea nga poupou e rua? (e) Eaa to Iehova tu ei Atua?
2 Ko te tata taramo okotai ua tona irinaki anga—ko tei meitaki roa ia! E vaio ua atu etai apinga ke ki te ekoko anga, inara te vai tamou nei teia tika: Ko Iehova tona punanga ketaketa, tona akapuanga. Te vaira tona irinaki anga ki runga i nga poupou mou e rua. Ko tona akarongo tetai, kare ra a Iehova e tuku kia akama aia, e ko te rua, ko te tuatua tika ia o Iehova ra, tera te aiteanga kare rava Aia e akaruke takiri i Tona tavini. Kare a Iehova i te Atua te ka taakama i tona au tavini tiratiratu; kare aia e aati i tana taputou. Mari ra, e Atua mou aia e ka tutaki i te aronga tei tuku akatenga i to ratou irinaki anga kiaia. I te openga ra, ka tutakiia te akarongo! Ka rauka mai te akaora anga!—Salamo 31:5, 6.
3. Akapeea ta te tata taramo akamaata ia Iehova?
3 I te akapapaanga i tana akatangi anga imene ma te au tangianga mei raro akaaka roa no te iriea e te aue e tae roa ki te au take teitei no te akakite anga irinaki anga, kua kitea e te tata taramo ra te ririnui i roto iaia. Kua akamaata aia ia Iehova no Tona aroa tiratiratu. “Kia akameitakiiā Iehova,” ko tana ia i imene, “ko tei akakite mai i tona takinga-meitaki maata kiaku, i roto i te oire akaketaketaia ra.”—Salamo 31:21.
E Pupu Mana no te Akakitekite Patireia
4, 5. (a) Eaa te pupu maroiroi maata te akapaapaa nei ia Iehova i teia tuatau, e i akapeea ta ratou raveanga i te reira i teia mataiti angaanga kua topa akenei? (Akara i te papaanga i te au kapi 12-15.) (e) Na teea mataara ta te akaputuanga no te Akamaara Anga i te akakite mai anga e e maata atu te aronga te anoano ra kia kapiti katoa mai ki te pupu o te aronga tutu aere i te Patireia? (Akara i te papaanga.) (ng) Ko teea pupu i toou putuputuanga penei te tau ra kia kapiti atu ki te pupu tutu aere?
4 I teia tuatau nei, kua ora akaou mai te au tuatua o taua taramo ra. Kare e rauka i tetai ua atu patoi anga kino i te arai i te au imene akapaapaa ia Iehova ra, na tetai tumatetenga, me kare na tetai mate i te pae o te puapinga; e tika tikai, kua riro to Iehova ra takinga meitaki aroa ei meitaki no tona au tangata. Takapini i teianei ao i te mataiti angaanga kua topa akenei, kua tae te take o te pupu maroiroi maata ki te 4,709,889 i te au enua e 231, kua imene ratou i te tuatua no te Patireia o te Atua ra. Kare ratou e reka kore i te kavamani a Iehova no te rangi na roto ia Iesu Karaiti. I teia mataiti i topa akenei, kua akapou teia aronga akakitekite i te Patireia no te au putuputuanga e 73,070 i etai au ora e 1,057,341,972, katoa i te raveanga i te angaanga tutu evangeria. Kua riro te tupuanga mei te reira mai e 296,004 te aronga tei akatutu i to ratou akatapuanga ki te Atua na te papetito angaia i te vai. Mei teaa ra te poitirere umere roa tei rekarekaia e te aronga katoatoa tei aere atu ki taua Uruoaanga Pa Enua o te Apiianga Tu-Atua tei raveia ki Kiev, i Ukarania, i teia Aukute i topa akenei. Kua kite ratou i te tuatua enua i te tupuanga, i te kiteanga i te papetito anga maata roa tei rekotiia o te au Kerititiano mou tei raveia aua! Mei tei totouia maira ia Isaia 54:2, 3, te tupu maata ra te au tangata o te Atua i te au numero kare ona aite anga mei muatangana mairai.
5 Inara, te tu ra etai atu aronga anoano ma te tau i te kauraro ei au tangata no te Patireia o te Atua te tatari ra i to ratou tuatau kia kapiti atu i taua pupu ra. I teia mataiti i topa akenei, e umere te katoa anga o te au tangata e 11,865,765 tei akaputuputu atu i te Akamaara Anga i te matenga o Iesu ra. Te manakonakoia nei, e manganui io ratou ra te ka tau kia rave i te imene anga i te imene Patireia mei tera ngutupa ki tera ngutupa i teia mataiti angaanga nei. Mei teaa ra te akakianga a te reira manakonakoanga i te enemi o te tuatua mou, koia Satani te Tiaporo, i te riri!—Apokalupo 12:12, 17.
6, 7. E akataka mai e i akapeea tetai tangata inangaro ra i te autu anga i te akakore atu i te tamanataanga a te au temoni na te tauturu anga a Iehova ra.
6 Ka tauta a Satani i te arai ia etai atu kia kore e kapiti atu i to ratou au reo ki to taua pupu ra. Ei akatauanga, i Tairani kua kitea e te aronga tutu aere e te tupu ra te numero o te au tangata te makiia ra i te tamanata anga e te au temoni. Inara, e manganui te aronga ngakau tae kua matara mai i te reira na ta Iehova ra tauturu anga. I muri ake i te aravei anga i tetai taunga purepure no te kimi anga manako, kua riro atu tetai tangata ki raro i te mana o te au temoni no te tai ngauru mataiti. Kua tamata aia i te akakore mai iaia i raro i to ratou mana ma te tauturu anga a tetai orometua, inara kare aia i kite i tetai meitaki anga tikai. Kua akamataia e tetai orometua rave angaanga i te au taime ravarai no te Au Kite o Iehova, tetai apii Puka Tapu ma taua tangata ra e kua apii iaia mei te Puka Tapu e ko te reira anake te mataara no te takore atu i te mana o te au temoni ra—kia akono i te kite tika i te tuatua mou, kia akarongo i te Atua ra kia Iehova, e kia pati kiaia na roto i te pure.—1 Korinetia 2:5; Philipi 4:6, 7; 1 Timoteo 2:3, 4.
7 I taua po ra i muri ake i te reira uriuri anga manako, kua moemoea taua tangata ra i tona metua kua mate ke ra, te tamataku maira iaia e me ka kore aia e oki akaou ki te ravenga ei taunga purepure. Kua akamata tona ngutuare tangata i te makiia. I te kore anga e akatika kia tapae ke aia kua rave tamou ua atura taua tangata ra i tana au apiianga i te Puka Tapu e kua akamata oki i te aere ki te au uipaanga. I tetai o aua apiianga ra, kua akataka atura taua painia ra e i etai taime ko etai apinga tei taangaangaia ra i te au peu purepure ra ka rauka i te reira i te akatuera i tetai mataara no te au temoni kia tamanata mai i te au tangata te tauta ra kia matara ke mai i to ratou mana ra. Kua maara mai i taua tangata ra e e inu tana tei raveia ana e ia ei mana purepure. Kua kite aia i teianei e ka tau aia kia titiri ke atu i te reira. I muri ake i tana takore atu anga i te reira, kare aia i tamanata akaouia mai e te au vaerua kikino ra. (Akaaite Ephesia 6:13; Iakobo 4:7, 8.) Te puapinga meitaki ra raua ko tana vaine i teianei i ta raua apii e te putuputu ra te aere ki te au uipaanga no te apiianga Puka Tapu.
8, 9. Eaa etai atu arairai anga tei rauka ra i tetai papaki o te aronga tutu Patireia i te takore atu?
8 Etai atu au arairai anga penei ka tapupu i te tangi anga o te tuatua meitaki. No tetai turanga ngata rava i Kaana i te pae o te moni, kua akamutuia etai aronga angaanga. Kua kake maata te moni no te tutaki kai no te oraanga, kua akariro i te reira ei manamanata tikai no te oko mai i te au apinga anoanoia no te oraanga. Akapeea te au tangata o Iehova i te akono anga ia ratou? Na te irinakianga, kare ia ratou uaorai, mari ra ia Iehova. Ei akatauanga, i tetai ra kua akaruke mai tetai tangata i te tikiro kua popaniia, ki te ngai aravei anga i te opati manga ra. I roto i taua tikiro ra e $200, me kare ko te moni tutaki meangiti ia no te toru marama no te angaanga. No ko mai te reira tikiro i tetai tei oronga ua maira i te reira e kare i akakite i tona ingoa, inara i runga i te pepa takai ko teia tataanga: “I ruti au i taku angaanga, inara kua orongaia mai e Iehova tetai atu angaanga naku. Te akameitaki nei au kiaia e tana Tamaiti, kia Iesu Karaiti. Ei tauturu i te akatotoaanga i te tuatua meitaki o te Patireia i mua ake i te tae mai anga te openga, te tuku atu nei au i taku tauturu meangiti ua.”—Akaaite 2 Korinetia 9:11.
9 Na te aere anga ki te au uipaanga e tauturu i te aronga tei kapiti atu kia matau i te imene anga akapaapaa ia Iehova ra. (Akaaite Salamo 22:22.) E, i te tuanga apatonga o Onotura, e putuputuanga tetai tei tapaia ko El Jordán. Eaa te tuke roa o teia pupu meangiti? Ko to ratou tiratiratu i te aere anga ki te au uipaanga. E 12 o te 19 aronga tutu aere ka aere na roto atu i tetai kauvai atea e tae atu ei ki te au uipaanga i te au epetoma tataki tai katoa ra. Kare teia i te manamanata maata i te tuatau maro ra, no te mea ka rauka ua ia ratou i te aere atu na roto i te kauvai na te takainga ki runga i te au toka ra. Inara, i te tuatau e maata te ua anga, kua taui te au turanga. Ko taua ngai kare ra i raveanga ngata te kauvai no te aere, kua riro ia ei kauvai ririnui i te opara anga i te au apinga ravarai i tona mataara. E raukai ia ratou te takore atu i teia manamanata, kua anoanoia te au taeake tungane e te au tuaine kia riro ei aronga kite i te kau. I mua ake ka aere ei na roto i te kauvai, ka tuku ratou i to ratou kakau no te uipaanga ki roto i te tina (e pa auri) e kua takaiia ki roto i tetai pute paratiki. Kua rave te tangata maroiroi i o ratou ra i te tina ei akapanu e kua taki atu aia i te pupu ki tetai pae o te kauvai ra. Kia tae meitaki atu ki tetai pae, kua tamaro ia ratou e kua akakakau, e kua tae atu ki te Are Uipaanga Patireia ma te mataora e te tu ma te kanapanapa oki!—Salamo 40:9.
E Punanga ei Ngai Nooanga no Tatou
10. Eaa ka raukai ia tatou i te ariu atu kia Iehova ra i te au tuatau no te taitaia ra?
10 Me tei raro ake koe i te tamanata anga kino a te temoni me kare te manako ngakau taitaia ra i etai au tumu ke atura, ka rauka ra kia riro a Iehova ei punanga ketaketa noou. E kapiki iaia na roto i te pure. Te akarongo marie maira aia noatu i te aue koumuumu ua a tona au tangata nei. Kua kite te tata taramo e e tika te reira e kua tata: “Ka tuku mai ana i to taringa kiaku nei; kia ngakoikoi mai koe i te akaora iaku: ei mato etaeta koe noku, ei are akapuanga kia ora au. E mato oki koe noku, e akapuanga oki koe noku: e no toou ra ingoa, e arataki mai koe, e e akakite mai kiaku. E totō koe iaku ki vao i te kupenga i uunaia e ratou noku nei: ko koe oki toku maroiroi.”—Salamo 31:2-4.
11. E akataka mai e eaa i kore ei te akapuanga o Iehova ra i tetai ngai no te tuatau poto ua.
11 Te oronga maira Iehova i te akapuanga kare no te tuatau poto ua mari ra ei punanga kare e rauka kia akakoreia, te ngai e noo ei tatou ma te tinamou. Kare i puapinga kore tana taki anga e te arataki anga i tona au tangata. Ka akariro te mana tu-atua kia puapinga kore te au angaanga kikite katoa a Satani e ta tona uanga oki. (Ephesia 6:10, 11) Ia tatou e irinaki ra ia Iehova ma te ngakau katoa, ka apai ke aia ia tatou mei ta Satani au ereere. (2 Petero 2:9) I nga mataiti e a i topa akenei, kua akatueraia te angaanga tutu aere a te Au Kite o Iehova i roto i etai 35 au enua. Pera katoa oki, i te au ngai o teianei ao te tapupuia ra e te tu oraanga, e te pae o te puapinga, me kare te au tu poritiki te tutu aere anga i te tuatua meitaki, kua aere ke atu te aronga tangata mei te tu mamoe rai ki tetai ngai e itae uaia mai ei ratou. Ko Tiapani tetai o taua au ngai i aere atura ratou.
12. I akapeea tetai painia i Tiapani i te akariro anga ia Iehova ei punanga ketaketa nona ra?
12 I Tiapani e maata te au tangata no te au enua ke ke tei aere atu ki reira no te angaanga, e e manganui te au putuputuanga no te au reo ke ke ra kua akanooia ki reira. Te akatutu maira tetai tupuanga ki tetai taeake i roto i tetai putuputuanga Tiapani, i te tupu maata anga o teia ngai e reo ke ra to reira. Kua anoano aia kia aere atu e angaanga ki tetai ngai e maata atu te umuumuia maira. Inara, e tai ngauru katoa tana au apii Puka Tapu e akono ra i tona ngai. Kua tuatua takatakata atura tetai oa nona e: “Me ka aere koe ki tetai ngai e maata atu te anoanoia maira, ka tau koe kia akono e 20 apii Puka Tapu ki reira!” Kua rauka mai tana ngai angaanga e kua aere atu ki Hiroshima. Inara, i muri ake i nga marama e a, e okotai ua tana apii Puka Tapu. I tetai ra kua aravei atu aia i tetai tangata no Paratiri mai tei tuatua ra i te reo Potukara anake ua. I te mea kare te taeake i kite akapeea me tuatua ei akakite anga manako ki taua tangata ra, kua oko aia i tetai puka apii i te reo Potukara. I muri ake i tana apiianga i etai au tuatua mama ua, kua oki akaou atura aia e aravei i taua tangata ra. I te aravei atu anga te taeake iaia i te reo Potukara, kua poitirere taua tangata e, kua katakata maata mai, e kua akatuera atea mai i te ngutupa e kua pati atu iaia ki roto. Kua akamataia tetai apii Puka Tapu. Kare i roa kua akono te taeake ra e 22 apii Puka Tapu katoa, e 14 i te reo Potukara, e 6 i te reo Paniora, e e 2 i te reo Tiapani!
Tutuanga ma te Irinaki Anga
13. Eaa i kore ei e tau tetai kia tauta i te taakama ia tatou kia tavini atu ia Iehova?
13 Te imene irinaki nei te au tangata o Iehova i te imene Patireia ma te akarongo katoa anga e ko Iehova to ratou akapuanga. (Salamo 31:14) Kare ratou e akama—kare oki a Iehova e taakama mai ia ratou, no te mea ka akatupu rai aia i tana tuatua. (Salamo 31:17) Ka akama rai te Tiaporo e tona au nuku temoni katoa oki. I te mea kua akaueia te au tangata o Iehova kia tutu aere i tetai tuatua kare ra ona tu akama, kare ratou e riro na te taakamaia mai e etai ke ra e rave ei i te tutu anga. Kare te reira i te mataara e akakeu ei a Iehova, me kore tana Tamaiti, i tona au tangata kia akamori Iaia. Me ki anake te ngakau o te au tangata i te akarongo e te arikianga i te meitaki o Iehova ma tona aroa takinga meitaki, ka riro na te tu meitaki o to ratou ngakau e akakeu i to ratou vaa kia tuatua. (Luke 6:45) E no reira, ko te taime ka akapou tatou i te rave i te tutu aere i te au marama tataki tai, e maata atu oki e me ko taua taime ra ko te meitaki ia te ka rauka ia tatou i te rave, e meitaki, kare e akama anga. Kare aina i ariki meitakiia e Iesu raua ko tona Metua te meangiti ua i orongaia ra e te vaine takaua ra?—Luka 21:1-4.
14. Eaa te au tuatua ka rauka ia koe i te tuatua no runga i te angaanga painia? (Akara katoa i te papaanga.)
14 No tetai numero o te aronga tutu aere te tupu ra, kua kapiti ta ratou akamori anga i te tavinianga ei au painia ma te ngakau katoa—e 890,231 i te take i teia mataiti i topa akenei! Me tamouia te tereanga o te mataiti i topa, te akara anga e ka maata atu teia numero i te 1,000,000. Te akakite maira te tupu anga te aru mai nei i akapeea tetai tuaine i Naiteria i tomo ei ki te pupu painia. Kua tata aia: “Iaku kua vaitata ra te akaoti i taku apii teitei, kua aere atu au i te tauturu i te tunuanga kai na te aronga i akaputu mai no te apii painia a te Au Kite o Iehova ra. Kua aravei atu au e rua nga tuaine i reira e pakari atu o raua mataiti i toku tupuna vaine. I toku kite anga e e painia raua tei aere mai ki taua apii ra, kua tamanako au kiaku uaorai, ‘Me ka rauka ia raua te painia, eaa ka kore ei e rauka iaku?’ E no reira i muri ake i te akaoti anga taku apii, kua riro katoa oki au ei painia tamou.”
15. Na teea tu e raukai i te tuatua ua anga, i te akapapa i te mataara no etai ke ra kia akariro ia Iehova ei akapuanga no ratou?
15 Kare e rauka kia painia te katoatoa, inara ka rauka ia ratou te tuatua akakitekite. I Peretiumu kua aere atu tetai tuaine e 82 mataiti ki te toa oko kiko puaka toro. Kua kite atu aia e e taitaia to te vaine a te tangata nana te toa, no te au tu pekapeka i tupu ua ana i te pae poritiki. No reira kua tauru atu te tuaine ra i tetai aenga pepa Eaa te Irinaki o te Au Kite o Iehova? ki roto i nga moni pepa i tana tutaki anga i tana pira. I te oki akaou atu anga te tuaine ra ki taua toa ra, kua aere viviki atura te vaine a te tangata nana ra te toa, e kua ui atu e eaa ta te Puka Tapu tuatua no runga i te toru o te tamaki anga no te ao. Kua apai mai te tuaine ra i te puka nana True Peace and Security—How Can You Find It? I etai ra tokoiti i muri mai, i te tomo atu anga te tuaine ruaine ra ki roto i te toa, kua ui mai taua vaine o te toa ra i etai atu uianga kiaia. Kua maoraora atura te ngakau o te tuaine ra ki teia vaine; kua oronga ua atu aia i tetai apii anga Puka Tapu nana, e kua arikiia mai te reira. I teianei te anoano ra te reira vaine a te tangata nana te toa kia papetitoia aia. Ka akapeea oki te tangata nana te toa? Kua tatau aia i te aenga pepa ra e i teianei te apii katoa ra i te Puka Tapu.
‘E Mea Meitaki Tei Vaioia Ra’
16. Akapeea a Iehova i te akataka anga i tetai mea meitaki no tona au tangata ra?
16 Kare ainei a Iehova i ‘oronga mai i tona aroa takinga-meitaki’ i teia tuatau openga taitaia nei ki te aronga tei irinaki kiaia ra? Mei tetai metua aroa te paruru ra, kua vaio a Iehova i tetai mea meitaki no tana au tamariki i te enua nei. Kua oronga maata maira aia i te tu mataora ki rungao ia ratou i mua i te aroaro o te aronga katoatoa te akara atura, mei ta te tata taramo i tuatua ra: “Te maata oki o te au mea memeitaki naau, i tei vaooia e koe no te aronga i mataku ia koe ra! i tei akonoia no te aronga i irinaki ia koe ra, ki mua i te aroaro o te tamariki a te tangata nei!”—Salamo 31:19, 21.
17-19. I Kaana, eaa te meitaki i tupu mai no te akamana angaia e tetai tangata ruaine tona akaipoipo anga i te ture ra?
17 E no reira, kua riro te au tangata o teianei ao ei kite mata i te tiratiratu o te aronga akamori ia Iehova, e kua umere ratou. Ei akatauanga, i Kaana kua aere atu tetai tangata e 96 mataiti ki te opati no te retita akaipoipo anga e kua pati atu kia retitaia tona akaipoipo anga tei noo kapiti ua ra raua ko tona tokorua ma te tau kore i te ture no te 70 mataiti i teianei. Kua poitirere te opita no te akaipoipo anga e kua ui atu: “Te papu ra ia koe e ko taau ia e anoano na kia rave? I tena mataiti noou?”
18 Kua akataka atura taua tangata ra: “Te anoano nei au kia riro au ei tetai o te Au Kite o Iehova e kia rave i te angaanga puapinga rava atu i mua ake i te openga o teianei ao—te angaanga tutuanga i te tuatua meitaki o te Patireia o te Atua. Ka taki atu teia angaanga ki te ora mutu kore. Te akono nei te Au Kite o Iehova i te ture o te enua nei, kapiti katoa oki te ture no te retita akaipoipo anga. E no reira e rave koe i te retita noku ine.” Kua va ua taua opita ra. E kua rave aia i te retita anga, e kua akaruke mai taua tangata ruaine ra ma te mataora e i teianei kua mana tona akaipoipo anga i te ture.—Akaaite Roma 12:2.
19 I muri ake i te reira, kua tamanako marie taua opita retita akaipoipo anga ra i te au mea tana i akarongorongo ana. “Au Kite o Iehova . . . te angaanga puapinga maata rava . . . te openga o teianei ao . . . Patireia o te Atua . . . ora mutu kore.” I te ekoko anga e eaa te aiteanga o teia au mea i te oraanga o te tangata e 96 mataiti, kua iki aia kia kimi i te Au Kite kia akarakara atu i te reira tumu. Kua ariki aia i tetai apii Puka Tapu i te ngutuare e kua viviki tona kite. I teia tuatau, kua riro taua tangata retita akaipoipo ra ei Kite papetitoia. E no reira me akono ra tatou i te au mea ta Iehova i akaue maira noatu me te manako ra etai ke e e apinga rikiriki ua, penei ka riro mai te reira ei meitaki maata no tatou uaorai e no te aronga katoa oki i kite mata i to tatou tu akono meitaki.—Akaaite 1 Petero 2:12.
20. I Maianama, i akapeea te tiratiratu o tetai tuaine ou i te taki atu anga ki tetai akakitekite anga meitaki?
20 Te akanoo maira te aronga kua ruaine tei ia ratou te tuatua mou i te akaraanga meitaki no te aronga ou i roto i teianei ao tiratiratu kore. Te noo ra tetai tuaine ou mei te reira te tu i Maianama. No roto mai aia i tetai ngutuare tangata putaua e te akaaka e tai ngauru tamariki. Ko te metua tane, e tangata koi moni pakari, e painia tamou aia. I tetai ra i te apii, kua kitea e teia tuaine tetai tapea rima taimana, e kua viviki aia i te kave atu i te reira ki te puapii. I te akaputu anga te pupu i tetai ra mai, kua akakite atu te puapii ki te pupu i reira i akapeea te kitea anga taua tapea rima ra e te akaoki angaia ki te vaine nona ia. I reira kua pati atu aia i taua tuaine ou ra kia tu mai ki mua i te pupu katoa e kia akakite mai e eaa te tumu i rave ei aia i teia i te tapea rima ra, no te kite oki e me ko etai atu tamariki ke penei ka iki kia kore e akaoki i te reira. Kua akakite atura taua tuaine ra e e Kite aia no Iehova e kare tona Atua e akatika i te keia me kare tetai ua atu tu tiratiratu kore. Kua akarongorongo atu te apii katoa i te reira, kua orongaia te tuatau meitaki no to tatou tuaine ou kia tuatua akakitekite atu ki te au puapii e pera katoa oki te aronga apiiia ra.
21. I te irinakianga te aronga ou ra ia Iehova, akapeea te akatupu anga a to ratou tu akono kiaia?
21 I Peretiumu kua tuatua tetai puapii i tetai manako meitaki no te Au Kite o Iehova ki te pupu apii. Kua akara aia i te tu akono o tetai o tana aronga e apii ra, e tuaine ou katoa oki, e kua tuatua aia: “E manako ke toku i teianei no te Au Kite o Iehova. Na te tu akaapa i taki atu iaku kia manako e ka riro ko ratou te aronga e meangiti roa te akakoromaki. Kua akapapuia maira e ratou e ko ratou tei maata roa te akakoromaki anga, ma te kore e tuku ua i ta ratou au kaveinga.” I te au mataiti tataki tai te orongaia ra tetai apinga re na te au puapii ki ta ratou aronga meitaki e apiiia ra. I roto i etai atu au apinga ko te re no te tu akono meitaki. No nga mataiti kapitiia e toru, kua orongaia e teia puapii nga re no nga pupu teitei e toru ki nga tamariki a te Au Kite o Iehova ra. E putuputu ra te reira te tupu ki te aronga tiratiratu te irinaki anga ia Iehova.—Salamo 31:23.
22. Eaa te taopenga autu anga kia Salamo 31 ra, e akapeea ta te reira tauturu ia tatou i te au ra openga o teianei akatereanga o te au mea nei?
22 Te tangitangi maata maira te Salamo 31 ma tetai taopenga autu anga: “Kia matutu, e nana e akamaroiroi mai i to kotou ngakau, ko kotou ravarai, e te aronga e manakonako atu ia Iehova ra.” (Salamo 31:24) No reira, ia tatou e aro atura i te au ra openga no te akatereanga kino o Satani, kare a Iehova e akaruke ia tatou, ka akavaitata rava mairai aia kia tatou e ka tuku mai i tona uaorai mana ki roto ia tatou. E pikikaa kore a Iehova e kare e kore tana. Koia to tatou irinaki anga; koia to tatou punanga.—Maseli 18:10.
Maara Ainei Ia Koe?
◻ Eaa ka raukai ia tatou kia irinaki i te akariro ia Iehova ei akapuanga no tatou?
◻ Eaa te akapapu anga te vai nei e e pupu maroiroi maata te imene nei i te akapaapaa anga Patireia ma te mataku kore?
◻ Eaa ra i raukai ia tatou kia irinaki papu e kare te au tangata o Iehova e akaereereia ki roto i te kupenga a Satani?
◻ Eaa te apinga ta Iehova ra i akataka mai na te aronga te irinaki ra kiaia?
[Tutu i te kapi 12-15]
TE RIPOTI TAVINI ANGA MATAITI 1993 A TE AU KITE O IEHOVA I TEIANEI AO
(Akara i te puka)
[Au Tutu i te kapi 16, 17]
Te aronga irinaki ia Iehova ra kua riro ei pupu maroiroi maata no te tutu anga i te Patireia—4,709,889 katoa ratou!
1. Tenekara
2. Paratiri
3. Tire
4. Porivia